੧੬. ਸਿਰਿਮਾਵਿਮਾਨਵਤ੍ਥੁ

੧੩੭. ‘‘ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾ, ਅਧੋਮੁਖਾ ਅਘਸਿਗਮਾ ਬਲੀ ਜਵਾ;

ਅਭਿਨਿਮ੍ਮਿਤਾ ਪਞ੍ਚਰਥਾਸਤਾ ਚ ਤੇ, ਅਨ੍ਵੇਨ੍ਤਿ ਤਂ ਸਾਰਥਿਚੋਦਿਤਾ ਹਯਾ.

੧੩੮. ‘‘ਸਾ ਤਿਟ੍ਠਸਿ ਰਥਵਰੇ ਅਲਙ੍ਕਤਾ, ਓਭਾਸਯਂ ਜਲਮਿਵ ਜੋਤਿ ਪਾਵਕੋ;

ਪੁਚ੍ਛਾਮਿ ਤਂ ਵਰਤਨੁ [ਵਰਚਾਰੁ (ਕਤ੍ਥਚਿ)] ਅਨੋਮਦਸ੍ਸਨੇ, ਕਸ੍ਮਾ ਨੁ ਕਾਯਾ ਅਨਧਿਵਰਂ ਉਪਾਗਮਿ.

੧੩੯. ‘‘ਕਾਮਗ੍ਗਪਤ੍ਤਾਨਂ ਯਮਾਹੁਨੁਤ੍ਤਰਂ [… ਨੁਤ੍ਤਰਾ (ਕ.), ਅਨੁਤ੍ਤਰਾ (ਸ੍ਯਾ.)], ਨਿਮ੍ਮਾਯ ਨਿਮ੍ਮਾਯ ਰਮਨ੍ਤਿ ਦੇਵਤਾ;

ਤਸ੍ਮਾ ਕਾਯਾ ਅਚ੍ਛਰਾ ਕਾਮਵਣ੍ਣਿਨੀ, ਇਧਾਗਤਾ ਅਨਧਿਵਰਂ ਨਮਸ੍ਸਿਤੁਂ.

੧੪੦. ‘‘ਕਿਂ ਤ੍ਵਂ ਪੁਰੇ ਸੁਚਰਿਤਮਾਚਰੀਧ [ਸੁਚਰਿਤਂ ਅਚਾਰਿਧ (ਪੀ.)],

ਕੇਨਚ੍ਛਸਿ ਤ੍ਵਂ ਅਮਿਤਯਸਾ ਸੁਖੇਧਿਤਾ;

ਇਦ੍ਧੀ ਚ ਤੇ ਅਨਧਿਵਰਾ ਵਿਹਙ੍ਗਮਾ,

ਵਣ੍ਣੋ ਚ ਤੇ ਦਸ ਦਿਸਾ ਵਿਰੋਚਤਿ.

੧੪੧. ‘‘ਦੇਵੇਹਿ ਤ੍ਵਂ ਪਰਿਵੁਤਾ ਸਕ੍ਕਤਾ ਚਸਿ,

ਕੁਤੋ ਚੁਤਾ ਸੁਗਤਿਗਤਾਸਿ ਦੇਵਤੇ;

ਕਸ੍ਸ ਵਾ ਤ੍ਵਂ ਵਚਨਕਰਾਨੁਸਾਸਨਿਂ,

ਆਚਿਕ੍ਖ ਮੇ ਤ੍ਵਂ ਯਦਿ ਬੁਦ੍ਧਸਾਵਿਕਾ’’ਤਿ.

੧੪੨. ‘‘ਨਗਨ੍ਤਰੇ ਨਗਰਵਰੇ ਸੁਮਾਪਿਤੇ, ਪਰਿਚਾਰਿਕਾ ਰਾਜਵਰਸ੍ਸ ਸਿਰਿਮਤੋ;

ਨਚ੍ਚੇ ਗੀਤੇ ਪਰਮਸੁਸਿਕ੍ਖਿਤਾ ਅਹੁਂ, ਸਿਰਿਮਾਤਿ ਮਂ ਰਾਜਗਹੇ ਅਵੇਦਿਂਸੁ [ਅਵੇਦਿਸੁਂ (?)].

੧੪੩. ‘‘ਬੁਦ੍ਧੋ ਚ ਮੇ ਇਸਿਨਿਸਭੋ ਵਿਨਾਯਕੋ, ਅਦੇਸਯੀ ਸਮੁਦਯਦੁਕ੍ਖਨਿਚ੍ਚਤਂ;

ਅਸਙ੍ਖਤਂ ਦੁਕ੍ਖਨਿਰੋਧਸਸ੍ਸਤਂ, ਮਗ੍ਗਞ੍ਚਿਮਂ ਅਕੁਟਿਲਮਞ੍ਜਸਂ ਸਿਵਂ.

੧੪੪. ‘‘ਸੁਤ੍ਵਾਨਹਂ ਅਮਤਪਦਂ ਅਸਙ੍ਖਤਂ, ਤਥਾਗਤਸ੍ਸਨਧਿਵਰਸ੍ਸ ਸਾਸਨਂ;

ਸੀਲੇਸ੍ਵਹਂ ਪਰਮਸੁਸਂਵੁਤਾ ਅਹੁਂ, ਧਮ੍ਮੇ ਠਿਤਾ ਨਰਵਰਬੁਦ੍ਧਦੇਸਿਤੇ [ਭਾਸਿਤੇ (ਸੀ.)].

੧੪੫. ‘‘ਞਤ੍ਵਾਨਹਂ ਵਿਰਜਪਦਂ ਅਸਙ੍ਖਤਂ, ਤਥਾਗਤੇਨਨਧਿਵਰੇਨ ਦੇਸਿਤਂ;

ਤਤ੍ਥੇਵਹਂ ਸਮਥਸਮਾਧਿਮਾਫੁਸਿਂ, ਸਾਯੇਵ ਮੇ ਪਰਮਨਿਯਾਮਤਾ ਅਹੁ.

੧੪੬. ‘‘ਲਦ੍ਧਾਨਹਂ ਅਮਤਵਰਂ ਵਿਸੇਸਨਂ, ਏਕਂਸਿਕਾ ਅਭਿਸਮਯੇ ਵਿਸੇਸਿਯ;

ਅਸਂਸਯਾ ਬਹੁਜਨਪੂਜਿਤਾ ਅਹਂ, ਖਿਡ੍ਡਾਰਤਿਂ [ਖਿਡ੍ਡਂ ਰਤਿਂ (ਸ੍ਯਾ. ਪੀ.)] ਪਚ੍ਚਨੁਭੋਮਨਪ੍ਪਕਂ.

੧੪੭. ‘‘ਏਵਂ ਅਹਂ ਅਮਤਦਸਮ੍ਹਿ [ਅਮਤਰਸਮ੍ਹਿ (ਕ.)] ਦੇਵਤਾ, ਤਥਾਗਤਸ੍ਸਨਧਿਵਰਸ੍ਸ ਸਾਵਿਕਾ;

ਧਮ੍ਮਦ੍ਦਸਾ ਪਠਮਫਲੇ ਪਤਿਟ੍ਠਿਤਾ, ਸੋਤਾਪਨ੍ਨਾ ਨ ਚ ਪਨ ਮਤ੍ਥਿ ਦੁਗ੍ਗਤਿ.

੧੪੮. ‘‘ਸਾ ਵਨ੍ਦਿਤੁਂ ਅਨਧਿਵਰਂ ਉਪਾਗਮਿਂ, ਪਾਸਾਦਿਕੇ ਕੁਸਲਰਤੇ ਚ ਭਿਕ੍ਖਵੋ;

ਨਮਸ੍ਸਿਤੁਂ ਸਮਣਸਮਾਗਮਂ ਸਿਵਂ, ਸਗਾਰਵਾ ਸਿਰਿਮਤੋ ਧਮ੍ਮਰਾਜਿਨੋ.

੧੪੯. ‘‘ਦਿਸ੍ਵਾ ਮੁਨਿਂ ਮੁਦਿਤਮਨਮ੍ਹਿ ਪੀਣਿਤਾ, ਤਥਾਗਤਂ ਨਰਵਰਦਮ੍ਮਸਾਰਥਿਂ;

ਤਣ੍ਹਚ੍ਛਿਦਂ ਕੁਸਲਰਤਂ ਵਿਨਾਯਕਂ, ਵਨ੍ਦਾਮਹਂ ਪਰਮਹਿਤਾਨੁਕਮ੍ਪਕ’’ਨ੍ਤਿ.

ਸਿਰਿਮਾਵਿਮਾਨਂ ਸੋਲ਼ਸਮਂ.