੧੦. ਚੂਲ਼ਅਸ੍ਸਪੁਰਸੁਤ੍ਤਂ

੪੩੫. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਅਙ੍ਗੇਸੁ ਵਿਹਰਤਿ ਅਸ੍ਸਪੁਰਂ ਨਾਮ ਅਙ੍ਗਾਨਂ ਨਿਗਮੋ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ – ‘‘ਸਮਣਾ ਸਮਣਾਤਿ ਵੋ, ਭਿਕ੍ਖਵੇ, ਜਨੋ ਸਞ੍ਜਾਨਾਤਿ. ਤੁਮ੍ਹੇ ਚ ਪਨ ‘ਕੇ ਤੁਮ੍ਹੇ’ਤਿ ਪੁਟ੍ਠਾ ਸਮਾਨਾ ‘ਸਮਣਾਮ੍ਹਾ’ਤਿ ਪਟਿਜਾਨਾਥ. ਤੇਸਂ ਵੋ, ਭਿਕ੍ਖਵੇ, ਏਵਂਸਮਞ੍ਞਾਨਂ ਸਤਂ ਏਵਂਪਟਿਞ੍ਞਾਨਂ ਸਤਂ – ‘ਯਾ ਸਮਣਸਾਮੀਚਿਪ੍ਪਟਿਪਦਾ ਤਂ ਪਟਿਪਜ੍ਜਿਸ੍ਸਾਮ; ਏਵਂ ਨੋ ਅਯਂ ਅਮ੍ਹਾਕਂ ਸਮਞ੍ਞਾ ਚ ਸਚ੍ਚਾ ਭਵਿਸ੍ਸਤਿ ਪਟਿਞ੍ਞਾ ਚ ਭੂਤਾ; ਯੇਸਞ੍ਚ ਮਯਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ ਪਰਿਭੁਞ੍ਜਾਮ, ਤੇਸਂ ਤੇ ਕਾਰਾ ਅਮ੍ਹੇਸੁ ਮਹਪ੍ਫਲਾ ਭਵਿਸ੍ਸਨ੍ਤਿ ਮਹਾਨਿਸਂਸਾ, ਅਮ੍ਹਾਕਞ੍ਚੇਵਾਯਂ ਪਬ੍ਬਜ੍ਜਾ ਅਵਞ੍ਝਾ ਭਵਿਸ੍ਸਤਿ ਸਫਲਾ ਸਉਦ੍ਰਯਾ’ਤਿ. ਏਵਞ੍ਹਿ ਵੋ, ਭਿਕ੍ਖਵੇ, ਸਿਕ੍ਖਿਤਬ੍ਬਂ.

੪੩੬. ‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਨ ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ ਹੋਤਿ? ਯਸ੍ਸ ਕਸ੍ਸਚਿ, ਭਿਕ੍ਖਵੇ, ਭਿਕ੍ਖੁਨੋ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਅਪ੍ਪਹੀਨਾ ਹੋਤਿ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਅਪ੍ਪਹੀਨੋ ਹੋਤਿ, ਕੋਧਨਸ੍ਸ ਕੋਧੋ ਅਪ੍ਪਹੀਨੋ ਹੋਤਿ, ਉਪਨਾਹਿਸ੍ਸ ਉਪਨਾਹੋ ਅਪ੍ਪਹੀਨੋ ਹੋਤਿ, ਮਕ੍ਖਿਸ੍ਸ ਮਕ੍ਖੋ ਅਪ੍ਪਹੀਨੋ ਹੋਤਿ, ਪਲ਼ਾਸਿਸ੍ਸ ਪਲ਼ਾਸੋ ਅਪ੍ਪਹੀਨੋ ਹੋਤਿ, ਇਸ੍ਸੁਕਿਸ੍ਸ ਇਸ੍ਸਾ ਅਪ੍ਪਹੀਨਾ ਹੋਤਿ, ਮਚ੍ਛਰਿਸ੍ਸ ਮਚ੍ਛਰਿਯਂ ਅਪ੍ਪਹੀਨਂ ਹੋਤਿ, ਸਠਸ੍ਸ ਸਾਠੇਯ੍ਯਂ ਅਪ੍ਪਹੀਨਂ ਹੋਤਿ, ਮਾਯਾਵਿਸ੍ਸ ਮਾਯਾ ਅਪ੍ਪਹੀਨਾ ਹੋਤਿ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਅਪ੍ਪਹੀਨਾ ਹੋਤਿ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਅਪ੍ਪਹੀਨਾ ਹੋਤਿ – ਇਮੇਸਂ ਖੋ ਅਹਂ, ਭਿਕ੍ਖਵੇ, ਸਮਣਮਲਾਨਂ ਸਮਣਦੋਸਾਨਂ ਸਮਣਕਸਟਾਨਂ ਆਪਾਯਿਕਾਨਂ ਠਾਨਾਨਂ ਦੁਗ੍ਗਤਿਵੇਦਨਿਯਾਨਂ ਅਪ੍ਪਹਾਨਾ ‘ਨ ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ ਵਦਾਮਿ. ਸੇਯ੍ਯਥਾਪਿ, ਭਿਕ੍ਖਵੇ, ਮਤਜਂ ਨਾਮ ਆਵੁਧਜਾਤਂ ਉਭਤੋਧਾਰਂ ਪੀਤਨਿਸਿਤਂ. ਤਦਸ੍ਸ ਸਙ੍ਘਾਟਿਯਾ ਸਮ੍ਪਾਰੁਤਂ ਸਮ੍ਪਲਿਵੇਠਿਤਂ. ਤਥੂਪਮਾਹਂ, ਭਿਕ੍ਖਵੇ, ਇਮਸ੍ਸ ਭਿਕ੍ਖੁਨੋ ਪਬ੍ਬਜ੍ਜਂ ਵਦਾਮਿ.

੪੩੭. ‘‘ਨਾਹਂ, ਭਿਕ੍ਖਵੇ, ਸਙ੍ਘਾਟਿਕਸ੍ਸ ਸਙ੍ਘਾਟਿਧਾਰਣਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਅਚੇਲਕਸ੍ਸ ਅਚੇਲਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਰਜੋਜਲ੍ਲਿਕਸ੍ਸ ਰਜੋਜਲ੍ਲਿਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਉਦਕੋਰੋਹਕਸ੍ਸ ਉਦਕੋਰੋਹਣਮਤ੍ਤੇਨ [ਉਦਕੋਰੋਹਕਮਤ੍ਤੇਨ (ਸੀ. ਪੀ.)] ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਰੁਕ੍ਖਮੂਲਿਕਸ੍ਸ ਰੁਕ੍ਖਮੂਲਿਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਅਬ੍ਭੋਕਾਸਿਕਸ੍ਸ ਅਬ੍ਭੋਕਾਸਿਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਉਬ੍ਭਟ੍ਠਕਸ੍ਸ ਉਬ੍ਭਟ੍ਠਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਪਰਿਯਾਯਭਤ੍ਤਿਕਸ੍ਸ ਪਰਿਯਾਯਭਤ੍ਤਿਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਮਨ੍ਤਜ੍ਝਾਯਕਸ੍ਸ ਮਨ੍ਤਜ੍ਝਾਯਕਮਤ੍ਤੇਨ ਸਾਮਞ੍ਞਂ ਵਦਾਮਿ. ਨਾਹਂ, ਭਿਕ੍ਖਵੇ, ਜਟਿਲਕਸ੍ਸ ਜਟਾਧਾਰਣਮਤ੍ਤੇਨ ਸਾਮਞ੍ਞਂ ਵਦਾਮਿ.

‘‘ਸਙ੍ਘਾਟਿਕਸ੍ਸ ਚੇ, ਭਿਕ੍ਖਵੇ, ਸਙ੍ਘਾਟਿਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯੇਥ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯੇਥ, ਕੋਧਨਸ੍ਸ ਕੋਧੋ ਪਹੀਯੇਥ, ਉਪਨਾਹਿਸ੍ਸ ਉਪਨਾਹੋ ਪਹੀਯੇਥ, ਮਕ੍ਖਿਸ੍ਸ ਮਕ੍ਖੋ ਪਹੀਯੇਥ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਯੇਥ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਯੇਥ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਯੇਥ, ਸਠਸ੍ਸ ਸਾਠੇਯ੍ਯਂ ਪਹੀਯੇਥ, ਮਾਯਾਵਿਸ੍ਸ ਮਾਯਾ ਪਹੀਯੇਥ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯੇਥ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯੇਥ, ਤਮੇਨਂ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ ਜਾਤਮੇਵ ਨਂ ਸਙ੍ਘਾਟਿਕਂ ਕਰੇਯ੍ਯੁਂ, ਸਙ੍ਘਾਟਿਕਤ੍ਤਮੇਵ [ਸਂਘਾਟੀਕਤ੍ਤੇ ਚੇਵ (ਕ.)] ਸਮਾਦਪੇਯ੍ਯੁਂ – ‘ਏਹਿ ਤ੍ਵਂ, ਭਦ੍ਰਮੁਖ, ਸਙ੍ਘਾਟਿਕੋ ਹੋਹਿ, ਸਙ੍ਘਾਟਿਕਸ੍ਸ ਤੇ ਸਤੋ ਸਙ੍ਘਾਟਿਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯਿਸ੍ਸਤਿ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯਿਸ੍ਸਤਿ, ਕੋਧਨਸ੍ਸ ਕੋਧੋ ਪਹੀਯਿਸ੍ਸਤਿ, ਉਪਨਾਹਿਸ੍ਸ ਉਪਨਾਹੋ ਪਹੀਯਿਸ੍ਸਤਿ, ਮਕ੍ਖਿਸ੍ਸ ਮਕ੍ਖੋ ਪਹੀਯਿਸ੍ਸਤਿ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਯਿਸ੍ਸਤਿ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਯਿਸ੍ਸਤਿ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਯਿਸ੍ਸਤਿ, ਸਠਸ੍ਸ ਸਾਠੇਯ੍ਯਂ ਪਹੀਯਿਸ੍ਸਤਿ, ਮਾਯਾਵਿਸ੍ਸ ਮਾਯਾ ਪਹੀਯਿਸ੍ਸਤਿ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯਿਸ੍ਸਤਿ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯਿਸ੍ਸਤੀ’ਤਿ. ਯਸ੍ਮਾ ਚ ਖੋ ਅਹਂ, ਭਿਕ੍ਖਵੇ, ਸਙ੍ਘਾਟਿਕਮ੍ਪਿ ਇਧੇਕਚ੍ਚਂ ਪਸ੍ਸਾਮਿ ਅਭਿਜ੍ਝਾਲੁਂ ਬ੍ਯਾਪਨ੍ਨਚਿਤ੍ਤਂ ਕੋਧਨਂ ਉਪਨਾਹਿਂ ਮਕ੍ਖਿਂ ਪਲ਼ਾਸਿਂ ਇਸ੍ਸੁਕਿਂ ਮਚ੍ਛਰਿਂ ਸਠਂ ਮਾਯਾਵਿਂ ਪਾਪਿਚ੍ਛਂ ਮਿਚ੍ਛਾਦਿਟ੍ਠਿਕਂ, ਤਸ੍ਮਾ ਨ ਸਙ੍ਘਾਟਿਕਸ੍ਸ ਸਙ੍ਘਾਟਿਧਾਰਣਮਤ੍ਤੇਨ ਸਾਮਞ੍ਞਂ ਵਦਾਮਿ.

‘‘ਅਚੇਲਕਸ੍ਸ ਚੇ, ਭਿਕ੍ਖਵੇ…ਪੇ… ਰਜੋਜਲ੍ਲਿਕਸ੍ਸ ਚੇ, ਭਿਕ੍ਖਵੇ…ਪੇ… ਉਦਕੋਰੋਹਕਸ੍ਸ ਚੇ, ਭਿਕ੍ਖਵੇ…ਪੇ… ਰੁਕ੍ਖਮੂਲਿਕਸ੍ਸ ਚੇ, ਭਿਕ੍ਖਵੇ…ਪੇ… ਅਬ੍ਭੋਕਾਸਿਕਸ੍ਸ ਚੇ, ਭਿਕ੍ਖਵੇ…ਪੇ… ਉਬ੍ਭਟ੍ਠਕਸ੍ਸ ਚੇ, ਭਿਕ੍ਖਵੇ…ਪੇ… ਪਰਿਯਾਯਭਤ੍ਤਿਕਸ੍ਸ ਚੇ, ਭਿਕ੍ਖਵੇ…ਪੇ… ਮਨ੍ਤਜ੍ਝਾਯਕਸ੍ਸ ਚੇ, ਭਿਕ੍ਖਵੇ…ਪੇ… ਜਟਿਲਕਸ੍ਸ ਚੇ, ਭਿਕ੍ਖਵੇ, ਜਟਾਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯੇਥ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯੇਥ, ਕੋਧਨਸ੍ਸ ਕੋਧੋ ਪਹੀਯੇਥ, ਉਪਨਾਹਿਸ੍ਸ ਉਪਨਾਹੋ ਪਹੀਯੇਥ, ਮਕ੍ਖਿਸ੍ਸ ਮਕ੍ਖੋ ਪਹੀਯੇਥ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਯੇਥ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਯੇਥ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਯੇਥ, ਸਠਸ੍ਸ ਸਾਠੇਯ੍ਯਂ ਪਹੀਯੇਥ, ਮਾਯਾਵਿਸ੍ਸ ਮਾਯਾ ਪਹੀਯੇਥ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯੇਥ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯੇਥ, ਤਮੇਨਂ ਮਿਤ੍ਤਾਮਚ੍ਚਾ ਞਾਤਿਸਾਲੋਹਿਤਾ ਜਾਤਮੇਵ ਨਂ ਜਟਿਲਕਂ ਕਰੇਯ੍ਯੁਂ, ਜਟਿਲਕਤ੍ਤਮੇਵ [ਜਟਿਲਕਤ੍ਤੇ ਚੇਵ (ਕ.)] ਸਮਾਦਪੇਯ੍ਯੁਂ – ‘ਏਹਿ ਤ੍ਵਂ, ਭਦ੍ਰਮੁਖ, ਜਟਿਲਕੋ ਹੋਹਿ, ਜਟਿਲਕਸ੍ਸ ਤੇ ਸਤੋ ਜਟਾਧਾਰਣਮਤ੍ਤੇਨ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਯਿਸ੍ਸਤਿ ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਯਿਸ੍ਸਤਿ, ਕੋਧਨਸ੍ਸ ਕੋਧੋ ਪਹੀਯਿਸ੍ਸਤਿ…ਪੇ… ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਯਿਸ੍ਸਤਿ ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਯਿਸ੍ਸਤੀ’ਤਿ. ਯਸ੍ਮਾ ਚ ਖੋ ਅਹਂ, ਭਿਕ੍ਖਵੇ, ਜਟਿਲਕਮ੍ਪਿ ਇਧੇਕਚ੍ਚਂ ਪਸ੍ਸਾਮਿ ਅਭਿਜ੍ਝਾਲੁਂ ਬ੍ਯਾਪਨ੍ਨਚਿਤ੍ਤਂ ਕੋਧਨਂ ਉਪਨਾਹਿਂ ਮਕ੍ਖਿਂ ਪਲਾਸਿਂ ਇਸ੍ਸੁਕਿਂ ਮਚ੍ਛਰਿਂ ਸਠਂ ਮਾਯਾਵਿਂ ਪਾਪਿਚ੍ਛਂ ਮਿਚ੍ਛਾਦਿਟ੍ਠਿਂ, ਤਸ੍ਮਾ ਨ ਜਟਿਲਕਸ੍ਸ ਜਟਾਧਾਰਣਮਤ੍ਤੇਨ ਸਾਮਞ੍ਞਂ ਵਦਾਮਿ.

੪੩੮. ‘‘ਕਥਞ੍ਚ, ਭਿਕ੍ਖਵੇ, ਭਿਕ੍ਖੁ ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ ਹੋਤਿ? ਯਸ੍ਸ ਕਸ੍ਸਚਿ, ਭਿਕ੍ਖਵੇ, ਭਿਕ੍ਖੁਨੋ ਅਭਿਜ੍ਝਾਲੁਸ੍ਸ ਅਭਿਜ੍ਝਾ ਪਹੀਨਾ ਹੋਤਿ, ਬ੍ਯਾਪਨ੍ਨਚਿਤ੍ਤਸ੍ਸ ਬ੍ਯਾਪਾਦੋ ਪਹੀਨੋ ਹੋਤਿ, ਕੋਧਨਸ੍ਸ ਕੋਧੋ ਪਹੀਨੋ ਹੋਤਿ, ਉਪਨਾਹਿਸ੍ਸ ਉਪਨਾਹੋ ਪਹੀਨੋ ਹੋਤਿ, ਮਕ੍ਖਿਸ੍ਸ ਮਕ੍ਖੋ ਪਹੀਨੋ ਹੋਤਿ, ਪਲ਼ਾਸਿਸ੍ਸ ਪਲ਼ਾਸੋ ਪਹੀਨੋ ਹੋਤਿ, ਇਸ੍ਸੁਕਿਸ੍ਸ ਇਸ੍ਸਾ ਪਹੀਨਾ ਹੋਤਿ, ਮਚ੍ਛਰਿਸ੍ਸ ਮਚ੍ਛਰਿਯਂ ਪਹੀਨਂ ਹੋਤਿ, ਸਠਸ੍ਸ ਸਾਠੇਯ੍ਯਂ ਪਹੀਨਂ ਹੋਤਿ, ਮਾਯਾਵਿਸ੍ਸ ਮਾਯਾ ਪਹੀਨਾ ਹੋਤਿ, ਪਾਪਿਚ੍ਛਸ੍ਸ ਪਾਪਿਕਾ ਇਚ੍ਛਾ ਪਹੀਨਾ ਹੋਤਿ, ਮਿਚ੍ਛਾਦਿਟ੍ਠਿਕਸ੍ਸ ਮਿਚ੍ਛਾਦਿਟ੍ਠਿ ਪਹੀਨਾ ਹੋਤਿ – ਇਮੇਸਂ ਖੋ ਅਹਂ, ਭਿਕ੍ਖਵੇ, ਸਮਣਮਲਾਨਂ ਸਮਣਦੋਸਾਨਂ ਸਮਣਕਸਟਾਨਂ ਆਪਾਯਿਕਾਨਂ ਠਾਨਾਨਂ ਦੁਗ੍ਗਤਿਵੇਦਨਿਯਾਨਂ ਪਹਾਨਾ ‘ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ ਵਦਾਮਿ. ਸੋ ਸਬ੍ਬੇਹਿ ਇਮੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ ਵਿਸੁਦ੍ਧਮਤ੍ਤਾਨਂ ਸਮਨੁਪਸ੍ਸਤਿ ( ) [(ਵਿਮੁਤ੍ਤਮਤ੍ਤਾਨਂ ਸਮਨੁਪਸ੍ਸਤਿ) (ਸੀ. ਸ੍ਯਾ. ਕਂ. ਪੀ.)]. ਤਸ੍ਸ ਸਬ੍ਬੇਹਿ ਇਮੇਹਿ ਪਾਪਕੇਹਿ ਅਕੁਸਲੇਹਿ ਧਮ੍ਮੇਹਿ ਵਿਸੁਦ੍ਧਮਤ੍ਤਾਨਂ ਸਮਨੁਪਸ੍ਸਤੋ ( ) [(ਵਿਮੁਤ੍ਤਮਤ੍ਤਾਨਂ ਸਮਨੁਪਸ੍ਸਤੋ) (ਸੀ. ਸ੍ਯਾ. ਕਂ. ਪੀ.)] ਪਾਮੋਜ੍ਜਂ ਜਾਯਤਿ, ਪਮੁਦਿਤਸ੍ਸ ਪੀਤਿ ਜਾਯਤਿ, ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤਿ, ਪਸ੍ਸਦ੍ਧਕਾਯੋ ਸੁਖਂ ਵੇਦੇਤਿ, ਸੁਖਿਨੋ ਚਿਤ੍ਤਂ ਸਮਾਧਿਯਤਿ.

‘‘ਸੋ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਬਜ੍ਝੇਨ ਫਰਿਤ੍ਵਾ ਵਿਹਰਤਿ. ਕਰੁਣਾਸਹਗਤੇਨ ਚੇਤਸਾ…ਪੇ… ਮੁਦਿਤਾਸਹਗਤੇਨ ਚੇਤਸਾ…ਪੇ… ਉਪੇਕ੍ਖਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ, ਤਥਾ ਤਤਿਯਂ, ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਉਪੇਕ੍ਖਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਬਜ੍ਝੇਨ ਫਰਿਤ੍ਵਾ ਵਿਹਰਤਿ. ਸੇਯ੍ਯਥਾਪਿ, ਭਿਕ੍ਖਵੇ, ਪੋਕ੍ਖਰਣੀ ਅਚ੍ਛੋਦਕਾ ਸਾਤੋਦਕਾ ਸੀਤੋਦਕਾ ਸੇਤਕਾ ਸੁਪਤਿਤ੍ਥਾ ਰਮਣੀਯਾ. ਪੁਰਤ੍ਥਿਮਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ ਘਮ੍ਮਾਭਿਤਤ੍ਤੋ ਘਮ੍ਮਪਰੇਤੋ ਕਿਲਨ੍ਤੋ ਤਸਿਤੋ ਪਿਪਾਸਿਤੋ. ਸੋ ਤਂ ਪੋਕ੍ਖਰਣਿਂ ਆਗਮ੍ਮ ਵਿਨੇਯ੍ਯ ਉਦਕਪਿਪਾਸਂ ਵਿਨੇਯ੍ਯ ਘਮ੍ਮਪਰਿਲ਼ਾਹਂ…ਪੇ… ਪਚ੍ਛਿਮਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ…ਪੇ… ਉਤ੍ਤਰਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ…ਪੇ… ਦਕ੍ਖਿਣਾਯ ਚੇਪਿ ਦਿਸਾਯ ਪੁਰਿਸੋ ਆਗਚ੍ਛੇਯ੍ਯ. ਯਤੋ ਕੁਤੋ ਚੇਪਿ ਨਂ ਪੁਰਿਸੋ ਆਗਚ੍ਛੇਯ੍ਯ ਘਮ੍ਮਾਭਿਤਤ੍ਤੋ ਘਮ੍ਮਪਰੇਤੋ, ਕਿਲਨ੍ਤੋ ਤਸਿਤੋ ਪਿਪਾਸਿਤੋ. ਸੋ ਤਂ ਪੋਕ੍ਖਰਣਿਂ ਆਗਮ੍ਮ ਵਿਨੇਯ੍ਯ ਉਦਕਪਿਪਾਸਂ, ਵਿਨੇਯ੍ਯ ਘਮ੍ਮਪਰਿਲ਼ਾਹਂ. ਏਵਮੇਵ ਖੋ, ਭਿਕ੍ਖਵੇ, ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ, ਏਵਂ ਮੇਤ੍ਤਂ ਕਰੁਣਂ ਮੁਦਿਤਂ ਉਪੇਕ੍ਖਂ ਭਾਵੇਤ੍ਵਾ ਲਭਤਿ ਅਜ੍ਝਤ੍ਤਂ [ਤਮਹਂ (ਕ.)] ਵੂਪਸਮਂ [ਤਮਹਂ (ਕ.)]. ਅਜ੍ਝਤ੍ਤਂ ਵੂਪਸਮਾ ‘ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ ਵਦਾਮਿ. ਬ੍ਰਾਹ੍ਮਣਕੁਲਾ ਚੇਪਿ…ਪੇ… ਵੇਸ੍ਸਕੁਲਾ ਚੇਪਿ…ਪੇ… ਸੁਦ੍ਦਕੁਲਾ ਚੇਪਿ…ਪੇ… ਯਸ੍ਮਾ ਕਸ੍ਮਾ ਚੇਪਿ ਕੁਲਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਤਥਾਗਤਪ੍ਪਵੇਦਿਤਂ ਧਮ੍ਮਵਿਨਯਂ ਆਗਮ੍ਮ, ਏਵਂ ਮੇਤ੍ਤਂ ਕਰੁਣਂ ਮੁਦਿਤਂ ਉਪੇਕ੍ਖਂ ਭਾਵੇਤ੍ਵਾ ਲਭਤਿ ਅਜ੍ਝਤ੍ਤਂ ਵੂਪਸਮਂ. ਅਜ੍ਝਤ੍ਤਂ ਵੂਪਸਮਾ ‘ਸਮਣਸਾਮੀਚਿਪ੍ਪਟਿਪਦਂ ਪਟਿਪਨ੍ਨੋ’ਤਿ ਵਦਾਮਿ.

‘‘ਖਤ੍ਤਿਯਕੁਲਾ ਚੇਪਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ. ਸੋ ਚ ਆਸਵਾਨਂ ਖਯਾ ਅਨਾਸਵਂ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਆਸਵਾਨਂ ਖਯਾ ਸਮਣੋ ਹੋਤਿ. ਬ੍ਰਾਹ੍ਮਣਕੁਲਾ ਚੇਪਿ…ਪੇ… ਵੇਸ੍ਸਕੁਲਾ ਚੇਪਿ… ਸੁਦ੍ਦਕੁਲਾ ਚੇਪਿ… ਯਸ੍ਮਾ ਕਸ੍ਮਾ ਚੇਪਿ ਕੁਲਾ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤੋ ਹੋਤਿ, ਸੋ ਚ ਆਸਵਾਨਂ ਖਯਾ ਅਨਾਸਵਂ ਚੇਤੋਵਿਮੁਤ੍ਤਿਂ ਪਞ੍ਞਾਵਿਮੁਤ੍ਤਿਂ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਤਿ. ਆਸਵਾਨਂ ਖਯਾ ਸਮਣੋ ਹੋਤੀ’’ਤਿ.

ਇਦਮਵੋਚ ਭਗਵਾ. ਅਤ੍ਤਮਨਾ ਤੇ ਭਿਕ੍ਖੂ ਭਗਵਤੋ ਭਾਸਿਤਂ ਅਭਿਨਨ੍ਦੁਨ੍ਤਿ.

ਚੂਲ਼ਅਸ੍ਸਪੁਰਸੁਤ੍ਤਂ ਨਿਟ੍ਠਿਤਂ ਦਸਮਂ.

ਮਹਾਯਮਕਵਗ੍ਗੋ ਨਿਟ੍ਠਿਤੋ ਚਤੁਤ੍ਥੋ.