੩. ਚੂਲ਼ਮਾਲੁਕ੍ਯਸੁਤ੍ਤਂ

੧੨੨. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਆਯਸ੍ਮਤੋ ਮਾਲੁਕ੍ਯਪੁਤ੍ਤਸ੍ਸ [ਮਾਲੁਙ੍ਕ੍ਯਪੁਤ੍ਤਸ੍ਸ (ਸੀ. ਸ੍ਯਾ. ਕਂ. ਪੀ.)] ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਯਾਨਿਮਾਨਿ ਦਿਟ੍ਠਿਗਤਾਨਿ ਭਗਵਤਾ ਅਬ੍ਯਾਕਤਾਨਿ ਠਪਿਤਾਨਿ ਪਟਿਕ੍ਖਿਤ੍ਤਾਨਿ – ‘ਸਸ੍ਸਤੋ ਲੋਕੋ’ਤਿਪਿ, ‘ਅਸਸ੍ਸਤੋ ਲੋਕੋ’ਤਿਪਿ, ‘ਅਨ੍ਤਵਾ ਲੋਕੋ’ਤਿਪਿ, ‘ਅਨਨ੍ਤਵਾ ਲੋਕੋ’ਤਿਪਿ, ‘ਤਂ ਜੀਵਂ ਤਂ ਸਰੀਰ’ਨ੍ਤਿਪਿ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿਪਿ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿ, ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿ – ਤਾਨਿ ਮੇ ਭਗਵਾ ਨ ਬ੍ਯਾਕਰੋਤਿ. ਯਾਨਿ ਮੇ ਭਗਵਾ ਨ ਬ੍ਯਾਕਰੋਤਿ ਤਂ ਮੇ ਨ ਰੁਚ੍ਚਤਿ, ਤਂ ਮੇ ਨਕ੍ਖਮਤਿ. ਸੋਹਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛਿਸ੍ਸਾਮਿ. ਸਚੇ ਮੇ ਭਗਵਾ ਬ੍ਯਾਕਰਿਸ੍ਸਤਿ – ‘ਸਸ੍ਸਤੋ ਲੋਕੋ’ਤਿ ਵਾ ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ – ਏਵਾਹਂ ਭਗਵਤਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਿ; ਨੋ ਚੇ ਮੇ ਭਗਵਾ ਬ੍ਯਾਕਰਿਸ੍ਸਤਿ – ‘ਸਸ੍ਸਤੋ ਲੋਕੋ’ਤਿ ਵਾ ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ – ਏਵਾਹਂ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਿਸ੍ਸਾਮੀ’’ਤਿ.

੧੨੩. ਅਥ ਖੋ ਆਯਸ੍ਮਾ ਮਾਲੁਕ੍ਯਪੁਤ੍ਤੋ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਮਾਲੁਕ੍ਯਪੁਤ੍ਤੋ ਭਗਵਨ੍ਤਂ ਏਤਦਵੋਚ –

੧੨੪. ‘‘ਇਧ ਮਯ੍ਹਂ, ਭਨ੍ਤੇ, ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ਯਾਨਿਮਾਨਿ ਦਿਟ੍ਠਿਗਤਾਨਿ ਭਗਵਤਾ ਅਬ੍ਯਾਕਤਾਨਿ ਠਪਿਤਾਨਿ ਪਟਿਕ੍ਖਿਤ੍ਤਾਨਿ – ‘ਸਸ੍ਸਤੋ ਲੋਕੋ’ਤਿਪਿ, ‘ਅਸਸ੍ਸਤੋ ਲੋਕੋ’ਤਿਪਿ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿਪਿ – ਤਾਨਿ ਮੇ ਭਗਵਾ ਨ ਬ੍ਯਾਕਰੋਤਿ. ਯਾਨਿ ਮੇ ਭਗਵਾ ਨ ਬ੍ਯਾਕਰੋਤਿ ਤਂ ਮੇ ਨ ਰੁਚ੍ਚਤਿ, ਤਂ ਮੇ ਨਕ੍ਖਮਤਿ. ਸੋਹਂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛਿਸ੍ਸਾਮਿ. ਸਚੇ ਮੇ ਭਗਵਾ ਬ੍ਯਾਕਰਿਸ੍ਸਤਿ – ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ – ਏਵਾਹਂ ਭਗਵਤਿ, ਬ੍ਰਹ੍ਮਚਰਿਯਂ ਚਰਿਸ੍ਸਾਮਿ. ਨੋ ਚੇ ਮੇ ਭਗਵਾ ਬ੍ਯਾਕਰਿਸ੍ਸਤਿ – ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ – ਏਵਾਹਂ ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾਵਤ੍ਤਿਸ੍ਸਾਮੀਤਿ. ਸਚੇ ਭਗਵਾ ਜਾਨਾਤਿ – ‘ਸਸ੍ਸਤੋ ਲੋਕੋ’ਤਿ, ‘ਸਸ੍ਸਤੋ ਲੋਕੋ’ਤਿ ਮੇ ਭਗਵਾ ਬ੍ਯਾਕਰੋਤੁ; ਸਚੇ ਭਗਵਾ ਜਾਨਾਤਿ – ‘ਅਸਸ੍ਸਤੋ ਲੋਕੋ’ਤਿ, ‘ਅਸਸ੍ਸਤੋ ਲੋਕੋ’ਤਿ ਮੇ ਭਗਵਾ ਬ੍ਯਾਕਰੋਤੁ. ਨੋ ਚੇ ਭਗਵਾ ਜਾਨਾਤਿ – ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ, ਅਜਾਨਤੋ ਖੋ ਪਨ ਅਪਸ੍ਸਤੋ ਏਤਦੇਵ ਉਜੁਕਂ ਹੋਤਿ ਯਦਿਦਂ – ‘ਨ ਜਾਨਾਮਿ, ਨ ਪਸ੍ਸਾਮੀ’ਤਿ. ਸਚੇ ਭਗਵਾ ਜਾਨਾਤਿ – ‘ਅਨ੍ਤਵਾ ਲੋਕੋ’ਤਿ, ‘ਅਨਨ੍ਤਵਾ ਲੋਕੋ’ਤਿ ਮੇ ਭਗਵਾ ਬ੍ਯਾਕਰੋਤੁ; ਸਚੇ ਭਗਵਾ ਜਾਨਾਤਿ – ‘ਅਨਨ੍ਤਵਾ ਲੋਕੋ’ਤਿ, ‘ਅਨਨ੍ਤਵਾ ਲੋਕੋ’ਤਿ ਮੇ ਭਗਵਾ ਬ੍ਯਾਕਰੋਤੁ. ਨੋ ਚੇ ਭਗਵਾ ਜਾਨਾਤਿ – ‘ਅਨ੍ਤਵਾ ਲੋਕੋ’ਤਿ ਵਾ, ‘ਅਨਨ੍ਤਵਾ ਲੋਕੋ’ਤਿ ਵਾ, ਅਜਾਨਤੋ ਖੋ ਪਨ ਅਪਸ੍ਸਤੋ ਏਤਦੇਵ ਉਜੁਕਂ ਹੋਤਿ ਯਦਿਦਂ – ‘ਨ ਜਾਨਾਮਿ, ਨ ਪਸ੍ਸਾਮੀ’ਤਿ. ਸਚੇ ਭਗਵਾ ਜਾਨਾਤਿ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ, ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਮੇ ਭਗਵਾ ਬ੍ਯਾਕਰੋਤੁ; ਸਚੇ ਭਗਵਾ ਜਾਨਾਤਿ – ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਮੇ ਭਗਵਾ ਬ੍ਯਾਕਰੋਤੁ. ਨੋ ਚੇ ਭਗਵਾ ਜਾਨਾਤਿ – ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ, ਅਜਾਨਤੋ ਖੋ ਪਨ ਅਪਸ੍ਸਤੋ ਏਤਦੇਵ ਉਜੁਕਂ ਹੋਤਿ ਯਦਿਦਂ – ‘ਨ ਜਾਨਾਮਿ, ਨ ਪਸ੍ਸਾਮੀ’ਤਿ. ਸਚੇ ਭਗਵਾ ਜਾਨਾਤਿ – ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਮੇ ਭਗਵਾ ਬ੍ਯਾਕਰੋਤੁ; ਸਚੇ ਭਗਵਾ ਜਾਨਾਤਿ – ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਮੇ ਭਗਵਾ ਬ੍ਯਾਕਰੋਤੁ. ਨੋ ਚੇ ਭਗਵਾ ਜਾਨਾਤਿ – ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ਅਜਾਨਤੋ ਖੋ ਪਨ ਅਪਸ੍ਸਤੋ ਏਤਦੇਵ ਉਜੁਕਂ ਹੋਤਿ ਯਦਿਦਂ – ‘ਨ ਜਾਨਾਮਿ ਨ ਪਸ੍ਸਾਮੀ’ਤਿ. ਸਚੇ ਭਗਵਾ ਜਾਨਾਤਿ – ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਮੇ ਭਗਵਾ ਬ੍ਯਾਕਰੋਤੁ; ਸਚੇ ਭਗਵਾ ਜਾਨਾਤਿ – ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਮੇ ਭਗਵਾ ਬ੍ਯਾਕਰੋਤੁ. ਨੋ ਚੇ ਭਗਵਾ ਜਾਨਾਤਿ – ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ਅਜਾਨਤੋ ਖੋ ਪਨ ਅਪਸ੍ਸਤੋ ਏਤਦੇਵ ਉਜੁਕਂ ਹੋਤਿ ਯਦਿਦਂ – ‘ਨ ਜਾਨਾਮਿ, ਨ ਪਸ੍ਸਾਮੀ’’’ਤਿ.

੧੨੫. ‘‘ਕਿਂ ਨੁ [ਕਿਂ ਨੁ ਖੋ (ਸ੍ਯਾ. ਕਂ. ਕ.)] ਤਾਹਂ, ਮਾਲੁਕ੍ਯਪੁਤ੍ਤ, ਏਵਂ ਅਵਚਂ – ‘ਏਹਿ ਤ੍ਵਂ, ਮਾਲੁਕ੍ਯਪੁਤ੍ਤ, ਮਯਿ ਬ੍ਰਹ੍ਮਚਰਿਯਂ ਚਰ, ਅਹਂ ਤੇ ਬ੍ਯਾਕਰਿਸ੍ਸਾਮਿ – ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ, ‘ਅਨ੍ਤਵਾ ਲੋਕੋ’ਤਿ ਵਾ, ‘ਅਨਨ੍ਤਵਾ ਲੋਕੋ’ਤਿ ਵਾ, ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਤ੍ਵਂ ਵਾ ਪਨ ਮਂ ਏਵਂ ਅਵਚ – ਅਹਂ, ਭਨ੍ਤੇ, ਭਗਵਤਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਿ, ਭਗਵਾ ਮੇ ਬ੍ਯਾਕਰਿਸ੍ਸਤਿ – ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ, ‘ਅਨ੍ਤਵਾ ਲੋਕੋ’ਤਿ ਵਾ, ‘ਅਨਨ੍ਤਵਾ ਲੋਕੋ’ਤਿ ਵਾ, ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ, ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਇਤਿ ਕਿਰ, ਮਾਲੁਕ੍ਯਪੁਤ੍ਤ, ਨੇਵਾਹਂ ਤਂ ਵਦਾਮਿ – ਏਹਿ ਤ੍ਵਂ, ਮਾਲੁਕ੍ਯਪੁਤ੍ਤ, ਮਯਿ ਬ੍ਰਹ੍ਮਚਰਿਯਂ ਚਰ, ਅਹਂ ਤੇ ਬ੍ਯਾਕਰਿਸ੍ਸਾਮਿ – ‘ਸਸ੍ਸਤੋ ਲੋਕੋ’ਤਿ ਵਾ, ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾਤਿ ਵਾ’ਤਿ; ਨਪਿ ਕਿਰ ਮਂ ਤ੍ਵਂ ਵਦੇਸਿ – ਅਹਂ, ਭਨ੍ਤੇ, ਭਗਵਤਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਿ, ਭਗਵਾ ਮੇ ਬ੍ਯਾਕਰਿਸ੍ਸਤਿ – ‘ਸਸ੍ਸਤੋ ਲੋਕੋ’ਤਿ ਵਾ ‘ਅਸਸ੍ਸਤੋ ਲੋਕੋ’ਤਿ ਵਾ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ’’ਤਿ. ਏਵਂ ਸਨ੍ਤੇ, ਮੋਘਪੁਰਿਸ, ਕੋ ਸਨ੍ਤੋ ਕਂ ਪਚ੍ਚਾਚਿਕ੍ਖਸਿ?

੧੨੬. ‘‘ਯੋ ਖੋ, ਮਾਲੁਕ੍ਯਪੁਤ੍ਤ, ਏਵਂ ਵਦੇਯ੍ਯ – ‘ਨ ਤਾਵਾਹਂ ਭਗਵਤਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਿ ਯਾਵ ਮੇ ਭਗਵਾ ਨ ਬ੍ਯਾਕਰਿਸ੍ਸਤਿ – ‘‘ਸਸ੍ਸਤੋ ਲੋਕੋ’’ਤਿ ਵਾ, ‘‘ਅਸਸ੍ਸਤੋ ਲੋਕੋ’’ਤਿ ਵਾ…ਪੇ… ‘‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ ਵਾਤਿ, ਅਬ੍ਯਾਕਤਮੇਵ ਤਂ, ਮਾਲੁਕ੍ਯਪੁਤ੍ਤ, ਤਥਾਗਤੇਨ ਅਸ੍ਸ, ਅਥ ਸੋ ਪੁਗ੍ਗਲੋ ਕਾਲਂ ਕਰੇਯ੍ਯ. ਸੇਯ੍ਯਥਾਪਿ, ਮਾਲੁਕ੍ਯਪੁਤ੍ਤ, ਪੁਰਿਸੋ ਸਲ੍ਲੇਨ ਵਿਦ੍ਧੋ ਅਸ੍ਸ ਸਵਿਸੇਨ ਗਾਲ਼੍ਹਪਲੇਪਨੇਨ. ਤਸ੍ਸ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ ਭਿਸਕ੍ਕਂ ਸਲ੍ਲਕਤ੍ਤਂ ਉਪਟ੍ਠਪੇਯ੍ਯੁਂ. ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਪੁਰਿਸਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਖਤ੍ਤਿਯੋ ਵਾ ਬ੍ਰਾਹ੍ਮਣੋ ਵਾ ਵੇਸ੍ਸੋ ਵਾ ਸੁਦ੍ਦੋ ਵਾ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਪੁਰਿਸਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਏਵਂਨਾਮੋ ਏਵਂਗੋਤ੍ਤੋ ਇਤਿ ਵਾ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਪੁਰਿਸਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਦੀਘੋ ਵਾ ਰਸ੍ਸੋ ਵਾ ਮਜ੍ਝਿਮੋ ਵਾ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਪੁਰਿਸਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਕਾਲ਼ੋ ਵਾ ਸਾਮੋ ਵਾ ਮਙ੍ਗੁਰਚ੍ਛਵੀ ਵਾ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਪੁਰਿਸਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਅਮੁਕਸ੍ਮਿਂ ਗਾਮੇ ਵਾ ਨਿਗਮੇ ਵਾ ਨਗਰੇ ਵਾ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਧਨੁਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਯਦਿ ਵਾ ਚਾਪੋ ਯਦਿ ਵਾ ਕੋਦਣ੍ਡੋ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਜਿਯਂ ਜਾਨਾਮਿ ਯਾਯਮ੍ਹਿ ਵਿਦ੍ਧੋ, ਯਦਿ ਵਾ ਅਕ੍ਕਸ੍ਸ ਯਦਿ ਵਾ ਸਣ੍ਹਸ੍ਸ [ਸਣ੍ਠਸ੍ਸ (ਸੀ. ਸ੍ਯਾ. ਕਂ. ਪੀ.)] ਯਦਿ ਵਾ ਨ੍ਹਾਰੁਸ੍ਸ ਯਦਿ ਵਾ ਮਰੁਵਾਯ ਯਦਿ ਵਾ ਖੀਰਪਣ੍ਣਿਨੋ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਕਣ੍ਡਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਯਦਿ ਵਾ ਗਚ੍ਛਂ ਯਦਿ ਵਾ ਰੋਪਿਮ’ਨ੍ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਕਣ੍ਡਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਯਸ੍ਸ ਪਤ੍ਤੇਹਿ ਵਾਜਿਤਂ [ਵਾਖਿਤ੍ਤਂ (ਕ.)] ਯਦਿ ਵਾ ਗਿਜ੍ਝਸ੍ਸ ਯਦਿ ਵਾ ਕਙ੍ਕਸ੍ਸ ਯਦਿ ਵਾ ਕੁਲਲਸ੍ਸ ਯਦਿ ਵਾ ਮੋਰਸ੍ਸ ਯਦਿ ਵਾ ਸਿਥਿਲਹਨੁਨੋ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਕਣ੍ਡਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਯਸ੍ਸ ਨ੍ਹਾਰੁਨਾ ਪਰਿਕ੍ਖਿਤ੍ਤਂ ਯਦਿ ਵਾ ਗਵਸ੍ਸ ਯਦਿ ਵਾ ਮਹਿਂਸਸ੍ਸ ਯਦਿ ਵਾ ਭੇਰਵਸ੍ਸ [ਰੋਰੁਵਸ੍ਸ (ਸੀ. ਸ੍ਯਾ. ਕਂ. ਪੀ.)] ਯਦਿ ਵਾ ਸੇਮ੍ਹਾਰਸ੍ਸਾ’ਤਿ; ਸੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਇਮਂ ਸਲ੍ਲਂ ਆਹਰਿਸ੍ਸਾਮਿ ਯਾਵ ਨ ਤਂ ਸਲ੍ਲਂ ਜਾਨਾਮਿ ਯੇਨਮ੍ਹਿ ਵਿਦ੍ਧੋ, ਯਦਿ ਵਾ ਸਲ੍ਲਂ ਯਦਿ ਵਾ ਖੁਰਪ੍ਪਂ ਯਦਿ ਵਾ ਵੇਕਣ੍ਡਂ ਯਦਿ ਵਾ ਨਾਰਾਚਂ ਯਦਿ ਵਾ ਵਚ੍ਛਦਨ੍ਤਂ ਯਦਿ ਵਾ ਕਰਵੀਰਪਤ੍ਤ’ਨ੍ਤਿ – ਅਞ੍ਞਾਤਮੇਵ ਤਂ, ਮਾਲੁਕ੍ਯਪੁਤ੍ਤ, ਤੇਨ ਪੁਰਿਸੇਨ ਅਸ੍ਸ, ਅਥ ਸੋ ਪੁਰਿਸੋ ਕਾਲਂ ਕਰੇਯ੍ਯ. ਏਵਮੇਵ ਖੋ, ਮਾਲੁਕ੍ਯਪੁਤ੍ਤ, ਯੋ ਏਵਂ ਵਦੇਯ੍ਯ – ‘ਨ ਤਾਵਾਹਂ ਭਗਵਤਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਿ ਯਾਵ ਮੇ ਭਗਵਾ ਨ ਬ੍ਯਾਕਰਿਸ੍ਸਤਿ – ‘‘ਸਸ੍ਸਤੋ ਲੋਕੋ’’ਤਿ ਵਾ ‘‘ਅਸਸ੍ਸਤੋ ਲੋਕੋ’’ਤਿ ਵਾ…ਪੇ… ‘‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’’ਤਿ ਵਾਤਿ – ਅਬ੍ਯਾਕਤਮੇਵ ਤਂ, ਮਾਲੁਕ੍ਯਪੁਤ੍ਤ, ਤਥਾਗਤੇਨ ਅਸ੍ਸ, ਅਥ ਸੋ ਪੁਗ੍ਗਲੋ ਕਾਲਙ੍ਕਰੇਯ੍ਯ.

੧੨੭. ‘‘‘ਸਸ੍ਸਤੋ ਲੋਕੋ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਂ ‘ਨੋ ਅਸਸ੍ਸਤੋ ਲੋਕੋ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਮ੍ਪਿ ‘ਨੋ ਸਸ੍ਸਤੋ ਲੋਕੋ’ਤਿ ਵਾ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ, ‘ਅਸਸ੍ਸਤੋ ਲੋਕੋ’ਤਿ ਵਾ ਦਿਟ੍ਠਿਯਾ ਸਤਿ ਅਤ੍ਥੇਵ ਜਾਤਿ, ਅਤ੍ਥਿ ਜਰਾ, ਅਤ੍ਥਿ ਮਰਣਂ, ਸਨ੍ਤਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ; ਯੇਸਾਹਂ ਦਿਟ੍ਠੇਵ ਧਮ੍ਮੇ ਨਿਘਾਤਂ ਪਞ੍ਞਪੇਮਿ. ‘ਅਨ੍ਤਵਾ ਲੋਕੋ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਂ ‘ਨੋ ਅਨਨ੍ਤਵਾ ਲੋਕੋ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਮ੍ਪਿ ‘ਨੋ ਅਨ੍ਤਵਾ ਲੋਕੋ’ਤਿ ਵਾ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ, ‘ਅਨਨ੍ਤਵਾ ਲੋਕੋ’ਤਿ ਵਾ ਦਿਟ੍ਠਿਯਾ ਸਤਿ ਅਤ੍ਥੇਵ ਜਾਤਿ, ਅਤ੍ਥਿ ਜਰਾ, ਅਤ੍ਥਿ ਮਰਣਂ, ਸਨ੍ਤਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ; ਯੇਸਾਹਂ ਦਿਟ੍ਠੇਵ ਧਮ੍ਮੇ ਨਿਘਾਤਂ ਪਞ੍ਞਪੇਮਿ. ‘ਤਂ ਜੀਵਂ ਤਂ ਸਰੀਰ’ਨ੍ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਂ ‘ਨੋ ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਮ੍ਪਿ ‘ਨੋ ਤਂ ਜੀਵਂ ਤਂ ਸਰੀਰ’ਨ੍ਤਿ ਵਾ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ, ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਵਾ ਦਿਟ੍ਠਿਯਾ ਸਤਿ ਅਤ੍ਥੇਵ ਜਾਤਿ…ਪੇ… ਨਿਘਾਤਂ ਪਞ੍ਞਪੇਮਿ. ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਂ ‘ਨੋ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਮ੍ਪਿ ‘ਨੋ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ, ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ ਦਿਟ੍ਠਿਯਾ ਸਤਿ ਅਤ੍ਥੇਵ ਜਾਤਿ…ਪੇ… ਯੇਸਾਹਂ ਦਿਟ੍ਠੇਵ ਧਮ੍ਮੇ ਨਿਘਾਤਂ ਪਞ੍ਞਪੇਮਿ. ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਂ ‘ਨੋ ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ ਬ੍ਰਹ੍ਮਚਰਿਯਵਾਸੋ ਅਭਵਿਸ੍ਸਾਤਿ, ਏਵਮ੍ਪਿ ‘ਨੋ ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ, ਮਾਲੁਕ੍ਯਪੁਤ੍ਤ, ਦਿਟ੍ਠਿਯਾ ਸਤਿ, ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਵਾ ਦਿਟ੍ਠਿਯਾ ਸਤਿ ਅਤ੍ਥੇਵ ਜਾਤਿ…ਪੇ… ਯੇਸਾਹਂ ਦਿਟ੍ਠੇਵ ਧਮ੍ਮੇ ਨਿਘਾਤਂ ਪਞ੍ਞਪੇਮਿ.

੧੨੮. ‘‘ਤਸ੍ਮਾਤਿਹ, ਮਾਲੁਕ੍ਯਪੁਤ੍ਤ, ਅਬ੍ਯਾਕਤਞ੍ਚ ਮੇ ਅਬ੍ਯਾਕਤਤੋ ਧਾਰੇਥ; ਬ੍ਯਾਕਤਞ੍ਚ ਮੇ ਬ੍ਯਾਕਤਤੋ ਧਾਰੇਥ. ਕਿਞ੍ਚ, ਮਾਲੁਕ੍ਯਪੁਤ੍ਤ, ਮਯਾ ਅਬ੍ਯਾਕਤਂ? ‘ਸਸ੍ਸਤੋ ਲੋਕੋ’ਤਿ ਮਾਲੁਕ੍ਯਪੁਤ੍ਤ, ਮਯਾ ਅਬ੍ਯਾਕਤਂ; ‘ਅਸਸ੍ਸਤੋ ਲੋਕੋ’ਤਿ – ਮਯਾ ਅਬ੍ਯਾਕਤਂ; ‘ਅਨ੍ਤਵਾ ਲੋਕੋ’ਤਿ – ਮਯਾ ਅਬ੍ਯਾਕਤਂ; ‘ਅਨਨ੍ਤਵਾ ਲੋਕੋ’ਤਿ – ਮਯਾ ਅਬ੍ਯਾਕਤਂ; ‘ਤਂ ਜੀਵਂ ਤਂ ਸਰੀਰ’ਨ੍ਤਿ – ਮਯਾ ਅਬ੍ਯਾਕਤਂ; ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ – ਮਯਾ ਅਬ੍ਯਾਕਤਂ; ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ – ਮਯਾ ਅਬ੍ਯਾਕਤਂ; ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ – ਮਯਾ ਅਬ੍ਯਾਕਤਂ; ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ – ਮਯਾ ਅਬ੍ਯਾਕਤਂ; ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ – ਮਯਾ ਅਬ੍ਯਾਕਤਂ. ਕਸ੍ਮਾ ਚੇਤਂ, ਮਾਲੁਕ੍ਯਪੁਤ੍ਤ, ਮਯਾ ਅਬ੍ਯਾਕਤਂ? ਨ ਹੇਤਂ, ਮਾਲੁਕ੍ਯਪੁਤ੍ਤ, ਅਤ੍ਥਸਂਹਿਤਂ ਨ ਆਦਿਬ੍ਰਹ੍ਮਚਰਿਯਕਂ ਨ [ਨੇਤਂ (ਸੀ.)] ਨਿਬ੍ਬਿਦਾਯ ਨ ਵਿਰਾਗਾਯ ਨ ਨਿਰੋਧਾਯ ਨ ਉਪਸਮਾਯ ਨ ਅਭਿਞ੍ਞਾਯ ਨ ਸਮ੍ਬੋਧਾਯ ਨ ਨਿਬ੍ਬਾਨਾਯ ਸਂਵਤ੍ਤਤਿ. ਤਸ੍ਮਾ ਤਂ ਮਯਾ ਅਬ੍ਯਾਕਤਂ. ਕਿਞ੍ਚ, ਮਾਲੁਕ੍ਯਪੁਤ੍ਤ, ਮਯਾ ਬ੍ਯਾਕਤਂ? ‘ਇਦਂ ਦੁਕ੍ਖ’ਨ੍ਤਿ, ਮਾਲੁਕ੍ਯਪੁਤ੍ਤ, ਮਯਾ ਬ੍ਯਾਕਤਂ; ‘ਅਯਂ ਦੁਕ੍ਖਸਮੁਦਯੋ’ਤਿ – ਮਯਾ ਬ੍ਯਾਕਤਂ; ‘ਅਯਂ ਦੁਕ੍ਖਨਿਰੋਧੋ’ਤਿ – ਮਯਾ ਬ੍ਯਾਕਤਂ; ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ – ਮਯਾ ਬ੍ਯਾਕਤਂ. ਕਸ੍ਮਾ ਚੇਤਂ, ਮਾਲੁਕ੍ਯਪੁਤ੍ਤ, ਮਯਾ ਬ੍ਯਾਕਤਂ? ਏਤਞ੍ਹਿ, ਮਾਲੁਕ੍ਯਪੁਤ੍ਤ, ਅਤ੍ਥਸਂਹਿਤਂ ਏਤਂ ਆਦਿਬ੍ਰਹ੍ਮਚਰਿਯਕਂ ਨਿਬ੍ਬਿਦਾਯ ਵਿਰਾਗਾਯ ਨਿਰੋਧਾਯ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਤਸ੍ਮਾ ਤਂ ਮਯਾ ਬ੍ਯਾਕਤਂ. ਤਸ੍ਮਾਤਿਹ, ਮਾਲੁਕ੍ਯਪੁਤ੍ਤ, ਅਬ੍ਯਾਕਤਞ੍ਚ ਮੇ ਅਬ੍ਯਾਕਤਤੋ ਧਾਰੇਥ; ਬ੍ਯਾਕਤਞ੍ਚ ਮੇ ਬ੍ਯਾਕਤਤੋ ਧਾਰੇਥਾ’’ਤਿ.

ਇਦਮਵੋਚ ਭਗਵਾ. ਅਤ੍ਤਮਨੋ ਆਯਸ੍ਮਾ ਮਾਲੁਕ੍ਯਪੁਤ੍ਤੋ ਭਗਵਤੋ ਭਾਸਿਤਂ ਅਭਿਨਨ੍ਦੀਤਿ.

ਚੂਲ਼ਮਾਲੁਕ੍ਯਸੁਤ੍ਤਂ ਨਿਟ੍ਠਿਤਂ ਤਤਿਯਂ.