੪. ਚਣ੍ਡਾਲਿਵਿਮਾਨਵਤ੍ਥੁ

੧੯੫. ‘‘ਚਣ੍ਡਾਲਿ ਵਨ੍ਦ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ;

ਤਮੇਵ [ਤਵੇਵ (ਸੀ.)] ਅਨੁਕਮ੍ਪਾਯ, ਅਟ੍ਠਾਸਿ ਇਸਿਸਤ੍ਤਮੋ [ਇਸਿਸੁਤ੍ਤਮੋ (ਸੀ.)].

੧੯੬. ‘‘ਅਭਿਪ੍ਪਸਾਦੇਹਿ ਮਨਂ, ਅਰਹਨ੍ਤਮ੍ਹਿ ਤਾਦਿਨਿ [ਤਾਦਿਨੇ (ਸ੍ਯਾ. ਕ.)];

ਖਿਪ੍ਪਂ ਪਞ੍ਜਲਿਕਾ ਵਨ੍ਦ, ਪਰਿਤ੍ਤਂ ਤਵ ਜੀਵਿਤ’’ਨ੍ਤਿ.

੧੯੭. ਚੋਦਿਤਾ ਭਾਵਿਤਤ੍ਤੇਨ, ਸਰੀਰਨ੍ਤਿਮਧਾਰਿਨਾ;

ਚਣ੍ਡਾਲੀ ਵਨ੍ਦਿ ਪਾਦਾਨਿ, ਗੋਤਮਸ੍ਸ ਯਸਸ੍ਸਿਨੋ.

੧੯੮. ਤਮੇਨਂ ਅਵਧੀ ਗਾਵੀ, ਚਣ੍ਡਾਲਿਂ ਪਞ੍ਜਲਿਂ ਠਿਤਂ;

ਨਮਸ੍ਸਮਾਨਂ ਸਮ੍ਬੁਦ੍ਧਂ, ਅਨ੍ਧਕਾਰੇ ਪਭਙ੍ਕਰਨ੍ਤਿ.

੧੯੯. ‘‘ਖੀਣਾਸਵਂ ਵਿਗਤਰਜਂ ਅਨੇਜਂ, ਏਕਂ ਅਰਞ੍ਞਮ੍ਹਿ ਰਹੋ ਨਿਸਿਨ੍ਨਂ;

ਦੇਵਿਦ੍ਧਿਪਤ੍ਤਾ ਉਪਸਙ੍ਕਮਿਤ੍ਵਾ, ਵਨ੍ਦਾਮਿ ਤਂ ਵੀਰ ਮਹਾਨੁਭਾਵ’’ਨ੍ਤਿ.

੨੦੦. ‘‘ਸੁਵਣ੍ਣਵਣ੍ਣਾ ਜਲਿਤਾ ਮਹਾਯਸਾ, ਵਿਮਾਨਮੋਰੁਯ੍ਹ ਅਨੇਕਚਿਤ੍ਤਾ;

ਪਰਿਵਾਰਿਤਾ ਅਚ੍ਛਰਾਸਙ੍ਗਣੇਨ [ਅਚ੍ਛਰਾਨਂ ਗਣੇਨ (ਸੀ.)], ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮ’’ਨ੍ਤਿ.

੨੦੧. ‘‘ਅਹਂ ਭਦ੍ਦਨ੍ਤੇ ਚਣ੍ਡਾਲੀ, ਤਯਾ ਵੀਰੇਨ [ਥੇਰੇਨ (ਕ.)] ਪੇਸਿਤਾ;

ਵਨ੍ਦਿਂ ਅਰਹਤੋ ਪਾਦੇ, ਗੋਤਮਸ੍ਸ ਯਸਸ੍ਸਿਨੋ.

੨੦੨. ‘‘ਸਾਹਂ ਵਨ੍ਦਿਤ੍ਵਾ [ਵਨ੍ਦਿਤ੍ਵ (ਸੀ.)] ਪਾਦਾਨਿ, ਚੁਤਾ ਚਣ੍ਡਾਲਯੋਨਿਯਾ;

ਵਿਮਾਨਂ ਸਬ੍ਬਤੋ ਭਦ੍ਦਂ, ਉਪਪਨ੍ਨਮ੍ਹਿ ਨਨ੍ਦਨੇ.

੨੦੩. ‘‘ਅਚ੍ਛਰਾਨਂ ਸਤਸਹਸ੍ਸਂ, ਪੁਰਕ੍ਖਤ੍ਵਾਨ [ਪੁਰਕ੍ਖਿਤ੍ਵਾ ਮਂ (ਸ੍ਯਾ. ਕ.)] ਤਿਟ੍ਠਤਿ;

ਤਾਸਾਹਂ ਪਵਰਾ ਸੇਟ੍ਠਾ, ਵਣ੍ਣੇਨ ਯਸਸਾਯੁਨਾ.

੨੦੪. ‘‘ਪਹੂਤਕਤਕਲ੍ਯਾਣਾ, ਸਮ੍ਪਜਾਨਾ ਪਟਿਸ੍ਸਤਾ [ਪਤਿਸ੍ਸਤਾ (ਸੀ. ਸ੍ਯਾ.)];

ਮੁਨਿਂ ਕਾਰੁਣਿਕਂ ਲੋਕੇ, ਤਂ ਭਨ੍ਤੇ ਵਨ੍ਦਿਤੁਮਾਗਤਾ’’ਤਿ.

੨੦੫. ਇਦਂ ਵਤ੍ਵਾਨ ਚਣ੍ਡਾਲੀ, ਕਤਞ੍ਞੂ ਕਤਵੇਦਿਨੀ;

ਵਨ੍ਦਿਤ੍ਵਾ ਅਰਹਤੋ ਪਾਦੇ, ਤਤ੍ਥੇਵਨ੍ਤਰਧਾਯਥਾਤਿ [ਤਤ੍ਥੇਵਨ੍ਤਰਧਾਯਤੀਤਿ (ਸ੍ਯਾ. ਕ.)].

ਚਣ੍ਡਾਲਿਵਿਮਾਨਂ ਚਤੁਤ੍ਥਂ.