੮. ਸਮਣਮੁਣ੍ਡਿਕਸੁਤ੍ਤਂ

੨੬੦. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ [ਸਮਣਮਣ੍ਡਿਕਾਪੁਤ੍ਤੋ (ਸੀ. ਪੀ.)] ਸਮਯਪ੍ਪਵਾਦਕੇ ਤਿਨ੍ਦੁਕਾਚੀਰੇ ਏਕਸਾਲਕੇ ਮਲ੍ਲਿਕਾਯ ਆਰਾਮੇ ਪਟਿਵਸਤਿ ਮਹਤਿਯਾ ਪਰਿਬ੍ਬਾਜਕਪਰਿਸਾਯ ਸਦ੍ਧਿਂ ਪਞ੍ਚਮਤ੍ਤੇਹਿ ਪਰਿਬ੍ਬਾਜਕਸਤੇਹਿ. ਅਥ ਖੋ ਪਞ੍ਚਕਙ੍ਗੋ ਥਪਤਿ ਸਾਵਤ੍ਥਿਯਾ ਨਿਕ੍ਖਮਿ ਦਿਵਾ ਦਿਵਸ੍ਸ ਭਗਵਨ੍ਤਂ ਦਸ੍ਸਨਾਯ. ਅਥ ਖੋ ਪਞ੍ਚਕਙ੍ਗਸ੍ਸ ਥਪਤਿਸ੍ਸ ਏਤਦਹੋਸਿ – ‘‘ਅਕਾਲੋ ਖੋ ਤਾਵ ਭਗਵਨ੍ਤਂ ਦਸ੍ਸਨਾਯ; ਪਟਿਸਲ੍ਲੀਨੋ ਭਗਵਾ. ਮਨੋਭਾਵਨਿਯਾਨਮ੍ਪਿ ਭਿਕ੍ਖੂਨਂ ਅਸਮਯੋ ਦਸ੍ਸਨਾਯ; ਪਟਿਸਲ੍ਲੀਨਾ ਮਨੋਭਾਵਨਿਯਾ ਭਿਕ੍ਖੂ. ਯਂਨੂਨਾਹਂ ਯੇਨ ਸਮਯਪ੍ਪਵਾਦਕੋ ਤਿਨ੍ਦੁਕਾਚੀਰੋ ਏਕਸਾਲਕੋ ਮਲ੍ਲਿਕਾਯ ਆਰਾਮੋ ਯੇਨ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ ਤੇਨੁਪਸਙ੍ਕਮੇਯ੍ਯ’’ਨ੍ਤਿ. ਅਥ ਖੋ ਪਞ੍ਚਕਙ੍ਗੋ ਥਪਤਿ ਯੇਨ ਸਮਯਪ੍ਪਵਾਦਕੋ ਤਿਨ੍ਦੁਕਾਚੀਰੋ ਏਕਸਾਲਕੋ ਮਲ੍ਲਿਕਾਯ ਆਰਾਮੋ ਯੇਨ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ ਤੇਨੁਪਸਙ੍ਕਮਿ.

ਤੇਨ ਖੋ ਪਨ ਸਮਯੇਨ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ ਮਹਤਿਯਾ ਪਰਿਬ੍ਬਾਜਕਪਰਿਸਾਯ ਸਦ੍ਧਿਂ ਨਿਸਿਨ੍ਨੋ ਹੋਤਿ ਉਨ੍ਨਾਦਿਨਿਯਾ ਉਚ੍ਚਾਸਦ੍ਦਮਹਾਸਦ੍ਦਾਯ ਅਨੇਕਵਿਹਿਤਂ ਤਿਰਚ੍ਛਾਨਕਥਂ ਕਥੇਨ੍ਤਿਯਾ, ਸੇਯ੍ਯਥਿਦਂ – ਰਾਜਕਥਂ ਚੋਰਕਥਂ ਮਹਾਮਤ੍ਤਕਥਂ ਸੇਨਾਕਥਂ ਭਯਕਥਂ ਯੁਦ੍ਧਕਥਂ ਅਨ੍ਨਕਥਂ ਪਾਨਕਥਂ ਵਤ੍ਥਕਥਂ ਸਯਨਕਥਂ ਮਾਲਾਕਥਂ ਗਨ੍ਧਕਥਂ ਞਾਤਿਕਥਂ ਯਾਨਕਥਂ ਗਾਮਕਥਂ ਨਿਗਮਕਥਂ ਨਗਰਕਥਂ ਜਨਪਦਕਥਂ ਇਤ੍ਥਿਕਥਂ ਸੂਰਕਥਂ ਵਿਸਿਖਾਕਥਂ ਕੁਮ੍ਭਟ੍ਠਾਨਕਥਂ ਪੁਬ੍ਬਪੇਤਕਥਂ ਨਾਨਤ੍ਤਕਥਂ ਲੋਕਕ੍ਖਾਯਿਕਂ ਸਮੁਦ੍ਦਕ੍ਖਾਯਿਕਂ ਇਤਿਭਵਾਭਵਕਥਂ ਇਤਿ ਵਾ.

ਅਦ੍ਦਸਾ ਖੋ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ ਪਞ੍ਚਕਙ੍ਗਂ ਥਪਤਿਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਸਕਂ ਪਰਿਸਂ ਸਣ੍ਠਾਪੇਸਿ – ‘‘ਅਪ੍ਪਸਦ੍ਦਾ ਭੋਨ੍ਤੋ ਹੋਨ੍ਤੁ, ਮਾ ਭੋਨ੍ਤੋ ਸਦ੍ਦਮਕਤ੍ਥ; ਅਯਂ ਸਮਣਸ੍ਸ ਗੋਤਮਸ੍ਸ ਸਾਵਕੋ ਆਗਚ੍ਛਤਿ ਪਞ੍ਚਕਙ੍ਗੋ ਥਪਤਿ. ਯਾਵਤਾ ਖੋ ਪਨ ਸਮਣਸ੍ਸ ਗੋਤਮਸ੍ਸ ਸਾਵਕਾ ਗਿਹੀ ਓਦਾਤਵਸਨਾ ਸਾਵਤ੍ਥਿਯਂ ਪਟਿਵਸਨ੍ਤਿ ਅਯਂ ਤੇਸਂ ਅਞ੍ਞਤਰੋ ਪਞ੍ਚਕਙ੍ਗੋ ਥਪਤਿ. ਅਪ੍ਪਸਦ੍ਦਕਾਮਾ ਖੋ ਪਨ ਤੇ ਆਯਸ੍ਮਨ੍ਤੋ ਅਪ੍ਪਸਦ੍ਦਵਿਨੀਤਾ ਅਪ੍ਪਸਦ੍ਦਸ੍ਸ ਵਣ੍ਣਵਾਦਿਨੋ; ਅਪ੍ਪੇਵ ਨਾਮ ਅਪ੍ਪਸਦ੍ਦਂ ਪਰਿਸਂ ਵਿਦਿਤ੍ਵਾ ਉਪਸਙ੍ਕਮਿਤਬ੍ਬਂ ਮਞ੍ਞੇਯ੍ਯਾ’’ਤਿ. ਅਥ ਖੋ ਤੇ ਪਰਿਬ੍ਬਾਜਕਾ ਤੁਣ੍ਹੀ ਅਹੇਸੁਂ.

੨੬੧. ਅਥ ਖੋ ਪਞ੍ਚਕਙ੍ਗੋ ਥਪਤਿ ਯੇਨ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਉਗ੍ਗਾਹਮਾਨੇਨ ਪਰਿਬ੍ਬਾਜਕੇਨ ਸਮਣਮੁਣ੍ਡਿਕਾਪੁਤ੍ਤੇਨ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਪਞ੍ਚਕਙ੍ਗਂ ਥਪਤਿਂ ਉਗ੍ਗਾਹਮਾਨੋ ਪਰਿਬ੍ਬਾਜਕੋ ਸਮਣਮੁਣ੍ਡਿਕਾਪੁਤ੍ਤੋ ਏਤਦਵੋਚ – ‘‘ਚਤੂਹਿ ਖੋ ਅਹਂ, ਗਹਪਤਿ, ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਸਮ੍ਪਨ੍ਨਕੁਸਲਂ ਪਰਮਕੁਸਲਂ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝਂ. ਕਤਮੇਹਿ ਚਤੂਹਿ? ਇਧ, ਗਹਪਤਿ, ਨ ਕਾਯੇਨ ਪਾਪਕਮ੍ਮਂ ਕਰੋਤਿ, ਨ ਪਾਪਕਂ ਵਾਚਂ ਭਾਸਤਿ, ਨ ਪਾਪਕਂ ਸਙ੍ਕਪ੍ਪਂ ਸਙ੍ਕਪ੍ਪੇਤਿ, ਨ ਪਾਪਕਂ ਆਜੀਵਂ ਆਜੀਵਤਿ – ਇਮੇਹਿ ਖੋ ਅਹਂ, ਗਹਪਤਿ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਸਮ੍ਪਨ੍ਨਕੁਸਲਂ ਪਰਮਕੁਸਲਂ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝ’’ਨ੍ਤਿ.

ਅਥ ਖੋ ਪਞ੍ਚਕਙ੍ਗੋ ਥਪਤਿ ਉਗ੍ਗਾਹਮਾਨਸ੍ਸ ਪਰਿਬ੍ਬਾਜਕਸ੍ਸ ਸਮਣਮੁਣ੍ਡਿਕਾਪੁਤ੍ਤਸ੍ਸ ਭਾਸਿਤਂ ਨੇਵ ਅਭਿਨਨ੍ਦਿ ਨਪ੍ਪਟਿਕ੍ਕੋਸਿ. ਅਨਭਿਨਨ੍ਦਿਤ੍ਵਾ ਅਪ੍ਪਟਿਕ੍ਕੋਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ – ‘‘ਭਗਵਤੋ ਸਨ੍ਤਿਕੇ ਏਤਸ੍ਸ ਭਾਸਿਤਸ੍ਸ ਅਤ੍ਥਂ ਆਜਾਨਿਸ੍ਸਾਮੀ’’ਤਿ. ਅਥ ਖੋ ਪਞ੍ਚਕਙ੍ਗੋ ਥਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਪਞ੍ਚਕਙ੍ਗੋ ਥਪਤਿ ਯਾਵਤਕੋ ਅਹੋਸਿ ਉਗ੍ਗਾਹਮਾਨੇਨ ਪਰਿਬ੍ਬਾਜਕੇਨ ਸਮਣਮੁਣ੍ਡਿਕਾਪੁਤ੍ਤੇਨ ਸਦ੍ਧਿਂ ਕਥਾਸਲ੍ਲਾਪੋ ਤਂ ਸਬ੍ਬਂ ਭਗਵਤੋ ਆਰੋਚੇਸਿ.

੨੬੨. ਏਵਂ ਵੁਤ੍ਤੇ, ਭਗਵਾ ਪਞ੍ਚਕਙ੍ਗਂ ਥਪਤਿਂ ਏਤਦਵੋਚ – ‘‘ਏਵਂ ਸਨ੍ਤੇ ਖੋ, ਥਪਤਿ, ਦਹਰੋ ਕੁਮਾਰੋ ਮਨ੍ਦੋ ਉਤ੍ਤਾਨਸੇਯ੍ਯਕੋ ਸਮ੍ਪਨ੍ਨਕੁਸਲੋ ਭਵਿਸ੍ਸਤਿ ਪਰਮਕੁਸਲੋ ਉਤ੍ਤਮਪਤ੍ਤਿਪਤ੍ਤੋ ਸਮਣੋ ਅਯੋਜ੍ਝੋ, ਯਥਾ ਉਗ੍ਗਾਹਮਾਨਸ੍ਸ ਪਰਿਬ੍ਬਾਜਕਸ੍ਸ ਸਮਣਮੁਣ੍ਡਿਕਾਪੁਤ੍ਤਸ੍ਸ ਵਚਨਂ. ਦਹਰਸ੍ਸ ਹਿ, ਥਪਤਿ, ਕੁਮਾਰਸ੍ਸ ਮਨ੍ਦਸ੍ਸ ਉਤ੍ਤਾਨਸੇਯ੍ਯਕਸ੍ਸ ਕਾਯੋਤਿਪਿ ਨ ਹੋਤਿ, ਕੁਤੋ ਪਨ ਕਾਯੇਨ ਪਾਪਕਮ੍ਮਂ ਕਰਿਸ੍ਸਤਿ, ਅਞ੍ਞਤ੍ਰ ਫਨ੍ਦਿਤਮਤ੍ਤਾ! ਦਹਰਸ੍ਸ ਹਿ, ਥਪਤਿ, ਕੁਮਾਰਸ੍ਸ ਮਨ੍ਦਸ੍ਸ ਉਤ੍ਤਾਨਸੇਯ੍ਯਕਸ੍ਸ ਵਾਚਾਤਿਪਿ ਨ ਹੋਤਿ, ਕੁਤੋ ਪਨ ਪਾਪਕਂ ਵਾਚਂ ਭਾਸਿਸ੍ਸਤਿ, ਅਞ੍ਞਤ੍ਰ ਰੋਦਿਤਮਤ੍ਤਾ! ਦਹਰਸ੍ਸ ਹਿ, ਥਪਤਿ, ਕੁਮਾਰਸ੍ਸ ਮਨ੍ਦਸ੍ਸ ਉਤ੍ਤਾਨਸੇਯ੍ਯਕਸ੍ਸ ਸਙ੍ਕਪ੍ਪੋਤਿਪਿ ਨ ਹੋਤਿ, ਕੁਤੋ ਪਨ ਪਾਪਕਂ ਸਙ੍ਕਪ੍ਪਂ ਸਙ੍ਕਪ੍ਪਿਸ੍ਸਤਿ, ਅਞ੍ਞਤ੍ਰ ਵਿਕੂਜਿਤਮਤ੍ਤਾ [ਵਿਕੁਜ੍ਜਿਤਮਤ੍ਤਾ (ਸੀ. ਸ੍ਯਾ. ਕਂ. ਪੀ.)]! ਦਹਰਸ੍ਸ ਹਿ, ਥਪਤਿ, ਕੁਮਾਰਸ੍ਸ ਮਨ੍ਦਸ੍ਸ ਉਤ੍ਤਾਨਸੇਯ੍ਯਕਸ੍ਸ ਆਜੀਵੋਤਿਪਿ ਨ ਹੋਤਿ, ਕੁਤੋ ਪਨ ਪਾਪਕਂ ਆਜੀਵਂ ਆਜੀਵਿਸ੍ਸਤਿ, ਅਞ੍ਞਤ੍ਰ ਮਾਤੁਥਞ੍ਞਾ! ਏਵਂ ਸਨ੍ਤੇ ਖੋ, ਥਪਤਿ, ਦਹਰੋ ਕੁਮਾਰੋ ਮਨ੍ਦੋ ਉਤ੍ਤਾਨਸੇਯ੍ਯਕੋ ਸਮ੍ਪਨ੍ਨਕੁਸਲੋ ਭਵਿਸ੍ਸਤਿ ਪਰਮਕੁਸਲੋ ਉਤ੍ਤਮਪਤ੍ਤਿਪਤ੍ਤੋ ਸਮਣੋ ਅਯੋਜ੍ਝੋ, ਯਥਾ ਉਗ੍ਗਾਹਮਾਨਸ੍ਸ ਪਰਿਬ੍ਬਾਜਕਸ੍ਸ ਸਮਣਮੁਣ੍ਡਿਕਾਪੁਤ੍ਤਸ੍ਸ ਵਚਨਂ.

੨੬੩. ‘‘ਚਤੂਹਿ ਖੋ ਅਹਂ, ਥਪਤਿ, ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਨ ਚੇਵ ਸਮ੍ਪਨ੍ਨਕੁਸਲਂ ਨ ਪਰਮਕੁਸਲਂ ਨ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝਂ, ਅਪਿ ਚਿਮਂ ਦਹਰਂ ਕੁਮਾਰਂ ਮਨ੍ਦਂ ਉਤ੍ਤਾਨਸੇਯ੍ਯਕਂ ਸਮਧਿਗਯ੍ਹ ਤਿਟ੍ਠਤਿ. ਕਤਮੇਹਿ ਚਤੂਹਿ? ਇਧ, ਥਪਤਿ, ਨ ਕਾਯੇਨ ਪਾਪਕਮ੍ਮਂ ਕਰੋਤਿ, ਨ ਪਾਪਕਂ ਵਾਚਂ ਭਾਸਤਿ, ਨ ਪਾਪਕਂ ਸਙ੍ਕਪ੍ਪਂ ਸਙ੍ਕਪ੍ਪੇਤਿ, ਨ ਪਾਪਕਂ ਆਜੀਵਂ ਆਜੀਵਤਿ – ਇਮੇਹਿ ਖੋ ਅਹਂ, ਥਪਤਿ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਨ ਚੇਵ ਸਮ੍ਪਨ੍ਨਕੁਸਲਂ ਨ ਪਰਮਕੁਸਲਂ ਨ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝਂ, ਅਪਿ ਚਿਮਂ ਦਹਰਂ ਕੁਮਾਰਂ ਮਨ੍ਦਂ ਉਤ੍ਤਾਨਸੇਯ੍ਯਕਂ ਸਮਧਿਗਯ੍ਹ ਤਿਟ੍ਠਤਿ.

‘‘ਦਸਹਿ ਖੋ ਅਹਂ, ਥਪਤਿ, ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਸਮ੍ਪਨ੍ਨਕੁਸਲਂ ਪਰਮਕੁਸਲਂ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝਂ. ਇਮੇ ਅਕੁਸਲਾ ਸੀਲਾ; ਤਮਹਂ [ਕਹਂ (ਸੀ.), ਤਹਂ (ਪੀ.)], ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਤੋਸਮੁਟ੍ਠਾਨਾ ਅਕੁਸਲਾ ਸੀਲਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਧ ਅਕੁਸਲਾ ਸੀਲਾ ਅਪਰਿਸੇਸਾ ਨਿਰੁਜ੍ਝਨ੍ਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਏਵਂ ਪਟਿਪਨ੍ਨੋ ਅਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ.

‘‘ਇਮੇ ਕੁਸਲਾ ਸੀਲਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਤੋਸਮੁਟ੍ਠਾਨਾ ਕੁਸਲਾ ਸੀਲਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਧ ਕੁਸਲਾ ਸੀਲਾ ਅਪਰਿਸੇਸਾ ਨਿਰੁਜ੍ਝਨ੍ਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਏਵਂ ਪਟਿਪਨ੍ਨੋ ਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ.

‘‘ਇਮੇ ਅਕੁਸਲਾ ਸਙ੍ਕਪ੍ਪਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਤੋਸਮੁਟ੍ਠਾਨਾ ਅਕੁਸਲਾ ਸਙ੍ਕਪ੍ਪਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਧ ਅਕੁਸਲਾ ਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਏਵਂ ਪਟਿਪਨ੍ਨੋ ਅਕੁਸਲਾਨਂ ਸਙ੍ਕਪ੍ਪਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ.

‘‘ਇਮੇ ਕੁਸਲਾ ਸਙ੍ਕਪ੍ਪਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਤੋਸਮੁਟ੍ਠਾਨਾ ਕੁਸਲਾ ਸਙ੍ਕਪ੍ਪਾ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਇਧ ਕੁਸਲਾ ਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ. ਏਵਂ ਪਟਿਪਨ੍ਨੋ ਕੁਸਲਾਨਂ ਸਙ੍ਕਪ੍ਪਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ; ਤਮਹਂ, ਥਪਤਿ, ਵੇਦਿਤਬ੍ਬਨ੍ਤਿ ਵਦਾਮਿ.

੨੬੪. ‘‘ਕਤਮੇ ਚ, ਥਪਤਿ, ਅਕੁਸਲਾ ਸੀਲਾ? ਅਕੁਸਲਂ ਕਾਯਕਮ੍ਮਂ, ਅਕੁਸਲਂ ਵਚੀਕਮ੍ਮਂ, ਪਾਪਕੋ ਆਜੀਵੋ – ਇਮੇ ਵੁਚ੍ਚਨ੍ਤਿ, ਥਪਤਿ, ਅਕੁਸਲਾ ਸੀਲਾ.

‘‘ਇਮੇ ਚ, ਥਪਤਿ, ਅਕੁਸਲਾ ਸੀਲਾ ਕਿਂਸਮੁਟ੍ਠਾਨਾ? ਸਮੁਟ੍ਠਾਨਮ੍ਪਿ ਨੇਸਂ ਵੁਤ੍ਤਂ. ‘ਚਿਤ੍ਤਸਮੁਟ੍ਠਾਨਾ’ਤਿਸ੍ਸ ਵਚਨੀਯਂ. ਕਤਮਂ ਚਿਤ੍ਤਂ? ਚਿਤ੍ਤਮ੍ਪਿ ਹਿ ਬਹੁਂ ਅਨੇਕਵਿਧਂ ਨਾਨਪ੍ਪਕਾਰਕਂ. ਯਂ ਚਿਤ੍ਤਂ ਸਰਾਗਂ ਸਦੋਸਂ ਸਮੋਹਂ, ਇਤੋਸਮੁਟ੍ਠਾਨਾ ਅਕੁਸਲਾ ਸੀਲਾ.

‘‘ਇਮੇ ਚ, ਥਪਤਿ, ਅਕੁਸਲਾ ਸੀਲਾ ਕੁਹਿਂ ਅਪਰਿਸੇਸਾ ਨਿਰੁਜ੍ਝਨ੍ਤਿ? ਨਿਰੋਧੋਪਿ ਨੇਸਂ ਵੁਤ੍ਤੋ. ਇਧ, ਥਪਤਿ, ਭਿਕ੍ਖੁ ਕਾਯਦੁਚ੍ਚਰਿਤਂ ਪਹਾਯ ਕਾਯਸੁਚਰਿਤਂ ਭਾਵੇਤਿ, ਵਚੀਦੁਚ੍ਚਰਿਤਂ ਪਹਾਯ ਵਚੀਸੁਚਰਿਤਂ ਭਾਵੇਤਿ, ਮਨੋਦੁਚ੍ਚਰਿਤਂ ਪਹਾਯ ਮਨੋਸੁਚਰਿਤਂ ਭਾਵੇਤਿ, ਮਿਚ੍ਛਾਜੀਵਂ ਪਹਾਯ ਸਮ੍ਮਾਜੀਵੇਨ ਜੀਵਿਤਂ ਕਪ੍ਪੇਤਿ – ਏਤ੍ਥੇਤੇ ਅਕੁਸਲਾ ਸੀਲਾ ਅਪਰਿਸੇਸਾ ਨਿਰੁਜ੍ਝਨ੍ਤਿ.

‘‘ਕਥਂ ਪਟਿਪਨ੍ਨੋ, ਥਪਤਿ, ਅਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ? ਇਧ, ਥਪਤਿ, ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ; ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ; ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ; ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਏਵਂ ਪਟਿਪਨ੍ਨੋ ਖੋ, ਥਪਤਿ, ਅਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ.

੨੬੫. ‘‘ਕਤਮੇ ਚ, ਥਪਤਿ, ਕੁਸਲਾ ਸੀਲਾ? ਕੁਸਲਂ ਕਾਯਕਮ੍ਮਂ, ਕੁਸਲਂ ਵਚੀਕਮ੍ਮਂ, ਆਜੀਵਪਰਿਸੁਦ੍ਧਮ੍ਪਿ ਖੋ ਅਹਂ, ਥਪਤਿ, ਸੀਲਸ੍ਮਿਂ ਵਦਾਮਿ. ਇਮੇ ਵੁਚ੍ਚਨ੍ਤਿ, ਥਪਤਿ, ਕੁਸਲਾ ਸੀਲਾ.

‘‘ਇਮੇ ਚ, ਥਪਤਿ, ਕੁਸਲਾ ਸੀਲਾ ਕਿਂਸਮੁਟ੍ਠਾਨਾ? ਸਮੁਟ੍ਠਾਨਮ੍ਪਿ ਨੇਸਂ ਵੁਤ੍ਤਂ. ‘ਚਿਤ੍ਤਸਮੁਟ੍ਠਾਨਾ’ਤਿਸ੍ਸ ਵਚਨੀਯਂ. ਕਤਮਂ ਚਿਤ੍ਤਂ? ਚਿਤ੍ਤਮ੍ਪਿ ਹਿ ਬਹੁਂ ਅਨੇਕਵਿਧਂ ਨਾਨਪ੍ਪਕਾਰਕਂ. ਯਂ ਚਿਤ੍ਤਂ ਵੀਤਰਾਗਂ ਵੀਤਦੋਸਂ ਵੀਤਮੋਹਂ, ਇਤੋਸਮੁਟ੍ਠਾਨਾ ਕੁਸਲਾ ਸੀਲਾ.

‘‘ਇਮੇ ਚ, ਥਪਤਿ, ਕੁਸਲਾ ਸੀਲਾ ਕੁਹਿਂ ਅਪਰਿਸੇਸਾ ਨਿਰੁਜ੍ਝਨ੍ਤਿ? ਨਿਰੋਧੋਪਿ ਨੇਸਂ ਵੁਤ੍ਤੋ. ਇਧ, ਥਪਤਿ, ਭਿਕ੍ਖੁ ਸੀਲਵਾ ਹੋਤਿ ਨੋ ਚ ਸੀਲਮਯੋ, ਤਞ੍ਚ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਯਥਾਭੂਤਂ ਪਜਾਨਾਤਿ; ਯਤ੍ਥਸ੍ਸ ਤੇ ਕੁਸਲਾ ਸੀਲਾ ਅਪਰਿਸੇਸਾ ਨਿਰੁਜ੍ਝਨ੍ਤਿ.

‘‘ਕਥਂ ਪਟਿਪਨ੍ਨੋ ਚ, ਥਪਤਿ, ਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ? ਇਧ, ਥਪਤਿ, ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ; ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ…ਪੇ… ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ…ਪੇ… ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਏਵਂ ਪਟਿਪਨ੍ਨੋ ਖੋ, ਥਪਤਿ, ਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ.

੨੬੬. ‘‘ਕਤਮੇ ਚ, ਥਪਤਿ, ਅਕੁਸਲਾ ਸਙ੍ਕਪ੍ਪਾ? ਕਾਮਸਙ੍ਕਪ੍ਪੋ, ਬ੍ਯਾਪਾਦਸਙ੍ਕਪ੍ਪੋ, ਵਿਹਿਂਸਾਸਙ੍ਕਪ੍ਪੋ – ਇਮੇ ਵੁਚ੍ਚਨ੍ਤਿ, ਥਪਤਿ, ਅਕੁਸਲਾ ਸਙ੍ਕਪ੍ਪਾ.

‘‘ਇਮੇ ਚ, ਥਪਤਿ, ਅਕੁਸਲਾ ਸਙ੍ਕਪ੍ਪਾ ਕਿਂਸਮੁਟ੍ਠਾਨਾ? ਸਮੁਟ੍ਠਾਨਮ੍ਪਿ ਨੇਸਂ ਵੁਤ੍ਤਂ. ‘ਸਞ੍ਞਾਸਮੁਟ੍ਠਾਨਾ’ਤਿਸ੍ਸ ਵਚਨੀਯਂ. ਕਤਮਾ ਸਞ੍ਞਾ? ਸਞ੍ਞਾਪਿ ਹਿ ਬਹੂ ਅਨੇਕਵਿਧਾ ਨਾਨਪ੍ਪਕਾਰਕਾ. ਕਾਮਸਞ੍ਞਾ, ਬ੍ਯਾਪਾਦਸਞ੍ਞਾ, ਵਿਹਿਂਸਾਸਞ੍ਞਾ – ਇਤੋਸਮੁਟ੍ਠਾਨਾ ਅਕੁਸਲਾ ਸਙ੍ਕਪ੍ਪਾ.

‘‘ਇਮੇ ਚ, ਥਪਤਿ, ਅਕੁਸਲਾ ਸਙ੍ਕਪ੍ਪਾ ਕੁਹਿਂ ਅਪਰਿਸੇਸਾ ਨਿਰੁਜ੍ਝਨ੍ਤਿ? ਨਿਰੋਧੋਪਿ ਨੇਸਂ ਵੁਤ੍ਤੋ. ਇਧ, ਥਪਤਿ, ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ; ਏਤ੍ਥੇਤੇ ਅਕੁਸਲਾ ਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ.

‘‘ਕਥਂ ਪਟਿਪਨ੍ਨੋ ਚ, ਥਪਤਿ, ਅਕੁਸਲਾਨਂ ਸਙ੍ਕਪ੍ਪਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ? ਇਧ, ਥਪਤਿ, ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ; ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ…ਪੇ… ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ…ਪੇ… ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਏਵਂ ਪਟਿਪਨ੍ਨੋ ਖੋ, ਥਪਤਿ, ਅਕੁਸਲਾਨਂ ਸਙ੍ਕਪ੍ਪਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ.

੨੬੭. ‘‘ਕਤਮੇ ਚ, ਥਪਤਿ, ਕੁਸਲਾ ਸਙ੍ਕਪ੍ਪਾ? ਨੇਕ੍ਖਮ੍ਮਸਙ੍ਕਪ੍ਪੋ, ਅਬ੍ਯਾਪਾਦਸਙ੍ਕਪ੍ਪੋ, ਅਵਿਹਿਂਸਾਸਙ੍ਕਪ੍ਪੋ – ਇਮੇ ਵੁਚ੍ਚਨ੍ਤਿ, ਥਪਤਿ, ਕੁਸਲਾ ਸਙ੍ਕਪ੍ਪਾ.

‘‘ਇਮੇ ਚ, ਥਪਤਿ, ਕੁਸਲਾ ਸਙ੍ਕਪ੍ਪਾ ਕਿਂਸਮੁਟ੍ਠਾਨਾ? ਸਮੁਟ੍ਠਾਨਮ੍ਪਿ ਨੇਸਂ ਵੁਤ੍ਤਂ. ‘ਸਞ੍ਞਾਸਮੁਟ੍ਠਾਨਾ’ਤਿਸ੍ਸ ਵਚਨੀਯਂ. ਕਤਮਾ ਸਞ੍ਞਾ? ਸਞ੍ਞਾਪਿ ਹਿ ਬਹੂ ਅਨੇਕਵਿਧਾ ਨਾਨਪ੍ਪਕਾਰਕਾ. ਨੇਕ੍ਖਮ੍ਮਸਞ੍ਞਾ, ਅਬ੍ਯਾਪਾਦਸਞ੍ਞਾ, ਅਵਿਹਿਂਸਾਸਞ੍ਞਾ – ਇਤੋਸਮੁਟ੍ਠਾਨਾ ਕੁਸਲਾ ਸਙ੍ਕਪ੍ਪਾ.

‘‘ਇਮੇ ਚ, ਥਪਤਿ, ਕੁਸਲਾ ਸਙ੍ਕਪ੍ਪਾ ਕੁਹਿਂ ਅਪਰਿਸੇਸਾ ਨਿਰੁਜ੍ਝਨ੍ਤਿ? ਨਿਰੋਧੋਪਿ ਨੇਸਂ ਵੁਤ੍ਤੋ. ਇਧ, ਥਪਤਿ, ਭਿਕ੍ਖੁ ਵਿਤਕ੍ਕਵਿਚਾਰਾਨਂ ਵੂਪਸਮਾ…ਪੇ… ਦੁਤਿਯਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ; ਏਤ੍ਥੇਤੇ ਕੁਸਲਾ ਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ.

‘‘ਕਥਂ ਪਟਿਪਨ੍ਨੋ ਚ, ਥਪਤਿ, ਕੁਸਲਾਨਂ ਸਙ੍ਕਪ੍ਪਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ? ਇਧ, ਥਪਤਿ, ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ; ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ…ਪੇ… ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ…ਪੇ… ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ. ਏਵਂ ਪਟਿਪਨ੍ਨੋ ਖੋ, ਥਪਤਿ, ਕੁਸਲਾਨਂ ਸਙ੍ਕਪ੍ਪਾਨਂ ਨਿਰੋਧਾਯ ਪਟਿਪਨ੍ਨੋ ਹੋਤਿ.

੨੬੮. ‘‘ਕਤਮੇਹਿ ਚਾਹਂ, ਥਪਤਿ, ਦਸਹਿ ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਸਮ੍ਪਨ੍ਨਕੁਸਲਂ ਪਰਮਕੁਸਲਂ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝਂ? ਇਧ, ਥਪਤਿ, ਭਿਕ੍ਖੁ ਅਸੇਖਾਯ ਸਮ੍ਮਾਦਿਟ੍ਠਿਯਾ ਸਮਨ੍ਨਾਗਤੋ ਹੋਤਿ, ਅਸੇਖੇਨ ਸਮ੍ਮਾਸਙ੍ਕਪ੍ਪੇਨ ਸਮਨ੍ਨਾਗਤੋ ਹੋਤਿ, ਅਸੇਖਾਯ ਸਮ੍ਮਾਵਾਚਾਯ ਸਮਨ੍ਨਾਗਤੋ ਹੋਤਿ, ਅਸੇਖੇਨ ਸਮ੍ਮਾਕਮ੍ਮਨ੍ਤੇਨ ਸਮਨ੍ਨਾਗਤੋ ਹੋਤਿ, ਅਸੇਖੇਨ ਸਮ੍ਮਾਆਜੀਵੇਨ ਸਮਨ੍ਨਾਗਤੋ ਹੋਤਿ, ਅਸੇਖੇਨ ਸਮ੍ਮਾਵਾਯਾਮੇਨ ਸਮਨ੍ਨਾਗਤੋ ਹੋਤਿ, ਅਸੇਖਾਯ ਸਮ੍ਮਾਸਤਿਯਾ ਸਮਨ੍ਨਾਗਤੋ ਹੋਤਿ, ਅਸੇਖੇਨ ਸਮ੍ਮਾਸਮਾਧਿਨਾ ਸਮਨ੍ਨਾਗਤੋ ਹੋਤਿ, ਅਸੇਖੇਨ ਸਮ੍ਮਾਞਾਣੇਨ ਸਮਨ੍ਨਾਗਤੋ ਹੋਤਿ, ਅਸੇਖਾਯ ਸਮ੍ਮਾਵਿਮੁਤ੍ਤਿਯਾ ਸਮਨ੍ਨਾਗਤੋ ਹੋਤਿ – ਇਮੇਹਿ ਖੋ ਅਹਂ, ਥਪਤਿ, ਦਸਹਿ ਧਮ੍ਮੇਹਿ ਸਮਨ੍ਨਾਗਤਂ ਪੁਰਿਸਪੁਗ੍ਗਲਂ ਪਞ੍ਞਪੇਮਿ ਸਮ੍ਪਨ੍ਨਕੁਸਲਂ ਪਰਮਕੁਸਲਂ ਉਤ੍ਤਮਪਤ੍ਤਿਪਤ੍ਤਂ ਸਮਣਂ ਅਯੋਜ੍ਝ’’ਨ੍ਤਿ.

ਇਦਮਵੋਚ ਭਗਵਾ. ਅਤ੍ਤਮਨੋ ਪਞ੍ਚਕਙ੍ਗੋ ਥਪਤਿ ਭਗਵਤੋ ਭਾਸਿਤਂ ਅਭਿਨਨ੍ਦੀਤਿ.

ਸਮਣਮੁਣ੍ਡਿਕਸੁਤ੍ਤਂ ਨਿਟ੍ਠਿਤਂ ਅਟ੍ਠਮਂ.