੧੫. ਉਤ੍ਤਰਾਵਿਮਾਨਵਤ੍ਥੁ

੧੨੪. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੨੫. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੨੬. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੨੭. ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ.

੧੨੮. ‘‘ਇਸ੍ਸਾ ਚ ਮਚ੍ਛੇਰਮਥੋ [ਮਚ੍ਛਰਿਯਮਥੋ ਚ (ਕ.)] ਪਲ਼ਾਸੋ, ਨਾਹੋਸਿ ਮਯ੍ਹਂ ਘਰਮਾਵਸਨ੍ਤਿਯਾ;

ਅਕ੍ਕੋਧਨਾ ਭਤ੍ਤੁਵਸਾਨੁਵਤ੍ਤਿਨੀ, ਉਪੋਸਥੇ ਨਿਚ੍ਚਹਮਪ੍ਪਮਤ੍ਤਾ.

੧੨੯. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ [ਯਾਵ (ਸੀ. ਅਟ੍ਠ., ਕ. ਅਟ੍ਠ.) ਥੇਰੀਗਾਥਾਅਟ੍ਠਕਥਾ ਪਸ੍ਸਿਤਬ੍ਬਾ] ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੧੩੦. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਸਞ੍ਞਮਾ ਸਂਵਿਭਾਗਾ ਚ, ਵਿਮਾਨਂ ਆਵਸਾਮਹਂ [ਆਵਸਾਮਿਮਂ (ਸੀ. ਅਟ੍ਠ., ਕ.) ਪਰਤੋ ਪਨ ਸਬ੍ਬਤ੍ਥਪਿ ‘‘ਆਵਸਾਮਹਂ’’ ਇਚ੍ਚੇਵ ਦਿਸ੍ਸਤਿ].

੧੩੧. ‘‘ਪਾਣਾਤਿਪਾਤਾ ਵਿਰਤਾ, ਮੁਸਾਵਾਦਾ ਚ ਸਞ੍ਞਤਾ;

ਥੇਯ੍ਯਾ ਚ ਅਤਿਚਾਰਾ ਚ, ਮਜ੍ਜਪਾਨਾ ਚ ਆਰਕਾ [ਆਰਤਾ (?)].

੧੩੨. ‘‘ਪਞ੍ਚਸਿਕ੍ਖਾਪਦੇ ਰਤਾ, ਅਰਿਯਸਚ੍ਚਾਨ ਕੋਵਿਦਾ;

ਉਪਾਸਿਕਾ ਚਕ੍ਖੁਮਤੋ, ਗੋਤਮਸ੍ਸ ਯਸਸ੍ਸਿਨੋ.

੧੩੩. ‘‘ਸਾਹਂ ਸਕੇਨ ਸੀਲੇਨ, ਯਸਸਾ ਚ ਯਸਸ੍ਸਿਨੀ;

ਅਨੁਭੋਮਿ ਸਕਂ ਪੁਞ੍ਞਂ, ਸੁਖਿਤਾ ਚਮ੍ਹਿਨਾਮਯਾ.

੧੩੪. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੩੫. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਹਂ ਅਕਾਸਿਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀਤਿ.

੧੩੬. ‘‘ਮਮ ਚ, ਭਨ੍ਤੇ, ਵਚਨੇਨ ਭਗਵਤੋ ਪਾਦੇ ਸਿਰਸਾ ਵਨ੍ਦੇਯ੍ਯਾਸਿ – ‘ਉਤ੍ਤਰਾ ਨਾਮ, ਭਨ੍ਤੇ, ਉਪਾਸਿਕਾ ਭਗਵਤੋ ਪਾਦੇ ਸਿਰਸਾ ਵਨ੍ਦਤੀ’ਤਿ. ਅਨਚ੍ਛਰਿਯਂ ਖੋ ਪਨੇਤਂ, ਭਨ੍ਤੇ, ਯਂ ਮਂ ਭਗਵਾ ਅਞ੍ਞਤਰਸ੍ਮਿਂ ਸਾਮਞ੍ਞਫਲੇ ਬ੍ਯਾਕਰੇਯ੍ਯ [ਬ੍ਯਾਕਰੇਯ੍ਯਾਤਿ (?)], ਤਂ ਭਗਵਾ ਸਕਦਾਗਾਮਿਫਲੇ ਬ੍ਯਾਕਾਸੀ’’ਤਿ.

ਉਤ੍ਤਰਾਵਿਮਾਨਂ ਪਨ੍ਨਰਸਮਂ.