੩. ਸਤ੍ਤਿਵਗ੍ਗੋ

੧. ਸਤ੍ਤਿਸੁਤ੍ਤਂ

੨੧. ਸਾਵਤ੍ਥਿਨਿਦਾਨਂ. ਏਕਮਨ੍ਤਂ ਠਿਤਾ ਖੋ ਸਾ ਦੇਵਤਾ ਭਗਵਤੋ ਸਨ੍ਤਿਕੇ ਇਮਂ ਗਾਥਂ ਅਭਾਸਿ –

‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ [ਡਯ੍ਹਮਾਨੇਵ (ਸਬ੍ਬਤ੍ਥ)] ਮਤ੍ਥਕੇ;

ਕਾਮਰਾਗਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ ਮਤ੍ਥਕੇ;

ਸਕ੍ਕਾਯਦਿਟ੍ਠਿਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

੨. ਫੁਸਤਿਸੁਤ੍ਤਂ

੨੨. ‘‘ਨਾਫੁਸਨ੍ਤਂ ਫੁਸਤਿ ਚ, ਫੁਸਨ੍ਤਞ੍ਚ ਤਤੋ ਫੁਸੇ;

ਤਸ੍ਮਾ ਫੁਸਨ੍ਤਂ ਫੁਸਤਿ, ਅਪ੍ਪਦੁਟ੍ਠਪਦੋਸਿਨ’’ਨ੍ਤਿ.

‘‘ਯੋ ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ,

ਸੁਦ੍ਧਸ੍ਸ ਪੋਸਸ੍ਸ ਅਨਙ੍ਗਣਸ੍ਸ;

ਤਮੇਵ ਬਾਲਂ ਪਚ੍ਚੇਤਿ ਪਾਪਂ,

ਸੁਖੁਮੋ ਰਜੋ ਪਟਿਵਾਤਂਵ ਖਿਤ੍ਤੋ’’ਤਿ.

੩. ਜਟਾਸੁਤ੍ਤਂ

੨੩. ‘‘ਅਨ੍ਤੋ ਜਟਾ ਬਹਿ ਜਟਾ, ਜਟਾਯ ਜਟਿਤਾ ਪਜਾ;

ਤਂ ਤਂ ਗੋਤਮ ਪੁਚ੍ਛਾਮਿ, ਕੋ ਇਮਂ ਵਿਜਟਯੇ ਜਟ’’ਨ੍ਤਿ.

‘‘ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ, ਚਿਤ੍ਤਂ ਪਞ੍ਞਞ੍ਚ ਭਾਵਯਂ;

ਆਤਾਪੀ ਨਿਪਕੋ ਭਿਕ੍ਖੁ, ਸੋ ਇਮਂ ਵਿਜਟਯੇ ਜਟਂ.

‘‘ਯੇਸਂ ਰਾਗੋ ਚ ਦੋਸੋ ਚ, ਅਵਿਜ੍ਜਾ ਚ ਵਿਰਾਜਿਤਾ;

ਖੀਣਾਸਵਾ ਅਰਹਨ੍ਤੋ, ਤੇਸਂ ਵਿਜਟਿਤਾ ਜਟਾ.

‘‘ਯਤ੍ਥ ਨਾਮਞ੍ਚ ਰੂਪਞ੍ਚ, ਅਸੇਸਂ ਉਪਰੁਜ੍ਝਤਿ;

ਪਟਿਘਂ ਰੂਪਸਞ੍ਞਾ ਚ, ਏਤ੍ਥੇਸਾ ਛਿਜ੍ਜਤੇ [ਵਿਜਟੇ (ਕ.)] ਜਟਾ’’ਤਿ.

੪. ਮਨੋਨਿਵਾਰਣਸੁਤ੍ਤਂ

੨੪. ‘‘ਯਤੋ ਯਤੋ ਮਨੋ ਨਿਵਾਰਯੇ,

ਨ ਦੁਕ੍ਖਮੇਤਿ ਨਂ ਤਤੋ ਤਤੋ;

ਸ ਸਬ੍ਬਤੋ ਮਨੋ ਨਿਵਾਰਯੇ,

ਸ ਸਬ੍ਬਤੋ ਦੁਕ੍ਖਾ ਪਮੁਚ੍ਚਤਿ’’.

‘‘ਨ ਸਬ੍ਬਤੋ ਮਨੋ ਨਿਵਾਰਯੇ,

ਨ ਮਨੋ ਸਂਯਤਤ੍ਤਮਾਗਤਂ;

ਯਤੋ ਯਤੋ ਚ ਪਾਪਕਂ,

ਤਤੋ ਤਤੋ ਮਨੋ ਨਿਵਾਰਯੇ’’ਤਿ.

੫. ਅਰਹਨ੍ਤਸੁਤ੍ਤਂ

੨੫. ‘‘ਯੋ ਹੋਤਿ ਭਿਕ੍ਖੁ ਅਰਹਂ ਕਤਾਵੀ,

ਖੀਣਾਸਵੋ ਅਨ੍ਤਿਮਦੇਹਧਾਰੀ;

ਅਹਂ ਵਦਾਮੀਤਿਪਿ ਸੋ ਵਦੇਯ੍ਯ,

ਮਮਂ ਵਦਨ੍ਤੀਤਿਪਿ ਸੋ ਵਦੇਯ੍ਯਾ’’ਤਿ.

‘‘ਯੋ ਹੋਤਿ ਭਿਕ੍ਖੁ ਅਰਹਂ ਕਤਾਵੀ,

ਖੀਣਾਸਵੋ ਅਨ੍ਤਿਮਦੇਹਧਾਰੀ;

ਅਹਂ ਵਦਾਮੀਤਿਪਿ ਸੋ ਵਦੇਯ੍ਯ,

ਮਮਂ ਵਦਨ੍ਤੀਤਿਪਿ ਸੋ ਵਦੇਯ੍ਯ;

ਲੋਕੇ ਸਮਞ੍ਞਂ ਕੁਸਲੋ ਵਿਦਿਤ੍ਵਾ,

ਵੋਹਾਰਮਤ੍ਤੇਨ ਸੋ [ਸ (?)] ਵੋਹਰੇਯ੍ਯਾ’’ਤਿ.

‘‘ਯੋ ਹੋਤਿ ਭਿਕ੍ਖੁ ਅਰਹਂ ਕਤਾਵੀ,

ਖੀਣਾਸਵੋ ਅਨ੍ਤਿਮਦੇਹਧਾਰੀ;

ਮਾਨਂ ਨੁ ਖੋ ਸੋ ਉਪਗਮ੍ਮ ਭਿਕ੍ਖੁ,

ਅਹਂ ਵਦਾਮੀਤਿਪਿ ਸੋ ਵਦੇਯ੍ਯ;

ਮਮਂ ਵਦਨ੍ਤੀਤਿਪਿ ਸੋ ਵਦੇਯ੍ਯਾ’’ਤਿ.

‘‘ਪਹੀਨਮਾਨਸ੍ਸ ਨ ਸਨ੍ਤਿ ਗਨ੍ਥਾ,

ਵਿਧੂਪਿਤਾ ਮਾਨਗਨ੍ਥਸ੍ਸ ਸਬ੍ਬੇ;

ਸ ਵੀਤਿਵਤ੍ਤੋ ਮਞ੍ਞਤਂ [ਮਾਨਨਂ (ਸੀ.), ਮਞ੍ਞੀਤਂ (?)] ਸੁਮੇਧੋ,

ਅਹਂ ਵਦਾਮੀਤਿਪਿ ਸੋ ਵਦੇਯ੍ਯ.

‘‘ਮਮਂ ਵਦਨ੍ਤੀਤਿਪਿ ਸੋ ਵਦੇਯ੍ਯ;

ਲੋਕੇ ਸਮਞ੍ਞਂ ਕੁਸਲੋ ਵਿਦਿਤ੍ਵਾ;

ਵੋਹਾਰਮਤ੍ਤੇਨ ਸੋ ਵੋਹਰੇਯ੍ਯਾ’’ਤਿ.

੬. ਪਜ੍ਜੋਤਸੁਤ੍ਤਂ

੨੬. ‘‘ਕਤਿ ਲੋਕਸ੍ਮਿਂ ਪਜ੍ਜੋਤਾ, ਯੇਹਿ ਲੋਕੋ ਪਕਾਸਤਿ [ਪਭਾਸਤਿ (ਕ. ਸੀ.)];

ਭਗਵਨ੍ਤਂ [ਭਵਨ੍ਤਂ (ਕ.)] ਪੁਟ੍ਠੁਮਾਗਮ੍ਮ, ਕਥਂ ਜਾਨੇਮੁ ਤਂ ਮਯ’’ਨ੍ਤਿ.

‘‘ਚਤ੍ਤਾਰੋ ਲੋਕੇ ਪਜ੍ਜੋਤਾ, ਪਞ੍ਚਮੇਤ੍ਥ ਨ ਵਿਜ੍ਜਤਿ;

ਦਿਵਾ ਤਪਤਿ ਆਦਿਚ੍ਚੋ, ਰਤ੍ਤਿਮਾਭਾਤਿ ਚਨ੍ਦਿਮਾ.

‘‘ਅਥ ਅਗ੍ਗਿ ਦਿਵਾਰਤ੍ਤਿਂ, ਤਤ੍ਥ ਤਤ੍ਥ ਪਕਾਸਤਿ;

ਸਮ੍ਬੁਦ੍ਧੋ ਤਪਤਂ ਸੇਟ੍ਠੋ, ਏਸਾ ਆਭਾ ਅਨੁਤ੍ਤਰਾ’’ਤਿ.

੭. ਸਰਸੁਤ੍ਤਂ

੨੭. ‘‘ਕੁਤੋ ਸਰਾ ਨਿਵਤ੍ਤਨ੍ਤਿ, ਕਤ੍ਥ ਵਟ੍ਟਂ ਨ ਵਤ੍ਤਤਿ;

ਕਤ੍ਥ ਨਾਮਞ੍ਚ ਰੂਪਞ੍ਚ, ਅਸੇਸਂ ਉਪਰੁਜ੍ਝਤੀ’’ਤਿ.

‘‘ਯਤ੍ਥ ਆਪੋ ਚ ਪਥਵੀ, ਤੇਜੋ ਵਾਯੋ ਨ ਗਾਧਤਿ;

ਅਤੋ ਸਰਾ ਨਿਵਤ੍ਤਨ੍ਤਿ, ਏਤ੍ਥ ਵਟ੍ਟਂ ਨ ਵਤ੍ਤਤਿ;

ਏਤ੍ਥ ਨਾਮਞ੍ਚ ਰੂਪਞ੍ਚ, ਅਸੇਸਂ ਉਪਰੁਜ੍ਝਤੀ’’ਤਿ.

੮. ਮਹਦ੍ਧਨਸੁਤ੍ਤਂ

੨੮. ‘‘ਮਹਦ੍ਧਨਾ ਮਹਾਭੋਗਾ, ਰਟ੍ਠਵਨ੍ਤੋਪਿ ਖਤ੍ਤਿਯਾ;

ਅਞ੍ਞਮਞ੍ਞਾਭਿਗਿਜ੍ਝਨ੍ਤਿ, ਕਾਮੇਸੁ ਅਨਲਙ੍ਕਤਾ.

‘‘ਤੇਸੁ ਉਸ੍ਸੁਕ੍ਕਜਾਤੇਸੁ, ਭਵਸੋਤਾਨੁਸਾਰਿਸੁ;

ਕੇਧ ਤਣ੍ਹਂ [ਰੋਧਤਣ੍ਹਂ (ਸ੍ਯਾ. ਕਂ.), ਗੇਧਤਣ੍ਹਂ (ਕ.)] ਪਜਹਿਂਸੁ [ਪਵਾਹਿਂਸੁ (ਸ੍ਯਾ. ਕਂ. ਕ.)], ਕੇ ਲੋਕਸ੍ਮਿਂ ਅਨੁਸ੍ਸੁਕਾ’’ਤਿ.

‘‘ਹਿਤ੍ਵਾ ਅਗਾਰਂ ਪਬ੍ਬਜਿਤਾ, ਹਿਤ੍ਵਾ ਪੁਤ੍ਤਂ ਪਸੁਂ ਵਿਯਂ;

ਹਿਤ੍ਵਾ ਰਾਗਞ੍ਚ ਦੋਸਞ੍ਚ, ਅਵਿਜ੍ਜਞ੍ਚ ਵਿਰਾਜਿਯ;

ਖੀਣਾਸਵਾ ਅਰਹਨ੍ਤੋ, ਤੇ ਲੋਕਸ੍ਮਿਂ ਅਨੁਸ੍ਸੁਕਾ’’ਤਿ.

੯. ਚਤੁਚਕ੍ਕਸੁਤ੍ਤਂ

੨੯. ‘‘ਚਤੁਚਕ੍ਕਂ ਨਵਦ੍ਵਾਰਂ, ਪੁਣ੍ਣਂ ਲੋਭੇਨ ਸਂਯੁਤਂ;

ਪਙ੍ਕਜਾਤਂ ਮਹਾਵੀਰ, ਕਥਂ ਯਾਤ੍ਰਾ ਭਵਿਸ੍ਸਤੀ’’ਤਿ.

‘‘ਛੇਤ੍ਵਾ ਨਦ੍ਧਿਂ ਵਰਤ੍ਤਞ੍ਚ, ਇਚ੍ਛਾ ਲੋਭਞ੍ਚ ਪਾਪਕਂ;

ਸਮੂਲਂ ਤਣ੍ਹਮਬ੍ਬੁਯ੍ਹ, ਏਵਂ ਯਾਤ੍ਰਾ ਭਵਿਸ੍ਸਤੀ’’ਤਿ.

੧੦. ਏਣਿਜਙ੍ਘਸੁਤ੍ਤਂ

੩੦. ‘‘ਏਣਿਜਙ੍ਘਂ ਕਿਸਂ ਵੀਰਂ, ਅਪ੍ਪਾਹਾਰਂ ਅਲੋਲੁਪਂ;

ਸੀਹਂ ਵੇਕਚਰਂ ਨਾਗਂ, ਕਾਮੇਸੁ ਅਨਪੇਕ੍ਖਿਨਂ;

ਉਪਸਙ੍ਕਮ੍ਮ ਪੁਚ੍ਛਾਮ, ਕਥਂ ਦੁਕ੍ਖਾ ਪਮੁਚ੍ਚਤੀ’’ਤਿ.

‘‘ਪਞ੍ਚ ਕਾਮਗੁਣਾ ਲੋਕੇ, ਮਨੋਛਟ੍ਠਾ ਪਵੇਦਿਤਾ;

ਏਤ੍ਥ ਛਨ੍ਦਂ ਵਿਰਾਜੇਤ੍ਵਾ, ਏਵਂ ਦੁਕ੍ਖਾ ਪਮੁਚ੍ਚਤੀ’’ਤਿ.

ਸਤ੍ਤਿਵਗ੍ਗੋ ਤਤਿਯੋ.

ਤਸ੍ਸੁਦ੍ਦਾਨਂ –

ਸਤ੍ਤਿਯਾ ਫੁਸਤਿ ਚੇਵ, ਜਟਾ ਮਨੋਨਿਵਾਰਣਾ;

ਅਰਹਨ੍ਤੇਨ ਪਜ੍ਜੋਤੋ, ਸਰਾ ਮਹਦ੍ਧਨੇਨ ਚ;

ਚਤੁਚਕ੍ਕੇਨ ਨਵਮਂ, ਏਣਿਜਙ੍ਘੇਨ ਤੇ ਦਸਾਤਿ.