੬. ਏਸੁਕਾਰੀਸੁਤ੍ਤਂ

੪੩੬. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਏਸੁਕਾਰੀ ਬ੍ਰਾਹ੍ਮਣੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤਾ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਏਸੁਕਾਰੀ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਬ੍ਰਾਹ੍ਮਣਾ, ਭੋ ਗੋਤਮ, ਚਤਸ੍ਸੋ ਪਾਰਿਚਰਿਯਾ ਪਞ੍ਞਪੇਨ੍ਤਿ – ਬ੍ਰਾਹ੍ਮਣਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ, ਖਤ੍ਤਿਯਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ, ਵੇਸ੍ਸਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ, ਸੁਦ੍ਦਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਬ੍ਰਾਹ੍ਮਣਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ – ‘ਬ੍ਰਾਹ੍ਮਣੋ ਵਾ ਬ੍ਰਾਹ੍ਮਣਂ ਪਰਿਚਰੇਯ੍ਯ, ਖਤ੍ਤਿਯੋ ਵਾ ਬ੍ਰਾਹ੍ਮਣਂ ਪਰਿਚਰੇਯ੍ਯ, ਵੇਸ੍ਸੋ ਵਾ ਬ੍ਰਾਹ੍ਮਣਂ ਪਰਿਚਰੇਯ੍ਯ, ਸੁਦ੍ਦੋ ਵਾ ਬ੍ਰਾਹ੍ਮਣਂ ਪਰਿਚਰੇਯ੍ਯਾ’ਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਬ੍ਰਾਹ੍ਮਣਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਖਤ੍ਤਿਯਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ – ‘ਖਤ੍ਤਿਯੋ ਵਾ ਖਤ੍ਤਿਯਂ ਪਰਿਚਰੇਯ੍ਯ, ਵੇਸ੍ਸੋ ਵਾ ਖਤ੍ਤਿਯਂ ਪਰਿਚਰੇਯ੍ਯ, ਸੁਦ੍ਦੋ ਵਾ ਖਤ੍ਤਿਯਂ ਪਰਿਚਰੇਯ੍ਯਾ’ਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਖਤ੍ਤਿਯਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਵੇਸ੍ਸਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ – ‘ਵੇਸ੍ਸੋ ਵਾ ਵੇਸ੍ਸਂ ਪਰਿਚਰੇਯ੍ਯ, ਸੁਦ੍ਦੋ ਵਾ ਵੇਸ੍ਸਂ ਪਰਿਚਰੇਯ੍ਯਾ’ਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਵੇਸ੍ਸਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਸੁਦ੍ਦਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ – ‘ਸੁਦ੍ਦੋਵ ਸੁਦ੍ਦਂ ਪਰਿਚਰੇਯ੍ਯ. ਕੋ ਪਨਞ੍ਞੋ ਸੁਦ੍ਦਂ ਪਰਿਚਰਿਸ੍ਸਤੀ’ਤਿ? ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਸੁਦ੍ਦਸ੍ਸ ਪਾਰਿਚਰਿਯਂ ਪਞ੍ਞਪੇਨ੍ਤਿ. ਬ੍ਰਾਹ੍ਮਣਾ, ਭੋ ਗੋਤਮ, ਇਮਾ ਚਤਸ੍ਸੋ ਪਾਰਿਚਰਿਯਾ ਪਞ੍ਞਪੇਨ੍ਤਿ. ਇਧ ਭਵਂ ਗੋਤਮੋ ਕਿਮਾਹਾ’’ਤਿ?

੪੩੭. ‘‘ਕਿਂ ਪਨ, ਬ੍ਰਾਹ੍ਮਣ, ਸਬ੍ਬੋ ਲੋਕੋ ਬ੍ਰਾਹ੍ਮਣਾਨਂ ਏਤਦਬ੍ਭਨੁਜਾਨਾਤਿ – ‘ਇਮਾ ਚਤਸ੍ਸੋ ਪਾਰਿਚਰਿਯਾ ਪਞ੍ਞਪੇਨ੍ਤੂ’’’ਤਿ [ਪਞ੍ਞਪੇਨ੍ਤੀਤਿ (ਸੀ. ਕ.)]? ‘‘ਨੋ ਹਿਦਂ, ਭੋ ਗੋਤਮ’’. ‘‘ਸੇਯ੍ਯਥਾਪਿ, ਬ੍ਰਾਹ੍ਮਣ, ਪੁਰਿਸੋ ਦਲਿਦ੍ਦੋ [ਦਲ਼ਿਦ੍ਦੋ (ਸੀ. ਸ੍ਯਾ. ਕਂ. ਪੀ.)] ਅਸ੍ਸਕੋ ਅਨਾਲ਼੍ਹਿਯੋ. ਤਸ੍ਸ ਅਕਾਮਸ੍ਸ ਬਿਲਂ ਓਲਗ੍ਗੇਯ੍ਯੁਂ – ‘ਇਦਂ ਤੇ, ਅਮ੍ਭੋ ਪੁਰਿਸ, ਮਂਸਂ ਖਾਦਿਤਬ੍ਬਂ, ਮੂਲਞ੍ਚ ਅਨੁਪ੍ਪਦਾਤਬ੍ਬ’ਨ੍ਤਿ. ਏਵਮੇਵ ਖੋ, ਬ੍ਰਾਹ੍ਮਣ, ਬ੍ਰਾਹ੍ਮਣਾ ਅਪ੍ਪਟਿਞ੍ਞਾਯ ਤੇਸਂ ਸਮਣਬ੍ਰਾਹ੍ਮਣਾਨਂ, ਅਥ ਚ ਪਨਿਮਾ ਚਤਸ੍ਸੋ ਪਾਰਿਚਰਿਯਾ ਪਞ੍ਞਪੇਨ੍ਤਿ. ਨਾਹਂ, ਬ੍ਰਾਹ੍ਮਣ, ‘ਸਬ੍ਬਂ ਪਰਿਚਰਿਤਬ੍ਬ’ਨ੍ਤਿ ਵਦਾਮਿ; ਨਾਹਂ, ਬ੍ਰਾਹ੍ਮਣ, ‘ਸਬ੍ਬਂ ਨ ਪਰਿਚਰਿਤਬ੍ਬ’ਨ੍ਤਿ ਵਦਾਮਿ. ਯਂ ਹਿਸ੍ਸ, ਬ੍ਰਾਹ੍ਮਣ, ਪਰਿਚਰਤੋ ਪਾਰਿਚਰਿਯਾਹੇਤੁ ਪਾਪਿਯੋ ਅਸ੍ਸ ਨ ਸੇਯ੍ਯੋ, ਨਾਹਂ ਤਂ ‘ਪਰਿਚਰਿਤਬ੍ਬ’ਨ੍ਤਿ ਵਦਾਮਿ; ਯਞ੍ਚ ਖ੍ਵਾਸ੍ਸ, ਬ੍ਰਾਹ੍ਮਣ, ਪਰਿਚਰਤੋ ਪਾਰਿਚਰਿਯਾਹੇਤੁ ਸੇਯ੍ਯੋ ਅਸ੍ਸ ਨ ਪਾਪਿਯੋ ਤਮਹਂ ‘ਪਰਿਚਰਿਤਬ੍ਬ’ਨ੍ਤਿ ਵਦਾਮਿ. ਖਤ੍ਤਿਯਂ ਚੇਪਿ, ਬ੍ਰਾਹ੍ਮਣ, ਏਵਂ ਪੁਚ੍ਛੇਯ੍ਯੁਂ – ‘ਯਂ ਵਾ ਤੇ ਪਰਿਚਰਤੋ ਪਾਰਿਚਰਿਯਾਹੇਤੁ ਪਾਪਿਯੋ ਅਸ੍ਸ ਨ ਸੇਯ੍ਯੋ, ਯਂ ਵਾ ਤੇ ਪਰਿਚਰਤੋ ਪਾਰਿਚਰਿਯਾਹੇਤੁ ਸੇਯ੍ਯੋ ਅਸ੍ਸ ਨ ਪਾਪਿਯੋ; ਕਮੇਤ੍ਥ ਪਰਿਚਰੇਯ੍ਯਾਸੀ’ਤਿ, ਖਤ੍ਤਿਯੋਪਿ ਹਿ, ਬ੍ਰਾਹ੍ਮਣ, ਸਮ੍ਮਾ ਬ੍ਯਾਕਰਮਾਨੋ ਏਵਂ ਬ੍ਯਾਕਰੇਯ੍ਯ – ‘ਯਞ੍ਹਿ ਮੇ ਪਰਿਚਰਤੋ ਪਾਰਿਚਰਿਯਾਹੇਤੁ ਪਾਪਿਯੋ ਅਸ੍ਸ ਨ ਸੇਯ੍ਯੋ, ਨਾਹਂ ਤਂ ਪਰਿਚਰੇਯ੍ਯਂ; ਯਞ੍ਚ ਖੋ ਮੇ ਪਰਿਚਰਤੋ ਪਾਰਿਚਰਿਯਾਹੇਤੁ ਸੇਯ੍ਯੋ ਅਸ੍ਸ ਨ ਪਾਪਿਯੋ ਤਮਹਂ ਪਰਿਚਰੇਯ੍ਯ’ਨ੍ਤਿ. ਬ੍ਰਾਹ੍ਮਣਂ ਚੇਪਿ, ਬ੍ਰਾਹ੍ਮਣ…ਪੇ… ਵੇਸ੍ਸਂ ਚੇਪਿ, ਬ੍ਰਾਹ੍ਮਣ…ਪੇ… ਸੁਦ੍ਦਂ ਚੇਪਿ, ਬ੍ਰਾਹ੍ਮਣ, ਏਵਂ ਪੁਚ੍ਛੇਯ੍ਯੁਂ – ‘ਯਂ ਵਾ ਤੇ ਪਰਿਚਰਤੋ ਪਾਰਿਚਰਿਯਾਹੇਤੁ ਪਾਪਿਯੋ ਅਸ੍ਸ ਨ ਸੇਯ੍ਯੋ, ਯਂ ਵਾ ਤੇ ਪਰਿਚਰਤੋ ਪਾਰਿਚਰਿਯਾਹੇਤੁ ਸੇਯ੍ਯੋ ਅਸ੍ਸ ਨ ਪਾਪਿਯੋ; ਕਮੇਤ੍ਥ ਪਰਿਚਰੇਯ੍ਯਾਸੀ’ਤਿ, ਸੁਦ੍ਦੋਪਿ ਹਿ, ਬ੍ਰਾਹ੍ਮਣ, ਸਮ੍ਮਾ ਬ੍ਯਾਕਰਮਾਨੋ ਏਵਂ ਬ੍ਯਾਕਰੇਯ੍ਯ – ‘ਯਞ੍ਹਿ ਮੇ ਪਰਿਚਰਤੋ ਪਾਰਿਚਰਿਯਾਹੇਤੁ ਪਾਪਿਯੋ ਅਸ੍ਸ ਨ ਸੇਯ੍ਯੋ, ਨਾਹਂ ਤਂ ਪਰਿਚਰੇਯ੍ਯਂ; ਯਞ੍ਚ ਖੋ ਮੇ ਪਰਿਚਰਤੋ ਪਾਰਿਚਰਿਯਾਹੇਤੁ ਸੇਯ੍ਯੋ ਅਸ੍ਸ ਨ ਪਾਪਿਯੋ ਤਮਹਂ ਪਰਿਚਰੇਯ੍ਯ’ਨ੍ਤਿ. ਨਾਹਂ, ਬ੍ਰਾਹ੍ਮਣ, ‘ਉਚ੍ਚਾਕੁਲੀਨਤਾ ਸੇਯ੍ਯਂਸੋ’ਤਿ ਵਦਾਮਿ, ਨ ਪਨਾਹਂ, ਬ੍ਰਾਹ੍ਮਣ, ‘ਉਚ੍ਚਾਕੁਲੀਨਤਾ ਪਾਪਿਯਂਸੋ’ਤਿ ਵਦਾਮਿ; ਨਾਹਂ, ਬ੍ਰਾਹ੍ਮਣ, ‘ਉਲ਼ਾਰਵਣ੍ਣਤਾ ਸੇਯ੍ਯਂਸੋ’ਤਿ ਵਦਾਮਿ, ਨ ਪਨਾਹਂ, ਬ੍ਰਾਹ੍ਮਣ, ‘ਉਲ਼ਾਰਵਣ੍ਣਤਾ ਪਾਪਿਯਂਸੋ’ਤਿ ਵਦਾਮਿ; ਨਾਹਂ, ਬ੍ਰਾਹ੍ਮਣ, ‘ਉਲ਼ਾਰਭੋਗਤਾ ਸੇਯ੍ਯਂਸੋ’ਤਿ ਵਦਾਮਿ, ਨ ਪਨਾਹਂ, ਬ੍ਰਾਹ੍ਮਣ, ‘ਉਲ਼ਾਰਭੋਗਤਾ ਪਾਪਿਯਂਸੋ’ਤਿ ਵਦਾਮਿ.

੪੩੮. ‘‘ਉਚ੍ਚਾਕੁਲੀਨੋਪਿ ਹਿ, ਬ੍ਰਾਹ੍ਮਣ, ਇਧੇਕਚ੍ਚੋ ਪਾਣਾਤਿਪਾਤੀ ਹੋਤਿ, ਅਦਿਨ੍ਨਾਦਾਯੀ ਹੋਤਿ, ਕਾਮੇਸੁਮਿਚ੍ਛਾਚਾਰੀ ਹੋਤਿ, ਮੁਸਾਵਾਦੀ ਹੋਤਿ, ਪਿਸੁਣਾਵਾਚੋ ਹੋਤਿ, ਫਰੁਸਾਵਾਚੋ ਹੋਤਿ, ਸਮ੍ਫਪ੍ਪਲਾਪੀ ਹੋਤਿ, ਅਭਿਜ੍ਝਾਲੁ ਹੋਤਿ, ਬ੍ਯਾਪਨ੍ਨਚਿਤ੍ਤੋ ਹੋਤਿ, ਮਿਚ੍ਛਾਦਿਟ੍ਠਿ ਹੋਤਿ. ਤਸ੍ਮਾ ‘ਨ ਉਚ੍ਚਾਕੁਲੀਨਤਾ ਸੇਯ੍ਯਂਸੋ’ਤਿ ਵਦਾਮਿ. ਉਚ੍ਚਾਕੁਲੀਨੋਪਿ ਹਿ, ਬ੍ਰਾਹ੍ਮਣ, ਇਧੇਕਚ੍ਚੋ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ, ਅਦਿਨ੍ਨਾਦਾਨਾ ਪਟਿਵਿਰਤੋ ਹੋਤਿ, ਕਾਮੇਸੁਮਿਚ੍ਛਾਚਾਰਾ ਪਟਿਵਿਰਤੋ ਹੋਤਿ, ਮੁਸਾਵਾਦਾ ਪਟਿਵਿਰਤੋ ਹੋਤਿ, ਪਿਸੁਣਾਯ ਵਾਚਾਯ ਪਟਿਵਿਰਤੋ ਹੋਤਿ, ਫਰੁਸਾਯ ਵਾਚਾਯ ਪਟਿਵਿਰਤੋ ਹੋਤਿ, ਸਮ੍ਫਪ੍ਪਲਾਪਾ ਪਟਿਵਿਰਤੋ ਹੋਤਿ, ਅਨਭਿਜ੍ਝਾਲੁ ਹੋਤਿ, ਅਬ੍ਯਾਪਨ੍ਨਚਿਤ੍ਤੋ ਹੋਤਿ, ਸਮ੍ਮਾਦਿਟ੍ਠਿ ਹੋਤਿ. ਤਸ੍ਮਾ ‘ਨ ਉਚ੍ਚਾਕੁਲੀਨਤਾ ਪਾਪਿਯਂਸੋ’ਤਿ ਵਦਾਮਿ.

੪੩੯. ‘‘ਉਲ਼ਾਰਵਣ੍ਣੋਪਿ ਹਿ, ਬ੍ਰਾਹ੍ਮਣ…ਪੇ… ਉਲ਼ਾਰਭੋਗੋਪਿ ਹਿ, ਬ੍ਰਾਹ੍ਮਣ, ਇਧੇਕਚ੍ਚੋ ਪਾਣਾਤਿਪਾਤੀ ਹੋਤਿ…ਪੇ… ਮਿਚ੍ਛਾਦਿਟ੍ਠਿ ਹੋਤਿ. ਤਸ੍ਮਾ ‘ਨ ਉਲ਼ਾਰਭੋਗਤਾ ਸੇਯ੍ਯਂਸੋ’ਤਿ ਵਦਾਮਿ. ਉਲ਼ਾਰਭੋਗੋਪਿ ਹਿ, ਬ੍ਰਾਹ੍ਮਣ, ਇਧੇਕਚ੍ਚੋ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ. ਤਸ੍ਮਾ ‘ਨ ਉਲ਼ਾਰਭੋਗਤਾ ਪਾਪਿਯਂਸੋ’ਤਿ ਵਦਾਮਿ. ਨਾਹਂ, ਬ੍ਰਾਹ੍ਮਣ, ‘ਸਬ੍ਬਂ ਪਰਿਚਰਿਤਬ੍ਬ’ਨ੍ਤਿ ਵਦਾਮਿ, ਨ ਪਨਾਹਂ, ਬ੍ਰਾਹ੍ਮਣ, ‘ਸਬ੍ਬਂ ਨ ਪਰਿਚਰਿਤਬ੍ਬ’ਨ੍ਤਿ ਵਦਾਮਿ. ਯਂ ਹਿਸ੍ਸ, ਬ੍ਰਾਹ੍ਮਣ, ਪਰਿਚਰਤੋ ਪਾਰਿਚਰਿਯਾਹੇਤੁ ਸਦ੍ਧਾ ਵਡ੍ਢਤਿ, ਸੀਲਂ ਵਡ੍ਢਤਿ, ਸੁਤਂ ਵਡ੍ਢਤਿ, ਚਾਗੋ ਵਡ੍ਢਤਿ, ਪਞ੍ਞਾ ਵਡ੍ਢਤਿ, ਤਮਹਂ ‘ਪਰਿਚਰਿਤਬ੍ਬ’ਨ੍ਤਿ (ਵਦਾਮਿ. ਯਂ ਹਿਸ੍ਸ, ਬ੍ਰਾਹ੍ਮਣ, ਪਰਿਚਰਤੋ ਪਾਰਿਚਰਿਯਾਹੇਤੁ ਨ ਸਦ੍ਧਾ ਵਡ੍ਢਤਿ, ਨ ਸੀਲਂ ਵਡ੍ਢਤਿ, ਨ ਸੁਤਂ ਵਡ੍ਢਤਿ, ਨ ਚਾਗੋ ਵਡ੍ਢਤਿ, ਨ ਪਞ੍ਞਾ ਵਡ੍ਢਤਿ, ਨਾਹਂ ਤਂ ‘ਪਰਿਚਰਿਤਬ੍ਬ’ਨ੍ਤਿ) [( ) ਏਤ੍ਥਨ੍ਤਰੇ ਪਾਠੋ ਸੀ. ਸ੍ਯਾ. ਕਂ. ਪੀ. ਪੋਤ੍ਥਕੇਸੁ ਨਤ੍ਥਿ] ਵਦਾਮੀ’’ਤਿ.

੪੪੦. ਏਵਂ ਵੁਤ੍ਤੇ, ਏਸੁਕਾਰੀ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਬ੍ਰਾਹ੍ਮਣਾ, ਭੋ ਗੋਤਮ, ਚਤ੍ਤਾਰਿ ਧਨਾਨਿ ਪਞ੍ਞਪੇਨ੍ਤਿ – ਬ੍ਰਾਹ੍ਮਣਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ, ਖਤ੍ਤਿਯਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ, ਵੇਸ੍ਸਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ, ਸੁਦ੍ਦਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਬ੍ਰਾਹ੍ਮਣਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ ਭਿਕ੍ਖਾਚਰਿਯਂ; ਭਿਕ੍ਖਾਚਰਿਯਞ੍ਚ ਪਨ ਬ੍ਰਾਹ੍ਮਣੋ ਸਨ੍ਧਨਂ ਅਤਿਮਞ੍ਞਮਾਨੋ ਅਕਿਚ੍ਚਕਾਰੀ ਹੋਤਿ ਗੋਪੋਵ ਅਦਿਨ੍ਨਂ ਆਦਿਯਮਾਨੋਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਬ੍ਰਾਹ੍ਮਣਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਖਤ੍ਤਿਯਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ ਧਨੁਕਲਾਪਂ; ਧਨੁਕਲਾਪਞ੍ਚ ਪਨ ਖਤ੍ਤਿਯੋ ਸਨ੍ਧਨਂ ਅਤਿਮਞ੍ਞਮਾਨੋ ਅਕਿਚ੍ਚਕਾਰੀ ਹੋਤਿ ਗੋਪੋਵ ਅਦਿਨ੍ਨਂ ਆਦਿਯਮਾਨੋਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਖਤ੍ਤਿਯਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਵੇਸ੍ਸਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ ਕਸਿਗੋਰਕ੍ਖਂ; ਕਸਿਗੋਰਕ੍ਖਞ੍ਚ ਪਨ ਵੇਸ੍ਸੋ ਸਨ੍ਧਨਂ ਅਤਿਮਞ੍ਞਮਾਨੋ ਅਕਿਚ੍ਚਕਾਰੀ ਹੋਤਿ ਗੋਪੋਵ ਅਦਿਨ੍ਨਂ ਆਦਿਯਮਾਨੋਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਵੇਸ੍ਸਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ. ਤਤ੍ਰਿਦਂ, ਭੋ ਗੋਤਮ, ਬ੍ਰਾਹ੍ਮਣਾ ਸੁਦ੍ਦਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ ਅਸਿਤਬ੍ਯਾਭਙ੍ਗਿਂ; ਅਸਿਤਬ੍ਯਾਭਙ੍ਗਿਞ੍ਚ ਪਨ ਸੁਦ੍ਦੋ ਸਨ੍ਧਨਂ ਅਤਿਮਞ੍ਞਮਾਨੋ ਅਕਿਚ੍ਚਕਾਰੀ ਹੋਤਿ ਗੋਪੋਵ ਅਦਿਨ੍ਨਂ ਆਦਿਯਮਾਨੋਤਿ. ਇਦਂ ਖੋ, ਭੋ ਗੋਤਮ, ਬ੍ਰਾਹ੍ਮਣਾ ਸੁਦ੍ਦਸ੍ਸ ਸਨ੍ਧਨਂ ਪਞ੍ਞਪੇਨ੍ਤਿ. ਬ੍ਰਾਹ੍ਮਣਾ, ਭੋ ਗੋਤਮ, ਇਮਾਨਿ ਚਤ੍ਤਾਰਿ ਧਨਾਨਿ ਪਞ੍ਞਪੇਨ੍ਤਿ. ਇਧ ਭਵਂ ਗੋਤਮੋ ਕਿਮਾਹਾ’’ਤਿ?

੪੪੧. ‘‘ਕਿਂ ਪਨ, ਬ੍ਰਾਹ੍ਮਣ, ਸਬ੍ਬੋ ਲੋਕੋ ਬ੍ਰਾਹ੍ਮਣਾਨਂ ਏਤਦਬ੍ਭਨੁਜਾਨਾਤਿ – ‘ਇਮਾਨਿ ਚਤ੍ਤਾਰਿ ਧਨਾਨਿ ਪਞ੍ਞਪੇਨ੍ਤੂ’’’ਤਿ? ‘‘ਨੋ ਹਿਦਂ, ਭੋ ਗੋਤਮ’’. ‘‘ਸੇਯ੍ਯਥਾਪਿ, ਬ੍ਰਾਹ੍ਮਣ, ਪੁਰਿਸੋ ਦਲਿਦ੍ਦੋ ਅਸ੍ਸਕੋ ਅਨਾਲ਼੍ਹਿਯੋ. ਤਸ੍ਸ ਅਕਾਮਸ੍ਸ ਬਿਲਂ ਓਲਗ੍ਗੇਯ੍ਯੁਂ – ‘ਇਦਂ ਤੇ, ਅਮ੍ਭੋ ਪੁਰਿਸ, ਮਂਸਂ ਖਾਦਿਤਬ੍ਬਂ, ਮੂਲਞ੍ਚ ਅਨੁਪ੍ਪਦਾਤਬ੍ਬ’ਨ੍ਤਿ. ਏਵਮੇਵ ਖੋ, ਬ੍ਰਾਹ੍ਮਣ, ਬ੍ਰਾਹ੍ਮਣਾ ਅਪ੍ਪਟਿਞ੍ਞਾਯ ਤੇਸਂ ਸਮਣਬ੍ਰਾਹ੍ਮਣਾਨਂ, ਅਥ ਚ ਪਨਿਮਾਨਿ ਚਤ੍ਤਾਰਿ ਧਨਾਨਿ ਪਞ੍ਞਪੇਨ੍ਤਿ. ਅਰਿਯਂ ਖੋ ਅਹਂ, ਬ੍ਰਾਹ੍ਮਣ, ਲੋਕੁਤ੍ਤਰਂ ਧਮ੍ਮਂ ਪੁਰਿਸਸ੍ਸ ਸਨ੍ਧਨਂ ਪਞ੍ਞਪੇਮਿ. ਪੋਰਾਣਂ ਖੋ ਪਨਸ੍ਸ ਮਾਤਾਪੇਤ੍ਤਿਕਂ ਕੁਲਵਂਸਂ ਅਨੁਸ੍ਸਰਤੋ ਯਤ੍ਥ ਯਤ੍ਥੇਵ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ਤੇਨ ਤੇਨੇਵ ਸਙ੍ਖ੍ਯਂ ਗਚ੍ਛਤਿ. ਖਤ੍ਤਿਯਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਖਤ੍ਤਿਯੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਬ੍ਰਾਹ੍ਮਣਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਬ੍ਰਾਹ੍ਮਣੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਵੇਸ੍ਸਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਵੇਸ੍ਸੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਸੁਦ੍ਦਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਸੁਦ੍ਦੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਸੇਯ੍ਯਥਾਪਿ, ਬ੍ਰਾਹ੍ਮਣ, ਯਂਯਦੇਵ ਪਚ੍ਚਯਂ ਪਟਿਚ੍ਚ ਅਗ੍ਗਿ ਜਲਤਿ ਤੇਨ ਤੇਨੇਵ ਸਙ੍ਖ੍ਯਂ ਗਚ੍ਛਤਿ. ਕਟ੍ਠਞ੍ਚੇ ਪਟਿਚ੍ਚ ਅਗ੍ਗਿ ਜਲਤਿ ‘ਕਟ੍ਠਗ੍ਗਿ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਸਕਲਿਕਞ੍ਚੇ ਪਟਿਚ੍ਚ ਅਗ੍ਗਿ ਜਲਤਿ ‘ਸਕਲਿਕਗ੍ਗਿ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਤਿਣਞ੍ਚੇ ਪਟਿਚ੍ਚ ਅਗ੍ਗਿ ਜਲਤਿ ‘ਤਿਣਗ੍ਗਿ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਗੋਮਯਞ੍ਚੇ ਪਟਿਚ੍ਚ ਅਗ੍ਗਿ ਜਲਤਿ ‘ਗੋਮਯਗ੍ਗਿ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਏਵਮੇਵ ਖੋ ਅਹਂ, ਬ੍ਰਾਹ੍ਮਣ, ਅਰਿਯਂ ਲੋਕੁਤ੍ਤਰਂ ਧਮ੍ਮਂ ਪੁਰਿਸਸ੍ਸ ਸਨ੍ਧਨਂ ਪਞ੍ਞਪੇਮਿ. ਪੋਰਾਣਂ ਖੋ ਪਨਸ੍ਸ ਮਾਤਾਪੇਤ੍ਤਿਕਂ ਕੁਲਵਂਸਂ ਅਨੁਸ੍ਸਰਤੋ ਯਤ੍ਥ ਯਤ੍ਥੇਵ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ਤੇਨ ਤੇਨੇਵ ਸਙ੍ਖ੍ਯਂ ਗਚ੍ਛਤਿ.

‘‘ਖਤ੍ਤਿਯਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਖਤ੍ਤਿਯੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਬ੍ਰਾਹ੍ਮਣਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਬ੍ਰਾਹ੍ਮਣੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਵੇਸ੍ਸਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਵੇਸ੍ਸੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ; ਸੁਦ੍ਦਕੁਲੇ ਚੇ ਅਤ੍ਤਭਾਵਸ੍ਸ ਅਭਿਨਿਬ੍ਬਤ੍ਤਿ ਹੋਤਿ ‘ਸੁਦ੍ਦੋ’ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ.

‘‘ਖਤ੍ਤਿਯਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ, ਅਦਿਨ੍ਨਾਦਾਨਾ ਪਟਿਵਿਰਤੋ ਹੋਤਿ, ਅਬ੍ਰਹ੍ਮਚਰਿਯਾ ਪਟਿਵਿਰਤੋ ਹੋਤਿ, ਮੁਸਾਵਾਦਾ ਪਟਿਵਿਰਤੋ ਹੋਤਿ, ਪਿਸੁਣਾਯ ਵਾਚਾਯ ਪਟਿਵਿਰਤੋ ਹੋਤਿ, ਫਰੁਸਾਯ ਵਾਚਾਯ ਪਟਿਵਿਰਤੋ ਹੋਤਿ, ਸਮ੍ਫਪ੍ਪਲਾਪਾ ਪਟਿਵਿਰਤੋ ਹੋਤਿ, ਅਨਭਿਜ੍ਝਾਲੁ ਹੋਤਿ, ਅਬ੍ਯਾਪਨ੍ਨਚਿਤ੍ਤੋ ਹੋਤਿ, ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

‘‘ਬ੍ਰਾਹ੍ਮਣਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

‘‘ਵੇਸ੍ਸਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

‘‘ਸੁਦ੍ਦਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

੪੪੨. ‘‘ਤਂ ਕਿਂ ਮਞ੍ਞਸਿ, ਬ੍ਰਾਹ੍ਮਣ, ਬ੍ਰਾਹ੍ਮਣੋਵ ਨੁ ਖੋ ਪਹੋਤਿ ਅਸ੍ਮਿਂ ਪਦੇਸੇ ਅਵੇਰਂ ਅਬ੍ਯਾਬਜ੍ਝਂ ਮੇਤ੍ਤਚਿਤ੍ਤਂ ਭਾਵੇਤੁਂ, ਨੋ ਖਤ੍ਤਿਯੋ ਨੋ ਵੇਸ੍ਸੋ ਨੋ ਸੁਦ੍ਦੋ’’ਤਿ? ‘‘ਨੋ ਹਿਦਂ, ਭੋ ਗੋਤਮ. ਖਤ੍ਤਿਯੋਪਿ ਹਿ, ਭੋ ਗੋਤਮ, ਪਹੋਤਿ ਅਸ੍ਮਿਂ ਪਦੇਸੇ ਅਵੇਰਂ ਅਬ੍ਯਾਬਜ੍ਝਂ ਮੇਤ੍ਤਚਿਤ੍ਤਂ ਭਾਵੇਤੁਂ; ਬ੍ਰਾਹ੍ਮਣੋਪਿ ਹਿ, ਭੋ ਗੋਤਮ… ਵੇਸ੍ਸੋਪਿ ਹਿ, ਭੋ ਗੋਤਮ… ਸੁਦ੍ਦੋਪਿ ਹਿ, ਭੋ ਗੋਤਮ… ਸਬ੍ਬੇਪਿ ਹਿ, ਭੋ ਗੋਤਮ, ਚਤ੍ਤਾਰੋ ਵਣ੍ਣਾ ਪਹੋਨ੍ਤਿ ਅਸ੍ਮਿਂ ਪਦੇਸੇ ਅਵੇਰਂ ਅਬ੍ਯਾਬਜ੍ਝਂ ਮੇਤ੍ਤਚਿਤ੍ਤਂ ਭਾਵੇਤੁ’’ਨ੍ਤਿ. ‘‘ਏਵਮੇਵ ਖੋ, ਬ੍ਰਾਹ੍ਮਣ, ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

‘‘ਬ੍ਰਾਹ੍ਮਣਕੁਲਾ ਚੇਪਿ, ਬ੍ਰਾਹ੍ਮਣ… ਵੇਸ੍ਸਕੁਲਾ ਚੇਪਿ, ਬ੍ਰਾਹ੍ਮਣ… ਸੁਦ੍ਦਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

੪੪੩. ‘‘ਤਂ ਕਿਂ ਮਞ੍ਞਸਿ, ਬ੍ਰਾਹ੍ਮਣ, ਬ੍ਰਾਹ੍ਮਣੋਵ ਨੁ ਖੋ ਪਹੋਤਿ ਸੋਤ੍ਤਿਸਿਨਾਨਿਂ ਆਦਾਯ ਨਦਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤੁਂ, ਨੋ ਖਤ੍ਤਿਯੋ ਨੋ ਵੇਸ੍ਸੋ ਨੋ ਸੁਦ੍ਦੋ’’ਤਿ? ‘‘ਨੋ ਹਿਦਂ, ਭੋ ਗੋਤਮ. ਖਤ੍ਤਿਯੋਪਿ ਹਿ, ਭੋ ਗੋਤਮ, ਪਹੋਤਿ ਸੋਤ੍ਤਿਸਿਨਾਨਿਂ ਆਦਾਯ ਨਦਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤੁਂ; ਬ੍ਰਾਹ੍ਮਣੋਪਿ ਹਿ, ਭੋ ਗੋਤਮ… ਵੇਸ੍ਸੋਪਿ ਹਿ, ਭੋ ਗੋਤਮ … ਸੁਦ੍ਦੋਪਿ ਹਿ, ਭੋ ਗੋਤਮ… ਸਬ੍ਬੇਪਿ ਹਿ, ਭੋ ਗੋਤਮ, ਚਤ੍ਤਾਰੋ ਵਣ੍ਣਾ ਪਹੋਨ੍ਤਿ ਸੋਤ੍ਤਿਸਿਨਾਨਿਂ ਆਦਾਯ ਨਦਿਂ ਗਨ੍ਤ੍ਵਾ ਰਜੋਜਲ੍ਲਂ ਪਵਾਹੇਤੁ’’ਨ੍ਤਿ. ‘‘ਏਵਮੇਵ ਖੋ, ਬ੍ਰਾਹ੍ਮਣ, ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

‘‘ਬ੍ਰਾਹ੍ਮਣਕੁਲਾ ਚੇਪਿ, ਬ੍ਰਾਹ੍ਮਣ… ਵੇਸ੍ਸਕੁਲਾ ਚੇਪਿ, ਬ੍ਰਾਹ੍ਮਣ… ਸੁਦ੍ਦਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ.

੪੪੪. ‘‘ਤਂ ਕਿਂ ਮਞ੍ਞਸਿ, ਬ੍ਰਾਹ੍ਮਣ, ਇਧ ਰਾਜਾ ਖਤ੍ਤਿਯੋ ਮੁਦ੍ਧਾਵਸਿਤ੍ਤੋ ਨਾਨਾਜਚ੍ਚਾਨਂ ਪੁਰਿਸਾਨਂ ਪੁਰਿਸਸਤਂ ਸਨ੍ਨਿਪਾਤੇਯ੍ਯ – ‘ਆਯਨ੍ਤੁ ਭੋਨ੍ਤੋ ਯੇ ਤਤ੍ਥ ਖਤ੍ਤਿਯਕੁਲਾ ਬ੍ਰਾਹ੍ਮਣਕੁਲਾ ਰਾਜਞ੍ਞਕੁਲਾ ਉਪ੍ਪਨ੍ਨਾ ਸਾਕਸ੍ਸ ਵਾ ਸਾਲਸ੍ਸ ਵਾ ਸਲਲ਼ਸ੍ਸ ਵਾ ਚਨ੍ਦਨਸ੍ਸ ਵਾ ਪਦੁਮਕਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿਂ ਅਭਿਨਿਬ੍ਬਤ੍ਤੇਨ੍ਤੁ, ਤੇਜੋ ਪਾਤੁਕਰੋਨ੍ਤੁ; ਆਯਨ੍ਤੁ ਪਨ ਭੋਨ੍ਤੋ ਯੇ ਤਤ੍ਥ ਚਣ੍ਡਾਲਕੁਲਾ ਨੇਸਾਦਕੁਲਾ ਵੇਨਕੁਲਾ ਰਥਕਾਰਕੁਲਾ ਪੁਕ੍ਕੁਸਕੁਲਾ ਉਪ੍ਪਨ੍ਨਾ ਸਾਪਾਨਦੋਣਿਯਾ ਵਾ ਸੂਕਰਦੋਣਿਯਾ ਵਾ ਰਜਕਦੋਣਿਯਾ ਵਾ ਏਰਣ੍ਡਕਟ੍ਠਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿਂ ਅਭਿਨਿਬ੍ਬਤ੍ਤੇਨ੍ਤੁ, ਤੇਜੋ ਪਾਤੁਕਰੋਨ੍ਤੂ’’’ਤਿ?

‘‘ਤਂ ਕਿਂ ਮਞ੍ਞਸਿ, ਬ੍ਰਾਹ੍ਮਣ, ਯੋ ਏਵਂ ਨੁ ਖੋ ਸੋ ਖਤ੍ਤਿਯਕੁਲਾ ਬ੍ਰਾਹ੍ਮਣਕੁਲਾ ਰਾਜਞ੍ਞਕੁਲਾ ਉਪ੍ਪਨ੍ਨੇਹਿ ਸਾਕਸ੍ਸ ਵਾ ਸਾਲਸ੍ਸ ਵਾ ਸਲਲ਼ਸ੍ਸ ਵਾ ਚਨ੍ਦਨਸ੍ਸ ਵਾ ਪਦੁਮਕਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ ਤੇਜੋ ਪਾਤੁਕਤੋ ਸੋ ਏਵ ਨੁ ਖ੍ਵਾਸ੍ਸ ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ ਤੇਨ ਚ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁਂ; ਯੋ ਪਨ ਸੋ ਚਣ੍ਡਾਲਕੁਲਾ ਨੇਸਾਦਕੁਲਾ ਵੇਨਕੁਲਾ ਰਥਕਾਰਕੁਲਾ ਪੁਕ੍ਕੁਸਕੁਲਾ ਉਪ੍ਪਨ੍ਨੇਹਿ ਸਾਪਾਨਦੋਣਿਯਾ ਵਾ ਸੂਕਰਦੋਣਿਯਾ ਵਾ ਰਜਕਦੋਣਿਯਾ ਵਾ ਏਰਣ੍ਡਕਟ੍ਠਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ ਤੇਜੋ ਪਾਤੁਕਤੋ ਸ੍ਵਾਸ੍ਸ ਅਗ੍ਗਿ ਨ ਚੇਵ ਅਚ੍ਚਿਮਾ ਨ ਚ ਵਣ੍ਣਵਾ ਨ ਚ ਪਭਸ੍ਸਰੋ ਨ ਚ ਤੇਨ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁ’’ਨ੍ਤਿ? ‘‘ਨੋ ਹਿਦਂ, ਭੋ ਗੋਤਮ. ਯੋਪਿ ਹਿ ਸੋ, ਭੋ ਗੋਤਮ, ਖਤ੍ਤਿਯਕੁਲਾ ਬ੍ਰਾਹ੍ਮਣਕੁਲਾ ਰਾਜਞ੍ਞਕੁਲਾ ਉਪ੍ਪਨ੍ਨੇਹਿ ਸਾਕਸ੍ਸ ਵਾ ਸਾਲਸ੍ਸ ਵਾ ਸਲਲ਼ਸ੍ਸ ਵਾ ਚਨ੍ਦਨਸ੍ਸ ਵਾ ਪਦੁਮਕਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ ਤੇਜੋ ਪਾਤੁਕਤੋ ਸ੍ਵਾਸ੍ਸ ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ ਤੇਨ ਚ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁਂ; ਯੋਪਿ ਸੋ ਚਣ੍ਡਾਲਕੁਲਾ ਨੇਸਾਦਕੁਲਾ ਵੇਨਕੁਲਾ ਰਥਕਾਰਕੁਲਾ ਪੁਕ੍ਕੁਸਕੁਲਾ ਉਪ੍ਪਨ੍ਨੇਹਿ ਸਾਪਾਨਦੋਣਿਯਾ ਵਾ ਸੂਕਰਦੋਣਿਯਾ ਵਾ ਰਜਕਦੋਣਿਯਾ ਵਾ ਏਰਣ੍ਡਕਟ੍ਠਸ੍ਸ ਵਾ ਉਤ੍ਤਰਾਰਣਿਂ ਆਦਾਯ ਅਗ੍ਗਿ ਅਭਿਨਿਬ੍ਬਤ੍ਤੋ ਤੇਜੋ ਪਾਤੁਕਤੋ ਸ੍ਵਾਸ੍ਸ ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ ਤੇਨ ਚ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁਂ. ਸਬ੍ਬੋਪਿ ਹਿ, ਭੋ ਗੋਤਮ, ਅਗ੍ਗਿ ਅਚ੍ਚਿਮਾ ਚੇਵ ਵਣ੍ਣਵਾ ਚ ਪਭਸ੍ਸਰੋ ਚ ਸਬ੍ਬੇਨਪਿ ਸਕ੍ਕਾ ਅਗ੍ਗਿਨਾ ਅਗ੍ਗਿਕਰਣੀਯਂ ਕਾਤੁ’’ਨ੍ਤਿ.

‘‘ਏਵਮੇਵ ਖੋ, ਬ੍ਰਾਹ੍ਮਣ, ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ…ਪੇ… ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲਂ. ਬ੍ਰਾਹ੍ਮਣਕੁਲਾ ਚੇਪਿ, ਬ੍ਰਾਹ੍ਮਣ… ਵੇਸ੍ਸਕੁਲਾ ਚੇਪਿ, ਬ੍ਰਾਹ੍ਮਣ… ਸੁਦ੍ਦਕੁਲਾ ਚੇਪਿ, ਬ੍ਰਾਹ੍ਮਣ, ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ ਪਾਣਾਤਿਪਾਤਾ ਪਟਿਵਿਰਤੋ ਹੋਤਿ, ਅਦਿਨ੍ਨਾਦਾਨਾ ਪਟਿਵਿਰਤੋ ਹੋਤਿ, ਅਬ੍ਰਹ੍ਮਚਰਿਯਾ ਪਟਿਵਿਰਤੋ ਹੋਤਿ, ਮੁਸਾਵਾਦਾ ਪਟਿਵਿਰਤੋ ਹੋਤਿ, ਪਿਸੁਣਾਯ ਵਾਚਾਯ ਪਟਿਵਿਰਤੋ ਹੋਤਿ, ਫਰੁਸਾਯ ਵਾਚਾਯ ਪਟਿਵਿਰਤੋ ਹੋਤਿ, ਸਮ੍ਫਪ੍ਪਲਾਪਾ ਪਟਿਵਿਰਤੋ ਹੋਤਿ, ਅਨਭਿਜ੍ਝਾਲੁ ਹੋਤਿ, ਅਬ੍ਯਾਪਨ੍ਨਚਿਤ੍ਤੋ ਹੋਤਿ, ਸਮ੍ਮਾਦਿਟ੍ਠਿ ਹੋਤਿ, ਆਰਾਧਕੋ ਹੋਤਿ ਞਾਯਂ ਧਮ੍ਮਂ ਕੁਸਲ’’ਨ੍ਤਿ.

ਏਵਂ ਵੁਤ੍ਤੇ, ਏਸੁਕਾਰੀ ਬ੍ਰਾਹ੍ਮਣੋ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭੋ ਗੋਤਮ, ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ.

ਏਸੁਕਾਰੀਸੁਤ੍ਤਂ ਨਿਟ੍ਠਿਤਂ ਛਟ੍ਠਂ.