੧੨. ਦਕ੍ਖਿਣਾਵਿਭਙ੍ਗਸੁਤ੍ਤਂ

੩੭੬. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ. ਅਥ ਖੋ ਮਹਾਪਜਾਪਤਿ [ਮਹਾਪਜਾਪਤੀ (ਸੀ. ਸ੍ਯਾ. ਕਂ. ਪੀ.)] ਗੋਤਮੀ ਨਵਂ ਦੁਸ੍ਸਯੁਗਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਾ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਇਦਂ ਮੇ, ਭਨ੍ਤੇ, ਨਵਂ ਦੁਸ੍ਸਯੁਗਂ ਭਗਵਨ੍ਤਂ ਉਦ੍ਦਿਸ੍ਸ ਸਾਮਂ ਕਨ੍ਤਂ ਸਾਮਂ ਵਾਯਿਤਂ. ਤਂ ਮੇ, ਭਨ੍ਤੇ, ਭਗਵਾ ਪਟਿਗ੍ਗਣ੍ਹਾਤੁ ਅਨੁਕਮ੍ਪਂ ਉਪਾਦਾਯਾ’’ਤਿ. ਏਵਂ ਵੁਤ੍ਤੇ, ਭਗਵਾ ਮਹਾਪਜਾਪਤਿਂ ਗੋਤਮਿਂ ਏਤਦਵੋਚ – ‘‘ਸਙ੍ਘੇ, ਗੋਤਮਿ, ਦੇਹਿ. ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ. ਦੁਤਿਯਮ੍ਪਿ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਇਦਂ ਮੇ, ਭਨ੍ਤੇ, ਨਵਂ ਦੁਸ੍ਸਯੁਗਂ ਭਗਵਨ੍ਤਂ ਉਦ੍ਦਿਸ੍ਸ ਸਾਮਂ ਕਨ੍ਤਂ ਸਾਮਂ ਵਾਯਿਤਂ. ਤਂ ਮੇ, ਭਨ੍ਤੇ, ਭਗਵਾ ਪਟਿਗ੍ਗਣ੍ਹਾਤੁ ਅਨੁਕਮ੍ਪਂ ਉਪਾਦਾਯਾ’’ਤਿ. ਦੁਤਿਯਮ੍ਪਿ ਖੋ ਭਗਵਾ ਮਹਾਪਜਾਪਤਿਂ ਗੋਤਮਿਂ ਏਤਦਵੋਚ – ‘‘ਸਙ੍ਘੇ, ਗੋਤਮਿ, ਦੇਹਿ. ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ. ਤਤਿਯਮ੍ਪਿ ਖੋ ਮਹਾਪਜਾਪਤਿ ਗੋਤਮੀ ਭਗਵਨ੍ਤਂ ਏਤਦਵੋਚ – ‘‘ਇਦਂ ਮੇ, ਭਨ੍ਤੇ, ਨਵਂ ਦੁਸ੍ਸਯੁਗਂ ਭਗਵਨ੍ਤਂ ਉਦ੍ਦਿਸ੍ਸ ਸਾਮਂ ਕਨ੍ਤਂ ਸਾਮਂ ਵਾਯਿਤਂ. ਤਂ ਮੇ, ਭਨ੍ਤੇ, ਭਗਵਾ ਪਟਿਗ੍ਗਣ੍ਹਾਤੁ ਅਨੁਕਮ੍ਪਂ ਉਪਾਦਾਯਾ’’ਤਿ. ਤਤਿਯਮ੍ਪਿ ਖੋ ਭਗਵਾ ਮਹਾਪਜਾਪਤਿਂ ਗੋਤਮਿਂ ਏਤਦਵੋਚ – ‘‘ਸਙ੍ਘੇ, ਗੋਤਮਿ, ਦੇਹਿ. ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ.

੩੭੭. ਏਵਂ ਵੁਤ੍ਤੇ, ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਪਟਿਗ੍ਗਣ੍ਹਾਤੁ, ਭਨ੍ਤੇ, ਭਗਵਾ ਮਹਾਪਜਾਪਤਿਯਾ ਗੋਤਮਿਯਾ ਨਵਂ ਦੁਸ੍ਸਯੁਗਂ. ਬਹੂਪਕਾਰਾ [ਬਹੁਕਾਰਾ (ਸ੍ਯਾ. ਕਂ.)], ਭਨ੍ਤੇ, ਮਹਾਪਜਾਪਤਿ ਗੋਤਮੀ ਭਗਵਤੋ ਮਾਤੁਚ੍ਛਾ ਆਪਾਦਿਕਾ ਪੋਸਿਕਾ ਖੀਰਸ੍ਸ ਦਾਯਿਕਾ; ਭਗਵਨ੍ਤਂ ਜਨੇਤ੍ਤਿਯਾ ਕਾਲਙ੍ਕਤਾਯ ਥਞ੍ਞਂ ਪਾਯੇਸਿ. ਭਗਵਾਪਿ, ਭਨ੍ਤੇ, ਬਹੂਪਕਾਰੋ ਮਹਾਪਜਾਪਤਿਯਾ ਗੋਤਮਿਯਾ. ਭਗਵਨ੍ਤਂ, ਭਨ੍ਤੇ, ਆਗਮ੍ਮ ਮਹਾਪਜਾਪਤਿ ਗੋਤਮੀ ਬੁਦ੍ਧਂ ਸਰਣਂ ਗਤਾ, ਧਮ੍ਮਂ ਸਰਣਂ ਗਤਾ, ਸਙ੍ਘਂ ਸਰਣਂ ਗਤਾ. ਭਗਵਨ੍ਤਂ, ਭਨ੍ਤੇ, ਆਗਮ੍ਮ ਮਹਾਪਜਾਪਤਿ ਗੋਤਮੀ ਪਾਣਾਤਿਪਾਤਾ ਪਟਿਵਿਰਤਾ ਅਦਿਨ੍ਨਾਦਾਨਾ ਪਟਿਵਿਰਤਾ ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤਾ ਮੁਸਾਵਾਦਾ ਪਟਿਵਿਰਤਾ ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤਾ. ਭਗਵਨ੍ਤਂ, ਭਨ੍ਤੇ, ਆਗਮ੍ਮ ਮਹਾਪਜਾਪਤਿ ਗੋਤਮੀ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤਾ, ਧਮ੍ਮੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤਾ, ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤਾ ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤਾ. ਭਗਵਨ੍ਤਂ, ਭਨ੍ਤੇ, ਆਗਮ੍ਮ ਮਹਾਪਜਾਪਤਿ ਗੋਤਮੀ ਦੁਕ੍ਖੇ ਨਿਕ੍ਕਙ੍ਖਾ, ਦੁਕ੍ਖਸਮੁਦਯੇ ਨਿਕ੍ਕਙ੍ਖਾ, ਦੁਕ੍ਖਨਿਰੋਧੇ ਨਿਕ੍ਕਙ੍ਖਾ, ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਨਿਕ੍ਕਙ੍ਖਾ. ਭਗਵਾਪਿ, ਭਨ੍ਤੇ, ਬਹੂਪਕਾਰੋ ਮਹਾਪਜਾਪਤਿਯਾ ਗੋਤਮਿਯਾ’’ਤਿ.

੩੭੮. ‘‘ਏਵਮੇਤਂ, ਆਨਨ੍ਦ. ਯਂ ਹਾਨਨ੍ਦ, ਪੁਗ੍ਗਲੋ ਪੁਗ੍ਗਲਂ ਆਗਮ੍ਮ ਬੁਦ੍ਧਂ ਸਰਣਂ ਗਤੋ ਹੋਤਿ, ਧਮ੍ਮਂ ਸਰਣਂ ਗਤੋ ਹੋਤਿ, ਸਙ੍ਘਂ ਸਰਣਂ ਗਤੋ ਹੋਤਿ, ਇਮਸ੍ਸਾਨਨ੍ਦ, ਪੁਗ੍ਗਲਸ੍ਸ ਇਮਿਨਾ ਪੁਗ੍ਗਲੇਨ ਨ ਸੁਪ੍ਪਤਿਕਾਰਂ ਵਦਾਮਿ, ਯਦਿਦਂ – ਅਭਿਵਾਦਨ-ਪਚ੍ਚੁਟ੍ਠਾਨ-ਅਞ੍ਜਲਿਕਮ੍ਮ ਸਾਮੀਚਿਕਮ੍ਮਚੀਵਰਪਿਣ੍ਡਪਾਤਸੇਨਾਸਨਗਿਲਾ- ਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨੁਪ੍ਪਦਾਨੇਨ.

‘‘ਯਂ ਹਾਨਨ੍ਦ, ਪੁਗ੍ਗਲੋ ਪੁਗ੍ਗਲਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ, ਅਦਿਨ੍ਨਾਦਾਨਾ ਪਟਿਵਿਰਤੋ ਹੋਤਿ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਹੋਤਿ, ਮੁਸਾਵਾਦਾ ਪਟਿਵਿਰਤੋ ਹੋਤਿ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਪਟਿਵਿਰਤੋ ਹੋਤਿ, ਇਮਸ੍ਸਾਨਨ੍ਦ, ਪੁਗ੍ਗਲਸ੍ਸ ਇਮਿਨਾ ਪੁਗ੍ਗਲੇਨ ਨ ਸੁਪ੍ਪਤਿਕਾਰਂ ਵਦਾਮਿ, ਯਦਿਦਂ – ਅਭਿਵਾਦਨ-ਪਚ੍ਚੁਟ੍ਠਾਨ-ਅਞ੍ਜਲਿਕਮ੍ਮ-ਸਾਮੀਚਿਕਮ੍ਮਚੀਵਰਪਿਣ੍ਡਪਾਤਸੇਨਾਸਨਗਿਲਾ- ਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨੁਪ੍ਪਦਾਨੇਨ.

‘‘ਯਂ ਹਾਨਨ੍ਦ, ਪੁਗ੍ਗਲੋ ਪੁਗ੍ਗਲਂ ਆਗਮ੍ਮ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ ਹੋਤਿ, ਧਮ੍ਮੇ… ਸਙ੍ਘੇ… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ ਹੋਤਿ, ਇਮਸ੍ਸਾਨਨ੍ਦ, ਪੁਗ੍ਗਲਸ੍ਸ ਇਮਿਨਾ ਪੁਗ੍ਗਲੇਨ ਨ ਸੁਪ੍ਪਤਿਕਾਰਂ ਵਦਾਮਿ, ਯਦਿਦਂ – ਅਭਿਵਾਦਨ-ਪਚ੍ਚੁਟ੍ਠਾਨ-ਅਞ੍ਜਲਿਕਮ੍ਮ-ਸਾਮੀਚਿਕਮ੍ਮਚੀਵਰਪਿਣ੍ਡਪਾਤਸੇਨਾਸਨਗਿਲਾ- ਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨੁਪ੍ਪਦਾਨੇਨ.

‘‘ਯਂ ਹਾਨਨ੍ਦ, ਪੁਗ੍ਗਲੋ ਪੁਗ੍ਗਲਂ ਆਗਮ੍ਮ ਦੁਕ੍ਖੇ ਨਿਕ੍ਕਙ੍ਖੋ ਹੋਤਿ, ਦੁਕ੍ਖਸਮੁਦਯੇ ਨਿਕ੍ਕਙ੍ਖੋ ਹੋਤਿ, ਦੁਕ੍ਖਨਿਰੋਧੇ ਨਿਕ੍ਕਙ੍ਖੋ ਹੋਤਿ, ਦੁਕ੍ਖਨਿਰੋਧਗਾਮਿਨਿਯਾ ਪਟਿਪਦਾਯ ਨਿਕ੍ਕਙ੍ਖੋ ਹੋਤਿ, ਇਮਸ੍ਸਾਨਨ੍ਦ, ਪੁਗ੍ਗਲਸ੍ਸ ਇਮਿਨਾ ਪੁਗ੍ਗਲੇਨ ਨ ਸੁਪ੍ਪਤਿਕਾਰਂ ਵਦਾਮਿ, ਯਦਿਦਂ – ਅਭਿਵਾਦਨ-ਪਚ੍ਚੁਟ੍ਠਾਨਅਞ੍ਜਲਿਕਮ੍ਮ-ਸਾਮੀਚਿਕਮ੍ਮ-ਚੀਵਰਪਿਣ੍ਡਪਾਤਸੇਨਾਸਨਗਿਲਾ- ਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨੁਪ੍ਪਦਾਨੇਨ.

੩੭੯. ‘‘ਚੁਦ੍ਦਸ ਖੋ ਪਨਿਮਾਨਨ੍ਦ, ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਕਤਮਾ ਚੁਦ੍ਦਸ? ਤਥਾਗਤੇ ਅਰਹਨ੍ਤੇ ਸਮ੍ਮਾਸਮ੍ਬੁਦ੍ਧੇ ਦਾਨਂ ਦੇਤਿ – ਅਯਂ ਪਠਮਾ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਪਚ੍ਚੇਕਸਮ੍ਬੁਦ੍ਧੇ [ਪਚ੍ਚੇਕਬੁਦ੍ਧੇ (ਸੀ. ਪੀ.)] ਦਾਨਂ ਦੇਤਿ – ਅਯਂ ਦੁਤਿਯਾ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਤਥਾਗਤਸਾਵਕੇ ਅਰਹਨ੍ਤੇ ਦਾਨਂ ਦੇਤਿ – ਅਯਂ ਤਤਿਯਾ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਅਰਹਤ੍ਤਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਾਨਂ ਦੇਤਿ – ਅਯਂ ਚਤੁਤ੍ਥੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਅਨਾਗਾਮਿਸ੍ਸ ਦਾਨਂ ਦੇਤਿ – ਅਯਂ ਪਞ੍ਚਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਾਨਂ ਦੇਤਿ – ਅਯਂ ਛਟ੍ਠੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਸਕਦਾਗਾਮਿਸ੍ਸ ਦਾਨਂ ਦੇਤਿ – ਅਯਂ ਸਤ੍ਤਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਾਨਂ ਦੇਤਿ – ਅਯਂ ਅਟ੍ਠਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਸੋਤਾਪਨ੍ਨੇ ਦਾਨਂ ਦੇਤਿ – ਅਯਂ ਨਵਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਾਨਂ ਦੇਤਿ – ਅਯਂ ਦਸਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਬਾਹਿਰਕੇ ਕਾਮੇਸੁ ਵੀਤਰਾਗੇ ਦਾਨਂ ਦੇਤਿ – ਅਯਂ ਏਕਾਦਸਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਪੁਥੁਜ੍ਜਨਸੀਲਵਨ੍ਤੇ ਦਾਨਂ ਦੇਤਿ – ਅਯਂ ਦ੍ਵਾਦਸਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਪੁਥੁਜ੍ਜਨਦੁਸ੍ਸੀਲੇ ਦਾਨਂ ਦੇਤਿ – ਅਯਂ ਤੇਰਸਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾ. ਤਿਰਚ੍ਛਾਨਗਤੇ ਦਾਨਂ ਦੇਤਿ – ਅਯਂ ਚੁਦ੍ਦਸਮੀ ਪਾਟਿਪੁਗ੍ਗਲਿਕਾ ਦਕ੍ਖਿਣਾਤਿ.

‘‘ਤਤ੍ਰਾਨਨ੍ਦ, ਤਿਰਚ੍ਛਾਨਗਤੇ ਦਾਨਂ ਦਤ੍ਵਾ ਸਤਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ, ਪੁਥੁਜ੍ਜਨਦੁਸ੍ਸੀਲੇ ਦਾਨਂ ਦਤ੍ਵਾ ਸਹਸ੍ਸਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ, ਪੁਥੁਜ੍ਜਨਸੀਲਵਨ੍ਤੇ ਦਾਨਂ ਦਤ੍ਵਾ ਸਤਸਹਸ੍ਸਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ, ਬਾਹਿਰਕੇ ਕਾਮੇਸੁ ਵੀਤਰਾਗੇ ਦਾਨਂ ਦਤ੍ਵਾ ਕੋਟਿਸਤਸਹਸ੍ਸਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ, ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ ਦਾਨਂ ਦਤ੍ਵਾ ਅਸਙ੍ਖੇਯ੍ਯਾ ਅਪ੍ਪਮੇਯ੍ਯਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ, ਕੋ ਪਨ ਵਾਦੋ ਸੋਤਾਪਨ੍ਨੇ, ਕੋ ਪਨ ਵਾਦੋ ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ, ਕੋ ਪਨ ਵਾਦੋ ਸਕਦਾਗਾਮਿਸ੍ਸ, ਕੋ ਪਨ ਵਾਦੋ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ, ਕੋ ਪਨ ਵਾਦੋ ਅਨਾਗਾਮਿਸ੍ਸ, ਕੋ ਪਨ ਵਾਦੋ ਅਰਹਤ੍ਤਫਲਸਚ੍ਛਿਕਿਰਿਯਾਯ ਪਟਿਪਨ੍ਨੇ, ਕੋ ਪਨ ਵਾਦੋ ਅਰਹਨ੍ਤੇ, ਕੋ ਪਨ ਵਾਦੋ ਪਚ੍ਚੇਕਸਮ੍ਬੁਦ੍ਧੇ, ਕੋ ਪਨ ਵਾਦੋ ਤਥਾਗਤੇ ਅਰਹਨ੍ਤੇ ਸਮ੍ਮਾਸਮ੍ਬੁਦ੍ਧੇ!

੩੮੦. ‘‘ਸਤ੍ਤ ਖੋ ਪਨਿਮਾਨਨ੍ਦ, ਸਙ੍ਘਗਤਾ ਦਕ੍ਖਿਣਾ. ਕਤਮਾ ਸਤ੍ਤ? ਬੁਦ੍ਧਪ੍ਪਮੁਖੇ ਉਭਤੋਸਙ੍ਘੇ ਦਾਨਂ ਦੇਤਿ – ਅਯਂ ਪਠਮਾ ਸਙ੍ਘਗਤਾ ਦਕ੍ਖਿਣਾ. ਤਥਾਗਤੇ ਪਰਿਨਿਬ੍ਬੁਤੇ ਉਭਤੋਸਙ੍ਘੇ ਦਾਨਂ ਦੇਤਿ – ਅਯਂ ਦੁਤਿਯਾ ਸਙ੍ਘਗਤਾ ਦਕ੍ਖਿਣਾ. ਭਿਕ੍ਖੁਸਙ੍ਘੇ ਦਾਨਂ ਦੇਤਿ – ਅਯਂ ਤਤਿਯਾ ਸਙ੍ਘਗਤਾ ਦਕ੍ਖਿਣਾ. ਭਿਕ੍ਖੁਨਿਸਙ੍ਘੇ ਦਾਨਂ ਦੇਤਿ – ਅਯਂ ਚਤੁਤ੍ਥੀ ਸਙ੍ਘਗਤਾ ਦਕ੍ਖਿਣਾ. ‘ਏਤ੍ਤਕਾ ਮੇ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਸਙ੍ਘਤੋ ਉਦ੍ਦਿਸ੍ਸਥਾ’ਤਿ ਦਾਨਂ ਦੇਤਿ – ਅਯਂ ਪਞ੍ਚਮੀ ਸਙ੍ਘਗਤਾ ਦਕ੍ਖਿਣਾ. ‘ਏਤ੍ਤਕਾ ਮੇ ਭਿਕ੍ਖੂ ਸਙ੍ਘਤੋ ਉਦ੍ਦਿਸ੍ਸਥਾ’ਤਿ ਦਾਨਂ ਦੇਤਿ – ਅਯਂ ਛਟ੍ਠੀ ਸਙ੍ਘਗਤਾ ਦਕ੍ਖਿਣਾ. ‘ਏਤ੍ਤਕਾ ਮੇ ਭਿਕ੍ਖੁਨਿਯੋ ਸਙ੍ਘਤੋ ਉਦ੍ਦਿਸ੍ਸਥਾ’ਤਿ ਦਾਨਂ ਦੇਤਿ – ਅਯਂ ਸਤ੍ਤਮੀ ਸਙ੍ਘਗਤਾ ਦਕ੍ਖਿਣਾ.

‘‘ਭਵਿਸ੍ਸਨ੍ਤਿ ਖੋ ਪਨਾਨਨ੍ਦ, ਅਨਾਗਤਮਦ੍ਧਾਨਂ ਗੋਤ੍ਰਭੁਨੋ ਕਾਸਾਵਕਣ੍ਠਾ ਦੁਸ੍ਸੀਲਾ ਪਾਪਧਮ੍ਮਾ. ਤੇਸੁ ਦੁਸ੍ਸੀਲੇਸੁ ਸਙ੍ਘਂ ਉਦ੍ਦਿਸ੍ਸ ਦਾਨਂ ਦਸ੍ਸਨ੍ਤਿ. ਤਦਾਪਾਹਂ, ਆਨਨ੍ਦ, ਸਙ੍ਘਗਤਂ ਦਕ੍ਖਿਣਂ ਅਸਙ੍ਖੇਯ੍ਯਂ ਅਪ੍ਪਮੇਯ੍ਯਂ ਵਦਾਮਿ. ਨ ਤ੍ਵੇਵਾਹਂ, ਆਨਨ੍ਦ, ਕੇਨਚਿ ਪਰਿਯਾਯੇਨ ਸਙ੍ਘਗਤਾਯ ਦਕ੍ਖਿਣਾਯ ਪਾਟਿਪੁਗ੍ਗਲਿਕਂ ਦਾਨਂ ਮਹਪ੍ਫਲਤਰਂ ਵਦਾਮਿ.

੩੮੧. ‘‘ਚਤਸ੍ਸੋ ਖੋ ਇਮਾ, ਆਨਨ੍ਦ, ਦਕ੍ਖਿਣਾ ਵਿਸੁਦ੍ਧਿਯੋ. ਕਤਮਾ ਚਤਸ੍ਸੋ? ਅਤ੍ਥਾਨਨ੍ਦ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ ਨੋ ਪਟਿਗ੍ਗਾਹਕਤੋ. ਅਤ੍ਥਾਨਨ੍ਦ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ ਨੋ ਦਾਯਕਤੋ. ਅਤ੍ਥਾਨਨ੍ਦ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ ਨੋ ਪਟਿਗ੍ਗਾਹਕਤੋ. ਅਤ੍ਥਾਨਨ੍ਦ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ.

‘‘ਕਥਞ੍ਚਾਨਨ੍ਦ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ ਨੋ ਪਟਿਗ੍ਗਾਹਕਤੋ? ਇਧਾਨਨ੍ਦ, ਦਾਯਕੋ ਹੋਤਿ ਸੀਲਵਾ ਕਲ੍ਯਾਣਧਮ੍ਮੋ, ਪਟਿਗ੍ਗਾਹਕਾ ਹੋਨ੍ਤਿ ਦੁਸ੍ਸੀਲਾ ਪਾਪਧਮ੍ਮਾ – ਏਵਂ ਖੋ, ਆਨਨ੍ਦ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ ਨੋ ਪਟਿਗ੍ਗਾਹਕਤੋ.

‘‘ਕਥਞ੍ਚਾਨਨ੍ਦ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ ਨੋ ਦਾਯਕਤੋ? ਇਧਾਨਨ੍ਦ, ਦਾਯਕੋ ਹੋਤਿ ਦੁਸ੍ਸੀਲੋ ਪਾਪਧਮ੍ਮੋ, ਪਟਿਗ੍ਗਾਹਕਾ ਹੋਨ੍ਤਿ ਸੀਲਵਨ੍ਤੋ [ਸੀਲਵਨ੍ਤਾ (ਸੀ.)] ਕਲ੍ਯਾਣਧਮ੍ਮਾ – ਏਵਂ ਖੋ, ਆਨਨ੍ਦ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ ਨੋ ਦਾਯਕਤੋ.

‘‘ਕਥਞ੍ਚਾਨਨ੍ਦ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ ਨੋ ਪਟਿਗ੍ਗਾਹਕਤੋ? ਇਧਾਨਨ੍ਦ, ਦਾਯਕੋ ਚ ਹੋਤਿ ਦੁਸ੍ਸੀਲੋ ਪਾਪਧਮ੍ਮੋ, ਪਟਿਗ੍ਗਾਹਕਾ ਚ ਹੋਨ੍ਤਿ ਦੁਸ੍ਸੀਲਾ ਪਾਪਧਮ੍ਮਾ – ਏਵਂ ਖੋ, ਆਨਨ੍ਦ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ ਨੋ ਪਟਿਗ੍ਗਾਹਕਤੋ.

‘‘ਕਥਞ੍ਚਾਨਨ੍ਦ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ? ਇਧਾਨਨ੍ਦ, ਦਾਯਕੋ ਚ ਹੋਤਿ ਸੀਲਵਾ ਕਲ੍ਯਾਣਧਮ੍ਮੋ, ਪਟਿਗ੍ਗਾਹਕਾ ਚ ਹੋਨ੍ਤਿ ਸੀਲਵਨ੍ਤੋ ਕਲ੍ਯਾਣਧਮ੍ਮਾ – ਏਵਂ ਖੋ, ਆਨਨ੍ਦ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ. ਇਮਾ ਖੋ, ਆਨਨ੍ਦ, ਚਤਸ੍ਸੋ ਦਕ੍ਖਿਣਾ ਵਿਸੁਦ੍ਧਿਯੋ’’ਤਿ.

ਇਦਮਵੋਚ ਭਗਵਾ. ਇਦਂ ਵਤ੍ਵਾਨ ਸੁਗਤੋ ਅਥਾਪਰਂ ਏਤਦਵੋਚ ਸਤ੍ਥਾ –

੩੮੨. ‘‘ਯੋ ਸੀਲਵਾ ਦੁਸ੍ਸੀਲੇਸੁ ਦਦਾਤਿ ਦਾਨਂ,

ਧਮ੍ਮੇਨ ਲਦ੍ਧਂ [ਲਦ੍ਧਾ (ਸੀ. ਪੀ.)] ਸੁਪਸਨ੍ਨਚਿਤ੍ਤੋ;

ਅਭਿਸਦ੍ਦਹਂ ਕਮ੍ਮਫਲਂ ਉਲ਼ਾਰਂ,

ਸਾ ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ.

‘‘ਯੋ ਦੁਸ੍ਸੀਲੋ ਸੀਲਵਨ੍ਤੇਸੁ ਦਦਾਤਿ ਦਾਨਂ,

ਅਧਮ੍ਮੇਨ ਲਦ੍ਧਂ ਅਪ੍ਪਸਨ੍ਨਚਿਤ੍ਤੋ;

ਅਨਭਿਸਦ੍ਦਹਂ ਕਮ੍ਮਫਲਂ ਉਲ਼ਾਰਂ,

ਸਾ ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ.

‘‘ਯੋ ਦੁਸ੍ਸੀਲੋ ਦੁਸ੍ਸੀਲੇਸੁ ਦਦਾਤਿ ਦਾਨਂ,

ਅਧਮ੍ਮੇਨ ਲਦ੍ਧਂ ਅਪ੍ਪਸਨ੍ਨਚਿਤ੍ਤੋ;

ਅਨਭਿਸਦ੍ਦਹਂ ਕਮ੍ਮਫਲਂ ਉਲ਼ਾਰਂ,

ਨ ਤਂ ਦਾਨਂ ਵਿਪੁਲਪ੍ਫਲਨ੍ਤਿ ਬ੍ਰੂਮਿ.

‘‘ਯੋ ਸੀਲਵਾ ਸੀਲਵਨ੍ਤੇਸੁ ਦਦਾਤਿ ਦਾਨਂ,

ਧਮ੍ਮੇਨ ਲਦ੍ਧਂ ਸੁਪਸਨ੍ਨਚਿਤ੍ਤੋ;

ਅਭਿਸਦ੍ਦਹਂ ਕਮ੍ਮਫਲਂ ਉਲ਼ਾਰਂ,

ਤਂ ਵੇ ਦਾਨਂ ਵਿਪੁਲਪ੍ਫਲਨ੍ਤਿ ਬ੍ਰੂਮਿ [ਸਾ ਦਕ੍ਖਿਣਾ ਨੇਵੁਭਤੋ ਵਿਸੁਜ੍ਝਤਿ (ਸੀ. ਪੀ.)].

‘‘ਯੋ ਵੀਤਰਾਗੋ ਵੀਤਰਾਗੇਸੁ ਦਦਾਤਿ ਦਾਨਂ,

ਧਮ੍ਮੇਨ ਲਦ੍ਧਂ ਸੁਪਸਨ੍ਨਚਿਤ੍ਤੋ;

ਅਭਿਸਦ੍ਦਹਂ ਕਮ੍ਮਫਲਂ ਉਲ਼ਾਰਂ,

ਤਂ ਵੇ ਦਾਨਂ ਆਮਿਸਦਾਨਾਨਮਗ੍ਗ’’ [ਤਂ ਵੇ ਦਾਨਂ ਵਿਪੁਲਨ੍ਤਿ ਬ੍ਰੂਮਿ (ਸੀ.)] ਨ੍ਤਿ.

ਦਕ੍ਖਿਣਾਵਿਭਙ੍ਗਸੁਤ੍ਤਂ ਨਿਟ੍ਠਿਤਂ ਦ੍ਵਾਦਸਮਂ.

ਵਿਭਙ੍ਗਵਗ੍ਗੋ ਨਿਟ੍ਠਿਤੋ ਚਤੁਤ੍ਥੋ.