੨. ਵਾਸੇਟ੍ਠੀਥੇਰੀਗਾਥਾ

੧੩੩. ‘‘ਪੁਤ੍ਤਸੋਕੇਨਹਂ ਅਟ੍ਟਾ, ਖਿਤ੍ਤਚਿਤ੍ਤਾ ਵਿਸਞ੍ਞਿਨੀ;

ਨਗ੍ਗਾ ਪਕਿਣ੍ਣਕੇਸੀ ਚ, ਤੇਨ ਤੇਨ ਵਿਚਾਰਿਹਂ.

੧੩੪. ‘‘ਵੀਥਿ [ਵਸਿਂ (ਸੀ.)] ਸਙ੍ਕਾਰਕੂਟੇਸੁ, ਸੁਸਾਨੇ ਰਥਿਯਾਸੁ ਚ;

ਅਚਰਿਂ ਤੀਣਿ ਵਸ੍ਸਾਨਿ, ਖੁਪ੍ਪਿਪਾਸਾਸਮਪ੍ਪਿਤਾ.

੧੩੫. ‘‘ਅਥਦ੍ਦਸਾਸਿਂ ਸੁਗਤਂ, ਨਗਰਂ ਮਿਥਿਲਂ ਪਤਿ [ਗਤਂ (ਕ.)];

ਅਦਨ੍ਤਾਨਂ ਦਮੇਤਾਰਂ, ਸਮ੍ਬੁਦ੍ਧਮਕੁਤੋਭਯਂ.

੧੩੬. ‘‘ਸਚਿਤ੍ਤਂ ਪਟਿਲਦ੍ਧਾਨ, ਵਨ੍ਦਿਤ੍ਵਾਨ ਉਪਾਵਿਸਿਂ;

ਸੋ ਮੇ ਧਮ੍ਮਮਦੇਸੇਸਿ, ਅਨੁਕਮ੍ਪਾਯ ਗੋਤਮੋ.

੧੩੭. ‘‘ਤਸ੍ਸ ਧਮ੍ਮਂ ਸੁਣਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਯੁਞ੍ਜਨ੍ਤੀ ਸਤ੍ਥੁਵਚਨੇ, ਸਚ੍ਛਾਕਾਸਿਂ ਪਦਂ ਸਿਵਂ.

੧੩੮. ‘‘ਸਬ੍ਬੇ ਸੋਕਾ ਸਮੁਚ੍ਛਿਨ੍ਨਾ, ਪਹੀਨਾ ਏਤਦਨ੍ਤਿਕਾ;

ਪਰਿਞ੍ਞਾਤਾ ਹਿ ਮੇ ਵਤ੍ਥੂ, ਯਤੋ ਸੋਕਾਨ ਸਮ੍ਭਵੋ’’ਤਿ.

… ਵਾਸੇਟ੍ਠੀ ਥੇਰੀ….