੭. ਅਡ੍ਡਕਰਣਸੁਤ੍ਤਂ

੧੧੮. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਪਸੇਨਦਿ ਕੋਸਲੋ ਭਗਵਨ੍ਤਂ ਏਤਦਵੋਚ – ‘‘ਇਧਾਹਂ, ਭਨ੍ਤੇ, ਅਡ੍ਡਕਰਣੇ [ਅਤ੍ਥਕਰਣੇ (ਸੀ. ਸ੍ਯਾ. ਕਂ. ਪੀ.)] ਨਿਸਿਨ੍ਨੋ ਪਸ੍ਸਾਮਿ ਖਤ੍ਤਿਯਮਹਾਸਾਲੇਪਿ ਬ੍ਰਾਹ੍ਮਣਮਹਾਸਾਲੇਪਿ ਗਹਪਤਿਮਹਾਸਾਲੇਪਿ ਅਡ੍ਢੇ ਮਹਦ੍ਧਨੇ ਮਹਾਭੋਗੇ ਪਹੂਤਜਾਤਰੂਪਰਜਤੇ ਪਹੂਤਵਿਤ੍ਤੂਪਕਰਣੇ ਪਹੂਤਧਨਧਞ੍ਞੇ ਕਾਮਹੇਤੁ ਕਾਮਨਿਦਾਨਂ ਕਾਮਾਧਿਕਰਣਂ ਸਮ੍ਪਜਾਨਮੁਸਾ ਭਾਸਨ੍ਤੇ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਲਂ ਦਾਨਿ ਮੇ ਅਡ੍ਡਕਰਣੇਨ, ਭਦ੍ਰਮੁਖੋ ਦਾਨਿ ਅਡ੍ਡਕਰਣੇਨ ਪਞ੍ਞਾਯਿਸ੍ਸਤੀ’’’ਤਿ.

‘‘(ਏਵਮੇਤਂ, ਮਹਾਰਾਜ, ਏਵਮੇਤਂ ਮਹਾਰਾਜ!) [( ) ਸੀ. ਪੀ. ਪੋਤ੍ਥਕੇਸੁ ਨਤ੍ਥਿ] ਯੇਪਿ ਤੇ, ਮਹਾਰਾਜ, ਖਤ੍ਤਿਯਮਹਾਸਾਲਾ ਬ੍ਰਾਹ੍ਮਣਮਹਾਸਾਲਾ ਗਹਪਤਿਮਹਾਸਾਲਾ ਅਡ੍ਢਾ ਮਹਦ੍ਧਨਾ ਮਹਾਭੋਗਾ ਪਹੂਤਜਾਤਰੂਪਰਜਤਾ ਪਹੂਤਵਿਤ੍ਤੂਪਕਰਣਾ ਪਹੂਤਧਨਧਞ੍ਞਾ ਕਾਮਹੇਤੁ ਕਾਮਨਿਦਾਨਂ ਕਾਮਾਧਿਕਰਣਂ ਸਮ੍ਪਜਾਨਮੁਸਾ ਭਾਸਨ੍ਤਿ; ਤੇਸਂ ਤਂ ਭਵਿਸ੍ਸਤਿ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾ’’ਤਿ. ਇਦਮਵੋਚ…ਪੇ…

‘‘ਸਾਰਤ੍ਤਾ ਕਾਮਭੋਗੇਸੁ, ਗਿਦ੍ਧਾ ਕਾਮੇਸੁ ਮੁਚ੍ਛਿਤਾ;

ਅਤਿਸਾਰਂ ਨ ਬੁਜ੍ਝਨ੍ਤਿ, ਮਚ੍ਛਾ ਖਿਪ੍ਪਂਵ ਓਡ੍ਡਿਤਂ;

ਪਚ੍ਛਾਸਂ ਕਟੁਕਂ ਹੋਤਿ, ਵਿਪਾਕੋ ਹਿਸ੍ਸ ਪਾਪਕੋ’’ਤਿ.