੧. ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਂ

੧੦੭. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਰਾਹੁਲੋ ਅਮ੍ਬਲਟ੍ਠਿਕਾਯਂ ਵਿਹਰਤਿ. ਅਥ ਖੋ ਭਗਵਾ ਸਾਯਨ੍ਹਸਮਯਂ ਪਟਿਸਲ੍ਲਾਨਾ ਵੁਟ੍ਠਿਤੋ ਯੇਨ ਅਮ੍ਬਲਟ੍ਠਿਕਾ ਯੇਨਾਯਸ੍ਮਾ ਰਾਹੁਲੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਆਯਸ੍ਮਾ ਰਾਹੁਲੋ ਭਗਵਨ੍ਤਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਆਸਨਂ ਪਞ੍ਞਾਪੇਸਿ, ਉਦਕਞ੍ਚ ਪਾਦਾਨਂ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਨਿਸਜ੍ਜ ਪਾਦੇ ਪਕ੍ਖਾਲੇਸਿ. ਆਯਸ੍ਮਾਪਿ ਖੋ ਰਾਹੁਲੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ.

੧੦੮. ਅਥ ਖੋ ਭਗਵਾ ਪਰਿਤ੍ਤਂ ਉਦਕਾਵਸੇਸਂ ਉਦਕਾਧਾਨੇ ਠਪੇਤ੍ਵਾ ਆਯਸ੍ਮਨ੍ਤਂ ਰਾਹੁਲਂ ਆਮਨ੍ਤੇਸਿ – ‘‘ਪਸ੍ਸਸਿ ਨੋ ਤ੍ਵਂ, ਰਾਹੁਲ, ਇਮਂ ਪਰਿਤ੍ਤਂ ਉਦਕਾਵਸੇਸਂ ਉਦਕਾਧਾਨੇ ਠਪਿਤ’’ਨ੍ਤਿ? ‘‘ਏਵਂ, ਭਨ੍ਤੇ’’. ‘‘ਏਵਂ ਪਰਿਤ੍ਤਕਂ ਖੋ, ਰਾਹੁਲ, ਤੇਸਂ ਸਾਮਞ੍ਞਂ ਯੇਸਂ ਨਤ੍ਥਿ ਸਮ੍ਪਜਾਨਮੁਸਾਵਾਦੇ ਲਜ੍ਜਾ’’ਤਿ. ਅਥ ਖੋ ਭਗਵਾ ਪਰਿਤ੍ਤਂ ਉਦਕਾਵਸੇਸਂ ਛਡ੍ਡੇਤ੍ਵਾ ਆਯਸ੍ਮਨ੍ਤਂ ਰਾਹੁਲਂ ਆਮਨ੍ਤੇਸਿ – ‘‘ਪਸ੍ਸਸਿ ਨੋ ਤ੍ਵਂ, ਰਾਹੁਲ, ਪਰਿਤ੍ਤਂ ਉਦਕਾਵਸੇਸਂ ਛਡ੍ਡਿਤ’’ਨ੍ਤਿ? ‘‘ਏਵਂ, ਭਨ੍ਤੇ’’. ‘‘ਏਵਂ ਛਡ੍ਡਿਤਂ ਖੋ, ਰਾਹੁਲ, ਤੇਸਂ ਸਾਮਞ੍ਞਂ ਯੇਸਂ ਨਤ੍ਥਿ ਸਮ੍ਪਜਾਨਮੁਸਾਵਾਦੇ ਲਜ੍ਜਾ’’ਤਿ. ਅਥ ਖੋ ਭਗਵਾ ਤਂ ਉਦਕਾਧਾਨਂ ਨਿਕ੍ਕੁਜ੍ਜਿਤ੍ਵਾ ਆਯਸ੍ਮਨ੍ਤਂ ਰਾਹੁਲਂ ਆਮਨ੍ਤੇਸਿ – ‘‘ਪਸ੍ਸਸਿ ਨੋ ਤ੍ਵਂ, ਰਾਹੁਲ, ਇਮਂ ਉਦਕਾਧਾਨਂ ਨਿਕ੍ਕੁਜ੍ਜਿਤ’’ਨ੍ਤਿ? ‘‘ਏਵਂ, ਭਨ੍ਤੇ’’. ‘‘ਏਵਂ ਨਿਕ੍ਕੁਜ੍ਜਿਤਂ ਖੋ, ਰਾਹੁਲ, ਤੇਸਂ ਸਾਮਞ੍ਞਂ ਯੇਸਂ ਨਤ੍ਥਿ ਸਮ੍ਪਜਾਨਮੁਸਾਵਾਦੇ ਲਜ੍ਜਾ’’ਤਿ. ਅਥ ਖੋ ਭਗਵਾ ਤਂ ਉਦਕਾਧਾਨਂ ਉਕ੍ਕੁਜ੍ਜਿਤ੍ਵਾ ਆਯਸ੍ਮਨ੍ਤਂ ਰਾਹੁਲਂ ਆਮਨ੍ਤੇਸਿ – ‘‘ਪਸ੍ਸਸਿ ਨੋ ਤ੍ਵਂ, ਰਾਹੁਲ, ਇਮਂ ਉਦਕਾਧਾਨਂ ਰਿਤ੍ਤਂ ਤੁਚ੍ਛ’’ਨ੍ਤਿ? ‘‘ਏਵਂ, ਭਨ੍ਤੇ’’. ‘‘ਏਵਂ ਰਿਤ੍ਤਂ ਤੁਚ੍ਛਂ ਖੋ, ਰਾਹੁਲ, ਤੇਸਂ ਸਾਮਞ੍ਞਂ ਯੇਸਂ ਨਤ੍ਥਿ ਸਮ੍ਪਜਾਨਮੁਸਾਵਾਦੇ ਲਜ੍ਜਾਤਿ. ਸੇਯ੍ਯਥਾਪਿ, ਰਾਹੁਲ, ਰਞ੍ਞੋ ਨਾਗੋ ਈਸਾਦਨ੍ਤੋ ਉਰੂਲ਼੍ਹਵਾ [ਉਬ੍ਬੂਲ਼੍ਹਵਾ (ਸੀ. ਪੀ.)] ਅਭਿਜਾਤੋ ਸਙ੍ਗਾਮਾਵਚਰੋ ਸਙ੍ਗਾਮਗਤੋ ਪੁਰਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ, ਪਚ੍ਛਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ, ਪੁਰਿਮੇਨਪਿ ਕਾਯੇਨ ਕਮ੍ਮਂ ਕਰੋਤਿ, ਪਚ੍ਛਿਮੇਨਪਿ ਕਾਯੇਨ ਕਮ੍ਮਂ ਕਰੋਤਿ, ਸੀਸੇਨਪਿ ਕਮ੍ਮਂ ਕਰੋਤਿ, ਕਣ੍ਣੇਹਿਪਿ ਕਮ੍ਮਂ ਕਰੋਤਿ, ਦਨ੍ਤੇਹਿਪਿ ਕਮ੍ਮਂ ਕਰੋਤਿ, ਨਙ੍ਗੁਟ੍ਠੇਨਪਿ ਕਮ੍ਮਂ ਕਰੋਤਿ; ਰਕ੍ਖਤੇਵ ਸੋਣ੍ਡਂ. ਤਤ੍ਥ ਹਤ੍ਥਾਰੋਹਸ੍ਸ ਏਵਂ ਹੋਤਿ – ‘ਅਯਂ ਖੋ ਰਞ੍ਞੋ ਨਾਗੋ ਈਸਾਦਨ੍ਤੋ ਉਰੂਲ਼੍ਹਵਾ ਅਭਿਜਾਤੋ ਸਙ੍ਗਾਮਾਵਚਰੋ ਸਙ੍ਗਾਮਗਤੋ ਪੁਰਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ, ਪਚ੍ਛਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ…ਪੇ… ਨਙ੍ਗੁਟ੍ਠੇਨਪਿ ਕਮ੍ਮਂ ਕਰੋਤਿ; ਰਕ੍ਖਤੇਵ ਸੋਣ੍ਡਂ. ਅਪਰਿਚ੍ਚਤ੍ਤਂ ਖੋ ਰਞ੍ਞੋ ਨਾਗਸ੍ਸ ਜੀਵਿਤ’ਨ੍ਤਿ. ਯਤੋ ਖੋ, ਰਾਹੁਲ, ਰਞ੍ਞੋ ਨਾਗੋ ਈਸਾਦਨ੍ਤੋ ਉਰੂਲ਼੍ਹਵਾ ਅਭਿਜਾਤੋ ਸਙ੍ਗਾਮਾਵਚਰੋ ਸਙ੍ਗਾਮਗਤੋ ਪੁਰਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ, ਪਚ੍ਛਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ…ਪੇ… ਨਙ੍ਗੁਟ੍ਠੇਨਪਿ ਕਮ੍ਮਂ ਕਰੋਤਿ, ਸੋਣ੍ਡਾਯਪਿ ਕਮ੍ਮਂ ਕਰੋਤਿ, ਤਤ੍ਥ ਹਤ੍ਥਾਰੋਹਸ੍ਸ ਏਵਂ ਹੋਤਿ – ‘ਅਯਂ ਖੋ ਰਞ੍ਞੋ ਨਾਗੋ ਈਸਾਦਨ੍ਤੋ ਉਰੂਲ਼੍ਹਵਾ ਅਭਿਜਾਤੋ ਸਙ੍ਗਾਮਾਵਚਰੋ ਸਙ੍ਗਾਮਗਤੋ ਪੁਰਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ, ਪਚ੍ਛਿਮੇਹਿਪਿ ਪਾਦੇਹਿ ਕਮ੍ਮਂ ਕਰੋਤਿ, ਪੁਰਿਮੇਨਪਿ ਕਾਯੇਨ ਕਮ੍ਮਂ ਕਰੋਤਿ, ਪਚ੍ਛਿਮੇਨਪਿ ਕਾਯੇਨ ਕਮ੍ਮਂ ਕਰੋਤਿ, ਸੀਸੇਨਪਿ ਕਮ੍ਮਂ ਕਰੋਤਿ, ਕਣ੍ਣੇਹਿਪਿ ਕਮ੍ਮਂ ਕਰੋਤਿ, ਦਨ੍ਤੇਹਿਪਿ ਕਮ੍ਮਂ ਕਰੋਤਿ, ਨਙ੍ਗੁਟ੍ਠੇਨਪਿ ਕਮ੍ਮਂ ਕਰੋਤਿ, ਸੋਣ੍ਡਾਯਪਿ ਕਮ੍ਮਂ ਕਰੋਤਿ. ਪਰਿਚ੍ਚਤ੍ਤਂ ਖੋ ਰਞ੍ਞੋ ਨਾਗਸ੍ਸ ਜੀਵਿਤਂ. ਨਤ੍ਥਿ ਦਾਨਿ ਕਿਞ੍ਚਿ ਰਞ੍ਞੋ ਨਾਗਸ੍ਸ ਅਕਰਣੀਯ’ਨ੍ਤਿ. ਏਵਮੇਵ ਖੋ, ਰਾਹੁਲ, ਯਸ੍ਸ ਕਸ੍ਸਚਿ ਸਮ੍ਪਜਾਨਮੁਸਾਵਾਦੇ ਨਤ੍ਥਿ ਲਜ੍ਜਾ, ਨਾਹਂ ਤਸ੍ਸ ਕਿਞ੍ਚਿ ਪਾਪਂ ਅਕਰਣੀਯਨ੍ਤਿ ਵਦਾਮਿ. ਤਸ੍ਮਾਤਿਹ ਤੇ, ਰਾਹੁਲ, ‘ਹਸ੍ਸਾਪਿ ਨ ਮੁਸਾ ਭਣਿਸ੍ਸਾਮੀ’ਤਿ – ਏਵਞ੍ਹਿ ਤੇ, ਰਾਹੁਲ, ਸਿਕ੍ਖਿਤਬ੍ਬਂ.

੧੦੯. ‘‘ਤਂ ਕਿਂ ਮਞ੍ਞਸਿ, ਰਾਹੁਲ, ਕਿਮਤ੍ਥਿਯੋ ਆਦਾਸੋ’’ਤਿ? ‘‘ਪਚ੍ਚਵੇਕ੍ਖਣਤ੍ਥੋ, ਭਨ੍ਤੇ’’ਤਿ. ‘‘ਏਵਮੇਵ ਖੋ, ਰਾਹੁਲ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਕਾਯੇਨ ਕਮ੍ਮਂ ਕਤ੍ਤਬ੍ਬਂ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਵਾਚਾਯ ਕਮ੍ਮਂ ਕਤ੍ਤਬ੍ਬਂ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਮਨਸਾ ਕਮ੍ਮਂ ਕਤ੍ਤਬ੍ਬਂ. ਯਦੇਵ ਤ੍ਵਂ, ਰਾਹੁਲ, ਕਾਯੇਨ ਕਮ੍ਮਂ ਕਤ੍ਤੁਕਾਮੋ ਅਹੋਸਿ, ਤਦੇਵ ਤੇ ਕਾਯਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਕਾਯਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਅਕੁਸਲਂ ਇਦਂ ਕਾਯਕਮ੍ਮਂ ਦੁਕ੍ਖੁਦ੍ਰਯਂ [ਦੁਕ੍ਖੁਨ੍ਦ੍ਰਯਂ, ਦੁਕ੍ਖੁਦਯਂ (ਕ.)] ਦੁਕ੍ਖਵਿਪਾਕ’ਨ੍ਤਿ? ਸਚੇ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਕਾਯਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਅਕੁਸਲਂ ਇਦਂ ਕਾਯਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਕਾਯੇਨ ਕਮ੍ਮਂ ਸਸਕ੍ਕਂ ਨ ਕਰਣੀਯਂ [ਸਂਸਕ੍ਕਂ ਨ ਚ ਕਰਣੀਯਂ (ਕ.)]. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਕਾਯਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਕੁਸਲਂ ਇਦਂ ਕਾਯਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਕਾਯੇਨ ਕਮ੍ਮਂ ਕਰਣੀਯਂ.

‘‘ਕਰੋਨ੍ਤੇਨਪਿ ਤੇ, ਰਾਹੁਲ, ਕਾਯੇਨ ਕਮ੍ਮਂ ਤਦੇਵ ਤੇ ਕਾਯਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਕਰੋਮਿ ਇਦਂ ਮੇ ਕਾਯਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਕਾਯਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਕਰੋਮਿ ਇਦਂ ਮੇ ਕਾਯਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਕਾਯਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਪਟਿਸਂਹਰੇਯ੍ਯਾਸਿ ਤ੍ਵਂ, ਰਾਹੁਲ, ਏਵਰੂਪਂ ਕਾਯਕਮ੍ਮਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਕਰੋਮਿ ਇਦਂ ਮੇ ਕਾਯਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਕੁਸਲਂ ਇਦਂ ਕਾਯਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਅਨੁਪਦਜ੍ਜੇਯ੍ਯਾਸਿ ਤ੍ਵਂ, ਰਾਹੁਲ, ਏਵਰੂਪਂ ਕਾਯਕਮ੍ਮਂ.

‘‘ਕਤ੍ਵਾਪਿ ਤੇ, ਰਾਹੁਲ, ਕਾਯੇਨ ਕਮ੍ਮਂ ਤਦੇਵ ਤੇ ਕਾਯਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਅਕਾਸਿਂ ਇਦਂ ਮੇ ਕਾਯਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ [ਸਂਵਤ੍ਤਿ (ਪੀ.)], ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਕਾਯਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਖੋ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਅਕਾਸਿਂ, ਇਦਂ ਮੇ ਕਾਯਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਕਾਯਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਕਾਯਕਮ੍ਮਂ ਸਤ੍ਥਰਿ ਵਾ ਵਿਞ੍ਞੂਸੁ ਵਾ ਸਬ੍ਰਹ੍ਮਚਾਰੀਸੁ ਦੇਸੇਤਬ੍ਬਂ, ਵਿਵਰਿਤਬ੍ਬਂ, ਉਤ੍ਤਾਨੀਕਾਤਬ੍ਬਂ; ਦੇਸੇਤ੍ਵਾ ਵਿਵਰਿਤ੍ਵਾ ਉਤ੍ਤਾਨੀਕਤ੍ਵਾ ਆਯਤਿਂ ਸਂਵਰਂ ਆਪਜ੍ਜਿਤਬ੍ਬਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਕਾਯੇਨ ਕਮ੍ਮਂ ਅਕਾਸਿਂ ਇਦਂ ਮੇ ਕਾਯਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਕੁਸਲਂ ਇਦਂ ਕਾਯਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਤੇਨੇਵ ਤ੍ਵਂ, ਰਾਹੁਲ, ਪੀਤਿਪਾਮੋਜ੍ਜੇਨ ਵਿਹਰੇਯ੍ਯਾਸਿ ਅਹੋਰਤ੍ਤਾਨੁਸਿਕ੍ਖੀ ਕੁਸਲੇਸੁ ਧਮ੍ਮੇਸੁ.

੧੧੦. ‘‘ਯਦੇਵ ਤ੍ਵਂ, ਰਾਹੁਲ, ਵਾਚਾਯ ਕਮ੍ਮਂ ਕਤ੍ਤੁਕਾਮੋ ਅਹੋਸਿ, ਤਦੇਵ ਤੇ ਵਚੀਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਵਚੀਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਅਕੁਸਲਂ ਇਦਂ ਵਚੀਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਵਚੀਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਅਕੁਸਲਂ ਇਦਂ ਵਚੀਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਵਾਚਾਯ ਕਮ੍ਮਂ ਸਸਕ੍ਕਂ ਨ ਕਰਣੀਯਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਵਚੀਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਕੁਸਲਂ ਇਦਂ ਵਚੀਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਵਾਚਾਯ ਕਮ੍ਮਂ ਕਰਣੀਯਂ.

‘‘ਕਰੋਨ੍ਤੇਨਪਿ, ਰਾਹੁਲ, ਵਾਚਾਯ ਕਮ੍ਮਂ ਤਦੇਵ ਤੇ ਵਚੀਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਕਰੋਮਿ ਇਦਂ ਮੇ ਵਚੀਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਵਚੀਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਕਰੋਮਿ ਇਦਂ ਮੇ ਵਚੀਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਵਚੀਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਪਟਿਸਂਹਰੇਯ੍ਯਾਸਿ ਤ੍ਵਂ, ਰਾਹੁਲ, ਏਵਰੂਪਂ ਵਚੀਕਮ੍ਮਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਕਰੋਮਿ ਇਦਂ ਮੇ ਵਚੀਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਕੁਸਲਂ ਇਦਂ ਵਚੀਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਅਨੁਪਦਜ੍ਜੇਯ੍ਯਾਸਿ, ਤ੍ਵਂ ਰਾਹੁਲ, ਏਵਰੂਪਂ ਵਚੀਕਮ੍ਮਂ.

‘‘ਕਤ੍ਵਾਪਿ ਤੇ, ਰਾਹੁਲ, ਵਾਚਾਯ ਕਮ੍ਮਂ ਤਦੇਵ ਤੇ ਵਚੀਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਅਕਾਸਿਂ ਇਦਂ ਮੇ ਵਚੀਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ [ਸਂਵਤ੍ਤਿ (ਸੀ. ਪੀ.)], ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਵਚੀਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਖੋ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਅਕਾਸਿਂ ਇਦਂ ਮੇ ਵਚੀਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਵਚੀਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਵਚੀਕਮ੍ਮਂ ਸਤ੍ਥਰਿ ਵਾ ਵਿਞ੍ਞੂਸੁ ਵਾ ਸਬ੍ਰਹ੍ਮਚਾਰੀਸੁ ਦੇਸੇਤਬ੍ਬਂ, ਵਿਵਰਿਤਬ੍ਬਂ, ਉਤ੍ਤਾਨੀਕਤ੍ਤਬ੍ਬਂ; ਦੇਸੇਤ੍ਵਾ ਵਿਵਰਿਤ੍ਵਾ ਉਤ੍ਤਾਨੀਕਤ੍ਵਾ ਆਯਤਿਂ ਸਂਵਰਂ ਆਪਜ੍ਜਿਤਬ੍ਬਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਵਾਚਾਯ ਕਮ੍ਮਂ ਅਕਾਸਿਂ ਇਦਂ ਮੇ ਵਚੀਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਕੁਸਲਂ ਇਦਂ ਵਚੀਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਤੇਨੇਵ ਤ੍ਵਂ, ਰਾਹੁਲ, ਪੀਤਿਪਾਮੋਜ੍ਜੇਨ ਵਿਹਰੇਯ੍ਯਾਸਿ ਅਹੋਰਤ੍ਤਾਨੁਸਿਕ੍ਖੀ ਕੁਸਲੇਸੁ ਧਮ੍ਮੇਸੁ.

੧੧੧. ‘‘ਯਦੇਵ ਤ੍ਵਂ, ਰਾਹੁਲ, ਮਨਸਾ ਕਮ੍ਮਂ ਕਤ੍ਤੁਕਾਮੋ ਅਹੋਸਿ, ਤਦੇਵ ਤੇ ਮਨੋਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਮਨਸਾ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਮਨੋਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਅਕੁਸਲਂ ਇਦਂ ਮਨੋਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਮਨਸਾ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਮਨੋਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਅਕੁਸਲਂ ਇਦਂ ਮਨੋਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਮਨਸਾ ਕਮ੍ਮਂ ਸਸਕ੍ਕਂ ਨ ਕਰਣੀਯਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਮਨਸਾ ਕਮ੍ਮਂ ਕਤ੍ਤੁਕਾਮੋ ਇਦਂ ਮੇ ਮਨੋਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤੇਯ੍ਯ – ਕੁਸਲਂ ਇਦਂ ਮਨੋਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਏਵਰੂਪਂ ਤੇ, ਰਾਹੁਲ, ਮਨਸਾ ਕਮ੍ਮਂ ਕਰਣੀਯਂ.

‘‘ਕਰੋਨ੍ਤੇਨਪਿ ਤੇ, ਰਾਹੁਲ, ਮਨਸਾ ਕਮ੍ਮਂ ਤਦੇਵ ਤੇ ਮਨੋਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਮਨਸਾ ਕਮ੍ਮਂ ਕਰੋਮਿ ਇਦਂ ਮੇ ਮਨੋਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਮਨੋਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਮਨਸਾ ਕਮ੍ਮਂ ਕਰੋਮਿ ਇਦਂ ਮੇ ਮਨੋਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਮਨੋਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਪਟਿਸਂਹਰੇਯ੍ਯਾਸਿ ਤ੍ਵਂ, ਰਾਹੁਲ, ਏਵਰੂਪਂ ਮਨੋਕਮ੍ਮਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਮਨਸਾ ਕਮ੍ਮਂ ਕਰੋਮਿ ਇਦਂ ਮੇ ਮਨੋਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਕੁਸਲਂ ਇਦਂ ਮਨੋਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਅਨੁਪਦਜ੍ਜੇਯ੍ਯਾਸਿ ਤ੍ਵਂ, ਰਾਹੁਲ, ਏਵਰੂਪਂ ਮਨੋਕਮ੍ਮਂ.

‘‘ਕਤ੍ਵਾਪਿ ਤੇ, ਰਾਹੁਲ, ਮਨਸਾ ਕਮ੍ਮਂ ਤਦੇਵ ਤੇ ਮਨੋਕਮ੍ਮਂ ਪਚ੍ਚਵੇਕ੍ਖਿਤਬ੍ਬਂ – ‘ਯਂ ਨੁ ਖੋ ਅਹਂ ਇਦਂ ਮਨਸਾ ਕਮ੍ਮਂ ਅਕਾਸਿਂ ਇਦਂ ਮੇ ਮਨੋਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ [ਸਂਵਤ੍ਤਿ (ਸੀ. ਪੀ.)], ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਮਨੋਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ? ਸਚੇ ਖੋ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਮਨਸਾ ਕਮ੍ਮਂ ਅਕਾਸਿਂ ਇਦਂ ਮੇ ਮਨੋਕਮ੍ਮਂ ਅਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਅਕੁਸਲਂ ਇਦਂ ਮਨੋਕਮ੍ਮਂ ਦੁਕ੍ਖੁਦ੍ਰਯਂ ਦੁਕ੍ਖਵਿਪਾਕ’ਨ੍ਤਿ, ਏਵਰੂਪਂ ਪਨ [ਏਵਰੂਪੇ (ਸੀ. ਪੀ.), ਏਵਰੂਪੇ ਪਨ (ਸ੍ਯਾ. ਕਂ.)] ਤੇ, ਰਾਹੁਲ, ਮਨੋਕਮ੍ਮਂ [ਮਨੋਕਮ੍ਮੇ (ਸੀ. ਸ੍ਯਾ. ਕਂ. ਪੀ.)] ਅਟ੍ਟੀਯਿਤਬ੍ਬਂ ਹਰਾਯਿਤਬ੍ਬਂ ਜਿਗੁਚ੍ਛਿਤਬ੍ਬਂ; ਅਟ੍ਟੀਯਿਤ੍ਵਾ ਹਰਾਯਿਤ੍ਵਾ ਜਿਗੁਚ੍ਛਿਤ੍ਵਾ ਆਯਤਿਂ ਸਂਵਰਂ ਆਪਜ੍ਜਿਤਬ੍ਬਂ. ਸਚੇ ਪਨ ਤ੍ਵਂ, ਰਾਹੁਲ, ਪਚ੍ਚਵੇਕ੍ਖਮਾਨੋ ਏਵਂ ਜਾਨੇਯ੍ਯਾਸਿ – ‘ਯਂ ਖੋ ਅਹਂ ਇਦਂ ਮਨਸਾ ਕਮ੍ਮਂ ਅਕਾਸਿਂ ਇਦਂ ਮੇ ਮਨੋਕਮ੍ਮਂ ਨੇਵਤ੍ਤਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਪਰਬ੍ਯਾਬਾਧਾਯਪਿ ਸਂਵਤ੍ਤਤਿ, ਨ ਉਭਯਬ੍ਯਾਬਾਧਾਯਪਿ ਸਂਵਤ੍ਤਤਿ – ਕੁਸਲਂ ਇਦਂ ਮਨੋਕਮ੍ਮਂ ਸੁਖੁਦ੍ਰਯਂ ਸੁਖਵਿਪਾਕ’ਨ੍ਤਿ, ਤੇਨੇਵ ਤ੍ਵਂ, ਰਾਹੁਲ, ਪੀਤਿਪਾਮੋਜ੍ਜੇਨ ਵਿਹਰੇਯ੍ਯਾਸਿ ਅਹੋਰਤ੍ਤਾਨੁਸਿਕ੍ਖੀ ਕੁਸਲੇਸੁ ਧਮ੍ਮੇਸੁ.

੧੧੨. ‘‘ਯੇ ਹਿ ਕੇਚਿ, ਰਾਹੁਲ, ਅਤੀਤਮਦ੍ਧਾਨਂ ਸਮਣਾ ਵਾ ਬ੍ਰਾਹ੍ਮਣਾ ਵਾ ਕਾਯਕਮ੍ਮਂ ਪਰਿਸੋਧੇਸੁਂ, ਵਚੀਕਮ੍ਮਂ ਪਰਿਸੋਧੇਸੁਂ, ਮਨੋਕਮ੍ਮਂ ਪਰਿਸੋਧੇਸੁਂ, ਸਬ੍ਬੇ ਤੇ ਏਵਮੇਵਂ ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਕਾਯਕਮ੍ਮਂ ਪਰਿਸੋਧੇਸੁਂ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਵਚੀਕਮ੍ਮਂ ਪਰਿਸੋਧੇਸੁਂ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਮਨੋਕਮ੍ਮਂ ਪਰਿਸੋਧੇਸੁਂ. ਯੇਪਿ ਹਿ ਕੇਚਿ, ਰਾਹੁਲ, ਅਨਾਗਤਮਦ੍ਧਾਨਂ ਸਮਣਾ ਵਾ ਬ੍ਰਾਹ੍ਮਣਾ ਵਾ ਕਾਯਕਮ੍ਮਂ ਪਰਿਸੋਧੇਸ੍ਸਨ੍ਤਿ, ਵਚੀਕਮ੍ਮਂ ਪਰਿਸੋਧੇਸ੍ਸਨ੍ਤਿ, ਮਨੋਕਮ੍ਮਂ ਪਰਿਸੋਧੇਸ੍ਸਨ੍ਤਿ, ਸਬ੍ਬੇ ਤੇ ਏਵਮੇਵਂ ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਕਾਯਕਮ੍ਮਂ ਪਰਿਸੋਧੇਸ੍ਸਨ੍ਤਿ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਵਚੀਕਮ੍ਮਂ ਪਰਿਸੋਧੇਸ੍ਸਨ੍ਤਿ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਮਨੋਕਮ੍ਮਂ ਪਰਿਸੋਧੇਸ੍ਸਨ੍ਤਿ. ਯੇਪਿ ਹਿ ਕੇਚਿ, ਰਾਹੁਲ, ਏਤਰਹਿ ਸਮਣਾ ਵਾ ਬ੍ਰਾਹ੍ਮਣਾ ਵਾ ਕਾਯਕਮ੍ਮਂ ਪਰਿਸੋਧੇਨ੍ਤਿ, ਵਚੀਕਮ੍ਮਂ ਪਰਿਸੋਧੇਨ੍ਤਿ, ਮਨੋਕਮ੍ਮਂ ਪਰਿਸੋਧੇਨ੍ਤਿ, ਸਬ੍ਬੇ ਤੇ ਏਵਮੇਵਂ ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਕਾਯਕਮ੍ਮਂ ਪਰਿਸੋਧੇਨ੍ਤਿ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਵਚੀਕਮ੍ਮਂ ਪਰਿਸੋਧੇਨ੍ਤਿ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਮਨੋਕਮ੍ਮਂ ਪਰਿਸੋਧੇਨ੍ਤਿ. ਤਸ੍ਮਾਤਿਹ, ਰਾਹੁਲ, ‘ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਕਾਯਕਮ੍ਮਂ ਪਰਿਸੋਧੇਸ੍ਸਾਮਿ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਵਚੀਕਮ੍ਮਂ ਪਰਿਸੋਧੇਸ੍ਸਾਮਿ, ਪਚ੍ਚਵੇਕ੍ਖਿਤ੍ਵਾ ਪਚ੍ਚਵੇਕ੍ਖਿਤ੍ਵਾ ਮਨੋਕਮ੍ਮਂ ਪਰਿਸੋਧੇਸ੍ਸਾਮੀ’ਤਿ – ਏਵਞ੍ਹਿ ਤੇ, ਰਾਹੁਲ, ਸਿਕ੍ਖਿਤਬ੍ਬ’’ਨ੍ਤਿ.

ਇਦਮਵੋਚ ਭਗਵਾ. ਅਤ੍ਤਮਨੋ ਆਯਸ੍ਮਾ ਰਾਹੁਲੋ ਭਗਵਤੋ ਭਾਸਿਤਂ ਅਭਿਨਨ੍ਦੀਤਿ.

ਅਮ੍ਬਲਟ੍ਠਿਕਰਾਹੁਲੋਵਾਦਸੁਤ੍ਤਂ ਨਿਟ੍ਠਿਤਂ ਪਠਮਂ.