੪. ਅਚ੍ਚਯਸੁਤ੍ਤਂ

੨੭੦. ਸਾਵਤ੍ਥਿਯਂ…ਪੇ… ਆਰਾਮੇ. ਤੇਨ ਖੋ ਪਨ ਸਮਯੇਨ ਦ੍ਵੇ ਭਿਕ੍ਖੂ ਸਮ੍ਪਯੋਜੇਸੁਂ. ਤਤ੍ਰੇਕੋ ਭਿਕ੍ਖੁ ਅਚ੍ਚਸਰਾ. ਅਥ ਖੋ ਸੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਸਨ੍ਤਿਕੇ ਅਚ੍ਚਯਂ ਅਚ੍ਚਯਤੋ ਦੇਸੇਤਿ; ਸੋ ਭਿਕ੍ਖੁ ਨਪ੍ਪਟਿਗ੍ਗਣ੍ਹਾਤਿ. ਅਥ ਖੋ ਸਮ੍ਬਹੁਲਾ ਭਿਕ੍ਖੂ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਭਿਕ੍ਖੂ ਭਗਵਨ੍ਤਂ ਏਤਦਵੋਚੁਂ – ‘‘ਇਧ, ਭਨ੍ਤੇ, ਦ੍ਵੇ ਭਿਕ੍ਖੂ ਸਮ੍ਪਯੋਜੇਸੁਂ, ਤਤ੍ਰੇਕੋ ਭਿਕ੍ਖੁ ਅਚ੍ਚਸਰਾ. ਅਥ ਖੋ ਸੋ, ਭਨ੍ਤੇ, ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਸਨ੍ਤਿਕੇ ਅਚ੍ਚਯਂ ਅਚ੍ਚਯਤੋ ਦੇਸੇਤਿ, ਸੋ ਭਿਕ੍ਖੁ ਨਪ੍ਪਟਿਗ੍ਗਣ੍ਹਾਤੀ’’ਤਿ.

‘‘ਦ੍ਵੇਮੇ, ਭਿਕ੍ਖਵੇ, ਬਾਲਾ. ਯੋ ਚ ਅਚ੍ਚਯਂ ਅਚ੍ਚਯਤੋ ਨ ਪਸ੍ਸਤਿ, ਯੋ ਚ ਅਚ੍ਚਯਂ ਦੇਸੇਨ੍ਤਸ੍ਸ ਯਥਾਧਮ੍ਮਂ ਨਪ੍ਪਟਿਗ੍ਗਣ੍ਹਾ’’ਤਿ – ਇਮੇ ਖੋ, ਭਿਕ੍ਖਵੇ, ਦ੍ਵੇ ਬਾਲਾ. ‘‘ਦ੍ਵੇਮੇ, ਭਿਕ੍ਖਵੇ, ਪਣ੍ਡਿਤਾ. ਯੋ ਚ ਅਚ੍ਚਯਂ ਅਚ੍ਚਯਤੋ ਪਸ੍ਸਤਿ, ਯੋ ਚ ਅਚ੍ਚਯਂ ਦੇਸੇਨ੍ਤਸ੍ਸ ਯਥਾਧਮ੍ਮਂ ਪਟਿਗ੍ਗਣ੍ਹਾ’’ਤਿ – ਇਮੇ ਖੋ, ਭਿਕ੍ਖਵੇ, ਦ੍ਵੇ ਪਣ੍ਡਿਤਾ.

‘‘ਭੂਤਪੁਬ੍ਬਂ, ਭਿਕ੍ਖਵੇ, ਸਕ੍ਕੋ ਦੇਵਾਨਮਿਨ੍ਦੋ ਸੁਧਮ੍ਮਾਯਂ ਸਭਾਯਂ ਦੇਵੇ ਤਾਵਤਿਂਸੇ ਅਨੁਨਯਮਾਨੋ ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਕੋਧੋ ਵੋ ਵਸਮਾਯਾਤੁ, ਮਾ ਚ ਮਿਤ੍ਤੇਹਿ ਵੋ ਜਰਾ;

ਅਗਰਹਿਯਂ ਮਾ ਗਰਹਿਤ੍ਥ, ਮਾ ਚ ਭਾਸਿਤ੍ਥ ਪੇਸੁਣਂ;

ਅਥ ਪਾਪਜਨਂ ਕੋਧੋ, ਪਬ੍ਬਤੋਵਾਭਿਮਦ੍ਦਤੀ’’ਤਿ.