੨. ਅਨਾਥਪਿਣ੍ਡਿਕਵਗ੍ਗੋ

੧. ਚਨ੍ਦਿਮਸਸੁਤ੍ਤਂ

੯੨. ਸਾਵਤ੍ਥਿਨਿਦਾਨਂ. ਅਥ ਖੋ ਚਨ੍ਦਿਮਸੋ [ਚਨ੍ਦਿਮਾਸੋ (ਕ.)] ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਚਨ੍ਦਿਮਸੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਤੇ ਹਿ ਸੋਤ੍ਥਿਂ ਗਮਿਸ੍ਸਨ੍ਤਿ, ਕਚ੍ਛੇ ਵਾਮਕਸੇ ਮਗਾ;

ਝਾਨਾਨਿ ਉਪਸਮ੍ਪਜ੍ਜ, ਏਕੋਦਿ ਨਿਪਕਾ ਸਤਾ’’ਤਿ.

‘‘ਤੇ ਹਿ ਪਾਰਂ ਗਮਿਸ੍ਸਨ੍ਤਿ, ਛੇਤ੍ਵਾ ਜਾਲਂਵ ਅਮ੍ਬੁਜੋ;

ਝਾਨਾਨਿ ਉਪਸਮ੍ਪਜ੍ਜ, ਅਪ੍ਪਮਤ੍ਤਾ ਰਣਞ੍ਜਹਾ’’ਤਿ.

੨. ਵੇਣ੍ਡੁਸੁਤ੍ਤਂ

੯੩. ਏਕਮਨ੍ਤਂ ਠਿਤੋ ਖੋ ਵੇਣ੍ਡੁ [ਵੇਣ੍ਹੁ (ਸੀ.)] ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਸੁਖਿਤਾਵ ਤੇ [ਸੁਖਿਤਾ ਵਤ ਤੇ (ਸੀ. ਸ੍ਯਾ. ਕਂ.)] ਮਨੁਜਾ, ਸੁਗਤਂ ਪਯਿਰੁਪਾਸਿਯ;

ਯੁਞ੍ਜਂ [ਯੁਜ੍ਜ (ਸੀ.), ਯੁਞ੍ਜ (ਸ੍ਯਾ. ਕਂ. ਪੀ.)] ਗੋਤਮਸਾਸਨੇ, ਅਪ੍ਪਮਤ੍ਤਾ ਨੁ ਸਿਕ੍ਖਰੇ’’ਤਿ.

‘‘ਯੇ ਮੇ ਪਵੁਤ੍ਤੇ ਸਿਟ੍ਠਿਪਦੇ [ਸਤ੍ਥਿਪਦੇ (ਸੀ. ਸ੍ਯਾ. ਕਂ. ਪੀ.)] (ਵੇਣ੍ਡੂਤਿ ਭਗਵਾ),

ਅਨੁਸਿਕ੍ਖਨ੍ਤਿ ਝਾਯਿਨੋ;

ਕਾਲੇ ਤੇ ਅਪ੍ਪਮਜ੍ਜਨ੍ਤਾ,

ਨ ਮਚ੍ਚੁਵਸਗਾ ਸਿਯੁ’’ਨ੍ਤਿ.

੩. ਦੀਘਲਟ੍ਠਿਸੁਤ੍ਤਂ

੯੪. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਅਥ ਖੋ ਦੀਘਲਟ੍ਠਿ ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵੇਲ਼ੁਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਦੀਘਲਟ੍ਠਿ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਭਿਕ੍ਖੁ ਸਿਯਾ ਝਾਯੀ ਵਿਮੁਤ੍ਤਚਿਤ੍ਤੋ,

ਆਕਙ੍ਖੇ ਚੇ ਹਦਯਸ੍ਸਾਨੁਪਤ੍ਤਿਂ;

ਲੋਕਸ੍ਸ ਞਤ੍ਵਾ ਉਦਯਬ੍ਬਯਞ੍ਚ,

ਸੁਚੇਤਸੋ ਅਨਿਸ੍ਸਿਤੋ ਤਦਾਨਿਸਂਸੋ’’ਤਿ.

੪. ਨਨ੍ਦਨਸੁਤ੍ਤਂ

੯੫. ਏਕਮਨ੍ਤਂ ਠਿਤੋ ਖੋ ਨਨ੍ਦਨੋ ਦੇਵਪੁਤ੍ਤੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਪੁਚ੍ਛਾਮਿ ਤਂ ਗੋਤਮ ਭੂਰਿਪਞ੍ਞ,

ਅਨਾਵਟਂ ਭਗਵਤੋ ਞਾਣਦਸ੍ਸਨਂ;

ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ,

ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤਿ;

ਕਥਂਵਿਧੋ ਦੁਕ੍ਖਮਤਿਚ੍ਚ ਇਰਿਯਤਿ,

ਕਥਂਵਿਧਂ ਦੇਵਤਾ ਪੂਜਯਨ੍ਤੀ’’ਤਿ.

‘‘ਯੋ ਸੀਲਵਾ ਪਞ੍ਞਵਾ ਭਾਵਿਤਤ੍ਤੋ,

ਸਮਾਹਿਤੋ ਝਾਨਰਤੋ ਸਤੀਮਾ;

ਸਬ੍ਬਸ੍ਸ ਸੋਕਾ ਵਿਗਤਾ ਪਹੀਨਾ,

ਖੀਣਾਸਵੋ ਅਨ੍ਤਿਮਦੇਹਧਾਰੀ.

‘‘ਤਥਾਵਿਧਂ ਸੀਲਵਨ੍ਤਂ ਵਦਨ੍ਤਿ,

ਤਥਾਵਿਧਂ ਪਞ੍ਞਵਨ੍ਤਂ ਵਦਨ੍ਤਿ;

ਤਥਾਵਿਧੋ ਦੁਕ੍ਖਮਤਿਚ੍ਚ ਇਰਿਯਤਿ,

ਤਥਾਵਿਧਂ ਦੇਵਤਾ ਪੂਜਯਨ੍ਤੀ’’ਤਿ.

੫. ਚਨ੍ਦਨਸੁਤ੍ਤਂ

੯੬. ਏਕਮਨ੍ਤਂ ਠਿਤੋ ਖੋ ਚਨ੍ਦਨੋ ਦੇਵਪੁਤ੍ਤੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਕਥਂਸੁ [ਕੋਸੁਧ (ਸੀ.)] ਤਰਤਿ ਓਘਂ, ਰਤ੍ਤਿਨ੍ਦਿਵਮਤਨ੍ਦਿਤੋ;

ਅਪ੍ਪਤਿਟ੍ਠੇ ਅਨਾਲਮ੍ਬੇ, ਕੋ ਗਮ੍ਭੀਰੇ ਨ ਸੀਦਤੀ’’ਤਿ.

‘‘ਸਬ੍ਬਦਾ ਸੀਲਸਮ੍ਪਨ੍ਨੋ, ਪਞ੍ਞਵਾ ਸੁਸਮਾਹਿਤੋ;

ਆਰਦ੍ਧਵੀਰਿਯੋ ਪਹਿਤਤ੍ਤੋ, ਓਘਂ ਤਰਤਿ ਦੁਤ੍ਤਰਂ.

‘‘ਵਿਰਤੋ ਕਾਮਸਞ੍ਞਾਯ, ਰੂਪਸਂਯੋਜਨਾਤਿਗੋ;

ਨਨ੍ਦੀਰਾਗਪਰਿਕ੍ਖੀਣੋ, ਸੋ ਗਮ੍ਭੀਰੇ ਨ ਸੀਦਤੀ’’ਤਿ.

੬. ਵਾਸੁਦਤ੍ਤਸੁਤ੍ਤਂ

੯੭. ਏਕਮਨ੍ਤਂ ਠਿਤੋ ਖੋ ਵਾਸੁਦਤ੍ਤੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ [ਡਯ੍ਹਮਾਨੇਵ (ਸਬ੍ਬਤ੍ਥ)] ਮਤ੍ਥਕੇ;

ਕਾਮਰਾਗਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ ਮਤ੍ਥਕੇ;

ਸਕ੍ਕਾਯਦਿਟ੍ਠਿਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

੭. ਸੁਬ੍ਰਹ੍ਮਸੁਤ੍ਤਂ

੯੮. ਏਕਮਨ੍ਤਂ ਠਿਤੋ ਖੋ ਸੁਬ੍ਰਹ੍ਮਾ ਦੇਵਪੁਤ੍ਤੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਨਿਚ੍ਚਂ ਉਤ੍ਰਸ੍ਤਮਿਦਂ ਚਿਤ੍ਤਂ, ਨਿਚ੍ਚਂ ਉਬ੍ਬਿਗ੍ਗਮਿਦਂ [ਉਬ੍ਬਿਗ੍ਗਿਦਂ (ਮਹਾਸਤਿਪਟ੍ਠਾਨਸੁਤ੍ਤਵਣ੍ਣਨਾਯਂ)] ਮਨੋ;

ਅਨੁਪ੍ਪਨ੍ਨੇਸੁ ਕਿਚ੍ਛੇਸੁ [ਕਿਚ੍ਚੇਸੁ (ਬਹੂਸੁ)], ਅਥੋ ਉਪ੍ਪਤਿਤੇਸੁ ਚ;

ਸਚੇ ਅਤ੍ਥਿ ਅਨੁਤ੍ਰਸ੍ਤਂ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

‘‘ਨਾਞ੍ਞਤ੍ਰ ਬੋਜ੍ਝਾ ਤਪਸਾ [ਬੋਜ੍ਝਙ੍ਗਤਪਸਾ (ਸੀ. ਸ੍ਯਾ. ਕਂ. ਪੀ.)], ਨਾਞ੍ਞਤ੍ਰਿਨ੍ਦ੍ਰਿਯਸਂਵਰਾ;

ਨਾਞ੍ਞਤ੍ਰ ਸਬ੍ਬਨਿਸ੍ਸਗ੍ਗਾ, ਸੋਤ੍ਥਿਂ ਪਸ੍ਸਾਮਿ ਪਾਣਿਨ’’ਨ੍ਤਿ.

‘‘ਇਦਮਵੋਚ…ਪੇ… ਤਤ੍ਥੇਵਨ੍ਤਰਧਾਯੀ’’ਤਿ.

੮. ਕਕੁਧਸੁਤ੍ਤਂ

੯੯. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਕੇਤੇ ਵਿਹਰਤਿ ਅਞ੍ਜਨਵਨੇ ਮਿਗਦਾਯੇ. ਅਥ ਖੋ ਕਕੁਧੋ ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਅਞ੍ਜਨਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਕਕੁਧੋ ਦੇਵਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਨਨ੍ਦਸਿ, ਸਮਣਾ’’ਤਿ? ‘‘ਕਿਂ ਲਦ੍ਧਾ, ਆਵੁਸੋ’’ਤਿ? ‘‘ਤੇਨ ਹਿ, ਸਮਣ, ਸੋਚਸੀ’’ਤਿ? ‘‘ਕਿਂ ਜੀਯਿਤ੍ਥ, ਆਵੁਸੋ’’ਤਿ? ‘‘ਤੇਨ ਹਿ, ਸਮਣ, ਨੇਵ ਨਨ੍ਦਸਿ ਨ ਚ [ਨੇਵ (ਸੀ. ਸ੍ਯਾ. ਕਂ.)] ਸੋਚਸੀ’’ਤਿ? ‘‘ਏਵਮਾਵੁਸੋ’’ਤਿ.

‘‘ਕਚ੍ਚਿ ਤ੍ਵਂ ਅਨਘੋ [ਅਨਿਘੋ (ਸਬ੍ਬਤ੍ਥ)] ਭਿਕ੍ਖੁ, ਕਚ੍ਚਿ ਨਨ੍ਦੀ [ਨਨ੍ਦਿ (ਸੀ. ਸ੍ਯਾ. ਕਂ.)] ਨ ਵਿਜ੍ਜਤਿ;

ਕਚ੍ਚਿ ਤਂ ਏਕਮਾਸੀਨਂ, ਅਰਤੀ ਨਾਭਿਕੀਰਤੀ’’ਤਿ.

‘‘ਅਨਘੋ ਵੇ ਅਹਂ ਯਕ੍ਖ, ਅਥੋ ਨਨ੍ਦੀ ਨ ਵਿਜ੍ਜਤਿ;

ਅਥੋ ਮਂ ਏਕਮਾਸੀਨਂ, ਅਰਤੀ ਨਾਭਿਕੀਰਤੀ’’ਤਿ.

‘‘ਕਥਂ ਤ੍ਵਂ ਅਨਘੋ ਭਿਕ੍ਖੁ, ਕਥਂ ਨਨ੍ਦੀ ਨ ਵਿਜ੍ਜਤਿ;

ਕਥਂ ਤਂ ਏਕਮਾਸੀਨਂ, ਅਰਤੀ ਨਾਭਿਕੀਰਤੀ’’ਤਿ.

‘‘ਅਘਜਾਤਸ੍ਸ ਵੇ ਨਨ੍ਦੀ, ਨਨ੍ਦੀਜਾਤਸ੍ਸ ਵੇ ਅਘਂ;

ਅਨਨ੍ਦੀ ਅਨਘੋ ਭਿਕ੍ਖੁ, ਏਵਂ ਜਾਨਾਹਿ ਆਵੁਸੋ’’ਤਿ.

‘‘ਚਿਰਸ੍ਸਂ ਵਤ ਪਸ੍ਸਾਮਿ, ਬ੍ਰਾਹ੍ਮਣਂ ਪਰਿਨਿਬ੍ਬੁਤਂ;

ਅਨਨ੍ਦਿਂ ਅਨਘਂ ਭਿਕ੍ਖੁਂ, ਤਿਣ੍ਣਂ ਲੋਕੇ ਵਿਸਤ੍ਤਿਕ’’ਨ੍ਤਿ.

੯. ਉਤ੍ਤਰਸੁਤ੍ਤਂ

੧੦੦. ਰਾਜਗਹਨਿਦਾਨਂ. ਏਕਮਨ੍ਤਂ ਠਿਤੋ ਖੋ ਉਤ੍ਤਰੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ,

ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਪੁਞ੍ਞਾਨਿ ਕਯਿਰਾਥ ਸੁਖਾਵਹਾਨੀ’’ਤਿ.

‘‘ਉਪਨੀਯਤਿ ਜੀਵਿਤਮਪ੍ਪਮਾਯੁ,

ਜਰੂਪਨੀਤਸ੍ਸ ਨ ਸਨ੍ਤਿ ਤਾਣਾ;

ਏਤਂ ਭਯਂ ਮਰਣੇ ਪੇਕ੍ਖਮਾਨੋ,

ਲੋਕਾਮਿਸਂ ਪਜਹੇ ਸਨ੍ਤਿਪੇਕ੍ਖੋ’’ਤਿ.

੧੦. ਅਨਾਥਪਿਣ੍ਡਿਕਸੁਤ੍ਤਂ

੧੦੧. ਏਕਮਨ੍ਤਂ ਠਿਤੋ ਖੋ ਅਨਾਥਪਿਣ੍ਡਿਕੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਾ ਗਾਥਾਯੋ ਅਭਾਸਿ –

‘‘ਇਦਞ੍ਹਿ ਤਂ ਜੇਤਵਨਂ, ਇਸਿਸਙ੍ਘਨਿਸੇਵਿਤਂ;

ਆਵੁਤ੍ਥਂ ਧਮ੍ਮਰਾਜੇਨ, ਪੀਤਿਸਞ੍ਜਨਨਂ ਮਮ.

‘‘ਕਮ੍ਮਂ ਵਿਜ੍ਜਾ ਚ ਧਮ੍ਮੋ ਚ, ਸੀਲਂ ਜੀਵਿਤਮੁਤ੍ਤਮਂ;

ਏਤੇਨ ਮਚ੍ਚਾ ਸੁਜ੍ਝਨ੍ਤਿ, ਨ ਗੋਤ੍ਤੇਨ ਧਨੇਨ ਵਾ.

‘‘ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;

ਯੋਨਿਸੋ ਵਿਚਿਨੇ ਧਮ੍ਮਂ, ਏਵਂ ਤਤ੍ਥ ਵਿਸੁਜ੍ਝਤਿ.

‘‘ਸਾਰਿਪੁਤ੍ਤੋਵ ਪਞ੍ਞਾਯ, ਸੀਲੇਨ ਉਪਸਮੇਨ ਚ;

ਯੋਪਿ ਪਾਰਙ੍ਗਤੋ ਭਿਕ੍ਖੁ, ਏਤਾਵਪਰਮੋ ਸਿਯਾ’’ਤਿ.

ਇਦਮਵੋਚ ਅਨਾਥਪਿਣ੍ਡਿਕੋ ਦੇਵਪੁਤ੍ਤੋ. ਇਦਂ ਵਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯੀਤਿ.

ਅਥ ਖੋ ਭਗਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਭਿਕ੍ਖੂ ਆਮਨ੍ਤੇਸਿ – ‘‘ਇਮਂ, ਭਿਕ੍ਖਵੇ, ਰਤ੍ਤਿਂ ਅਞ੍ਞਤਰੋ ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ, ਭਿਕ੍ਖਵੇ, ਸੋ ਦੇਵਪੁਤ੍ਤੋ ਮਮ ਸਨ੍ਤਿਕੇ ਇਮਾ ਗਾਥਾਯੋ ਅਭਾਸਿ –

‘‘ਇਦਞ੍ਹਿ ਤਂ ਜੇਤਵਨਂ, ਇਸਿਸਙ੍ਘਨਿਸੇਵਿਤਂ;

ਆਵੁਤ੍ਥਂ ਧਮ੍ਮਰਾਜੇਨ, ਪੀਤਿਸਞ੍ਜਨਨਂ ਮਮ.

‘‘ਕਮ੍ਮਂ ਵਿਜ੍ਜਾ ਚ ਧਮ੍ਮੋ ਚ, ਸੀਲਂ ਜੀਵਿਤਮੁਤ੍ਤਮਂ;

ਏਤੇਨ ਮਚ੍ਚਾ ਸੁਜ੍ਝਨ੍ਤਿ, ਨ ਗੋਤ੍ਤੇਨ ਧਨੇਨ ਵਾ.

‘‘ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ;

ਯੋਨਿਸੋ ਵਿਚਿਨੇ ਧਮ੍ਮਂ, ਏਵਂ ਤਤ੍ਥ ਵਿਸੁਜ੍ਝਤਿ.

‘‘ਸਾਰਿਪੁਤ੍ਤੋਵ ਪਞ੍ਞਾਯ, ਸੀਲੇਨ ਉਪਸਮੇਨ ਚ;

ਯੋਪਿ ਪਾਰਙ੍ਗਤੋ ਭਿਕ੍ਖੁ, ਏਤਾਵਪਰਮੋ ਸਿਯਾ’’ਤਿ.

‘‘ਇਦਮਵੋਚ, ਭਿਕ੍ਖਵੇ, ਸੋ ਦੇਵਪੁਤ੍ਤੋ. ਇਦਂ ਵਤ੍ਵਾ ਮਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯੀ’’ਤਿ.

ਏਵਂ ਵੁਤ੍ਤੇ, ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਸੋ ਹਿ ਨੂਨ, ਭਨ੍ਤੇ, ਅਨਾਥਪਿਣ੍ਡਿਕੋ ਦੇਵਪੁਤ੍ਤੋ ਭਵਿਸ੍ਸਤਿ. ਅਨਾਥਪਿਣ੍ਡਿਕੋ ਗਹਪਤਿ ਆਯਸ੍ਮਨ੍ਤੇ ਸਾਰਿਪੁਤ੍ਤੇ ਅਭਿਪ੍ਪਸਨ੍ਨੋ ਅਹੋਸੀ’’ਤਿ. ‘‘ਸਾਧੁ ਸਾਧੁ, ਆਨਨ੍ਦ, ਯਾਵਤਕਂ ਖੋ, ਆਨਨ੍ਦ, ਤਕ੍ਕਾਯ ਪਤ੍ਤਬ੍ਬਂ ਅਨੁਪ੍ਪਤ੍ਤਂ ਤਂ ਤਯਾ. ਅਨਾਥਪਿਣ੍ਡਿਕੋ ਹਿ ਸੋ, ਆਨਨ੍ਦ, ਦੇਵਪੁਤ੍ਤੋ’’ਤਿ.

ਅਨਾਥਪਿਣ੍ਡਿਕਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਚਨ੍ਦਿਮਸੋ [ਚਨ੍ਦਿਮਾਸੋ (ਪੀ. ਕ.)] ਚ ਵੇਣ੍ਡੁ [ਵੇਣ੍ਹੁ (ਸੀ. ਕ.)] ਚ, ਦੀਘਲਟ੍ਠਿ ਚ ਨਨ੍ਦਨੋ;

ਚਨ੍ਦਨੋ ਵਾਸੁਦਤ੍ਤੋ ਚ, ਸੁਬ੍ਰਹ੍ਮਾ ਕਕੁਧੇਨ ਚ;

ਉਤ੍ਤਰੋ ਨਵਮੋ ਵੁਤ੍ਤੋ, ਦਸਮੋ ਅਨਾਥਪਿਣ੍ਡਿਕੋਤਿ.