੭. ਉਪੋਸਥਾਵਿਮਾਨਵਤ੍ਥੁ

੨੨੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੨੩੦. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੨੩੨. ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ.

੨੩੩. ‘‘ਉਪੋਸਥਾਤਿ ਮਂ ਅਞ੍ਞਂਸੁ, ਸਾਕੇਤਾਯਂ ਉਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

੨੩੪. ‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੨੩੫. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੨੩੬. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੨੩੭. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੨੩੮. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

੨੩੯. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੨੪੧. ‘‘ਅਭਿਕ੍ਖਣਂ ਨਨ੍ਦਨਂ ਸੁਤ੍ਵਾ, ਛਨ੍ਦੋ ਮੇ ਉਦਪਜ੍ਜਥ [ਉਪਪਜ੍ਜਥ (ਬਹੂਸੁ)];

ਤਤ੍ਥ ਚਿਤ੍ਤਂ ਪਣਿਧਾਯ, ਉਪਪਨ੍ਨਮ੍ਹਿ ਨਨ੍ਦਨਂ.

੨੪੨. ‘‘ਨਾਕਾਸਿਂ ਸਤ੍ਥੁ ਵਚਨਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਹੀਨੇ ਚਿਤ੍ਤਂ ਪਣਿਧਾਯ, ਸਾਮ੍ਹਿ ਪਚ੍ਛਾਨੁਤਾਪਿਨੀ’’ਤਿ.

੨੪੩. ‘‘ਕੀਵ ਚਿਰਂ ਵਿਮਾਨਮ੍ਹਿ, ਇਧ ਵਚ੍ਛਸੁਪੋਸਥੇ [ਵਸ੍ਸਸੁਪੋਸਥੇ (ਸੀ.)];

ਦੇਵਤੇ ਪੁਚ੍ਛਿਤਾਚਿਕ੍ਖ, ਯਦਿ ਜਾਨਾਸਿ ਆਯੁਨੋ’’ਤਿ.

੨੪੪. ‘‘ਸਟ੍ਠਿਵਸ੍ਸਸਹਸ੍ਸਾਨਿ [ਸਟ੍ਠਿ ਸਤਸਹਸ੍ਸਾਨਿ (?)], ਤਿਸ੍ਸੋ ਚ ਵਸ੍ਸਕੋਟਿਯੋ;

ਇਧ ਠਤ੍ਵਾ ਮਹਾਮੁਨਿ, ਇਤੋ ਚੁਤਾ ਗਮਿਸ੍ਸਾਮਿ;

ਮਨੁਸ੍ਸਾਨਂ ਸਹਬ੍ਯਤ’’ਨ੍ਤਿ.

੨੪੫. ‘‘ਮਾ ਤ੍ਵਂ ਉਪੋਸਥੇ ਭਾਯਿ, ਸਮ੍ਬੁਦ੍ਧੇਨਾਸਿ ਬ੍ਯਾਕਤਾ;

ਸੋਤਾਪਨ੍ਨਾ ਵਿਸੇਸਯਿ, ਪਹੀਨਾ ਤਵ ਦੁਗ੍ਗਤੀ’’ਤਿ.

ਉਪੋਸਥਾਵਿਮਾਨਂ ਸਤ੍ਤਮਂ.