੭. ਵੀਮਂਸਕਸੁਤ੍ਤਂ

੪੮੭. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ – ‘‘ਵੀਮਂਸਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਰਸ੍ਸ ਚੇਤੋਪਰਿਯਾਯਂ ਅਜਾਨਨ੍ਤੇਨ [ਆਜਾਨਨ੍ਤੇਨ (ਪੀ. ਕ.), ਅਜਾਨਨ੍ਤੇਨ ਕਿਨ੍ਤਿ (?)] ਤਥਾਗਤੇ ਸਮਨ੍ਨੇਸਨਾ ਕਾਤਬ੍ਬਾ ‘ਸਮ੍ਮਾਸਮ੍ਬੁਦ੍ਧੋ ਵਾ ਨੋ ਵਾ’ ਇਤਿ ਵਿਞ੍ਞਾਣਾਯਾ’’ਤਿ. ‘‘ਭਗਵਂਮੂਲਕਾ ਨੋ, ਭਨ੍ਤੇ, ਧਮ੍ਮਾ, ਭਗਵਂਨੇਤ੍ਤਿਕਾ ਭਗਵਂਪਟਿਸਰਣਾ; ਸਾਧੁ ਵਤ, ਭਨ੍ਤੇ, ਭਗਵਨ੍ਤਂਯੇਵ ਪਟਿਭਾਤੁ ਏਤਸ੍ਸ ਭਾਸਿਤਸ੍ਸ ਅਤ੍ਥੋ; ਭਗਵਤੋ ਸੁਤ੍ਵਾ ਭਿਕ੍ਖੂ ਧਾਰੇਸ੍ਸਨ੍ਤੀ’’ਤਿ. ‘‘ਤੇਨ ਹਿ, ਭਿਕ੍ਖਵੇ, ਸੁਣਾਥ, ਸਾਧੁਕਂ ਮਨਸਿ ਕਰੋਥ, ਭਾਸਿਸ੍ਸਾਮੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

੪੮੮. ‘‘ਵੀਮਂਸਕੇਨ, ਭਿਕ੍ਖਵੇ, ਭਿਕ੍ਖੁਨਾ ਪਰਸ੍ਸ ਚੇਤੋਪਰਿਯਾਯਂ ਅਜਾਨਨ੍ਤੇਨ ਦ੍ਵੀਸੁ ਧਮ੍ਮੇਸੁ ਤਥਾਗਤੋ ਸਮਨ੍ਨੇਸਿਤਬ੍ਬੋ ਚਕ੍ਖੁਸੋਤਵਿਞ੍ਞੇਯ੍ਯੇਸੁ ਧਮ੍ਮੇਸੁ – ‘ਯੇ ਸਂਕਿਲਿਟ੍ਠਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਵਾ ਤੇ ਤਥਾਗਤਸ੍ਸ ਨੋ ਵਾ’ਤਿ? ਤਮੇਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਯੇ ਸਂਕਿਲਿਟ੍ਠਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਨ ਤੇ ਤਥਾਗਤਸ੍ਸ ਸਂਵਿਜ੍ਜਨ੍ਤੀ’ਤਿ.

‘‘ਯਤੋ ਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਯੇ ਸਂਕਿਲਿਟ੍ਠਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਨ ਤੇ ਤਥਾਗਤਸ੍ਸ ਸਂਵਿਜ੍ਜਨ੍ਤੀ’ਤਿ, ਤਤੋ ਨਂ ਉਤ੍ਤਰਿਂ ਸਮਨ੍ਨੇਸਤਿ – ‘ਯੇ ਵੀਤਿਮਿਸ੍ਸਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਵਾ ਤੇ ਤਥਾਗਤਸ੍ਸ ਨੋ ਵਾ’ਤਿ? ਤਮੇਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਯੇ ਵੀਤਿਮਿਸ੍ਸਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਨ ਤੇ ਤਥਾਗਤਸ੍ਸ ਸਂਵਿਜ੍ਜਨ੍ਤੀ’ਤਿ.

‘‘ਯਤੋ ਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਯੇ ਵੀਤਿਮਿਸ੍ਸਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਨ ਤੇ ਤਥਾਗਤਸ੍ਸ ਸਂਵਿਜ੍ਜਨ੍ਤੀ’ਤਿ, ਤਤੋ ਨਂ ਉਤ੍ਤਰਿਂ ਸਮਨ੍ਨੇਸਤਿ – ‘ਯੇ ਵੋਦਾਤਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਵਾ ਤੇ ਤਥਾਗਤਸ੍ਸ ਨੋ ਵਾ’ਤਿ? ਤਮੇਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਯੇ ਵੋਦਾਤਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਤੇ ਤਥਾਗਤਸ੍ਸਾ’ਤਿ.

‘‘ਯਤੋ ਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਯੇ ਵੋਦਾਤਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਤੇ ਤਥਾਗਤਸ੍ਸਾ’ਤਿ, ਤਤੋ ਨਂ ਉਤ੍ਤਰਿਂ ਸਮਨ੍ਨੇਸਤਿ – ‘ਦੀਘਰਤ੍ਤਂ ਸਮਾਪਨ੍ਨੋ ਅਯਮਾਯਸ੍ਮਾ ਇਮਂ ਕੁਸਲਂ ਧਮ੍ਮਂ, ਉਦਾਹੁ ਇਤ੍ਤਰਸਮਾਪਨ੍ਨੋ’ਤਿ? ਤਮੇਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਦੀਘਰਤ੍ਤਂ ਸਮਾਪਨ੍ਨੋ ਅਯਮਾਯਸ੍ਮਾ ਇਮਂ ਕੁਸਲਂ ਧਮ੍ਮਂ, ਨਾਯਮਾਯਸ੍ਮਾ ਇਤ੍ਤਰਸਮਾਪਨ੍ਨੋ’ਤਿ.

‘‘ਯਤੋ ਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਦੀਘਰਤ੍ਤਂ ਸਮਾਪਨ੍ਨੋ ਅਯਮਾਯਸ੍ਮਾ ਇਮਂ ਕੁਸਲਂ ਧਮ੍ਮਂ, ਨਾਯਮਾਯਸ੍ਮਾ ਇਤ੍ਤਰਸਮਾਪਨ੍ਨੋ’ਤਿ, ਤਤੋ ਨਂ ਉਤ੍ਤਰਿਂ ਸਮਨ੍ਨੇਸਤਿ – ‘ਞਤ੍ਤਜ੍ਝਾਪਨ੍ਨੋ ਅਯਮਾਯਸ੍ਮਾ ਭਿਕ੍ਖੁ ਯਸਪ੍ਪਤ੍ਤੋ, ਸਂਵਿਜ੍ਜਨ੍ਤਸ੍ਸ ਇਧੇਕਚ੍ਚੇ ਆਦੀਨਵਾ’ਤਿ? ਨ ਤਾਵ, ਭਿਕ੍ਖਵੇ, ਭਿਕ੍ਖੁਨੋ ਇਧੇਕਚ੍ਚੇ ਆਦੀਨਵਾ ਸਂਵਿਜ੍ਜਨ੍ਤਿ ਯਾਵ ਨ ਞਤ੍ਤਜ੍ਝਾਪਨ੍ਨੋ ਹੋਤਿ ਯਸਪ੍ਪਤ੍ਤੋ. ਯਤੋ ਚ ਖੋ, ਭਿਕ੍ਖਵੇ, ਭਿਕ੍ਖੁ ਞਤ੍ਤਜ੍ਝਾਪਨ੍ਨੋ ਹੋਤਿ ਯਸਪ੍ਪਤ੍ਤੋ, ਅਥਸ੍ਸ ਇਧੇਕਚ੍ਚੇ ਆਦੀਨਵਾ ਸਂਵਿਜ੍ਜਨ੍ਤਿ. ਤਮੇਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਞਤ੍ਤਜ੍ਝਾਪਨ੍ਨੋ ਅਯਮਾਯਸ੍ਮਾ ਭਿਕ੍ਖੁ ਯਸਪ੍ਪਤ੍ਤੋ, ਨਾਸ੍ਸ ਇਧੇਕਚ੍ਚੇ ਆਦੀਨਵਾ ਸਂਵਿਜ੍ਜਨ੍ਤੀ’ਤਿ.

‘‘ਯਤੋ ਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਞਤ੍ਤਜ੍ਝਾਪਨ੍ਨੋ ਅਯਮਾਯਸ੍ਮਾ ਭਿਕ੍ਖੁ ਯਸਪ੍ਪਤ੍ਤੋ, ਨਾਸ੍ਸ ਇਧੇਕਚ੍ਚੇ ਆਦੀਨਵਾ ਸਂਵਿਜ੍ਜਨ੍ਤੀ’ਤਿ, ਤਤੋ ਨਂ ਉਤ੍ਤਰਿਂ ਸਮਨ੍ਨੇਸਤਿ – ‘ਅਭਯੂਪਰਤੋ ਅਯਮਾਯਸ੍ਮਾ, ਨਾਯਮਾਯਸ੍ਮਾ ਭਯੂਪਰਤੋ; ਵੀਤਰਾਗਤ੍ਤਾ ਕਾਮੇ ਨ ਸੇਵਤਿ ਖਯਾ ਰਾਗਸ੍ਸਾ’ਤਿ? ਤਮੇਨਂ ਸਮਨ੍ਨੇਸਮਾਨੋ ਏਵਂ ਜਾਨਾਤਿ – ‘ਅਭਯੂਪਰਤੋ ਅਯਮਾਯਸ੍ਮਾ, ਨਾਯਮਾਯਸ੍ਮਾ ਭਯੂਪਰਤੋ; ਵੀਤਰਾਗਤ੍ਤਾ ਕਾਮੇ ਨ ਸੇਵਤਿ ਖਯਾ ਰਾਗਸ੍ਸਾ’ਤਿ. ਤਞ੍ਚੇ, ਭਿਕ੍ਖਵੇ, ਭਿਕ੍ਖੁਂ ਪਰੇ ਏਵਂ ਪੁਚ੍ਛੇਯ੍ਯੁਂ – ‘ਕੇ ਪਨਾਯਸ੍ਮਤੋ ਆਕਾਰਾ, ਕੇ ਅਨ੍ਵਯਾ, ਯੇਨਾਯਸ੍ਮਾ ਏਵਂ ਵਦੇਸਿ – ਅਭਯੂਪਰਤੋ ਅਯਮਾਯਸ੍ਮਾ, ਨਾਯਮਾਯਸ੍ਮਾ ਭਯੂਪਰਤੋ; ਵੀਤਰਾਗਤ੍ਤਾ ਕਾਮੇ ਨ ਸੇਵਤਿ ਖਯਾ ਰਾਗਸ੍ਸਾ’ਤਿ. ਸਮ੍ਮਾ ਬ੍ਯਾਕਰਮਾਨੋ, ਭਿਕ੍ਖਵੇ, ਭਿਕ੍ਖੁ ਏਵਂ ਬ੍ਯਾਕਰੇਯ੍ਯ – ‘ਤਥਾ ਹਿ ਪਨ ਅਯਮਾਯਸ੍ਮਾ ਸਙ੍ਘੇ ਵਾ ਵਿਹਰਨ੍ਤੋ ਏਕੋ ਵਾ ਵਿਹਰਨ੍ਤੋ, ਯੇ ਚ ਤਤ੍ਥ ਸੁਗਤਾ ਯੇ ਚ ਤਤ੍ਥ ਦੁਗ੍ਗਤਾ, ਯੇ ਚ ਤਤ੍ਥ ਗਣਮਨੁਸਾਸਨ੍ਤਿ, ਯੇ ਚ ਇਧੇਕਚ੍ਚੇ ਆਮਿਸੇਸੁ ਸਂਦਿਸ੍ਸਨ੍ਤਿ, ਯੇ ਚ ਇਧੇਕਚ੍ਚੇ ਆਮਿਸੇਨ ਅਨੁਪਲਿਤ੍ਤਾ, ਨਾਯਮਾਯਸ੍ਮਾ ਤਂ ਤੇਨ ਅਵਜਾਨਾਤਿ. ਸਮ੍ਮੁਖਾ ਖੋ ਪਨ ਮੇਤਂ ਭਗਵਤੋ ਸੁਤਂ ਸਮ੍ਮੁਖਾ ਪਟਿਗ੍ਗਹਿਤਂ – ਅਭਯੂਪਰਤੋਹਮਸ੍ਮਿ, ਨਾਹਮਸ੍ਮਿ ਭਯੂਪਰਤੋ, ਵੀਤਰਾਗਤ੍ਤਾ ਕਾਮੇ ਨ ਸੇਵਾਮਿ ਖਯਾ ਰਾਗਸ੍ਸਾ’ਤਿ.

੪੮੯. ‘‘ਤਤ੍ਰ, ਭਿਕ੍ਖਵੇ, ਤਥਾਗਤੋਵ ਉਤ੍ਤਰਿਂ ਪਟਿਪੁਚ੍ਛਿਤਬ੍ਬੋ – ‘ਯੇ ਸਂਕਿਲਿਟ੍ਠਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਵਾ ਤੇ ਤਥਾਗਤਸ੍ਸ ਨੋ ਵਾ’ਤਿ? ਬ੍ਯਾਕਰਮਾਨੋ, ਭਿਕ੍ਖਵੇ, ਤਥਾਗਤੋ ਏਵਂ ਬ੍ਯਾਕਰੇਯ੍ਯ – ‘ਯੇ ਸਂਕਿਲਿਟ੍ਠਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਨ ਤੇ ਤਥਾਗਤਸ੍ਸ ਸਂਵਿਜ੍ਜਨ੍ਤੀ’’’ਤਿ.

‘‘ਯੇ ਵੀਤਿਮਿਸ੍ਸਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਵਾ ਤੇ ਤਥਾਗਤਸ੍ਸ ਨੋ ਵਾਤਿ? ਬ੍ਯਾਕਰਮਾਨੋ, ਭਿਕ੍ਖਵੇ, ਤਥਾਗਤੋ ਏਵਂ ਬ੍ਯਾਕਰੇਯ੍ਯ – ‘ਯੇ ਵੀਤਿਮਿਸ੍ਸਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਨ ਤੇ ਤਥਾਗਤਸ੍ਸ ਸਂਵਿਜ੍ਜਨ੍ਤੀ’ਤਿ.

‘‘ਯੇ ਵੋਦਾਤਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਵਾ ਤੇ ਤਥਾਗਤਸ੍ਸ ਨੋ ਵਾਤਿ? ਬ੍ਯਾਕਰਮਾਨੋ, ਭਿਕ੍ਖਵੇ, ਤਥਾਗਤੋ ਏਵਂ ਬ੍ਯਾਕਰੇਯ੍ਯ – ‘ਯੇ ਵੋਦਾਤਾ ਚਕ੍ਖੁਸੋਤਵਿਞ੍ਞੇਯ੍ਯਾ ਧਮ੍ਮਾ, ਸਂਵਿਜ੍ਜਨ੍ਤਿ ਤੇ ਤਥਾਗਤਸ੍ਸ; ਏਤਂਪਥੋਹਮਸ੍ਮਿ, ਏਤਂਗੋਚਰੋ [ਏਤਪਥੋਹਮਸ੍ਮਿ ਏਤਗੋਚਰੋ (ਸੀ. ਸ੍ਯਾ. ਕਂ. ਪੀ.)], ਨੋ ਚ ਤੇਨ ਤਮ੍ਮਯੋ’ਤਿ.

‘‘ਏਵਂਵਾਦਿਂ ਖੋ, ਭਿਕ੍ਖਵੇ, ਸਤ੍ਥਾਰਂ ਅਰਹਤਿ ਸਾਵਕੋ ਉਪਸਙ੍ਕਮਿਤੁਂ ਧਮ੍ਮਸ੍ਸਵਨਾਯ. ਤਸ੍ਸ ਸਤ੍ਥਾ ਧਮ੍ਮਂ ਦੇਸੇਤਿ ਉਤ੍ਤਰੁਤ੍ਤਰਿਂ ਪਣੀਤਪਣੀਤਂ ਕਣ੍ਹਸੁਕ੍ਕਸਪ੍ਪਟਿਭਾਗਂ. ਯਥਾ ਯਥਾ ਖੋ, ਭਿਕ੍ਖਵੇ, ਭਿਕ੍ਖੁਨੋ ਸਤ੍ਥਾ ਧਮ੍ਮਂ ਦੇਸੇਤਿ ਉਤ੍ਤਰੁਤ੍ਤਰਿਂ ਪਣੀਤਪਣੀਤਂ ਕਣ੍ਹਸੁਕ੍ਕਸਪ੍ਪਟਿਭਾਗਂ ਤਥਾ ਤਥਾ ਸੋ ਤਸ੍ਮਿਂ ਧਮ੍ਮੇ ਅਭਿਞ੍ਞਾਯ ਇਧੇਕਚ੍ਚਂ ਧਮ੍ਮਂ ਧਮ੍ਮੇਸੁ ਨਿਟ੍ਠਂ ਗਚ੍ਛਤਿ, ਸਤ੍ਥਰਿ ਪਸੀਦਤਿ – ‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’ਤਿ. ਤਞ੍ਚੇ, ਭਿਕ੍ਖਵੇ, ਭਿਕ੍ਖੁਂ ਪਰੇ ਏਵਂ ਪੁਚ੍ਛੇਯ੍ਯੁਂ – ‘ਕੇ ਪਨਾਯਸ੍ਮਤੋ ਆਕਾਰਾ, ਕੇ ਅਨ੍ਵਯਾ, ਯੇਨਾਯਸ੍ਮਾ ਏਵਂ ਵਦੇਸਿ – ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’ਤਿ? ਸਮ੍ਮਾ ਬ੍ਯਾਕਰਮਾਨੋ, ਭਿਕ੍ਖਵੇ, ਭਿਕ੍ਖੁ ਏਵਂ ਬ੍ਯਾਕਰੇਯ੍ਯ – ‘ਇਧਾਹਂ, ਆਵੁਸੋ, ਯੇਨ ਭਗਵਾ ਤੇਨੁਪਸਙ੍ਕਮਿਂ ਧਮ੍ਮਸ੍ਸਵਨਾਯ. ਤਸ੍ਸ ਮੇ ਭਗਵਾ ਧਮ੍ਮਂ ਦੇਸੇਤਿ ਉਤ੍ਤਰੁਤ੍ਤਰਿਂ ਪਣੀਤਪਣੀਤਂ ਕਣ੍ਹਸੁਕ੍ਕਸਪ੍ਪਟਿਭਾਗਂ. ਯਥਾ ਯਥਾ ਮੇ, ਆਵੁਸੋ, ਭਗਵਾ ਧਮ੍ਮਂ ਦੇਸੇਤਿ ਉਤ੍ਤਰੁਤ੍ਤਰਿਂ ਪਣੀਤਪਣੀਤਂ ਕਣ੍ਹਸੁਕ੍ਕਸਪ੍ਪਟਿਭਾਗਂ ਤਥਾ ਤਥਾਹਂ ਤਸ੍ਮਿਂ ਧਮ੍ਮੇ ਅਭਿਞ੍ਞਾਯ ਇਧੇਕਚ੍ਚਂ ਧਮ੍ਮਂ ਧਮ੍ਮੇਸੁ ਨਿਟ੍ਠਮਗਮਂ, ਸਤ੍ਥਰਿ ਪਸੀਦਿਂ – ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਭਗਵਤਾ, ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’ਤਿ.

੪੯੦. ‘‘ਯਸ੍ਸ ਕਸ੍ਸਚਿ, ਭਿਕ੍ਖਵੇ, ਇਮੇਹਿ ਆਕਾਰੇਹਿ ਇਮੇਹਿ ਪਦੇਹਿ ਇਮੇਹਿ ਬ੍ਯਞ੍ਜਨੇਹਿ ਤਥਾਗਤੇ ਸਦ੍ਧਾ ਨਿਵਿਟ੍ਠਾ ਹੋਤਿ ਮੂਲਜਾਤਾ ਪਤਿਟ੍ਠਿਤਾ, ਅਯਂ ਵੁਚ੍ਚਤਿ, ਭਿਕ੍ਖਵੇ, ਆਕਾਰਵਤੀ ਸਦ੍ਧਾ ਦਸ੍ਸਨਮੂਲਿਕਾ, ਦਲ਼੍ਹਾ; ਅਸਂਹਾਰਿਯਾ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੇਨਚਿ ਵਾ ਲੋਕਸ੍ਮਿਂ. ਏਵਂ ਖੋ, ਭਿਕ੍ਖਵੇ, ਤਥਾਗਤੇ ਧਮ੍ਮਸਮਨ੍ਨੇਸਨਾ ਹੋਤਿ. ਏਵਞ੍ਚ ਪਨ ਤਥਾਗਤੋ ਧਮ੍ਮਤਾਸੁਸਮਨ੍ਨਿਟ੍ਠੋ ਹੋਤੀ’’ਤਿ.

ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ.

ਵੀਮਂਸਕਸੁਤ੍ਤਂ ਨਿਟ੍ਠਿਤਂ ਸਤ੍ਤਮਂ.