੧੨. ਰਜ੍ਜੁਮਾਲਾਵਿਮਾਨਵਤ੍ਥੁ

੮੨੬. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਹਤ੍ਥਪਾਦੇ ਚ ਵਿਗ੍ਗਯ੍ਹ, ਨਚ੍ਚਸਿ ਸੁਪ੍ਪਵਾਦਿਤੇ.

੮੨੭. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੮੨੮. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੮੨੯. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੮੩੦. ‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੁਰਿਯੇ ਪਞ੍ਚਙ੍ਗਿਕੇ ਯਥਾ.

੮੩੧. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੮੩੨. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੮੩੩. ‘‘ਦਾਸੀ ਅਹਂ ਪੁਰੇ ਆਸਿਂ, ਗਯਾਯਂ ਬ੍ਰਾਹ੍ਮਣਸ੍ਸਹਂ;

ਅਪ੍ਪਪੁਞ੍ਞਾ ਅਲਕ੍ਖਿਕਾ, ਰਜ੍ਜੁਮਾਲਾਤਿ ਮਂ ਵਿਦੁਂ [ਵਿਦੂ (ਸ੍ਯਾ. ਪੀ. ਕ.)].

੮੩੪. ‘‘ਅਕ੍ਕੋਸਾਨਂ ਵਧਾਨਞ੍ਚ, ਤਜ੍ਜਨਾਯ ਚ ਉਗ੍ਗਤਾ [ਉਕ੍ਕਤਾ (ਸੀ. ਸ੍ਯਾ.)];

ਕੁਟਂ ਗਹੇਤ੍ਵਾ ਨਿਕ੍ਖਮ੍ਮ, ਅਗਞ੍ਛਿਂ [ਆਗਚ੍ਛਿਂ (ਸ੍ਯਾ. ਕ.), ਅਗਚ੍ਛਿਂ (ਪੀ.), ਗਚ੍ਛਿਂ (ਸੀ.)] ਉਦਹਾਰਿਯਾ [ਉਦਕਹਾਰਿਯਾ (ਸੀ.)].

੮੩੫. ‘‘ਵਿਪਥੇ ਕੁਟਂ ਨਿਕ੍ਖਿਪਿਤ੍ਵਾ, ਵਨਸਣ੍ਡਂ ਉਪਾਗਮਿਂ;

ਇਧੇਵਾਹਂ ਮਰਿਸ੍ਸਾਮਿ, ਕੋ ਅਤ੍ਥੋ [ਕ੍ਵਤ੍ਥੋਸਿ (ਕ.), ਕੀਵਤ੍ਥੋਪਿ (ਸ੍ਯਾ.)] ਜੀਵਿਤੇਨ ਮੇ.

੮੩੬. ‘‘ਦਲ਼੍ਹਂ ਪਾਸਂ ਕਰਿਤ੍ਵਾਨ, ਆਸੁਮ੍ਭਿਤ੍ਵਾਨ ਪਾਦਪੇ;

ਤਤੋ ਦਿਸਾ ਵਿਲੋਕੇਸਿਂ,ਕੋ ਨੁ ਖੋ ਵਨਮਸ੍ਸਿਤੋ.

੮੩੭. ‘‘ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਸਬ੍ਬਲੋਕਹਿਤਂ ਮੁਨਿਂ;

ਨਿਸਿਨ੍ਨਂ ਰੁਕ੍ਖਮੂਲਸ੍ਮਿਂ, ਝਾਯਨ੍ਤਂ ਅਕੁਤੋਭਯਂ.

੮੩੮. ‘‘ਤਸ੍ਸਾ ਮੇ ਅਹੁ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ;

ਕੋ ਨੁ ਖੋ ਵਨਮਸ੍ਸਿਤੋ, ਮਨੁਸ੍ਸੋ ਉਦਾਹੁ ਦੇਵਤਾ.

੮੩੯. ‘‘ਪਾਸਾਦਿਕਂ ਪਸਾਦਨੀਯਂ, ਵਨਾ ਨਿਬ੍ਬਨਮਾਗਤਂ;

ਦਿਸ੍ਵਾ ਮਨੋ ਮੇ ਪਸੀਦਿ, ਨਾਯਂ ਯਾਦਿਸਕੀਦਿਸੋ.

੮੪੦. ‘‘ਗੁਤ੍ਤਿਨ੍ਦ੍ਰਿਯੋ ਝਾਨਰਤੋ, ਅਬਹਿਗ੍ਗਤਮਾਨਸੋ;

ਹਿਤੋ ਸਬ੍ਬਸ੍ਸ ਲੋਕਸ੍ਸ, ਬੁਦ੍ਧੋ ਅਯਂ [ਸੋਯਂ (ਸੀ.)] ਭਵਿਸ੍ਸਤਿ.

੮੪੧. ‘‘ਭਯਭੇਰਵੋ ਦੁਰਾਸਦੋ, ਸੀਹੋਵ ਗੁਹਮਸ੍ਸਿਤੋ;

ਦੁਲ੍ਲਭਾਯਂ ਦਸ੍ਸਨਾਯ, ਪੁਪ੍ਫਂ ਓਦੁਮ੍ਬਰਂ ਯਥਾ.

੮੪੨. ‘‘ਸੋ ਮਂ ਮੁਦੂਹਿ ਵਾਚਾਹਿ, ਆਲਪਿਤ੍ਵਾ ਤਥਾਗਤੋ;

ਰਜ੍ਜੁਮਾਲੇਤਿ ਮਂਵੋਚ, ਸਰਣਂ ਗਚ੍ਛ ਤਥਾਗਤਂ.

੮੪੩. ‘‘ਤਾਹਂ ਗਿਰਂ ਸੁਣਿਤ੍ਵਾਨ, ਨੇਲਂ ਅਤ੍ਥਵਤਿਂ ਸੁਚਿਂ;

ਸਣ੍ਹਂ ਮੁਦੁਞ੍ਚ ਵਗ੍ਗੁਞ੍ਚ, ਸਬ੍ਬਸੋਕਾਪਨੂਦਨਂ.

੮੪੪. ‘‘ਕਲ੍ਲਚਿਤ੍ਤਞ੍ਚ ਮਂ ਞਤ੍ਵਾ, ਪਸਨ੍ਨਂ ਸੁਦ੍ਧਮਾਨਸਂ;

ਹਿਤੋ ਸਬ੍ਬਸ੍ਸ ਲੋਕਸ੍ਸ, ਅਨੁਸਾਸਿ ਤਥਾਗਤੋ.

੮੪੫. ‘‘ਇਦਂ ਦੁਕ੍ਖਨ੍ਤਿ ਮਂਵੋਚ, ਅਯਂ ਦੁਕ੍ਖਸ੍ਸ ਸਮ੍ਭਵੋ;

ਦੁਕ੍ਖ [ਅਯਂ (ਸੀ. ਸ੍ਯਾ. ਪੀ.)] ਨਿਰੋਧੋ ਮਗ੍ਗੋ ਚ [ਦੁਕ੍ਖਨਿਰੋਧੋ ਚ (ਸ੍ਯਾ.)], ਅਞ੍ਜਸੋ ਅਮਤੋਗਧੋ.

੮੪੬. ‘‘ਅਨੁਕਮ੍ਪਕਸ੍ਸ ਕੁਸਲਸ੍ਸ, ਓਵਾਦਮ੍ਹਿ ਅਹਂ ਠਿਤਾ;

ਅਜ੍ਝਗਾ ਅਮਤਂ ਸਨ੍ਤਿਂ, ਨਿਬ੍ਬਾਨਂ ਪਦਮਚ੍ਚੁਤਂ.

੮੪੭. ‘‘ਸਾਹਂ ਅਵਟ੍ਠਿਤਾਪੇਮਾ, ਦਸ੍ਸਨੇ ਅਵਿਕਮ੍ਪਿਨੀ;

ਮੂਲਜਾਤਾਯ ਸਦ੍ਧਾਯ, ਧੀਤਾ ਬੁਦ੍ਧਸ੍ਸ ਓਰਸਾ.

੮੪੮. ‘‘ਸਾਹਂ ਰਮਾਮਿ ਕੀਲ਼ਾਮਿ, ਮੋਦਾਮਿ ਅਕੁਤੋਭਯਾ;

ਦਿਬ੍ਬਮਾਲਂ ਧਾਰਯਾਮਿ, ਪਿਵਾਮਿ ਮਧੁਮਦ੍ਦਵਂ.

੮੪੯. ‘‘ਸਟ੍ਠਿਤੁਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ;

ਆਲ਼ਮ੍ਬੋ ਗਗ੍ਗਰੋ ਭੀਮੋ, ਸਾਧੁਵਾਦੀ ਚ ਸਂਸਯੋ.

੮੫੦. ‘‘ਪੋਕ੍ਖਰੋ ਚ ਸੁਫਸ੍ਸੋ ਚ, ਵੀਣਾਮੋਕ੍ਖਾ ਚ ਨਾਰਿਯੋ;

ਨਨ੍ਦਾ ਚੇਵ ਸੁਨਨ੍ਦਾ ਚ, ਸੋਣਦਿਨ੍ਨਾ ਸੁਚਿਮ੍ਹਿਤਾ.

੮੫੧. ‘‘ਅਲਮ੍ਬੁਸਾ ਮਿਸ੍ਸਕੇਸੀ ਚ, ਪੁਣ੍ਡਰੀਕਾਤਿਦਾਰੁਣੀ [… ਤਿਚਾਰੁਣੀ (ਸੀ.)];

ਏਣੀਫਸ੍ਸਾ ਸੁਫਸ੍ਸਾ [ਸੁਪਸ੍ਸਾ (ਸ੍ਯਾ. ਪੀ. ਕ.)] ਚ, ਸੁਭਦ੍ਦਾ [ਸਂਭਦ੍ਦਾ (ਕ.)] ਮੁਦੁਵਾਦਿਨੀ.

੮੫੨. ‘‘ਏਤਾ ਚਞ੍ਞਾ ਚ ਸੇਯ੍ਯਾਸੇ, ਅਚ੍ਛਰਾਨਂ ਪਬੋਧਿਕਾ;

ਤਾ ਮਂ ਕਾਲੇਨੁਪਾਗਨ੍ਤ੍ਵਾ, ਅਭਿਭਾਸਨ੍ਤਿ ਦੇਵਤਾ.

੮੫੩. ‘‘ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ;

ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ.

੮੫੪. ‘‘ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ;

ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ.

੮੫੫. ‘‘ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ;

ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ.

੮੫੬. ‘‘ਬਹੂਨਂ ਵਤ ਅਤ੍ਥਾਯ, ਉਪ੍ਪਜ੍ਜਨ੍ਤਿ ਤਥਾਗਤਾ;

ਦਕ੍ਖਿਣੇਯ੍ਯਾ ਮਨੁਸ੍ਸਾਨਂ, ਪੁਞ੍ਞਖੇਤ੍ਤਾਨਮਾਕਰਾ;

ਯਤ੍ਥ ਕਾਰਂ ਕਰਿਤ੍ਵਾਨ, ਸਗ੍ਗੇ ਮੋਦਨ੍ਤਿ ਦਾਯਕਾ’’ਤਿ.

ਰਜ੍ਜੁਮਾਲਾਵਿਮਾਨਂ ਦ੍ਵਾਦਸਮਂ.

ਮਞ੍ਜਿਟ੍ਠਕਵਗ੍ਗੋ ਚਤੁਤ੍ਥੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਮਞ੍ਜਿਟ੍ਠਾ ਪਭਸ੍ਸਰਾ ਨਾਗਾ, ਅਲੋਮਾਕਞ੍ਜਿਕਦਾਯਿਕਾ;

ਵਿਹਾਰਚਤੁਰਿਤ੍ਥਮ੍ਬਾ, ਪੀਤਾ ਉਚ੍ਛੁਵਨ੍ਦਨਰਜ੍ਜੁਮਾਲਾ ਚ;

ਵਗ੍ਗੋ ਤੇਨ ਪਵੁਚ੍ਚਤੀਤਿ.

ਇਤ੍ਥਿਵਿਮਾਨਂ ਸਮਤ੍ਤਂ.