੮. ਨਗਰਵਿਨ੍ਦੇਯ੍ਯਸੁਤ੍ਤਂ

੪੩੪. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਕੋਸਲੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਯੇਨ ਨਗਰਵਿਨ੍ਦਂ ਨਾਮ ਕੋਸਲਾਨਂ ਬ੍ਰਾਹ੍ਮਣਾਨਂ ਗਾਮੋ ਤਦਵਸਰਿ. ਅਸ੍ਸੋਸੁਂ ਖੋ ਨਗਰਵਿਨ੍ਦੇਯ੍ਯਕਾ [ਨਗਰਵਿਨ੍ਦੇਯ੍ਯਾ (ਕ.)] ਬ੍ਰਾਹ੍ਮਣਗਹਪਤਿਕਾ – ‘‘ਸਮਣੋ ਖਲੁ, ਭੋ, ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਕੋਸਲੇਸੁ ਚਾਰਿਕਂ ਚਰਮਾਨੋ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਨਗਰਵਿਨ੍ਦਂ ਅਨੁਪ੍ਪਤ੍ਤੋ. ਤਂ ਖੋ ਪਨ ਭਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ਤਿ. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ, ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ.

ਅਥ ਖੋ ਨਗਰਵਿਨ੍ਦੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਅਪ੍ਪੇਕਚ੍ਚੇ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਪ੍ਪੇਕਚ੍ਚੇ ਭਗਵਤਾ ਸਦ੍ਧਿਂ ਸਮ੍ਮੋਦਿਂਸੁ; ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਪ੍ਪੇਕਚ੍ਚੇ ਯੇਨ ਭਗਵਾ ਤੇਨਞ੍ਜਲਿਂ ਪਣਾਮੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਪ੍ਪੇਕਚ੍ਚੇ ਭਗਵਤੋ ਸਨ੍ਤਿਕੇ ਨਾਮਗੋਤ੍ਤਂ ਸਾਵੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਅਪ੍ਪੇਕਚ੍ਚੇ ਤੁਣ੍ਹੀਭੂਤਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨੇ ਖੋ ਨਗਰਵਿਨ੍ਦੇਯ੍ਯਕੇ ਬ੍ਰਾਹ੍ਮਣਗਹਪਤਿਕੇ ਭਗਵਾ ਏਤਦਵੋਚ –

੪੩੫. ‘‘ਸਚੇ ਵੋ, ਗਹਪਤਯੋ, ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਏਵਂ ਪੁਚ੍ਛੇਯ੍ਯੁਂ – ‘ਕਥਂਭੂਤਾ, ਗਹਪਤਯੋ, ਸਮਣਬ੍ਰਾਹ੍ਮਣਾ ਨ ਸਕ੍ਕਾਤਬ੍ਬਾ ਨ ਗਰੁਕਾਤਬ੍ਬਾ ਨ ਮਾਨੇਤਬ੍ਬਾ ਨ ਪੂਜੇਤਬ੍ਬਾ’ਤਿ? ਏਵਂ ਪੁਟ੍ਠਾ ਤੁਮ੍ਹੇ, ਗਹਪਤਯੋ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥ – ‘ਯੇ ਤੇ ਸਮਣਬ੍ਰਾਹ੍ਮਣਾ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਅਵੀਤਰਾਗਾ ਅਵੀਤਦੋਸਾ ਅਵੀਤਮੋਹਾ, ਅਜ੍ਝਤ੍ਤਂ ਅਵੂਪਸਨ੍ਤਚਿਤ੍ਤਾ, ਸਮਵਿਸਮਂ ਚਰਨ੍ਤਿ ਕਾਯੇਨ ਵਾਚਾਯ ਮਨਸਾ, ਏਵਰੂਪਾ ਸਮਣਬ੍ਰਾਹ੍ਮਣਾ ਨ ਸਕ੍ਕਾਤਬ੍ਬਾ ਨ ਗਰੁਕਾਤਬ੍ਬਾ ਨ ਮਾਨੇਤਬ੍ਬਾ ਨ ਪੂਜੇਤਬ੍ਬਾ. ਤਂ ਕਿਸ੍ਸ ਹੇਤੁ? ਮਯਮ੍ਪਿ ਹਿ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਅਵੀਤਰਾਗਾ ਅਵੀਤਦੋਸਾ ਅਵੀਤਮੋਹਾ, ਅਜ੍ਝਤ੍ਤਂ ਅਵੂਪਸਨ੍ਤਚਿਤ੍ਤਾ, ਸਮਵਿਸਮਂ ਚਰਾਮ ਕਾਯੇਨ ਵਾਚਾਯ ਮਨਸਾ, ਤੇਸਂ ਨੋ ਸਮਚਰਿਯਮ੍ਪਿ ਹੇਤਂ ਉਤ੍ਤਰਿ ਅਪਸ੍ਸਤਂ. ਤਸ੍ਮਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨ ਸਕ੍ਕਾਤਬ੍ਬਾ ਨ ਗਰੁਕਾਤਬ੍ਬਾ ਨ ਮਾਨੇਤਬ੍ਬਾ ਨ ਪੂਜੇਤਬ੍ਬਾ. ਯੇ ਤੇ ਸਮਣਬ੍ਰਾਹ੍ਮਣਾ ਸੋਤਵਿਞ੍ਞੇਯ੍ਯੇਸੁ ਸਦ੍ਦੇਸੁ… ਘਾਨਵਿਞ੍ਞੇਯ੍ਯੇਸੁ ਗਨ੍ਧੇਸੁ… ਜਿਵ੍ਹਾਵਿਞ੍ਞੇਯ੍ਯੇਸੁ ਰਸੇਸੁ… ਕਾਯਵਿਞ੍ਞੇਯ੍ਯੇਸੁ ਫੋਟ੍ਠਬ੍ਬੇਸੁ… ਮਨੋਵਿਞ੍ਞੇਯ੍ਯੇਸੁ ਧਮ੍ਮੇਸੁ ਅਵੀਤਰਾਗਾ ਅਵੀਤਦੋਸਾ ਅਵੀਤਮੋਹਾ, ਅਜ੍ਝਤ੍ਤਂ ਅਵੂਪਸਨ੍ਤਚਿਤ੍ਤਾ, ਸਮਵਿਸਮਂ ਚਰਨ੍ਤਿ ਕਾਯੇਨ ਵਾਚਾਯ ਮਨਸਾ, ਏਵਰੂਪਾ ਸਮਣਬ੍ਰਾਹ੍ਮਣਾ ਨ ਸਕ੍ਕਾਤਬ੍ਬਾ ਨ ਗਰੁਕਾਤਬ੍ਬਾ ਨ ਮਾਨੇਤਬ੍ਬਾ ਨ ਪੂਜੇਤਬ੍ਬਾ. ਤਂ ਕਿਸ੍ਸ ਹੇਤੁ? ਮਯਮ੍ਪਿ ਹਿ ਮਨੋਵਿਞ੍ਞੇਯ੍ਯੇਸੁ ਧਮ੍ਮੇਸੁ ਅਵੀਤਰਾਗਾ ਅਵੀਤਦੋਸਾ ਅਵੀਤਮੋਹਾ, ਅਜ੍ਝਤ੍ਤਂ ਅਵੂਪਸਨ੍ਤਚਿਤ੍ਤਾ, ਸਮਵਿਸਮਂ ਚਰਾਮ ਕਾਯੇਨ ਵਾਚਾਯ ਮਨਸਾ, ਤੇਸਂ ਨੋ ਸਮਚਰਿਯਮ੍ਪਿ ਹੇਤਂ ਉਤ੍ਤਰਿ ਅਪਸ੍ਸਤਂ. ਤਸ੍ਮਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਨ ਸਕ੍ਕਾਤਬ੍ਬਾ ਨ ਗਰੁਕਾਤਬ੍ਬਾ ਨ ਮਾਨੇਤਬ੍ਬਾ ਨ ਪੂਜੇਤਬ੍ਬਾ’ਤਿ. ਏਵਂ ਪੁਟ੍ਠਾ ਤੁਮ੍ਹੇ, ਗਹਪਤਯੋ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥ.

੪੩੬. ‘‘ਸਚੇ ਪਨ ਵੋ, ਗਹਪਤਯੋ, ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਏਵਂ ਪੁਚ੍ਛੇਯ੍ਯੁਂ – ‘ਕਥਂਭੂਤਾ, ਗਹਪਤਯੋ, ਸਮਣਬ੍ਰਾਹ੍ਮਣਾ ਸਕ੍ਕਾਤਬ੍ਬਾ ਗਰੁਕਾਤਬ੍ਬਾ ਮਾਨੇਤਬ੍ਬਾ ਪੂਜੇਤਬ੍ਬਾ’ਤਿ? ਏਵਂ ਪੁਟ੍ਠਾ ਤੁਮ੍ਹੇ, ਗਹਪਤਯੋ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥ – ‘ਯੇ ਤੇ ਸਮਣਬ੍ਰਾਹ੍ਮਣਾ ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਵੀਤਰਾਗਾ ਵੀਤਦੋਸਾ ਵੀਤਮੋਹਾ, ਅਜ੍ਝਤ੍ਤਂ ਵੂਪਸਨ੍ਤਚਿਤ੍ਤਾ, ਸਮਚਰਿਯਂ ਚਰਨ੍ਤਿ ਕਾਯੇਨ ਵਾਚਾਯ ਮਨਸਾ, ਏਵਰੂਪਾ ਸਮਣਬ੍ਰਾਹ੍ਮਣਾ ਸਕ੍ਕਾਤਬ੍ਬਾ ਗਰੁਕਾਤਬ੍ਬਾ ਮਾਨੇਤਬ੍ਬਾ ਪੂਜੇਤਬ੍ਬਾ. ਤਂ ਕਿਸ੍ਸ ਹੇਤੁ? ਮਯਮ੍ਪਿ ਹਿ [ਮਯਂ ਹਿ (?)] ਚਕ੍ਖੁਵਿਞ੍ਞੇਯ੍ਯੇਸੁ ਰੂਪੇਸੁ ਅਵੀਤਰਾਗਾ ਅਵੀਤਦੋਸਾ ਅਵੀਤਮੋਹਾ, ਅਜ੍ਝਤ੍ਤਂ ਅਵੂਪਸਨ੍ਤਚਿਤ੍ਤਾ, ਸਮਵਿਸਮਂ ਚਰਾਮ ਕਾਯੇਨ ਵਾਚਾਯ ਮਨਸਾ, ਤੇਸਂ ਨੋ ਸਮਚਰਿਯਮ੍ਪਿ ਹੇਤਂ ਉਤ੍ਤਰਿ ਪਸ੍ਸਤਂ. ਤਸ੍ਮਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਕ੍ਕਾਤਬ੍ਬਾ ਗਰੁਕਾਤਬ੍ਬਾ ਮਾਨੇਤਬ੍ਬਾ ਪੂਜੇਤਬ੍ਬਾ. ਯੇ ਤੇ ਸਮਣਬ੍ਰਾਹ੍ਮਣਾ ਸੋਤਵਿਞ੍ਞੇਯ੍ਯੇਸੁ ਸਦ੍ਦੇਸੁ… ਘਾਨਵਿਞ੍ਞੇਯ੍ਯੇਸੁ ਗਨ੍ਧੇਸੁ… ਜਿਵ੍ਹਾਵਿਞ੍ਞੇਯ੍ਯੇਸੁ ਰਸੇਸੁ… ਕਾਯਵਿਞ੍ਞੇਯ੍ਯੇਸੁ ਫੋਟ੍ਠਬ੍ਬੇਸੁ… ਮਨੋਵਿਞ੍ਞੇਯ੍ਯੇਸੁ ਧਮ੍ਮੇਸੁ ਵੀਤਰਾਗਾ ਵੀਤਦੋਸਾ ਵੀਤਮੋਹਾ, ਅਜ੍ਝਤ੍ਤਂ ਵੂਪਸਨ੍ਤਚਿਤ੍ਤਾ, ਸਮਚਰਿਯਂ ਚਰਨ੍ਤਿ ਕਾਯੇਨ ਵਾਚਾਯ ਮਨਸਾ, ਏਵਰੂਪਾ ਸਮਣਬ੍ਰਾਹ੍ਮਣਾ ਸਕ੍ਕਾਤਬ੍ਬਾ ਗਰੁਕਾਤਬ੍ਬਾ ਮਾਨੇਤਬ੍ਬਾ ਪੂਜੇਤਬ੍ਬਾ. ਤਂ ਕਿਸ੍ਸ ਹੇਤੁ? ਮਯਮ੍ਪਿ ਹਿ ਮਨੋਵਿਞ੍ਞੇਯ੍ਯੇਸੁ ਧਮ੍ਮੇਸੁ ਅਵੀਤਰਾਗਾ ਅਵੀਤਦੋਸਾ ਅਵੀਤਮੋਹਾ ਅਜ੍ਝਤ੍ਤਂ ਅਵੂਪਸਨ੍ਤਚਿਤ੍ਤਾ, ਸਮਵਿਸਮਂ ਚਰਾਮ ਕਾਯੇਨ ਵਾਚਾਯ ਮਨਸਾ, ਤੇਸਂ ਨੋ ਸਮਚਰਿਯਮ੍ਪਿ ਹੇਤਂ ਉਤ੍ਤਰਿ ਪਸ੍ਸਤਂ. ਤਸ੍ਮਾ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ਸਕ੍ਕਾਤਬ੍ਬਾ ਗਰੁਕਾਤਬ੍ਬਾ ਮਾਨੇਤਬ੍ਬਾ ਪੂਜੇਤਬ੍ਬਾ’ਤਿ. ਏਵਂ ਪੁਟ੍ਠਾ ਤੁਮ੍ਹੇ, ਗਹਪਤਯੋ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥ.

੪੩੭. ‘‘ਸਚੇ ਪਨ ਵੋ [ਸਚੇ ਤੇ (ਸ੍ਯਾ. ਕਂ. ਪੀ. ਕ.)], ਗਹਪਤਯੋ, ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਏਵਂ ਪੁਚ੍ਛੇਯ੍ਯੁਂ – ‘ਕੇ ਪਨਾਯਸ੍ਮਨ੍ਤਾਨਂ ਆਕਾਰਾ, ਕੇ ਅਨ੍ਵਯਾ, ਯੇਨ ਤੁਮ੍ਹੇ ਆਯਸ੍ਮਨ੍ਤੋ ਏਵਂ ਵਦੇਥ? ਅਦ੍ਧਾ ਤੇ ਆਯਸ੍ਮਨ੍ਤੋ ਵੀਤਰਾਗਾ ਵਾ ਰਾਗਵਿਨਯਾਯ ਵਾ ਪਟਿਪਨ੍ਨਾ, ਵੀਤਦੋਸਾ ਵਾ ਦੋਸਵਿਨਯਾਯ ਵਾ ਪਟਿਪਨ੍ਨਾ, ਵੀਤਮੋਹਾ ਵਾ ਮੋਹਵਿਨਯਾਯ ਵਾ ਪਟਿਪਨ੍ਨਾ’ਤਿ? ਏਵਂ ਪੁਟ੍ਠਾ ਤੁਮ੍ਹੇ, ਗਹਪਤਯੋ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥ – ‘ਤਥਾ ਹਿ ਤੇ ਆਯਸ੍ਮਨ੍ਤੋ ਅਰਞ੍ਞਵਨਪਤ੍ਥਾਨਿ ਪਨ੍ਤਾਨਿ ਸੇਨਾਸਨਾਨਿ ਪਟਿਸੇਵਨ੍ਤਿ. ਨਤ੍ਥਿ ਖੋ ਪਨ ਤਤ੍ਥ ਤਥਾਰੂਪਾ ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਯੇ ਦਿਸ੍ਵਾ ਦਿਸ੍ਵਾ ਅਭਿਰਮੇਯ੍ਯੁਂ, ਨਤ੍ਥਿ ਖੋ ਪਨ ਤਤ੍ਥ ਤਥਾਰੂਪਾ ਸੋਤਵਿਞ੍ਞੇਯ੍ਯਾ ਸਦ੍ਦਾ ਯੇ ਸੁਤ੍ਵਾ ਸੁਤ੍ਵਾ ਅਭਿਰਮੇਯ੍ਯੁਂ, ਨਤ੍ਥਿ ਖੋ ਪਨ ਤਤ੍ਥ ਤਥਾਰੂਪਾ ਘਾਨਵਿਞ੍ਞੇਯ੍ਯਾ ਗਨ੍ਧਾ ਯੇ ਘਾਯਿਤ੍ਵਾ ਘਾਯਿਤ੍ਵਾ ਅਭਿਰਮੇਯ੍ਯੁਂ, ਨਤ੍ਥਿ ਖੋ ਪਨ ਤਤ੍ਥ ਤਥਾਰੂਪਾ ਜਿਵ੍ਹਾਵਿਞ੍ਞੇਯ੍ਯਾ ਰਸਾ ਯੇ ਸਾਯਿਤ੍ਵਾ ਸਾਯਿਤ੍ਵਾ ਅਭਿਰਮੇਯ੍ਯੁਂ, ਨਤ੍ਥਿ ਖੋ ਪਨ ਤਤ੍ਥ ਤਥਾਰੂਪਾ ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਯੇ ਫੁਸਿਤ੍ਵਾ ਫੁਸਿਤ੍ਵਾ ਅਭਿਰਮੇਯ੍ਯੁਂ. ਇਮੇ ਖੋ ਨੋ, ਆਵੁਸੋ, ਆਕਾਰਾ, ਇਮੇ ਅਨ੍ਵਯਾ, ਯੇਨ ਮਯਂ [ਯੇਨ ਮਯਂ ਆਯਸ੍ਮਨ੍ਤੋ (ਸੀ. ਪੀ.), ਯੇਨ ਮਯਂ ਆਯਸ੍ਮਨ੍ਤੇ (ਸ੍ਯਾ. ਕਂ.)] ਏਵਂ ਵਦੇਮ – ਅਦ੍ਧਾ ਤੇ ਆਯਸ੍ਮਨ੍ਤੋ ਵੀਤਰਾਗਾ ਵਾ ਰਾਗਵਿਨਯਾਯ ਵਾ ਪਟਿਪਨ੍ਨਾ, ਵੀਤਦੋਸਾ ਵਾ ਦੋਸਵਿਨਯਾਯ ਵਾ ਪਟਿਪਨ੍ਨਾ, ਵੀਤਮੋਹਾ ਵਾ ਮੋਹਵਿਨਯਾਯ ਵਾ ਪਟਿਪਨ੍ਨਾ’ਤਿ. ਏਵਂ ਪੁਟ੍ਠਾ ਤੁਮ੍ਹੇ, ਗਹਪਤਯੋ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਏਵਂ ਬ੍ਯਾਕਰੇਯ੍ਯਾਥਾ’’ਤਿ.

ਏਵਂ ਵੁਤ੍ਤੇ, ਨਗਰਵਿਨ੍ਦੇਯ੍ਯਕਾ ਬ੍ਰਾਹ੍ਮਣਗਹਪਤਿਕਾ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ! ਸੇਯ੍ਯਥਾਪਿ, ਭੋ ਗੋਤਮ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ, ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ – ‘ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀ’ਤਿ; ਏਵਮੇਵਂ ਭੋਤਾ ਗੋਤਮੇਨ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਤੇ ਮਯਂ ਭਵਨ੍ਤਂ ਗੋਤਮਂ ਸਰਣਂ ਗਚ੍ਛਾਮ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕੇ ਨੋ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ.

ਨਗਰਵਿਨ੍ਦੇਯ੍ਯਸੁਤ੍ਤਂ ਨਿਟ੍ਠਿਤਂ ਅਟ੍ਠਮਂ.