੩. ਧਮ੍ਮਦਾਯਾਦਸੁਤ੍ਤਂ

੨੯. ਏਵਂ ਮੇ ਸੁਤਂ – ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਧਮ੍ਮਦਾਯਾਦਾ ਮੇ, ਭਿਕ੍ਖਵੇ, ਭਵਥ, ਮਾ ਆਮਿਸਦਾਯਾਦਾ. ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ – ‘ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾ’ਤਿ. ਤੁਮ੍ਹੇ ਚ ਮੇ, ਭਿਕ੍ਖਵੇ, ਆਮਿਸਦਾਯਾਦਾ ਭਵੇਯ੍ਯਾਥ ਨੋ ਧਮ੍ਮਦਾਯਾਦਾ, ਤੁਮ੍ਹੇਪਿ ਤੇਨ ਆਦਿਯਾ [ਆਦਿਸ੍ਸਾ (ਸੀ. ਸ੍ਯਾ. ਪੀ.)] ਭਵੇਯ੍ਯਾਥ – ‘ਆਮਿਸਦਾਯਾਦਾ ਸਤ੍ਥੁਸਾਵਕਾ ਵਿਹਰਨ੍ਤਿ, ਨੋ ਧਮ੍ਮਦਾਯਾਦਾ’ਤਿ; ਅਹਮ੍ਪਿ ਤੇਨ ਆਦਿਯੋ ਭਵੇਯ੍ਯਂ – ‘ਆਮਿਸਦਾਯਾਦਾ ਸਤ੍ਥੁਸਾਵਕਾ ਵਿਹਰਨ੍ਤਿ, ਨੋ ਧਮ੍ਮਦਾਯਾਦਾ’ਤਿ. ਤੁਮ੍ਹੇ ਚ ਮੇ, ਭਿਕ੍ਖਵੇ, ਧਮ੍ਮਦਾਯਾਦਾ ਭਵੇਯ੍ਯਾਥ, ਨੋ ਆਮਿਸਦਾਯਾਦਾ, ਤੁਮ੍ਹੇਪਿ ਤੇਨ ਨ ਆਦਿਯਾ ਭਵੇਯ੍ਯਾਥ – ‘ਧਮ੍ਮਦਾਯਾਦਾ ਸਤ੍ਥੁਸਾਵਕਾ ਵਿਹਰਨ੍ਤਿ, ਨੋ ਆਮਿਸਦਾਯਾਦਾ’ਤਿ; ਅਹਮ੍ਪਿ ਤੇਨ ਨ ਆਦਿਯੋ ਭਵੇਯ੍ਯਂ – ‘ਧਮ੍ਮਦਾਯਾਦਾ ਸਤ੍ਥੁਸਾਵਕਾ ਵਿਹਰਨ੍ਤਿ, ਨੋ ਆਮਿਸਦਾਯਾਦਾ’ਤਿ. ਤਸ੍ਮਾਤਿਹ ਮੇ, ਭਿਕ੍ਖਵੇ, ਧਮ੍ਮਦਾਯਾਦਾ ਭਵਥ, ਮਾ ਆਮਿਸਦਾਯਾਦਾ. ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ – ‘ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾ’ਤਿ.

੩੦. ‘‘ਇਧਾਹਂ, ਭਿਕ੍ਖਵੇ, ਭੁਤ੍ਤਾਵੀ ਅਸ੍ਸਂ ਪਵਾਰਿਤੋ ਪਰਿਪੁਣ੍ਣੋ ਪਰਿਯੋਸਿਤੋ ਸੁਹਿਤੋ ਯਾਵਦਤ੍ਥੋ; ਸਿਯਾ ਚ ਮੇ ਪਿਣ੍ਡਪਾਤੋ ਅਤਿਰੇਕਧਮ੍ਮੋ ਛਡ੍ਡਨੀਯਧਮ੍ਮੋ [ਛਡ੍ਡਿਯਧਮ੍ਮੋ (ਸੀ. ਸ੍ਯਾ. ਪੀ.)]. ਅਥ ਦ੍ਵੇ ਭਿਕ੍ਖੂ ਆਗਚ੍ਛੇਯ੍ਯੁਂ ਜਿਘਚ੍ਛਾਦੁਬ੍ਬਲ੍ਯ- [ਜਿਘਚ੍ਛਾਦੁਬ੍ਬਲ੍ਲ (ਸੀ. ਪੀ.)] ਪਰੇਤਾ. ਤ੍ਯਾਹਂ ਏਵਂ ਵਦੇਯ੍ਯਂ – ‘ਅਹਂ ਖੋਮ੍ਹਿ, ਭਿਕ੍ਖਵੇ, ਭੁਤ੍ਤਾਵੀ ਪਵਾਰਿਤੋ ਪਰਿਪੁਣ੍ਣੋ ਪਰਿਯੋਸਿਤੋ ਸੁਹਿਤੋ ਯਾਵਦਤ੍ਥੋ; ਅਤ੍ਥਿ ਚ ਮੇ ਅਯਂ ਪਿਣ੍ਡਪਾਤੋ ਅਤਿਰੇਕਧਮ੍ਮੋ ਛਡ੍ਡਨੀਯਧਮ੍ਮੋ. ਸਚੇ ਆਕਙ੍ਖਥ, ਭੁਞ੍ਜਥ, ਨੋ ਚੇ ਤੁਮ੍ਹੇ ਭੁਞ੍ਜਿਸ੍ਸਥ [ਸਚੇ ਤੁਮ੍ਹੇ ਨ ਭੁਞ੍ਜਿਸ੍ਸਥ (ਸੀ. ਸ੍ਯਾ. ਪੀ.)], ਇਦਾਨਾਹਂ ਅਪ੍ਪਹਰਿਤੇ ਵਾ ਛਡ੍ਡੇਸ੍ਸਾਮਿ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਸ੍ਸਾਮੀ’ਤਿ. ਤਤ੍ਰੇਕਸ੍ਸ ਭਿਕ੍ਖੁਨੋ ਏਵਮਸ੍ਸ – ‘ਭਗਵਾ ਖੋ ਭੁਤ੍ਤਾਵੀ ਪਵਾਰਿਤੋ ਪਰਿਪੁਣ੍ਣੋ ਪਰਿਯੋਸਿਤੋ ਸੁਹਿਤੋ ਯਾਵਦਤ੍ਥੋ; ਅਤ੍ਥਿ ਚਾਯਂ ਭਗਵਤੋ ਪਿਣ੍ਡਪਾਤੋ ਅਤਿਰੇਕਧਮ੍ਮੋ ਛਡ੍ਡਨੀਯਧਮ੍ਮੋ. ਸਚੇ ਮਯਂ ਨ ਭੁਞ੍ਜਿਸ੍ਸਾਮ, ਇਦਾਨਿ ਭਗਵਾ ਅਪ੍ਪਹਰਿਤੇ ਵਾ ਛਡ੍ਡੇਸ੍ਸਤਿ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਸ੍ਸਤਿ’. ਵੁਤ੍ਤਂ ਖੋ ਪਨੇਤਂ ਭਗਵਤਾ – ‘ਧਮ੍ਮਦਾਯਾਦਾ ਮੇ, ਭਿਕ੍ਖਵੇ, ਭਵਥ, ਮਾ ਆਮਿਸਦਾਯਾਦਾ’ਤਿ. ਆਮਿਸਞ੍ਞਤਰਂ ਖੋ ਪਨੇਤਂ, ਯਦਿਦਂ ਪਿਣ੍ਡਪਾਤੋ. ਯਂਨੂਨਾਹਂ ਇਮਂ ਪਿਣ੍ਡਪਾਤਂ ਅਭੁਞ੍ਜਿਤ੍ਵਾ ਇਮਿਨਾਵ ਜਿਘਚ੍ਛਾਦੁਬ੍ਬਲ੍ਯੇਨ ਏਵਂ ਇਮਂ ਰਤ੍ਤਿਨ੍ਦਿਵਂ [ਰਤ੍ਤਿਦਿਵਂ (ਕ.)] ਵੀਤਿਨਾਮੇਯ੍ਯ’’ਨ੍ਤਿ. ਸੋ ਤਂ ਪਿਣ੍ਡਪਾਤਂ ਅਭੁਞ੍ਜਿਤ੍ਵਾ ਤੇਨੇਵ ਜਿਘਚ੍ਛਾਦੁਬ੍ਬਲ੍ਯੇਨ ਏਵਂ ਤਂ ਰਤ੍ਤਿਨ੍ਦਿਵਂ ਵੀਤਿਨਾਮੇਯ੍ਯ. ਅਥ ਦੁਤਿਯਸ੍ਸ ਭਿਕ੍ਖੁਨੋ ਏਵਮਸ੍ਸ – ‘ਭਗਵਾ ਖੋ ਭੁਤ੍ਤਾਵੀ ਪਵਾਰਿਤੋ ਪਰਿਪੁਣ੍ਣੋ ਪਰਿਯੋਸਿਤੋ ਸੁਹਿਤੋ ਯਾਵਦਤ੍ਥੋ; ਅਤ੍ਥਿ ਚਾਯਂ ਭਗਵਤੋ ਪਿਣ੍ਡਪਾਤੋ ਅਤਿਰੇਕਧਮ੍ਮੋ ਛਡ੍ਡਨੀਯਧਮ੍ਮੋ. ਸਚੇ ਮਯਂ ਨ ਭੁਞ੍ਜਿਸ੍ਸਾਮ, ਇਦਾਨਿ ਭਗਵਾ ਅਪ੍ਪਹਰਿਤੇ ਵਾ ਛਡ੍ਡੇਸ੍ਸਤਿ, ਅਪ੍ਪਾਣਕੇ ਵਾ ਉਦਕੇ ਓਪਿਲਾਪੇਸ੍ਸਤਿ. ਯਂਨੂਨਾਹਂ ਇਮਂ ਪਿਣ੍ਡਪਾਤਂ ਭੁਞ੍ਜਿਤ੍ਵਾ ਜਿਘਚ੍ਛਾਦੁਬ੍ਬਲ੍ਯਂ ਪਟਿਵਿਨੋਦੇਤ੍ਵਾ [ਪਟਿਵਿਨੇਤ੍ਵਾ (ਸੀ. ਸ੍ਯਾ. ਪੀ.)] ਏਵਂ ਇਮਂ ਰਤ੍ਤਿਨ੍ਦਿਵਂ ਵੀਤਿਨਾਮੇਯ੍ਯ’ਨ੍ਤਿ. ਸੋ ਤਂ ਪਿਣ੍ਡਪਾਤਂ ਭੁਞ੍ਜਿਤ੍ਵਾ ਜਿਘਚ੍ਛਾਦੁਬ੍ਬਲ੍ਯਂ ਪਟਿਵਿਨੋਦੇਤ੍ਵਾ ਏਵਂ ਤਂ ਰਤ੍ਤਿਨ੍ਦਿਵਂ ਵੀਤਿਨਾਮੇਯ੍ਯ. ਕਿਞ੍ਚਾਪਿ ਸੋ, ਭਿਕ੍ਖਵੇ, ਭਿਕ੍ਖੁ ਤਂ ਪਿਣ੍ਡਪਾਤਂ ਭੁਞ੍ਜਿਤ੍ਵਾ ਜਿਘਚ੍ਛਾਦੁਬ੍ਬਲ੍ਯਂ ਪਟਿਵਿਨੋਦੇਤ੍ਵਾ ਏਵਂ ਤਂ ਰਤ੍ਤਿਨ੍ਦਿਵਂ ਵੀਤਿਨਾਮੇਯ੍ਯ, ਅਥ ਖੋ ਅਸੁਯੇਵ ਮੇ ਪੁਰਿਮੋ ਭਿਕ੍ਖੁ ਪੁਜ੍ਜਤਰੋ ਚ ਪਾਸਂਸਤਰੋ ਚ. ਤਂ ਕਿਸ੍ਸ ਹੇਤੁ? ਤਞ੍ਹਿ ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਦੀਘਰਤ੍ਤਂ ਅਪ੍ਪਿਚ੍ਛਤਾਯ ਸਨ੍ਤੁਟ੍ਠਿਯਾ ਸਲ੍ਲੇਖਾਯ ਸੁਭਰਤਾਯ ਵੀਰਿਯਾਰਮ੍ਭਾਯ ਸਂਵਤ੍ਤਿਸ੍ਸਤਿ. ਤਸ੍ਮਾਤਿਹ ਮੇ, ਭਿਕ੍ਖਵੇ, ਧਮ੍ਮਦਾਯਾਦਾ ਭਵਥ, ਮਾ ਆਮਿਸਦਾਯਾਦਾ. ਅਤ੍ਥਿ ਮੇ ਤੁਮ੍ਹੇਸੁ ਅਨੁਕਮ੍ਪਾ – ‘ਕਿਨ੍ਤਿ ਮੇ ਸਾਵਕਾ ਧਮ੍ਮਦਾਯਾਦਾ ਭਵੇਯ੍ਯੁਂ, ਨੋ ਆਮਿਸਦਾਯਾਦਾ’’’ਤਿ.

ਇਦਮਵੋਚ ਭਗਵਾ. ਇਦਂ ਵਤ੍ਵਾਨ [ਵਤ੍ਵਾ (ਸੀ. ਪੀ.) ਏਵਮੀਦਿਸੇਸੁ ਠਾਨੇਸੁ] ਸੁਗਤੋ ਉਟ੍ਠਾਯਾਸਨਾ ਵਿਹਾਰਂ ਪਾਵਿਸਿ.

੩੧. ਤਤ੍ਰ ਖੋ ਆਯਸ੍ਮਾ ਸਾਰਿਪੁਤ੍ਤੋ ਅਚਿਰਪਕ੍ਕਨ੍ਤਸ੍ਸ ਭਗਵਤੋ ਭਿਕ੍ਖੂ ਆਮਨ੍ਤੇਸਿ – ‘‘ਆਵੁਸੋ ਭਿਕ੍ਖਵੇ’’ਤਿ. ‘‘ਆਵੁਸੋ’’ਤਿ ਖੋ ਤੇ ਭਿਕ੍ਖੂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਪਚ੍ਚਸ੍ਸੋਸੁਂ. ਆਯਸ੍ਮਾ ਸਾਰਿਪੁਤ੍ਤੋ ਏਤਦਵੋਚ –

‘‘ਕਿਤ੍ਤਾਵਤਾ ਨੁ ਖੋ, ਆਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਂ ਨਾਨੁਸਿਕ੍ਖਨ੍ਤਿ, ਕਿਤ੍ਤਾਵਤਾ ਚ ਪਨ ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਮਨੁਸਿਕ੍ਖਨ੍ਤੀ’’ਤਿ? ‘‘ਦੂਰਤੋਪਿ ਖੋ ਮਯਂ, ਆਵੁਸੋ, ਆਗਚ੍ਛਾਮ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸਨ੍ਤਿਕੇ ਏਤਸ੍ਸ ਭਾਸਿਤਸ੍ਸ ਅਤ੍ਥਮਞ੍ਞਾਤੁਂ. ਸਾਧੁ ਵਤਾਯਸ੍ਮਨ੍ਤਂਯੇਵ ਸਾਰਿਪੁਤ੍ਤਂ ਪਟਿਭਾਤੁ ਏਤਸ੍ਸ ਭਾਸਿਤਸ੍ਸ ਅਤ੍ਥੋ; ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਸੁਤ੍ਵਾ ਭਿਕ੍ਖੂ ਧਾਰੇਸ੍ਸਨ੍ਤੀ’’ਤਿ. ‘‘ਤੇਨ ਹਾਵੁਸੋ, ਸੁਣਾਥ, ਸਾਧੁਕਂ ਮਨਸਿ ਕਰੋਥ, ਭਾਸਿਸ੍ਸਾਮੀ’’ਤਿ. ‘‘ਏਵਮਾਵੁਸੋ’’ਤਿ ਖੋ ਤੇ ਭਿਕ੍ਖੂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਪਚ੍ਚਸ੍ਸੋਸੁਂ. ਆਯਸ੍ਮਾ ਸਾਰਿਪੁਤ੍ਤੋ ਏਤਦਵੋਚ –

‘‘ਕਿਤ੍ਤਾਵਤਾ ਨੁ ਖੋ, ਆਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਂ ਨਾਨੁਸਿਕ੍ਖਨ੍ਤਿ? ਇਧਾਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਂ ਨਾਨੁਸਿਕ੍ਖਨ੍ਤਿ, ਯੇਸਞ੍ਚ ਧਮ੍ਮਾਨਂ ਸਤ੍ਥਾ ਪਹਾਨਮਾਹ, ਤੇ ਚ ਧਮ੍ਮੇ ਨਪ੍ਪਜਹਨ੍ਤਿ, ਬਾਹੁਲਿਕਾ [ਬਾਹੁਲ੍ਲਿਕਾ (ਸ੍ਯਾ.)] ਚ ਹੋਨ੍ਤਿ, ਸਾਥਲਿਕਾ, ਓਕ੍ਕਮਨੇ ਪੁਬ੍ਬਙ੍ਗਮਾ, ਪਵਿਵੇਕੇ ਨਿਕ੍ਖਿਤ੍ਤਧੁਰਾ. ਤਤ੍ਰਾਵੁਸੋ, ਥੇਰਾ ਭਿਕ੍ਖੂ ਤੀਹਿ ਠਾਨੇਹਿ ਗਾਰਯ੍ਹਾ ਭਵਨ੍ਤਿ. ‘ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਂ ਨਾਨੁਸਿਕ੍ਖਨ੍ਤੀ’ਤਿ – ਇਮਿਨਾ ਪਠਮੇਨ ਠਾਨੇਨ ਥੇਰਾ ਭਿਕ੍ਖੂ ਗਾਰਯ੍ਹਾ ਭਵਨ੍ਤਿ. ‘ਯੇਸਞ੍ਚ ਧਮ੍ਮਾਨਂ ਸਤ੍ਥਾ ਪਹਾਨਮਾਹ ਤੇ ਚ ਧਮ੍ਮੇ ਨਪ੍ਪਜਹਨ੍ਤੀ’ਤਿ – ਇਮਿਨਾ ਦੁਤਿਯੇਨ ਠਾਨੇਨ ਥੇਰਾ ਭਿਕ੍ਖੂ ਗਾਰਯ੍ਹਾ ਭਵਨ੍ਤਿ. ‘ਬਾਹੁਲਿਕਾ ਚ, ਸਾਥਲਿਕਾ, ਓਕ੍ਕਮਨੇ ਪੁਬ੍ਬਙ੍ਗਮਾ, ਪਵਿਵੇਕੇ ਨਿਕ੍ਖਿਤ੍ਤਧੁਰਾ’ਤਿ – ਇਮਿਨਾ ਤਤਿਯੇਨ ਠਾਨੇਨ ਥੇਰਾ ਭਿਕ੍ਖੂ ਗਾਰਯ੍ਹਾ ਭਵਨ੍ਤਿ. ਥੇਰਾ, ਆਵੁਸੋ, ਭਿਕ੍ਖੂ ਇਮੇਹਿ ਤੀਹਿ ਠਾਨੇਹਿ ਗਾਰਯ੍ਹਾ ਭਵਨ੍ਤਿ. ਤਤ੍ਰਾਵੁਸੋ, ਮਜ੍ਝਿਮਾ ਭਿਕ੍ਖੂ…ਪੇ… ਨਵਾ ਭਿਕ੍ਖੂ ਤੀਹਿ ਠਾਨੇਹਿ ਗਾਰਯ੍ਹਾ ਭਵਨ੍ਤਿ. ‘ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਂ ਨਾਨੁਸਿਕ੍ਖਨ੍ਤੀ’ਤਿ – ਇਮਿਨਾ ਪਠਮੇਨ ਠਾਨੇਨ ਨਵਾ ਭਿਕ੍ਖੂ ਗਾਰਯ੍ਹਾ ਭਵਨ੍ਤਿ. ‘ਯੇਸਞ੍ਚ ਧਮ੍ਮਾਨਂ ਸਤ੍ਥਾ ਪਹਾਨਮਾਹ ਤੇ ਚ ਧਮ੍ਮੇ ਨਪ੍ਪਜਹਨ੍ਤੀ’ਤਿ – ਇਮਿਨਾ ਦੁਤਿਯੇਨ ਠਾਨੇਨ ਨਵਾ ਭਿਕ੍ਖੂ ਗਾਰਯ੍ਹਾ ਭਵਨ੍ਤਿ. ‘ਬਾਹੁਲਿਕਾ ਚ ਹੋਨ੍ਤਿ, ਸਾਥਲਿਕਾ, ਓਕ੍ਕਮਨੇ ਪੁਬ੍ਬਙ੍ਗਮਾ, ਪਵਿਵੇਕੇ ਨਿਕ੍ਖਿਤ੍ਤਧੁਰਾ’ਤਿ – ਇਮਿਨਾ ਤਤਿਯੇਨ ਠਾਨੇਨ ਨਵਾ ਭਿਕ੍ਖੂ ਗਾਰਯ੍ਹਾ ਭਵਨ੍ਤਿ. ਨਵਾ, ਆਵੁਸੋ, ਭਿਕ੍ਖੂ ਇਮੇਹਿ ਤੀਹਿ ਠਾਨੇਹਿ ਗਾਰਯ੍ਹਾ ਭਵਨ੍ਤਿ. ਏਤ੍ਤਾਵਤਾ ਖੋ, ਆਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਂ ਨਾਨੁਸਿਕ੍ਖਨ੍ਤਿ.

੩੨. ‘‘ਕਿਤ੍ਤਾਵਤਾ ਚ, ਪਨਾਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਮਨੁਸਿਕ੍ਖਨ੍ਤਿ? ਇਧਾਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਮਨੁਸਿਕ੍ਖਨ੍ਤਿ – ਯੇਸਞ੍ਚ ਧਮ੍ਮਾਨਂ ਸਤ੍ਥਾ ਪਹਾਨਮਾਹ ਤੇ ਚ ਧਮ੍ਮੇ ਪਜਹਨ੍ਤਿ; ਨ ਚ ਬਾਹੁਲਿਕਾ ਹੋਨ੍ਤਿ, ਨ ਸਾਥਲਿਕਾ ਓਕ੍ਕਮਨੇ ਨਿਕ੍ਖਿਤ੍ਤਧੁਰਾ ਪਵਿਵੇਕੇ ਪੁਬ੍ਬਙ੍ਗਮਾ. ਤਤ੍ਰਾਵੁਸੋ, ਥੇਰਾ ਭਿਕ੍ਖੂ ਤੀਹਿ ਠਾਨੇਹਿ ਪਾਸਂਸਾ ਭਵਨ੍ਤਿ. ‘ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਮਨੁਸਿਕ੍ਖਨ੍ਤੀ’ਤਿ – ਇਮਿਨਾ ਪਠਮੇਨ ਠਾਨੇਨ ਥੇਰਾ ਭਿਕ੍ਖੂ ਪਾਸਂਸਾ ਭਵਨ੍ਤਿ. ‘ਯੇਸਞ੍ਚ ਧਮ੍ਮਾਨਂ ਸਤ੍ਥਾ ਪਹਾਨਮਾਹ ਤੇ ਚ ਧਮ੍ਮੇ ਪਜਹਨ੍ਤੀ’ਤਿ – ਇਮਿਨਾ ਦੁਤਿਯੇਨ ਠਾਨੇਨ ਥੇਰਾ ਭਿਕ੍ਖੂ ਪਾਸਂਸਾ ਭਵਨ੍ਤਿ. ‘ਨ ਚ ਬਾਹੁਲਿਕਾ, ਨ ਸਾਥਲਿਕਾ ਓਕ੍ਕਮਨੇ ਨਿਕ੍ਖਿਤ੍ਤਧੁਰਾ ਪਵਿਵੇਕੇ ਪੁਬ੍ਬਙ੍ਗਮਾ’ਤਿ – ਇਮਿਨਾ ਤਤਿਯੇਨ ਠਾਨੇਨ ਥੇਰਾ ਭਿਕ੍ਖੂ ਪਾਸਂਸਾ ਭਵਨ੍ਤਿ. ਥੇਰਾ, ਆਵੁਸੋ, ਭਿਕ੍ਖੂ ਇਮੇਹਿ ਤੀਹਿ ਠਾਨੇਹਿ ਪਾਸਂਸਾ ਭਵਨ੍ਤਿ. ਤਤ੍ਰਾਵੁਸੋ, ਮਜ੍ਝਿਮਾ ਭਿਕ੍ਖੂ…ਪੇ… ਨਵਾ ਭਿਕ੍ਖੂ ਤੀਹਿ ਠਾਨੇਹਿ ਪਾਸਂਸਾ ਭਵਨ੍ਤਿ. ‘ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਮਨੁਸਿਕ੍ਖਨ੍ਤੀ’ਤਿ – ਇਮਿਨਾ ਪਠਮੇਨ ਠਾਨੇਨ ਨਵਾ ਭਿਕ੍ਖੂ ਪਾਸਂਸਾ ਭਵਨ੍ਤਿ. ‘ਯੇਸਞ੍ਚ ਧਮ੍ਮਾਨਂ ਸਤ੍ਥਾ ਪਹਾਨਮਾਹ ਤੇ ਚ ਧਮ੍ਮੇ ਪਜਹਨ੍ਤੀ’ਤਿ – ਇਮਿਨਾ ਦੁਤਿਯੇਨ ਠਾਨੇਨ ਨਵਾ ਭਿਕ੍ਖੂ ਪਾਸਂਸਾ ਭਵਨ੍ਤਿ. ‘ਨ ਚ ਬਾਹੁਲਿਕਾ, ਨ ਸਾਥਲਿਕਾ ਓਕ੍ਕਮਨੇ ਨਿਕ੍ਖਿਤ੍ਤਧੁਰਾ ਪਵਿਵੇਕੇ ਪੁਬ੍ਬਙ੍ਗਮਾ’ਤਿ – ਇਮਿਨਾ ਤਤਿਯੇਨ ਠਾਨੇਨ ਨਵਾ ਭਿਕ੍ਖੂ ਪਾਸਂਸਾ ਭਵਨ੍ਤਿ. ਨਵਾ, ਆਵੁਸੋ, ਭਿਕ੍ਖੂ ਇਮੇਹਿ ਤੀਹਿ ਠਾਨੇਹਿ ਪਾਸਂਸਾ ਭਵਨ੍ਤਿ. ਏਤ੍ਤਾਵਤਾ ਖੋ, ਆਵੁਸੋ, ਸਤ੍ਥੁ ਪਵਿਵਿਤ੍ਤਸ੍ਸ ਵਿਹਰਤੋ ਸਾਵਕਾ ਵਿਵੇਕਮਨੁਸਿਕ੍ਖਨ੍ਤਿ.

੩੩. ‘‘ਤਤ੍ਰਾਵੁਸੋ, ਲੋਭੋ ਚ ਪਾਪਕੋ ਦੋਸੋ ਚ ਪਾਪਕੋ. ਲੋਭਸ੍ਸ ਚ ਪਹਾਨਾਯ ਦੋਸਸ੍ਸ ਚ ਪਹਾਨਾਯ ਅਤ੍ਥਿ ਮਜ੍ਝਿਮਾ ਪਟਿਪਦਾ ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਕਤਮਾ ਚ ਸਾ, ਆਵੁਸੋ, ਮਜ੍ਝਿਮਾ ਪਟਿਪਦਾ ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ? ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ [ਸੇਯ੍ਯਥੀਦਂ (ਸੀ. ਸ੍ਯਾ. ਪੀ.)] – ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ. ਅਯਂ ਖੋ ਸਾ, ਆਵੁਸੋ, ਮਜ੍ਝਿਮਾ ਪਟਿਪਦਾ ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ.

‘‘ਤਤ੍ਰਾਵੁਸੋ, ਕੋਧੋ ਚ ਪਾਪਕੋ ਉਪਨਾਹੋ ਚ ਪਾਪਕੋ…ਪੇ… ਮਕ੍ਖੋ ਚ ਪਾਪਕੋ ਪਲ਼ਾਸੋ ਚ ਪਾਪਕੋ, ਇਸ੍ਸਾ ਚ ਪਾਪਿਕਾ ਮਚ੍ਛੇਰਞ੍ਚ ਪਾਪਕਂ, ਮਾਯਾ ਚ ਪਾਪਿਕਾ ਸਾਠੇਯ੍ਯਞ੍ਚ ਪਾਪਕਂ, ਥਮ੍ਭੋ ਚ ਪਾਪਕੋ ਸਾਰਮ੍ਭੋ ਚ ਪਾਪਕੋ, ਮਾਨੋ ਚ ਪਾਪਕੋ ਅਤਿਮਾਨੋ ਚ ਪਾਪਕੋ, ਮਦੋ ਚ ਪਾਪਕੋ ਪਮਾਦੋ ਚ ਪਾਪਕੋ. ਮਦਸ੍ਸ ਚ ਪਹਾਨਾਯ ਪਮਾਦਸ੍ਸ ਚ ਪਹਾਨਾਯ ਅਤ੍ਥਿ ਮਜ੍ਝਿਮਾ ਪਟਿਪਦਾ ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ. ਕਤਮਾ ਚ ਸਾ, ਆਵੁਸੋ, ਮਜ੍ਝਿਮਾ ਪਟਿਪਦਾ ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤਿ? ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਸੇਯ੍ਯਥਿਦਂ – ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧਿ. ਅਯਂ ਖੋ ਸਾ, ਆਵੁਸੋ, ਮਜ੍ਝਿਮਾ ਪਟਿਪਦਾ ਚਕ੍ਖੁਕਰਣੀ ਞਾਣਕਰਣੀ ਉਪਸਮਾਯ ਅਭਿਞ੍ਞਾਯ ਸਮ੍ਬੋਧਾਯ ਨਿਬ੍ਬਾਨਾਯ ਸਂਵਤ੍ਤਤੀ’’ਤਿ.

ਇਦਮਵੋਚਾਯਸ੍ਮਾ ਸਾਰਿਪੁਤ੍ਤੋ. ਅਤ੍ਤਮਨਾ ਤੇ ਭਿਕ੍ਖੂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਭਾਸਿਤਂ ਅਭਿਨਨ੍ਦੁਨ੍ਤਿ.

ਧਮ੍ਮਦਾਯਾਦਸੁਤ੍ਤਂ ਨਿਟ੍ਠਿਤਂ ਤਤਿਯਂ.