੬. ਵਿਹਾਰਵਿਮਾਨਵਤ੍ਥੁ

੭੨੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੭੩੦. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੭੩੧. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੭੩੨. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੭੩੩. ‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੭੩੪. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੭੩੫. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੭੩੬. ‘‘ਸਾਵਤ੍ਥਿਯਂ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਤਤ੍ਥਪ੍ਪਸਨ੍ਨਾ ਅਹਮਾਨੁਮੋਦਿਂ, ਦਿਸ੍ਵਾ ਅਗਾਰਞ੍ਚ ਪਿਯਞ੍ਚ ਮੇਤਂ.

੭੩੭. ‘‘ਤਾਯੇਵ ਮੇ ਸੁਦ੍ਧਨੁਮੋਦਨਾਯ, ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਸਮਨ੍ਤਤੋ ਸੋਲ਼ਸਯੋਜਨਾਨਿ, ਵੇਹਾਯਸਂ ਗਚ੍ਛਤਿ ਇਦ੍ਧਿਯਾ ਮਮ.

੭੩੮. ‘‘ਕੂਟਾਗਾਰਾ ਨਿਵੇਸਾ ਮੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਸਤਯੋਜਨਂ.

੭੩੯. ‘‘ਪੋਕ੍ਖਰਞ੍ਞੋ ਚ ਮੇ ਏਤ੍ਥ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ [ਅਚ੍ਛੋਦਿਕਾ (ਸੀ.)] ਵਿਪ੍ਪਸਨ੍ਨਾ, ਸੋਣ੍ਣਵਾਲੁਕਸਨ੍ਥਤਾ.

੭੪੦. ‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ [ਪਣ੍ਡਰੀਕਸਮੋਨਤਾ (ਸੀ.)];

ਸੁਰਭੀ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ.

੭੪੧. ‘‘ਜਮ੍ਬੁਯੋ ਪਨਸਾ ਤਾਲਾ, ਨਾਲ਼ਿਕੇਰਵਨਾਨਿ ਚ;

ਅਨ੍ਤੋਨਿਵੇਸਨੇ ਜਾਤਾ, ਨਾਨਾਰੁਕ੍ਖਾ ਅਰੋਪਿਮਾ.

੭੪੨. ‘‘ਨਾਨਾਤੂਰਿਯਸਙ੍ਘੁਟ੍ਠਂ, ਅਚ੍ਛਰਾਗਣਘੋਸਿਤਂ;

ਯੋਪਿ ਮਂ ਸੁਪਿਨੇ ਪਸ੍ਸੇ, ਸੋਪਿ ਵਿਤ੍ਤੋ ਸਿਯਾ ਨਰੋ.

੭੪੩. ‘‘ਏਤਾਦਿਸਂ ਅਬ੍ਭੁਤਦਸ੍ਸਨੇਯ੍ਯਂ, ਵਿਮਾਨਂ ਸਬ੍ਬਸੋਪਭਂ;

ਮਮ ਕਮ੍ਮੇਹਿ ਨਿਬ੍ਬਤ੍ਤਂ, ਅਲਂ ਪੁਞ੍ਞਾਨਿ ਕਾਤਵੇ’’ਤਿ.

੭੪੪. ‘‘ਤਾਯੇਵ ਤੇ ਸੁਦ੍ਧਨੁਮੋਦਨਾਯ, ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਯਾ ਚੇਵ ਸਾ ਦਾਨਮਦਾਸਿ ਨਾਰੀ, ਤਸ੍ਸਾ ਗਤਿਂ ਬ੍ਰੂਹਿ ਕੁਹਿਂ ਉਪ੍ਪਨ੍ਨਾ [ਉਪਪਨ੍ਨਾ (ਕ.)] ਸਾ’’ਤਿ.

੭੪੫. ‘‘ਯਾ ਸਾ ਅਹੁ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਵਿਞ੍ਞਾਤਧਮ੍ਮਾ ਸਾ ਅਦਾਸਿ ਦਾਨਂ, ਉਪ੍ਪਨ੍ਨਾ ਨਿਮ੍ਮਾਨਰਤੀਸੁ ਦੇਵੇਸੁ.

੭੪੬. ‘‘ਪਜਾਪਤੀ ਤਸ੍ਸ ਸੁਨਿਮ੍ਮਿਤਸ੍ਸ, ਅਚਿਨ੍ਤਿਯਾ ਕਮ੍ਮਵਿਪਾਕਾ ਤਸ੍ਸ;

ਯਮੇਤਂ ਪੁਚ੍ਛਸਿ ਕੁਹਿਂ ਉਪ੍ਪਨ੍ਨਾ [ਉਪਪਨ੍ਨਾ (ਕ.)] ਸਾਤਿ, ਤਂ ਤੇ ਵਿਯਾਕਾਸਿਂ ਅਨਞ੍ਞਥਾ ਅਹਂ.

੭੪੭. ‘‘ਤੇਨਹਞ੍ਞੇਪਿ ਸਮਾਦਪੇਥ, ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ;

ਧਮ੍ਮਞ੍ਚ ਸੁਣਾਥ ਪਸਨ੍ਨਮਾਨਸਾ, ਸੁਦੁਲ੍ਲਭੋ ਲਦ੍ਧੋ ਮਨੁਸ੍ਸਲਾਭੋ.

੭੪੮. ‘‘ਯਂ ਮਗ੍ਗਂ ਮਗ੍ਗਾਧਿਪਤੀ ਅਦੇਸਯਿ [ਮਗ੍ਗਾਧਿਪਤ੍ਯਦੇਸਯਿ (ਸੀ.)], ਬ੍ਰਹ੍ਮਸ੍ਸਰੋ ਕਞ੍ਚਨਸਨ੍ਨਿਭਤ੍ਤਚੋ;

ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ, ਮਹਪ੍ਫਲਾ ਯਤ੍ਥ ਭਵਨ੍ਤਿ ਦਕ੍ਖਿਣਾ.

੭੪੯. [ਖੁ. ਪਾ. ੬.੬; ਸੁ. ਨਿ. ੨੨੯] ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ, ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ;

ਤੇ ਦਕ੍ਖਿਣੇਯ੍ਯਾ ਸੁਗਤਸ੍ਸ ਸਾਵਕਾ, ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ.

੭੫੦. [ਵਿ. ਵ. ੬੪੧] ‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

੭੫੧. [ਵਿ. ਵ. ੬੪੨] ‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ.

੭੫੨. [ਵਿ. ਵ. ੬੪੩] ‘‘ਏਸੋ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ, ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇਹਿ ਸੇਟ੍ਠਾ ਨਰਵੀਰਸਾਵਕਾ, ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ [ਨਤ੍ਥੇਤ੍ਥ ਪਾਠਭੇਦੋ].

੭੫੩. [ਵਿ. ਵ. ੬੪੪] ‘‘ਤੇਸਂ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ, ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ, ਮਹਪ੍ਫਲਾ ਲੋਕਵਿਦੂਨ [ਲੋਕਵਿਦੂਹਿ (ਕ.)] ਵਣ੍ਣਿਤਾ.

੭੫੪. ‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ, ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ.

ਵਿਹਾਰਵਿਮਾਨਂ ਛਟ੍ਠਂ.

ਭਾਣਵਾਰਂ ਦੁਤਿਯਂ ਨਿਟ੍ਠਿਤਂ.