੪. ਨਨ੍ਦਨਸੁਤ੍ਤਂ

੯੫. ਏਕਮਨ੍ਤਂ ਠਿਤੋ ਖੋ ਨਨ੍ਦਨੋ ਦੇਵਪੁਤ੍ਤੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਪੁਚ੍ਛਾਮਿ ਤਂ ਗੋਤਮ ਭੂਰਿਪਞ੍ਞ,

ਅਨਾਵਟਂ ਭਗਵਤੋ ਞਾਣਦਸ੍ਸਨਂ;

ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ,

ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤਿ;

ਕਥਂਵਿਧੋ ਦੁਕ੍ਖਮਤਿਚ੍ਚ ਇਰਿਯਤਿ,

ਕਥਂਵਿਧਂ ਦੇਵਤਾ ਪੂਜਯਨ੍ਤੀ’’ਤਿ.

‘‘ਯੋ ਸੀਲਵਾ ਪਞ੍ਞਵਾ ਭਾਵਿਤਤ੍ਤੋ,

ਸਮਾਹਿਤੋ ਝਾਨਰਤੋ ਸਤੀਮਾ;

ਸਬ੍ਬਸ੍ਸ ਸੋਕਾ ਵਿਗਤਾ ਪਹੀਨਾ,

ਖੀਣਾਸਵੋ ਅਨ੍ਤਿਮਦੇਹਧਾਰੀ.

‘‘ਤਥਾਵਿਧਂ ਸੀਲਵਨ੍ਤਂ ਵਦਨ੍ਤਿ,

ਤਥਾਵਿਧਂ ਪਞ੍ਞਵਨ੍ਤਂ ਵਦਨ੍ਤਿ;

ਤਥਾਵਿਧੋ ਦੁਕ੍ਖਮਤਿਚ੍ਚ ਇਰਿਯਤਿ,

ਤਥਾਵਿਧਂ ਦੇਵਤਾ ਪੂਜਯਨ੍ਤੀ’’ਤਿ.