੯. ਗੋਲਿਯਾਨਿਸੁਤ੍ਤਂ

੧੭੩. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਗੋਲਿਯਾਨਿ [ਗੁਲਿਸ੍ਸਾਨਿ (ਸੀ. ਪੀ.), ਗੋਲਿਸ੍ਸਾਨਿ (ਸ੍ਯਾ. ਕਂ.)] ਨਾਮ ਭਿਕ੍ਖੁ ਆਰਞ੍ਞਿਕੋ [ਆਰਞ੍ਞਕੋ (ਸਬ੍ਬਤ੍ਥ)] ਪਦਸਮਾਚਾਰੋ [ਪਦਰਸਮਾਚਾਰੋ (ਸੀ. ਸ੍ਯਾ. ਕਂ. ਪੀ.)] ਸਙ੍ਘਮਜ੍ਝੇ ਓਸਟੋ ਹੋਤਿ ਕੇਨਚਿਦੇਵ ਕਰਣੀਯੇਨ. ਤਤ੍ਰ ਖੋ ਆਯਸ੍ਮਾ ਸਾਰਿਪੁਤ੍ਤੋ ਗੋਲਿਯਾਨਿਂ ਭਿਕ੍ਖੁਂ ਆਰਬ੍ਭ ਭਿਕ੍ਖੂ ਆਮਨ੍ਤੇਸਿ –

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਸਬ੍ਰਹ੍ਮਚਾਰੀਸੁ ਸਗਾਰਵੇਨ ਭਵਿਤਬ੍ਬਂ ਸਪ੍ਪਤਿਸ੍ਸੇਨ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਸਬ੍ਰਹ੍ਮਚਾਰੀਸੁ ਅਗਾਰਵੋ ਹੋਤਿ ਅਪ੍ਪਤਿਸ੍ਸੋ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ, ਯੋ ਅਯਮਾਯਸ੍ਮਾ ਸਬ੍ਰਹ੍ਮਚਾਰੀਸੁ ਅਗਾਰਵੋ ਹੋਤਿ ਅਪ੍ਪਤਿਸ੍ਸੋ’ਤਿ – ਤਸ੍ਸ [ਅਪ੍ਪਤਿਸ੍ਸੋਤਿਸ੍ਸ (ਸੀ. ਪੀ.)] ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਸਬ੍ਰਹ੍ਮਚਾਰੀਸੁ ਸਗਾਰਵੇਨ ਭਵਿਤਬ੍ਬਂ ਸਪ੍ਪਤਿਸ੍ਸੇਨ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਆਸਨਕੁਸਲੇਨ ਭਵਿਤਬ੍ਬਂ – ‘ਇਤਿ ਥੇਰੇ ਚ ਭਿਕ੍ਖੂ ਨਾਨੁਪਖਜ੍ਜ ਨਿਸੀਦਿਸ੍ਸਾਮਿ ਨਵੇ ਚ ਭਿਕ੍ਖੂ ਨ ਆਸਨੇਨ ਪਟਿਬਾਹਿਸ੍ਸਾਮੀ’ਤਿ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਨ ਆਸਨਕੁਸਲੋ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ, ਯੋ ਅਯਮਾਯਸ੍ਮਾ ਆਸਨਕੁਸਲੋ ਨ ਹੋਤੀ’ਤਿ [ਯੋ ਅਯਮਾਯਸ੍ਮਾ ਆਭਿਸਮਾਚਾਰਿਕਮ੍ਪਿ ਧਮ੍ਮਂ ਨ ਜਾਨਾਤੀਤਿ (ਸੀ. ਸ੍ਯਾ. ਕਂ. ਪੀ.)] – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਆਸਨਕੁਸਲੇਨ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਆਭਿਸਮਾਚਾਰਿਕੋਪਿ ਧਮ੍ਮੋ ਜਾਨਿਤਬ੍ਬੋ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਆਭਿਸਮਾਚਾਰਿਕਮ੍ਪਿ ਧਮ੍ਮਂ ਨ ਜਾਨਾਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਆਭਿਸਮਾਚਾਰਿਕਮ੍ਪਿ ਧਮ੍ਮਂ ਨ ਜਾਨਾਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਆਭਿਸਮਾਚਾਰਿਕੋਪਿ ਧਮ੍ਮੋ ਜਾਨਿਤਬ੍ਬੋ [ਅਯਂ ਆਭਿਸਮਾਚਾਰਿਕਤਤਿਯਵਾਰੋ ਸੀ. ਸ੍ਯਾ. ਕਂ. ਪੀ. ਪੋਤ੍ਥਕੇਸੁ ਨ ਦਿਸ੍ਸਤਿ].

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਨਾਤਿਕਾਲੇਨ ਗਾਮੋ ਪਵਿਸਿਤਬ੍ਬੋ ਨਾਤਿਦਿਵਾ [ਨ ਦਿਵਾ (ਸ੍ਯਾ. ਕਂ. ਪੀ. ਕ.)] ਪਟਿਕ੍ਕਮਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਅਤਿਕਾਲੇਨ ਗਾਮਂ ਪਵਿਸਤਿ ਅਤਿਦਿਵਾ ਪਟਿਕ੍ਕਮਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਅਤਿਕਾਲੇਨ ਗਾਮਂ ਪਵਿਸਤਿ ਅਤਿਦਿਵਾ ਪਟਿਕ੍ਕਮਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਨਾਤਿਕਾਲੇਨ ਗਾਮੋ ਪਵਿਸਿਤਬ੍ਬੋ, ਨਾਤਿਦਿਵਾ ਪਟਿਕ੍ਕਮਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਨ ਪੁਰੇਭਤ੍ਤਂ ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਪੁਰੇਭਤ੍ਤਂ ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਅਯਂ ਨੂਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਵਿਹਰਤੋ ਵਿਕਾਲਚਰਿਯਾ ਬਹੁਲੀਕਤਾ, ਤਮੇਨਂ ਸਙ੍ਘਗਤਮ੍ਪਿ ਸਮੁਦਾਚਰਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਨ ਪੁਰੇਭਤ੍ਤਂ ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਅਨੁਦ੍ਧਤੇਨ ਭਵਿਤਬ੍ਬਂ ਅਚਪਲੇਨ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਉਦ੍ਧਤੋ ਹੋਤਿ ਚਪਲੋ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਇਦਂ ਨੂਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਵਿਹਰਤੋ ਉਦ੍ਧਚ੍ਚਂ ਚਾਪਲ੍ਯਂ ਬਹੁਲੀਕਤਂ, ਤਮੇਨਂ ਸਙ੍ਘਗਤਮ੍ਪਿ ਸਮੁਦਾਚਰਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਅਨੁਦ੍ਧਤੇਨ ਭਵਿਤਬ੍ਬਂ ਅਚਪਲੇਨ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਅਮੁਖਰੇਨ ਭਵਿਤਬ੍ਬਂ ਅਵਿਕਿਣ੍ਣਵਾਚੇਨ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਮੁਖਰੋ ਹੋਤਿ ਵਿਕਿਣ੍ਣਵਾਚੋ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਮੁਖਰੋ ਵਿਕਿਣ੍ਣਵਾਚੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਅਮੁਖਰੇਨ ਭਵਿਤਬ੍ਬਂ ਅਵਿਕਿਣ੍ਣਵਾਚੇਨ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਸੁਵਚੇਨ [ਸੁਬ੍ਬਚੇਨ (ਸੀ. ਕ.)] ਭਵਿਤਬ੍ਬਂ ਕਲ੍ਯਾਣਮਿਤ੍ਤੇਨ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਸਙ੍ਘਗਤੋ ਸਙ੍ਘੇ ਵਿਹਰਨ੍ਤੋ ਦੁਬ੍ਬਚੋ ਹੋਤਿ ਪਾਪਮਿਤ੍ਤੋ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਦੁਬ੍ਬਚੋ ਪਾਪਮਿਤ੍ਤੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਙ੍ਘਗਤੇਨ ਸਙ੍ਘੇ ਵਿਹਰਨ੍ਤੇਨ ਸੁਵਚੇਨ ਭਵਿਤਬ੍ਬਂ ਕਲ੍ਯਾਣਮਿਤ੍ਤੇਨ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੇਨ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰੋ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੇਨ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਭੋਜਨੇ ਮਤ੍ਤਞ੍ਞੁਨਾ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭੋਜਨੇ ਅਮਤ੍ਤਞ੍ਞੂ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਭੋਜਨੇ ਅਮਤ੍ਤਞ੍ਞੂ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਭੋਜਨੇ ਮਤ੍ਤਞ੍ਞੁਨਾ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਜਾਗਰਿਯਂ ਅਨੁਯੁਤ੍ਤੇਨ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਜਾਗਰਿਯਂ ਅਨਨੁਯੁਤ੍ਤੋ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਜਾਗਰਿਯਂ ਅਨਨੁਯੁਤ੍ਤੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਜਾਗਰਿਯਂ ਅਨੁਯੁਤ੍ਤੇਨ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਆਰਦ੍ਧਵੀਰਿਯੇਨ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਕੁਸੀਤੋ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਕੁਸੀਤੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਆਰਦ੍ਧਵੀਰਿਯੇਨ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਉਪਟ੍ਠਿਤਸ੍ਸਤਿਨਾ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਮੁਟ੍ਠਸ੍ਸਤੀ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਮੁਟ੍ਠਸ੍ਸਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਉਪਟ੍ਠਿਤਸ੍ਸਤਿਨਾ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਸਮਾਹਿਤੇਨ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਅਸਮਾਹਿਤੋ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਅਸਮਾਹਿਤੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਸਮਾਹਿਤੇਨ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਪਞ੍ਞਵਤਾ ਭਵਿਤਬ੍ਬਂ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਦੁਪ੍ਪਞ੍ਞੋ ਹੋਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਦੁਪ੍ਪਞ੍ਞੋ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਪਞ੍ਞਵਤਾ ਭਵਿਤਬ੍ਬਂ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਅਭਿਧਮ੍ਮੇ ਅਭਿਵਿਨਯੇ ਯੋਗੋ ਕਰਣੀਯੋ. ਸਨ੍ਤਾਵੁਸੋ, ਆਰਞ੍ਞਿਕਂ ਭਿਕ੍ਖੁਂ ਅਭਿਧਮ੍ਮੇ ਅਭਿਵਿਨਯੇ ਪਞ੍ਹਂ ਪੁਚ੍ਛਿਤਾਰੋ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਅਭਿਧਮ੍ਮੇ ਅਭਿਵਿਨਯੇ ਪਞ੍ਹਂ ਪੁਟ੍ਠੋ ਨ ਸਮ੍ਪਾਯਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਅਭਿਧਮ੍ਮੇ ਅਭਿਵਿਨਯੇ ਪਞ੍ਹਂ ਪੁਟ੍ਠੋ ਨ ਸਮ੍ਪਾਯਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਅਭਿਧਮ੍ਮੇ ਅਭਿਵਿਨਯੇ ਯੋਗੋ ਕਰਣੀਯੋ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਯੇ ਤੇ ਸਨ੍ਤਾ ਵਿਮੋਕ੍ਖਾ ਅਤਿਕ੍ਕਮ੍ਮ ਰੂਪੇ ਆਰੁਪ੍ਪਾ ਤਤ੍ਥ ਯੋਗੋ ਕਰਣੀਯੋ. ਸਨ੍ਤਾਵੁਸੋ, ਆਰਞ੍ਞਿਕਂ ਭਿਕ੍ਖੁਂ ਯੇ ਤੇ ਸਨ੍ਤਾ ਵਿਮੋਕ੍ਖਾ ਅਤਿਕ੍ਕਮ੍ਮ ਰੂਪੇ ਆਰੁਪ੍ਪਾ ਤਤ੍ਥ ਪਞ੍ਹਂ ਪੁਚ੍ਛਿਤਾਰੋ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਯੇ ਤੇ ਸਨ੍ਤਾ ਵਿਮੋਕ੍ਖਾ ਅਤਿਕ੍ਕਮ੍ਮ ਰੂਪੇ ਆਰੁਪ੍ਪਾ ਤਤ੍ਥ ਪਞ੍ਹਂ ਪੁਟ੍ਠੋ ਨ ਸਮ੍ਪਾਯਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਯੇ ਤੇ ਸਨ੍ਤਾ ਵਿਮੋਕ੍ਖਾ ਅਤਿਕ੍ਕਮ੍ਮ ਰੂਪੇ ਆਰੁਪ੍ਪਾ ਤਤ੍ਥ ਪਞ੍ਹਂ ਪੁਟ੍ਠੋ ਨ ਸਮ੍ਪਾਯਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਯੇ ਤੇ ਸਨ੍ਤਾ ਵਿਮੋਕ੍ਖਾ ਅਤਿਕ੍ਕਮ੍ਮ ਰੂਪੇ ਆਰੁਪ੍ਪਾ ਤਤ੍ਥ ਯੋਗੋ ਕਰਣੀਯੋ.

‘‘ਆਰਞ੍ਞਿਕੇਨਾਵੁਸੋ, ਭਿਕ੍ਖੁਨਾ ਉਤ੍ਤਰਿ ਮਨੁਸ੍ਸਧਮ੍ਮੇ ਯੋਗੋ ਕਰਣੀਯੋ. ਸਨ੍ਤਾਵੁਸੋ, ਆਰਞ੍ਞਿਕਂ ਭਿਕ੍ਖੁਂ ਉਤ੍ਤਰਿ ਮਨੁਸ੍ਸਧਮ੍ਮੇ ਪਞ੍ਹਂ ਪੁਚ੍ਛਿਤਾਰੋ. ਸਚੇ, ਆਵੁਸੋ, ਆਰਞ੍ਞਿਕੋ ਭਿਕ੍ਖੁ ਉਤ੍ਤਰਿ ਮਨੁਸ੍ਸਧਮ੍ਮੇ ਪਞ੍ਹਂ ਪੁਟ੍ਠੋ ਨ ਸਮ੍ਪਾਯਤਿ, ਤਸ੍ਸ ਭਵਨ੍ਤਿ ਵਤ੍ਤਾਰੋ. ‘ਕਿਂ ਪਨਿਮਸ੍ਸਾਯਸ੍ਮਤੋ ਆਰਞ੍ਞਿਕਸ੍ਸ ਏਕਸ੍ਸਾਰਞ੍ਞੇ ਸੇਰਿਵਿਹਾਰੇਨ ਯੋ ਅਯਮਾਯਸ੍ਮਾ ਯਸ੍ਸਤ੍ਥਾਯ ਪਬ੍ਬਜਿਤੋ ਤਮਤ੍ਥਂ ਨ ਜਾਨਾਤੀ’ਤਿ – ਤਸ੍ਸ ਭਵਨ੍ਤਿ ਵਤ੍ਤਾਰੋ. ਤਸ੍ਮਾ ਆਰਞ੍ਞਿਕੇਨ ਭਿਕ੍ਖੁਨਾ ਉਤ੍ਤਰਿ ਮਨੁਸ੍ਸਧਮ੍ਮੇ ਯੋਗੋ ਕਰਣੀਯੋ’’ਤਿ.

ਏਵਂ ਵੁਤ੍ਤੇ, ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ [ਮਹਾਮੋਗ੍ਗਲਾਨੋ (ਕ.)] ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਆਰਞ੍ਞਿਕੇਨੇਵ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਭਿਕ੍ਖੁਨਾ ਇਮੇ ਧਮ੍ਮਾ ਸਮਾਦਾਯ ਵਤ੍ਤਿਤਬ੍ਬਾ ਉਦਾਹੁ ਗਾਮਨ੍ਤਵਿਹਾਰਿਨਾਪੀ’’ਤਿ? ‘‘ਆਰਞ੍ਞਿਕੇਨਾਪਿ ਖੋ, ਆਵੁਸੋ ਮੋਗ੍ਗਲ੍ਲਾਨ, ਭਿਕ੍ਖੁਨਾ ਇਮੇ ਧਮ੍ਮਾ ਸਮਾਦਾਯ ਵਤ੍ਤਿਤਬ੍ਬਾ ਪਗੇਵ ਗਾਮਨ੍ਤਵਿਹਾਰਿਨਾ’’ਤਿ.

ਗੋਲਿਯਾਨਿਸੁਤ੍ਤਂ ਨਿਟ੍ਠਿਤਂ ਨਵਮਂ.