੧. ਪਠਮਵਗ੍ਗੋ

੧. ਪਠਮਕਸ੍ਸਪਸੁਤ੍ਤਂ

੮੨. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਕਸ੍ਸਪੋ ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਕਸ੍ਸਪੋ ਦੇਵਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਭਿਕ੍ਖੁਂ ਭਗਵਾ ਪਕਾਸੇਸਿ, ਨੋ ਚ ਭਿਕ੍ਖੁਨੋ ਅਨੁਸਾਸ’’ਨ੍ਤਿ. ‘‘ਤੇਨ ਹਿ ਕਸ੍ਸਪ, ਤਞ੍ਞੇਵੇਤ੍ਥ ਪਟਿਭਾਤੂ’’ਤਿ.

‘‘ਸੁਭਾਸਿਤਸ੍ਸ ਸਿਕ੍ਖੇਥ, ਸਮਣੂਪਾਸਨਸ੍ਸ ਚ;

ਏਕਾਸਨਸ੍ਸ ਚ ਰਹੋ, ਚਿਤ੍ਤਵੂਪਸਮਸ੍ਸ ਚਾ’’ਤਿ.

ਇਦਮਵੋਚ ਕਸ੍ਸਪੋ ਦੇਵਪੁਤ੍ਤੋ; ਸਮਨੁਞ੍ਞੋ ਸਤ੍ਥਾ ਅਹੋਸਿ. ਅਥ ਖੋ ਕਸ੍ਸਪੋ ਦੇਵਪੁਤ੍ਤੋ ‘‘ਸਮਨੁਞ੍ਞੋ ਮੇ ਸਤ੍ਥਾ’’ਤਿ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯੀਤਿ.

੨. ਦੁਤਿਯਕਸ੍ਸਪਸੁਤ੍ਤਂ

੮੩. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤੋ ਖੋ ਕਸ੍ਸਪੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਭਿਕ੍ਖੁ ਸਿਯਾ ਝਾਯੀ ਵਿਮੁਤ੍ਤਚਿਤ੍ਤੋ,

ਆਕਙ੍ਖੇ ਚੇ ਹਦਯਸ੍ਸਾਨੁਪਤ੍ਤਿਂ;

ਲੋਕਸ੍ਸ ਞਤ੍ਵਾ ਉਦਯਬ੍ਬਯਞ੍ਚ,

ਸੁਚੇਤਸੋ ਅਨਿਸ੍ਸਿਤੋ ਤਦਾਨਿਸਂਸੋ’’ਤਿ.

੩. ਮਾਘਸੁਤ੍ਤਂ

੮੪. ਸਾਵਤ੍ਥਿਨਿਦਾਨਂ. ਅਥ ਖੋ ਮਾਘੋ ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਮਾਘੋ ਦੇਵਪੁਤ੍ਤੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਕਿਂਸੁ ਛੇਤ੍ਵਾ ਸੁਖਂ ਸੇਤਿ, ਕਿਂਸੁ ਛੇਤ੍ਵਾ ਨ ਸੋਚਤਿ;

ਕਿਸ੍ਸਸ੍ਸੁ ਏਕਧਮ੍ਮਸ੍ਸ, ਵਧਂ ਰੋਚੇਸਿ ਗੋਤਮਾ’’ਤਿ.

‘‘ਕੋਧਂ ਛੇਤ੍ਵਾ ਸੁਖਂ ਸੇਤਿ, ਕੋਧਂ ਛੇਤ੍ਵਾ ਨ ਸੋਚਤਿ;

ਕੋਧਸ੍ਸ ਵਿਸਮੂਲਸ੍ਸ, ਮਧੁਰਗ੍ਗਸ੍ਸ ਵਤ੍ਰਭੂ;

ਵਧਂ ਅਰਿਯਾ ਪਸਂਸਨ੍ਤਿ, ਤਞ੍ਹਿ ਛੇਤ੍ਵਾ ਨ ਸੋਚਤੀ’’ਤਿ.

੪. ਮਾਗਧਸੁਤ੍ਤਂ

੮੫. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤੋ ਖੋ ਮਾਗਧੋ ਦੇਵਪੁਤ੍ਤੋ ਭਗਵਨ੍ਤਂ ਗਾਥਾਯ ਅਜ੍ਝਭਾਸਿ –

‘‘ਕਤਿ ਲੋਕਸ੍ਮਿਂ ਪਜ੍ਜੋਤਾ, ਯੇਹਿ ਲੋਕੋ ਪਕਾਸਤਿ;

ਭਵਨ੍ਤਂ ਪੁਟ੍ਠੁਮਾਗਮ੍ਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

‘‘ਚਤ੍ਤਾਰੋ ਲੋਕੇ ਪਜ੍ਜੋਤਾ, ਪਞ੍ਚਮੇਤ੍ਥ ਨ ਵਿਜ੍ਜਤਿ;

ਦਿਵਾ ਤਪਤਿ ਆਦਿਚ੍ਚੋ, ਰਤ੍ਤਿਮਾਭਾਤਿ ਚਨ੍ਦਿਮਾ.

‘‘ਅਥ ਅਗ੍ਗਿ ਦਿਵਾਰਤ੍ਤਿਂ, ਤਤ੍ਥ ਤਤ੍ਥ ਪਕਾਸਤਿ;

ਸਮ੍ਬੁਦ੍ਧੋ ਤਪਤਂ ਸੇਟ੍ਠੋ, ਏਸਾ ਆਭਾ ਅਨੁਤ੍ਤਰਾ’’ਤਿ.

੫. ਦਾਮਲਿਸੁਤ੍ਤਂ

੮੬. ਸਾਵਤ੍ਥਿਨਿਦਾਨਂ. ਅਥ ਖੋ ਦਾਮਲਿ ਦੇਵਪੁਤ੍ਤੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਦਾਮਲਿ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਕਰਣੀਯਮੇਤਂ ਬ੍ਰਾਹ੍ਮਣੇਨ, ਪਧਾਨਂ ਅਕਿਲਾਸੁਨਾ;

ਕਾਮਾਨਂ ਵਿਪ੍ਪਹਾਨੇਨ, ਨ ਤੇਨਾਸੀਸਤੇ ਭਵ’’ਨ੍ਤਿ.

‘‘ਨਤ੍ਥਿ ਕਿਚ੍ਚਂ ਬ੍ਰਾਹ੍ਮਣਸ੍ਸ (ਦਾਮਲੀਤਿ ਭਗਵਾ),

ਕਤਕਿਚ੍ਚੋ ਹਿ ਬ੍ਰਾਹ੍ਮਣੋ.

‘‘ਯਾਵ ਨ ਗਾਧਂ ਲਭਤਿ ਨਦੀਸੁ,

ਆਯੂਹਤਿ ਸਬ੍ਬਗਤ੍ਤੇਭਿ ਜਨ੍ਤੁ;

ਗਾਧਞ੍ਚ ਲਦ੍ਧਾਨ ਥਲੇ ਠਿਤੋ ਯੋ,

ਨਾਯੂਹਤੀ ਪਾਰਗਤੋ ਹਿ ਸੋਵ [ਸੋਤਿ (ਸੀ. ਪੀ. ਕ.), ਹੋਤਿ (ਸ੍ਯਾ. ਕਂ.), ਸੋ (?)].

‘‘ਏਸੂਪਮਾ ਦਾਮਲਿ ਬ੍ਰਾਹ੍ਮਣਸ੍ਸ,

ਖੀਣਾਸਵਸ੍ਸ ਨਿਪਕਸ੍ਸ ਝਾਯਿਨੋ;

ਪਪ੍ਪੁਯ੍ਯ ਜਾਤਿਮਰਣਸ੍ਸ ਅਨ੍ਤਂ,

ਨਾਯੂਹਤੀ ਪਾਰਗਤੋ ਹਿ ਸੋ’’ਤਿ [ਹੋਤੀਤਿ (ਸ੍ਯਾ. ਕਂ.)].

੬. ਕਾਮਦਸੁਤ੍ਤਂ

੮੭. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤੋ ਖੋ ਕਾਮਦੋ ਦੇਵਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਦੁਕ੍ਕਰਂ ਭਗਵਾ, ਸੁਦੁਕ੍ਕਰਂ ਭਗਵਾ’’ਤਿ.

‘‘ਦੁਕ੍ਕਰਂ ਵਾਪਿ ਕਰੋਨ੍ਤਿ (ਕਾਮਦਾਤਿ ਭਗਵਾ),

ਸੇਖਾ ਸੀਲਸਮਾਹਿਤਾ;

ਠਿਤਤ੍ਤਾ ਅਨਗਾਰਿਯੁਪੇਤਸ੍ਸ,

ਤੁਟ੍ਠਿ ਹੋਤਿ ਸੁਖਾਵਹਾ’’ਤਿ.

‘‘ਦੁਲ੍ਲਭਾ ਭਗਵਾ ਯਦਿਦਂ ਤੁਟ੍ਠੀ’’ਤਿ.

‘‘ਦੁਲ੍ਲਭਂ ਵਾਪਿ ਲਭਨ੍ਤਿ (ਕਾਮਦਾਤਿ ਭਗਵਾ),

ਚਿਤ੍ਤਵੂਪਸਮੇ ਰਤਾ;

ਯੇਸਂ ਦਿਵਾ ਚ ਰਤ੍ਤੋ ਚ,

ਭਾਵਨਾਯ ਰਤੋ ਮਨੋ’’ਤਿ.

‘‘ਦੁਸ੍ਸਮਾਦਹਂ ਭਗਵਾ ਯਦਿਦਂ ਚਿਤ੍ਤ’’ਨ੍ਤਿ.

‘‘ਦੁਸ੍ਸਮਾਦਹਂ ਵਾਪਿ ਸਮਾਦਹਨ੍ਤਿ (ਕਾਮਦਾਤਿ ਭਗਵਾ),

ਇਨ੍ਦ੍ਰਿਯੂਪਸਮੇ ਰਤਾ;

ਤੇ ਛੇਤ੍ਵਾ ਮਚ੍ਚੁਨੋ ਜਾਲਂ,

ਅਰਿਯਾ ਗਚ੍ਛਨ੍ਤਿ ਕਾਮਦਾ’’ਤਿ.

‘‘ਦੁਗ੍ਗਮੋ ਭਗਵਾ ਵਿਸਮੋ ਮਗ੍ਗੋ’’ਤਿ.

‘‘ਦੁਗ੍ਗਮੇ ਵਿਸਮੇ ਵਾਪਿ, ਅਰਿਯਾ ਗਚ੍ਛਨ੍ਤਿ ਕਾਮਦ;

ਅਨਰਿਯਾ ਵਿਸਮੇ ਮਗ੍ਗੇ, ਪਪਤਨ੍ਤਿ ਅਵਂਸਿਰਾ;

ਅਰਿਯਾਨਂ ਸਮੋ ਮਗ੍ਗੋ, ਅਰਿਯਾ ਹਿ ਵਿਸਮੇ ਸਮਾ’’ਤਿ.

੭. ਪਞ੍ਚਾਲਚਣ੍ਡਸੁਤ੍ਤਂ

੮੮. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤੋ ਖੋ ਪਞ੍ਚਾਲਚਣ੍ਡੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਸਮ੍ਬਾਧੇ ਵਤ ਓਕਾਸਂ, ਅਵਿਨ੍ਦਿ ਭੂਰਿਮੇਧਸੋ;

ਯੋ ਝਾਨਮਬੁਜ੍ਝਿ [ਝਾਨਮਬੁਧਾ (ਕ. ਸੀ.), ਝਾਨਮਬੁਦ੍ਧਿ (ਸ੍ਯਾ. ਕਂ. ਪੀ. ਕ.)] ਬੁਦ੍ਧੋ, ਪਟਿਲੀਨਨਿਸਭੋ ਮੁਨੀ’’ਤਿ.

‘‘ਸਮ੍ਬਾਧੇ ਵਾਪਿ ਵਿਨ੍ਦਨ੍ਤਿ (ਪਞ੍ਚਾਲਚਣ੍ਡਾਤਿ ਭਗਵਾ),

ਧਮ੍ਮਂ ਨਿਬ੍ਬਾਨਪਤ੍ਤਿਯਾ;

ਯੇ ਸਤਿਂ ਪਚ੍ਚਲਤ੍ਥਂਸੁ,

ਸਮ੍ਮਾ ਤੇ ਸੁਸਮਾਹਿਤਾ’’ਤਿ.

੮. ਤਾਯਨਸੁਤ੍ਤਂ

੮੯. ਸਾਵਤ੍ਥਿਨਿਦਾਨਂ. ਅਥ ਖੋ ਤਾਯਨੋ ਦੇਵਪੁਤ੍ਤੋ ਪੁਰਾਣਤਿਤ੍ਥਕਰੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਤਾਯਨੋ ਦੇਵਪੁਤ੍ਤੋ ਭਗਵਤੋ ਸਨ੍ਤਿਕੇ ਇਮਾ ਗਾਥਾਯੋ ਅਭਾਸਿ –

‘‘ਛਿਨ੍ਦ ਸੋਤਂ ਪਰਕ੍ਕਮ੍ਮ, ਕਾਮੇ ਪਨੁਦ ਬ੍ਰਾਹ੍ਮਣ;

ਨਪ੍ਪਹਾਯ ਮੁਨੀ ਕਾਮੇ, ਨੇਕਤ੍ਤਮੁਪਪਜ੍ਜਤਿ.

‘‘ਕਯਿਰਾ ਚੇ ਕਯਿਰਾਥੇਨਂ, ਦਲ਼੍ਹਮੇਨਂ ਪਰਕ੍ਕਮੇ;

ਸਿਥਿਲੋ ਹਿ ਪਰਿਬ੍ਬਾਜੋ, ਭਿਯ੍ਯੋ ਆਕਿਰਤੇ ਰਜਂ.

‘‘ਅਕਤਂ ਦੁਕ੍ਕਟਂ [ਦੁਕ੍ਕਤਂ (ਸੀ. ਪੀ.)] ਸੇਯ੍ਯੋ, ਪਚ੍ਛਾ ਤਪਤਿ ਦੁਕ੍ਕਟਂ;

ਕਤਞ੍ਚ ਸੁਕਤਂ ਸੇਯ੍ਯੋ, ਯਂ ਕਤ੍ਵਾ ਨਾਨੁਤਪ੍ਪਤਿ.

‘‘ਕੁਸੋ ਯਥਾ ਦੁਗ੍ਗਹਿਤੋ, ਹਤ੍ਥਮੇਵਾਨੁਕਨ੍ਤਤਿ;

ਸਾਮਞ੍ਞਂ ਦੁਪ੍ਪਰਾਮਟ੍ਠਂ, ਨਿਰਯਾਯੂਪਕਡ੍ਢਤਿ.

‘‘ਯਂ ਕਿਞ੍ਚਿ ਸਿਥਿਲਂ ਕਮ੍ਮਂ, ਸਂਕਿਲਿਟ੍ਠਞ੍ਚ ਯਂ ਵਤਂ;

ਸਙ੍ਕਸ੍ਸਰਂ ਬ੍ਰਹ੍ਮਚਰਿਯਂ, ਨ ਤਂ ਹੋਤਿ ਮਹਪ੍ਫਲ’’ਨ੍ਤਿ.

ਇਦਮਵੋਚ ਤਾਯਨੋ ਦੇਵਪੁਤ੍ਤੋ; ਇਦਂ ਵਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯੀਤਿ.

ਅਥ ਖੋ ਭਗਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਭਿਕ੍ਖੂ ਆਮਨ੍ਤੇਸਿ – ‘‘ਇਮਂ, ਭਿਕ੍ਖਵੇ, ਰਤ੍ਤਿਂ ਤਾਯਨੋ ਨਾਮ ਦੇਵਪੁਤ੍ਤੋ ਪੁਰਾਣਤਿਤ੍ਥਕਰੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ, ਭਿਕ੍ਖਵੇ, ਤਾਯਨੋ ਦੇਵਪੁਤ੍ਤੋ ਮਮ ਸਨ੍ਤਿਕੇ ਇਮਾ ਗਾਥਾਯੋ ਅਭਾਸਿ –

‘‘ਛਿਨ੍ਦ ਸੋਤਂ ਪਰਕ੍ਕਮ੍ਮ, ਕਾਮੇ ਪਨੁਦ ਬ੍ਰਾਹ੍ਮਣ;

ਨਪ੍ਪਹਾਯ ਮੁਨੀ ਕਾਮੇ, ਨੇਕਤ੍ਤਮੁਪਪਜ੍ਜਤਿ.

‘‘ਕਯਿਰਾ ਚੇ ਕਯਿਰਾਥੇਨਂ, ਦਲ਼੍ਹਮੇਨਂ ਪਰਕ੍ਕਮੇ;

ਸਿਥਿਲੋ ਹਿ ਪਰਿਬ੍ਬਾਜੋ, ਭਿਯ੍ਯੋ ਆਕਿਰਤੇ ਰਜਂ.

‘‘ਅਕਤਂ ਦੁਕ੍ਕਟਂ ਸੇਯ੍ਯੋ, ਪਚ੍ਛਾ ਤਪਤਿ ਦੁਕ੍ਕਟਂ;

ਕਤਞ੍ਚ ਸੁਕਤਂ ਸੇਯ੍ਯੋ, ਯਂ ਕਤ੍ਵਾ ਨਾਨੁਤਪ੍ਪਤਿ.

‘‘ਕੁਸੋ ਯਥਾ ਦੁਗ੍ਗਹਿਤੋ, ਹਤ੍ਥਮੇਵਾਨੁਕਨ੍ਤਤਿ;

ਸਾਮਞ੍ਞਂ ਦੁਪ੍ਪਰਾਮਟ੍ਠਂ, ਨਿਰਯਾਯੂਪਕਡ੍ਢਤਿ.

‘‘ਯਂ ਕਿਞ੍ਚਿ ਸਿਥਿਲਂ ਕਮ੍ਮਂ, ਸਂਕਿਲਿਟ੍ਠਞ੍ਚ ਯਂ ਵਤਂ;

ਸਙ੍ਕਸ੍ਸਰਂ ਬ੍ਰਹ੍ਮਚਰਿਯਂ, ਨ ਤਂ ਹੋਤਿ ਮਹਪ੍ਫਲ’’ਨ੍ਤਿ.

‘‘ਇਦਮਵੋਚ, ਭਿਕ੍ਖਵੇ, ਤਾਯਨੋ ਦੇਵਪੁਤ੍ਤੋ, ਇਦਂ ਵਤ੍ਵਾ ਮਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਤਤ੍ਥੇਵਨ੍ਤਰਧਾਯਿ. ਉਗ੍ਗਣ੍ਹਾਥ, ਭਿਕ੍ਖਵੇ, ਤਾਯਨਗਾਥਾ; ਪਰਿਯਾਪੁਣਾਥ, ਭਿਕ੍ਖਵੇ, ਤਾਯਨਗਾਥਾ; ਧਾਰੇਥ, ਭਿਕ੍ਖਵੇ, ਤਾਯਨਗਾਥਾ. ਅਤ੍ਥਸਂਹਿਤਾ, ਭਿਕ੍ਖਵੇ, ਤਾਯਨਗਾਥਾ ਆਦਿਬ੍ਰਹ੍ਮਚਰਿਯਿਕਾ’’ਤਿ.

੯. ਚਨ੍ਦਿਮਸੁਤ੍ਤਂ

੯੦. ਸਾਵਤ੍ਥਿਨਿਦਾਨਂ. ਤੇਨ ਖੋ ਪਨ ਸਮਯੇਨ ਚਨ੍ਦਿਮਾ ਦੇਵਪੁਤ੍ਤੋ ਰਾਹੁਨਾ ਅਸੁਰਿਨ੍ਦੇਨ ਗਹਿਤੋ ਹੋਤਿ. ਅਥ ਖੋ ਚਨ੍ਦਿਮਾ ਦੇਵਪੁਤ੍ਤੋ ਭਗਵਨ੍ਤਂ ਅਨੁਸ੍ਸਰਮਾਨੋ ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਨਮੋ ਤੇ ਬੁਦ੍ਧ ਵੀਰਤ੍ਥੁ, ਵਿਪ੍ਪਮੁਤ੍ਤੋਸਿ ਸਬ੍ਬਧਿ;

ਸਮ੍ਬਾਧਪਟਿਪਨ੍ਨੋਸ੍ਮਿ, ਤਸ੍ਸ ਮੇ ਸਰਣਂ ਭਵਾ’’ਤਿ.

ਅਥ ਖੋ ਭਗਵਾ ਚਨ੍ਦਿਮਂ ਦੇਵਪੁਤ੍ਤਂ ਆਰਬ੍ਭ ਰਾਹੁਂ ਅਸੁਰਿਨ੍ਦਂ ਗਾਥਾਯ ਅਜ੍ਝਭਾਸਿ –

‘‘ਤਥਾਗਤਂ ਅਰਹਨ੍ਤਂ, ਚਨ੍ਦਿਮਾ ਸਰਣਂ ਗਤੋ;

ਰਾਹੁ ਚਨ੍ਦਂ ਪਮੁਞ੍ਚਸ੍ਸੁ, ਬੁਦ੍ਧਾ ਲੋਕਾਨੁਕਮ੍ਪਕਾ’’ਤਿ.

ਅਥ ਖੋ ਰਾਹੁ ਅਸੁਰਿਨ੍ਦੋ ਚਨ੍ਦਿਮਂ ਦੇਵਪੁਤ੍ਤਂ ਮੁਞ੍ਚਿਤ੍ਵਾ ਤਰਮਾਨਰੂਪੋ ਯੇਨ ਵੇਪਚਿਤ੍ਤਿ ਅਸੁਰਿਨ੍ਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸਂਵਿਗ੍ਗੋ ਲੋਮਹਟ੍ਠਜਾਤੋ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ ਰਾਹੁਂ ਅਸੁਰਿਨ੍ਦਂ ਵੇਪਚਿਤ੍ਤਿ ਅਸੁਰਿਨ੍ਦੋ ਗਾਥਾਯ ਅਜ੍ਝਭਾਸਿ –

‘‘ਕਿਂ ਨੁ ਸਨ੍ਤਰਮਾਨੋਵ, ਰਾਹੁ ਚਨ੍ਦਂ ਪਮੁਞ੍ਚਸਿ;

ਸਂਵਿਗ੍ਗਰੂਪੋ ਆਗਮ੍ਮ, ਕਿਂ ਨੁ ਭੀਤੋਵ ਤਿਟ੍ਠਸੀ’’ਤਿ.

‘‘ਸਤ੍ਤਧਾ ਮੇ ਫਲੇ ਮੁਦ੍ਧਾ, ਜੀਵਨ੍ਤੋ ਨ ਸੁਖਂ ਲਭੇ;

ਬੁਦ੍ਧਗਾਥਾਭਿਗੀਤੋਮ੍ਹਿ, ਨੋ ਚੇ ਮੁਞ੍ਚੇਯ੍ਯ ਚਨ੍ਦਿਮ’’ਨ੍ਤਿ.

੧੦. ਸੂਰਿਯਸੁਤ੍ਤਂ

੯੧. ਸਾਵਤ੍ਥਿਨਿਦਾਨਂ. ਤੇਨ ਖੋ ਪਨ ਸਮਯੇਨ ਸੂਰਿਯੋ ਦੇਵਪੁਤ੍ਤੋ ਰਾਹੁਨਾ ਅਸੁਰਿਨ੍ਦੇਨ ਗਹਿਤੋ ਹੋਤਿ. ਅਥ ਖੋ ਸੂਰਿਯੋ ਦੇਵਪੁਤ੍ਤੋ ਭਗਵਨ੍ਤਂ ਅਨੁਸ੍ਸਰਮਾਨੋ ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਨਮੋ ਤੇ ਬੁਦ੍ਧ ਵੀਰਤ੍ਥੁ, ਵਿਪ੍ਪਮੁਤ੍ਤੋਸਿ ਸਬ੍ਬਧਿ;

ਸਮ੍ਬਾਧਪਟਿਪਨ੍ਨੋਸ੍ਮਿ, ਤਸ੍ਸ ਮੇ ਸਰਣਂ ਭਵਾ’’ਤਿ.

ਅਥ ਖੋ ਭਗਵਾ ਸੂਰਿਯਂ ਦੇਵਪੁਤ੍ਤਂ ਆਰਬ੍ਭ ਰਾਹੁਂ ਅਸੁਰਿਨ੍ਦਂ ਗਾਥਾਹਿ ਅਜ੍ਝਭਾਸਿ –

‘‘ਤਥਾਗਤਂ ਅਰਹਨ੍ਤਂ, ਸੂਰਿਯੋ ਸਰਣਂ ਗਤੋ;

ਰਾਹੁ ਸੂਰਿਯਂ [ਸੁਰਿਯਂ (ਸੀ. ਸ੍ਯਾ. ਕਂ. ਪੀ.)] ਪਮੁਞ੍ਚਸ੍ਸੁ, ਬੁਦ੍ਧਾ ਲੋਕਾਨੁਕਮ੍ਪਕਾ.

‘‘ਯੋ ਅਨ੍ਧਕਾਰੇ ਤਮਸਿ ਪਭਙ੍ਕਰੋ,

ਵੇਰੋਚਨੋ ਮਣ੍ਡਲੀ ਉਗ੍ਗਤੇਜੋ;

ਮਾ ਰਾਹੁ ਗਿਲੀ ਚਰਮਨ੍ਤਲਿਕ੍ਖੇ,

ਪਜਂ ਮਮਂ ਰਾਹੁ ਪਮੁਞ੍ਚ ਸੂਰਿਯ’’ਨ੍ਤਿ.

ਅਥ ਖੋ ਰਾਹੁ ਅਸੁਰਿਨ੍ਦੋ ਸੂਰਿਯਂ ਦੇਵਪੁਤ੍ਤਂ ਮੁਞ੍ਚਿਤ੍ਵਾ ਤਰਮਾਨਰੂਪੋ ਯੇਨ ਵੇਪਚਿਤ੍ਤਿ ਅਸੁਰਿਨ੍ਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸਂਵਿਗ੍ਗੋ ਲੋਮਹਟ੍ਠਜਾਤੋ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ ਰਾਹੁਂ ਅਸੁਰਿਨ੍ਦਂ ਵੇਪਚਿਤ੍ਤਿ ਅਸੁਰਿਨ੍ਦੋ ਗਾਥਾਯ ਅਜ੍ਝਭਾਸਿ –

‘‘ਕਿਂ ਨੁ ਸਨ੍ਤਰਮਾਨੋਵ, ਰਾਹੁ ਸੂਰਿਯਂ ਪਮੁਞ੍ਚਸਿ;

ਸਂਵਿਗ੍ਗਰੂਪੋ ਆਗਮ੍ਮ, ਕਿਂ ਨੁ ਭੀਤੋਵ ਤਿਟ੍ਠਸੀ’’ਤਿ.

‘‘ਸਤ੍ਤਧਾ ਮੇ ਫਲੇ ਮੁਦ੍ਧਾ, ਜੀਵਨ੍ਤੋ ਨ ਸੁਖਂ ਲਭੇ;

ਬੁਦ੍ਧਗਾਥਾਭਿਗੀਤੋਮ੍ਹਿ, ਨੋ ਚੇ ਮੁਞ੍ਚੇਯ੍ਯ ਸੂਰਿਯ’’ਨ੍ਤਿ.

ਪਠਮੋ ਵਗ੍ਗੋ.

ਤਸ੍ਸੁਦ੍ਦਾਨਂ –

ਦ੍ਵੇ ਕਸ੍ਸਪਾ ਚ ਮਾਘੋ ਚ, ਮਾਗਧੋ ਦਾਮਲਿ ਕਾਮਦੋ;

ਪਞ੍ਚਾਲਚਣ੍ਡੋ ਤਾਯਨੋ, ਚਨ੍ਦਿਮਸੂਰਿਯੇਨ ਤੇ ਦਸਾਤਿ.