੨. ਉਚ੍ਛੁਦਾਯਿਕਾਵਿਮਾਨਵਤ੍ਥੁ

੨੯੬. ‘‘ਓਭਾਸਯਿਤ੍ਵਾ ਪਥਵਿਂ [ਪਠਵਿਂ (ਸੀ. ਸ੍ਯਾ.)] ਸਦੇਵਕਂ, ਅਤਿਰੋਚਸਿ ਚਨ੍ਦਿਮਸੂਰਿਯਾ ਵਿਯ;

ਸਿਰਿਯਾ ਚ ਵਣ੍ਣੇਨ ਯਸੇਨ ਤੇਜਸਾ, ਬ੍ਰਹ੍ਮਾਵ ਦੇਵੇ ਤਿਦਸੇ ਸਹਿਨ੍ਦਕੇ [ਸਇਨ੍ਦਕੇ (ਸੀ.)].

੨੯੭. ‘‘ਪੁਚ੍ਛਾਮਿ ਤਂ ਉਪ੍ਪਲਮਾਲਧਾਰਿਨੀ, ਆਵੇਲ਼ਿਨੀ ਕਞ੍ਚਨਸਨ੍ਨਿਭਤ੍ਤਚੇ;

ਅਲਙ੍ਕਤੇ ਉਤ੍ਤਮਵਤ੍ਥਧਾਰਿਨੀ, ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

੨੯੮. ‘‘ਕਿਂ ਤ੍ਵਂ ਪੁਰੇ ਕਮ੍ਮਮਕਾਸਿ ਅਤ੍ਤਨਾ, ਮਨੁਸ੍ਸਭੂਤਾ ਪੁਰਿਮਾਯ ਜਾਤਿਯਾ;

ਦਾਨਂ ਸੁਚਿਣ੍ਣਂ ਅਥ ਸੀਲਸਂਯਮਂ [ਸਞ੍ਞਮਂ (ਸੀ.)], ਕੇਨੂਪਪਨ੍ਨਾ ਸੁਗਤਿਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੨੯੯. ‘‘ਇਦਾਨਿ ਭਨ੍ਤੇ ਇਮਮੇਵ ਗਾਮਂ [ਗਾਮੇ (ਸ੍ਯਾ. ਕ.)], ਪਿਣ੍ਡਾਯ ਅਮ੍ਹਾਕਂ ਘਰਂ ਉਪਾਗਮਿ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤ੍ਤਾ ਅਤੁਲਾਯ ਪੀਤਿਯਾ.

੩੦੦. ‘‘ਸਸ੍ਸੁ ਚ ਪਚ੍ਛਾ ਅਨੁਯੁਞ੍ਜਤੇ ਮਮਂ, ਕਹਂ [ਕਹਂ ਮੇ (ਪੀ.)] ਨੁ ਉਚ੍ਛੁਂ ਵਧੁਕੇ ਅਵਾਕਿਰਿ [ਅਵਾਕਰਿ (ਸ੍ਯਾ. ਕ.)];

ਨ ਛਡ੍ਡਿਤਂ ਨੋ ਪਨ ਖਾਦਿਤਂ ਮਯਾ, ਸਨ੍ਤਸ੍ਸ ਭਿਕ੍ਖੁਸ੍ਸ ਸਯਂ ਅਦਾਸਹਂ.

੩੦੧. ‘‘ਤੁਯ੍ਹਂਨ੍ਵਿਦਂ [ਤੁਯ੍ਹਂ ਨੁ ਇਦਂ (ਸ੍ਯਾ.)] ਇਸ੍ਸਰਿਯਂ ਅਥੋ ਮਮ, ਇਤਿਸ੍ਸਾ ਸਸ੍ਸੁ ਪਰਿਭਾਸਤੇ ਮਮਂ;

ਪੀਠਂ ਗਹੇਤ੍ਵਾ ਪਹਾਰਂ ਅਦਾਸਿ ਮੇ, ਤਤੋ ਚੁਤਾ ਕਾਲਕਤਾਮ੍ਹਿ ਦੇਵਤਾ.

੩੦੨. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

੩੦੩. ‘‘ਤਦੇਵ ਕਮ੍ਮਂ ਕੁਸਲਂ ਕਤਂ ਮਯਾ, ਸੁਖਞ੍ਚ ਕਮ੍ਮਂ ਅਨੁਭੋਮਿ ਅਤ੍ਤਨਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਮਪ੍ਪਿਤਾ ਕਾਮਗੁਣੇਹਿ ਪਞ੍ਚਹਿ.

੩੦੪. ‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਵਿਪਾਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵੇਹਿ ਸਦ੍ਧਿਂ ਪਰਿਚਾਰਯਾਮਹਂ, ਮੋਦਾਮਹਂ ਕਾਮਗੁਣੇਹਿ ਪਞ੍ਚਹਿ.

੩੦੫. ‘‘ਏਤਾਦਿਸਂ ਪੁਞ੍ਞਫਲਂ ਅਨਪ੍ਪਕਂ, ਮਹਾਜੁਤਿਕਾ ਮਮ ਉਚ੍ਛੁਦਕ੍ਖਿਣਾ;

ਦੇਵਿਨ੍ਦਗੁਤ੍ਤਾ ਤਿਦਸੇਹਿ ਰਕ੍ਖਿਤਾ, ਸਹਸ੍ਸਨੇਤ੍ਤੋਰਿਵ ਨਨ੍ਦਨੇ ਵਨੇ.

੩੦੬. ‘‘ਤੁਵਞ੍ਚ ਭਨ੍ਤੇ ਅਨੁਕਮ੍ਪਕਂ ਵਿਦੁਂ, ਉਪੇਚ੍ਚ ਵਨ੍ਦਿਂ ਕੁਸਲਞ੍ਚ ਪੁਚ੍ਛਿਸਂ;

ਤਤੋ ਤੇ ਉਚ੍ਛੁਸ੍ਸ ਅਦਾਸਿ ਖਣ੍ਡਿਕਂ, ਪਸਨ੍ਨਚਿਤਾ ਅਤੁਲਾਯ ਪੀਤਿਯਾ’’ਤਿ.

ਉਚ੍ਛੁਦਾਯਿਕਾਵਿਮਾਨਂ ਦੁਤਿਯਂ.