੧੭. ਕੇਸਕਾਰੀਵਿਮਾਨਵਤ੍ਥੁ

੧੫੦. ‘‘ਇਦਂ ਵਿਮਾਨਂ ਰੁਚਿਰਂ ਪਭਸ੍ਸਰਂ, ਵੇਲ਼ੁਰਿਯਥਮ੍ਭਂ ਸਤਤਂ ਸੁਨਿਮ੍ਮਿਤਂ;

ਸੁਵਣ੍ਣਰੁਕ੍ਖੇਹਿ ਸਮਨ੍ਤਮੋਤ੍ਥਤਂ, ਠਾਨਂ ਮਮਂ ਕਮ੍ਮਵਿਪਾਕਸਮ੍ਭਵਂ.

੧੫੧. ‘‘ਤਤ੍ਰੂਪਪਨ੍ਨਾ ਪੁਰਿਮਚ੍ਛਰਾ ਇਮਾ, ਸਤਂ ਸਹਸ੍ਸਾਨਿ ਸਕੇਨ ਕਮ੍ਮੁਨਾ;

ਤੁਵਂਸਿ ਅਜ੍ਝੁਪਗਤਾ ਯਸਸ੍ਸਿਨੀ, ਓਭਾਸਯਂ ਤਿਟ੍ਠਸਿ ਪੁਬ੍ਬਦੇਵਤਾ.

੧੫੨. ‘‘ਸਸੀ ਅਧਿਗ੍ਗਯ੍ਹ ਯਥਾ ਵਿਰੋਚਤਿ, ਨਕ੍ਖਤ੍ਤਰਾਜਾਰਿਵ ਤਾਰਕਾਗਣਂ;

ਤਥੇਵ ਤ੍ਵਂ ਅਚ੍ਛਰਾਸਙ੍ਗਣਂ [ਅਚ੍ਛਰਾਸਙ੍ਗਮਂ (ਸੀ.)] ਇਮਂ, ਦਦ੍ਦਲ੍ਲਮਾਨਾ ਯਸਸਾ ਵਿਰੋਚਸਿ.

੧੫੩. ‘‘ਕੁਤੋ ਨੁ ਆਗਮ੍ਮ ਅਨੋਮਦਸ੍ਸਨੇ, ਉਪਪਨ੍ਨਾ ਤ੍ਵਂ ਭਵਨਂ ਮਮਂ ਇਦਂ;

ਬ੍ਰਹ੍ਮਂਵ ਦੇਵਾ ਤਿਦਸਾ ਸਹਿਨ੍ਦਕਾ, ਸਬ੍ਬੇ ਨ ਤਪ੍ਪਾਮਸੇ ਦਸ੍ਸਨੇਨ ਤ’’ਨ੍ਤਿ.

੧੫੪. ‘‘ਯਮੇਤਂ ਸਕ੍ਕ ਅਨੁਪੁਚ੍ਛਸੇ ਮਮਂ, ‘ਕੁਤੋ ਚੁਤਾ ਤ੍ਵਂ ਇਧ ਆਗਤਾ’ਤਿ [ਕੁਤੋ ਚੁਤਾ ਇਧ ਆਗਤਾ ਤੁਵਂ (ਸ੍ਯਾ.), ਕੁਤੋ ਚੁਤਾਯ ਆਗਤਿ ਤਵ (ਪੀ.)];

ਬਾਰਾਣਸੀ ਨਾਮ ਪੁਰਤ੍ਥਿ ਕਾਸਿਨਂ, ਤਤ੍ਥ ਅਹੋਸਿਂ ਪੁਰੇ ਕੇਸਕਾਰਿਕਾ.

੧੫੫. ‘‘ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨਮਾਨਸਾ, ਸਙ੍ਘੇ ਚ ਏਕਨ੍ਤਗਤਾ ਅਸਂਸਯਾ;

ਅਖਣ੍ਡਸਿਕ੍ਖਾਪਦਾ ਆਗਤਪ੍ਫਲਾ, ਸਮ੍ਬੋਧਿਧਮ੍ਮੇ ਨਿਯਤਾ ਅਨਾਮਯਾ’’ਤਿ.

੧੫੬. ‘‘ਤਨ੍ਤ੍ਯਾਭਿਨਨ੍ਦਾਮਸੇ ਸ੍ਵਾਗਤਞ੍ਚ [ਸਾਗਤਞ੍ਚ (ਸੀ.)] ਤੇ, ਧਮ੍ਮੇਨ ਚ ਤ੍ਵਂ ਯਸਸਾ ਵਿਰੋਚਸਿ;

ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨਮਾਨਸੇ, ਸਙ੍ਘੇ ਚ ਏਕਨ੍ਤਗਤੇ ਅਸਂਸਯੇ;

ਅਖਣ੍ਡਸਿਕ੍ਖਾਪਦੇ ਆਗਤਪ੍ਫਲੇ, ਸਮ੍ਬੋਧਿਧਮ੍ਮੇ ਨਿਯਤੇ ਅਨਾਮਯੇ’’ਤਿ.

ਕੇਸਕਾਰੀਵਿਮਾਨਂ ਸਤ੍ਤਰਸਮਂ.

ਪੀਠਵਗ੍ਗੋ ਪਠਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਪਞ੍ਚ ਪੀਠਾ ਤਯੋ ਨਾਵਾ, ਦੀਪਤਿਲਦਕ੍ਖਿਣਾ ਦ੍ਵੇ;

ਪਤਿ ਦ੍ਵੇ ਸੁਣਿਸਾ ਉਤ੍ਤਰਾ, ਸਿਰਿਮਾ ਕੇਸਕਾਰਿਕਾ;

ਵਗ੍ਗੋ ਤੇਨ ਪਵੁਚ੍ਚਤੀਤਿ.