੨. ਚਿਤ੍ਤਲਤਾਵਗ੍ਗੋ

੧. ਦਾਸਿਵਿਮਾਨਵਤ੍ਥੁ

੧੫੭. ‘‘ਅਪਿ ਸਕ੍ਕੋਵ ਦੇਵਿਨ੍ਦੋ, ਰਮ੍ਮੇ ਚਿਤ੍ਤਲਤਾਵਨੇ;

ਸਮਨ੍ਤਾ ਅਨੁਪਰਿਯਾਸਿ, ਨਾਰੀਗਣਪੁਰਕ੍ਖਤਾ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੫੮. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੫੯. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੬੦. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੬੧. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਾਸੀ ਅਹੋਸਿਂ ਪਰਪੇਸ੍ਸਿਯਾ [ਪਰਪੇਸਿਯਾ (ਕ.)] ਕੁਲੇ.

੧੬੨. ‘‘ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ;

ਤਸ੍ਸਾ ਮੇ ਨਿਕ੍ਕਮੋ ਆਸਿ, ਸਾਸਨੇ ਤਸ੍ਸ ਤਾਦਿਨੋ.

੧੬੩. ‘‘ਕਾਮਂ ਭਿਜ੍ਜਤੁਯਂ ਕਾਯੋ, ਨੇਵ ਅਤ੍ਥੇਤ੍ਥ ਸਣ੍ਠਨਂ [ਸਨ੍ਥਨਂ (ਸੀ. ਸ੍ਯਾ. ਪੀ.)];

ਸਿਕ੍ਖਾਪਦਾਨਂ ਪਞ੍ਚਨ੍ਨਂ, ਮਗ੍ਗੋ ਸੋਵਤ੍ਥਿਕੋ ਸਿਵੋ.

੧੬੪. ‘‘ਅਕਣ੍ਟਕੋ ਅਗਹਨੋ, ਉਜੁ ਸਬ੍ਭਿ ਪਵੇਦਿਤੋ;

ਨਿਕ੍ਕਮਸ੍ਸ ਫਲਂ ਪਸ੍ਸ, ਯਥਿਦਂ ਪਾਪੁਣਿਤ੍ਥਿਕਾ.

੧੬੫. ‘‘ਆਮਨ੍ਤਨਿਕਾ ਰਞ੍ਞੋਮ੍ਹਿ, ਸਕ੍ਕਸ੍ਸ ਵਸਵਤ੍ਤਿਨੋ;

ਸਟ੍ਠਿ ਤੁਰਿਯ [ਤੁਰਿਯ (ਸੀ. ਸ੍ਯਾ. ਪੀ.)] ਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ.

੧੬੬. ‘‘ਆਲਮ੍ਬੋ ਗਗ੍ਗਰੋ [ਗਗ੍ਗਮੋ (ਸ੍ਯਾ.), ਭਗ੍ਗਰੋ (ਕ.)] ਭੀਮੋ [ਭਿਮ੍ਮੋ (ਕ.)], ਸਾਧੁਵਾਦੀ ਚ ਸਂਸਯੋ;

ਪੋਕ੍ਖਰੋ ਚ ਸੁਫਸ੍ਸੋ ਚ, ਵਿਣਾਮੋਕ੍ਖਾ [ਵਿਲਾਮੋਕ੍ਖਾ (ਕ.)] ਚ ਨਾਰਿਯੋ.

੧੬੭. ‘‘ਨਨ੍ਦਾ ਚੇਵ ਸੁਨਨ੍ਦਾ ਚ, ਸੋਣਦਿਨ੍ਨਾ ਸੁਚਿਮ੍ਹਿਤਾ [ਸੁਚਿਮ੍ਭਿਕਾ (ਸ੍ਯਾ.)];

ਅਲਮ੍ਬੁਸਾ ਮਿਸ੍ਸਕੇਸੀ ਚ, ਪੁਣ੍ਡਰੀਕਾਤਿ ਦਾਰੁਣੀ.

੧੬੮. ‘‘ਏਣੀਫਸ੍ਸਾ ਸੁਫਸ੍ਸਾ ਚ, ਸੁਭਦ੍ਦਾ ਮੁਦੁਵਾਦਿਨੀ;

ਏਤਾ ਚਞ੍ਞਾ ਚ ਸੇਯ੍ਯਾਸੇ, ਅਚ੍ਛਰਾਨਂ ਪਬੋਧਿਕਾ.

੧੬੯. ‘‘ਤਾ ਮਂ ਕਾਲੇਨੁਪਾਗਨ੍ਤ੍ਵਾ, ਅਭਿਭਾਸਨ੍ਤਿ ਦੇਵਤਾ;

ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ.

੧੭੦. ‘‘ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ;

ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ.

੧੭੧. ‘‘ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ;

ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ.

੧੭੨. ‘‘ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ’’ਤਿ.

ਦਾਸਿਵਿਮਾਨਂ ਪਠਮਂ.

੨. ਲਖੁਮਾਵਿਮਾਨਵਤ੍ਥੁ

੧੭੩. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੭੪. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੭੫. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੭੬. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੭੭. ‘‘ਕੇਵਟ੍ਟਦ੍ਵਾਰਾ ਨਿਕ੍ਖਮ੍ਮ, ਅਹੁ ਮਯ੍ਹਂ ਨਿਵੇਸਨਂ;

ਤਤ੍ਥ ਸਞ੍ਚਰਮਾਨਾਨਂ, ਸਾਵਕਾਨਂ ਮਹੇਸਿਨਂ.

੧੭੮. ‘‘ਓਦਨਂ ਕੁਮ੍ਮਾਸਂ [ਸਾਕਂ (ਸੀ.)] ਡਾਕਂ, ਲੋਣਸੋਵੀਰਕਞ੍ਚਹਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੧੭੯. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੧੮੦. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੧੮੧. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੧੮੨. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

੧੮੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ… ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀਤਿ.

‘‘ਮਮ ਚ, ਭਨ੍ਤੇ, ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦੇਯ੍ਯਾਸਿ – ‘ਲਖੁਮਾ ਨਾਮ,ਭਨ੍ਤੇ,ਉਪਾਸਿਕਾ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’ਤਿ. ਅਨਚ੍ਛਰਿਯਂ ਖੋ ਪਨੇਤਂ, ਭਨ੍ਤੇ, ਯਂ ਮਂ ਭਗਵਾ ਅਞ੍ਞਤਰਸ੍ਮਿਂ ਸਾਮਞ੍ਞਫਲੇ ਬ੍ਯਾਕਰੇਯ੍ਯ [ਬ੍ਯਾਕਰੇਯ੍ਯਾਤਿ (?)]. ਤਂ ਭਗਵਾ ਸਕਦਾਗਾਮਿਫਲੇ ਬ੍ਯਾਕਾਸੀ’’ਤਿ.

ਲਖੁਮਾਵਿਮਾਨਂ ਦੁਤਿਯਂ.

੩. ਆਚਾਮਦਾਯਿਕਾਵਿਮਾਨਵਤ੍ਥੁ

੧੮੫. ‘‘ਪਿਣ੍ਡਾਯ ਤੇ ਚਰਨ੍ਤਸ੍ਸ, ਤੁਣ੍ਹੀਭੂਤਸ੍ਸ ਤਿਟ੍ਠਤੋ;

ਦਲਿਦ੍ਦਾ ਕਪਣਾ ਨਾਰੀ, ਪਰਾਗਾਰਂ ਅਪਸ੍ਸਿਤਾ [ਅਵਸ੍ਸਿਤਾ (ਸੀ.)].

੧੮੬. ‘‘ਯਾ ਤੇ ਅਦਾਸਿ ਆਚਾਮਂ, ਪਸਨ੍ਨਾ ਸੇਹਿ ਪਾਣਿਭਿ;

ਸਾ ਹਿਤ੍ਵਾ ਮਾਨੁਸਂ ਦੇਹਂ, ਕਂ ਨੁ ਸਾ ਦਿਸਤਂ ਗਤਾ’’ਤਿ.

੧੮੭. ‘‘ਪਿਣ੍ਡਾਯ ਮੇ ਚਰਨ੍ਤਸ੍ਸ, ਤੁਣ੍ਹੀਭੂਤਸ੍ਸ ਤਿਟ੍ਠਤੋ;

ਦਲਿਦ੍ਦਾ ਕਪਣਾ ਨਾਰੀ, ਪਰਾਗਾਰਂ ਅਪਸ੍ਸਿਤਾ.

੧੮੮. ‘‘ਯਾ ਮੇ ਅਦਾਸਿ ਆਚਾਮਂ, ਪਸਨ੍ਨਾ ਸੇਹਿ ਪਾਣਿਭਿ;

ਸਾ ਹਿਤ੍ਵਾ ਮਾਨੁਸਂ ਦੇਹਂ, ਵਿਪ੍ਪਮੁਤ੍ਤਾ ਇਤੋ ਚੁਤਾ.

੧੮੯. ‘‘ਨਿਮ੍ਮਾਨਰਤਿਨੋ ਨਾਮ, ਸਨ੍ਤਿ ਦੇਵਾ ਮਹਿਦ੍ਧਿਕਾ;

ਤਤ੍ਥ ਸਾ ਸੁਖਿਤਾ ਨਾਰੀ, ਮੋਦਤਾਚਾਮਦਾਯਿਕਾ’’ਤਿ.

੧੯੦. ‘‘ਅਹੋ ਦਾਨਂ ਵਰਾਕਿਯਾ, ਕਸ੍ਸਪੇ ਸੁਪ੍ਪਤਿਟ੍ਠਿਤਂ;

ਪਰਾਭਤੇਨ ਦਾਨੇਨ, ਇਜ੍ਝਿਤ੍ਥ ਵਤ ਦਕ੍ਖਿਣਾ.

੧੯੧. ‘‘ਯਾ ਮਹੇਸਿਤ੍ਤਂ ਕਾਰੇਯ੍ਯ, ਚਕ੍ਕਵਤ੍ਤਿਸ੍ਸ ਰਾਜਿਨੋ;

ਨਾਰੀ ਸਬ੍ਬਙ੍ਗਕਲ੍ਯਾਣੀ, ਭਤ੍ਤੁ ਚਾਨੋਮਦਸ੍ਸਿਕਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

੧੯੨. ‘‘ਸਤਂ ਨਿਕ੍ਖਾ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਕਞ੍ਞਾਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

੧੯੩. ‘‘ਸਤਂ ਹੇਮਵਤਾ ਨਾਗਾ, ਈਸਾਦਨ੍ਤਾ ਉਰੂਲ਼੍ਹਵਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ [ਹੇਮਕਪ੍ਪਨਿਵਾਸਸਾ (ਸ੍ਯਾ. ਕ.)];

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

੧੯੪. ‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਤਸ੍ਸਾਚਾਮਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ.

ਆਚਾਮਦਾਯਿਕਾਵਿਮਾਨਂ ਤਤਿਯਂ.

੪. ਚਣ੍ਡਾਲਿਵਿਮਾਨਵਤ੍ਥੁ

੧੯੫. ‘‘ਚਣ੍ਡਾਲਿ ਵਨ੍ਦ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ;

ਤਮੇਵ [ਤਵੇਵ (ਸੀ.)] ਅਨੁਕਮ੍ਪਾਯ, ਅਟ੍ਠਾਸਿ ਇਸਿਸਤ੍ਤਮੋ [ਇਸਿਸੁਤ੍ਤਮੋ (ਸੀ.)].

੧੯੬. ‘‘ਅਭਿਪ੍ਪਸਾਦੇਹਿ ਮਨਂ, ਅਰਹਨ੍ਤਮ੍ਹਿ ਤਾਦਿਨਿ [ਤਾਦਿਨੇ (ਸ੍ਯਾ. ਕ.)];

ਖਿਪ੍ਪਂ ਪਞ੍ਜਲਿਕਾ ਵਨ੍ਦ, ਪਰਿਤ੍ਤਂ ਤਵ ਜੀਵਿਤ’’ਨ੍ਤਿ.

੧੯੭. ਚੋਦਿਤਾ ਭਾਵਿਤਤ੍ਤੇਨ, ਸਰੀਰਨ੍ਤਿਮਧਾਰਿਨਾ;

ਚਣ੍ਡਾਲੀ ਵਨ੍ਦਿ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ.

੧੯੮. ਤਮੇਨਂ ਅਵਧੀ ਗਾਵੀ, ਚਣ੍ਡਾਲਿਂ ਪਞ੍ਜਲਿਂ ਠਿਤਂ;

ਨਮਸ੍ਸਮਾਨਂ ਸਮ੍ਬੁਦ੍ਧਂ, ਅਨ੍ਧਕਾਰੇ ਪਭਙ੍ਕਰਨ੍ਤਿ.

੧੯੯. ‘‘ਖੀਣਾਸਵਂ ਵਿਗਤਰਜਂ ਅਨੇਜਂ, ਏਕਂ ਅਰਞ੍ਞਮ੍ਹਿ ਰਹੋ ਨਿਸਿਨ੍ਨਂ;

ਦੇਵਿਦ੍ਧਿਪਤ੍ਤਾ ਉਪਸਙ੍ਕਮਿਤ੍ਵਾ, ਵਨ੍ਦਾਮਿ ਤਂ ਵੀਰ ਮਹਾਨੁਭਾਵ’’ਨ੍ਤਿ.

੨੦੦. ‘‘ਸੁਵਣ੍ਣਵਣ੍ਣਾ ਜਲਿਤਾ ਮਹਾਯਸਾ, ਵਿਮਾਨਮੋਰੁਯ੍ਹ ਅਨੇਕਚਿਤ੍ਤਾ;

ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ [ਅਚ੍ਛਰਾਨਂ ਗਣੇਨ (ਸੀ.)], ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮ’’ਨ੍ਤਿ.

੨੦੧. ‘‘ਅਹਂ ਭਦ੍ਦਨ੍ਤੇ ਚਣ੍ਡਾਲੀ, ਤਯਾ ਵੀਰੇਨ [ਥੇਰੇਨ (ਕ.)] ਪੇਸਿਤਾ;

ਵਨ੍ਦਿਂ ਅਰਹਤੋ ਪਾਦੇ, ਗੋਤਮਸ੍ਸ ਯਸਸ੍ਸਿਨੋ.

੨੦੨. ‘‘ਸਾਹਂ ਵਨ੍ਦਿਤ੍ਵਾ [ਵਨ੍ਦਿਤ੍ਵ (ਸੀ.)] ਪਾਦਾਨਿ, ਚੁਤਾ ਚਣ੍ਡਾਲਯੋਨਿਯਾ;

ਵਿਮਾਨਂ ਸਬ੍ਬਤੋ ਭਦ੍ਦਂ, ਉਪਪਨ੍ਨਮ੍ਹਿ ਨਨ੍ਦਨੇ.

੨੦੩. ‘‘ਅਚ੍ਛਰਾਨਂ ਸਤਸਹਸ੍ਸਂ, ਪੁਰਕ੍ਖਤ੍ਵਾਨ [ਪੁਰਕ੍ਖਿਤ੍ਵਾ ਮਂ (ਸ੍ਯਾ. ਕ.)] ਤਿਟ੍ਠਤਿ;

ਤਾਸਾਹਂ ਪਵਰਾ ਸੇਟ੍ਠਾ, ਵਣ੍ਣੇਨ ਯਸਸਾਯੁਨਾ.

੨੦੪. ‘‘ਪਹੂਤਕਤਕਲ੍ਯਾਣਾ, ਸਮ੍ਪਜਾਨਾ ਪਟਿਸ੍ਸਤਾ [ਪਤਿਸ੍ਸਤਾ (ਸੀ. ਸ੍ਯਾ.)];

ਮੁਨਿਂ ਕਾਰੁਣਿਕਂ ਲੋਕੇ, ਤਂ ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

੨੦੫. ਇਦਂ ਵਤ੍ਵਾਨ ਚਣ੍ਡਾਲੀ, ਕਤਞ੍ਞੂ ਕਤਵੇਦਿਨੀ;

ਵਨ੍ਦਿਤ੍ਵਾ ਅਰਹਤੋ ਪਾਦੇ, ਤਤ੍ਥੇਵਨ੍ਤਰਧਾਯਥਾਤਿ [ਤਤ੍ਥੇਵਨ੍ਤਰਧਾਯਤੀਤਿ (ਸ੍ਯਾ. ਕ.)].

ਚਣ੍ਡਾਲਿਵਿਮਾਨਂ ਚਤੁਤ੍ਥਂ.

੫. ਭਦ੍ਦਿਤ੍ਥਿਵਿਮਾਨਵਤ੍ਥੁ

੨੦੬. ‘‘ਨੀਲਾ ਪੀਤਾ ਚ ਕਾਲ਼ਾ ਚ, ਮਞ੍ਜਿਟ੍ਠਾ [ਮਞ੍ਜੇਟ੍ਠਾ (ਸੀ.), ਮਞ੍ਜਟ੍ਠਾ (ਪੀ.)] ਅਥ ਲੋਹਿਤਾ;

ਉਚ੍ਚਾਵਚਾਨਂ ਵਣ੍ਣਾਨਂ, ਕਿਞ੍ਜਕ੍ਖਪਰਿਵਾਰਿਤਾ.

੨੦੭. ‘‘ਮਨ੍ਦਾਰਵਾਨਂ ਪੁਪ੍ਫਾਨਂ, ਮਾਲਂ ਧਾਰੇਸਿ ਮੁਦ੍ਧਨਿ;

ਨਯਿਮੇ ਅਞ੍ਞੇਸੁ ਕਾਯੇਸੁ, ਰੁਕ੍ਖਾ ਸਨ੍ਤਿ ਸੁਮੇਧਸੇ.

੨੦੮. ‘‘ਕੇਨ ਕਾਯਂ ਉਪਪਨ੍ਨਾ, ਤਾਵਤਿਂਸਂ ਯਸਸ੍ਸਿਨੀ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੨੦੯. ‘‘ਭਦ੍ਦਿਤ੍ਥਿਕਾਤਿ [ਭਦ੍ਦਿਤ੍ਥੀਤਿ (ਸੀ.)] ਮਂ ਅਞ੍ਞਂਸੁ, ਕਿਮਿਲਾਯਂ ਉਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

੨੧੦. ‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੨੧੧. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੨੧੨. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ.

੨੧੩. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ.

੨੧੪. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਅਪ੍ਪਮਾਦਵਿਹਾਰਿਨੀ.

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ [ਕਤਾਵਕਾਸਾ ਕਤਕੁਸਲਾ (ਕ.)],

ਸਯਂ ਪਭਾ ਅਨੁਵਿਚਰਾਮਿ ਨਨ੍ਦਨਂ.

੨੧੫. ‘‘ਭਿਕ੍ਖੂ ਚਾਹਂ ਪਰਮਹਿਤਾਨੁਕਮ੍ਪਕੇ, ਅਭੋਜਯਿਂ ਤਪਸ੍ਸਿਯੁਗਂ ਮਹਾਮੁਨਿਂ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ [ਕਤਾਵਕਾਸਾ ਕਤਕੁਸਲਾ (ਕ.)], ਸਯਂ ਪਭਾ ਅਨੁਵਿਚਰਾਮਿ ਨਨ੍ਦਨਂ.

੨੧੬. ‘‘ਅਟ੍ਠਙ੍ਗਿਕਂ ਅਪਰਿਮਿਤਂ ਸੁਖਾਵਹਂ, ਉਪੋਸਥਂ ਸਤਤਮੁਪਾਵਸਿਂ ਅਹਂ;

ਕਤਾਵਾਸਾ ਕਤਕੁਸਲਾ ਤਤੋ ਚੁਤਾ [ਕਤਾਵਕਾਸਾ ਕਤਕੁਸਲਾ (ਕ.)], ਸਯਂ ਪਭਾ ਅਨੁਵਿਚਰਾਮਿ ਨਨ੍ਦਨ’’ਨ੍ਤਿ.

ਭਦ੍ਦਿਤ੍ਥਿਵਿਮਾਨਂ [ਭਦ੍ਦਿਤ੍ਥਿਕਾਵਿਮਾਨਂ (ਸ੍ਯਾ.)] ਪਞ੍ਚਮਂ.

੬. ਸੋਣਦਿਨ੍ਨਾਵਿਮਾਨਵਤ੍ਥੁ

੨੧੭. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੨੧੮. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੨੧੯. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੨੨੦. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੨੨੧. ‘‘ਸੋਣਦਿਨ੍ਨਾਤਿ ਮਂ ਅਞ੍ਞਂਸੁ, ਨਾਲ਼ਨ੍ਦਾਯਂ ਉਪਾਸਿਕਾ;

ਸਦ੍ਧਾ ਸੀਲੇਨ ਸਮ੍ਪਨ੍ਨਾ, ਸਂਵਿਭਾਗਰਤਾ ਸਦਾ.

੨੨੨. ‘‘ਅਚ੍ਛਾਦਨਞ੍ਚ ਭਤ੍ਤਞ੍ਚ, ਸੇਨਾਸਨਂ ਪਦੀਪਿਯਂ;

ਅਦਾਸਿਂ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ.

੨੨੩. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੨੨੪. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;