੬. ਮਿਤ੍ਤਾਕਾਲ਼ੀਥੇਰੀਗਾਥਾ

੯੨. ‘‘ਸਦ੍ਧਾਯ ਪਬ੍ਬਜਿਤ੍ਵਾਨ, ਅਗਾਰਸ੍ਮਾਨਗਾਰਿਯਂ;

ਵਿਚਰਿਂਹਂ ਤੇਨ ਤੇਨ, ਲਾਭਸਕ੍ਕਾਰਉਸ੍ਸੁਕਾ.

੯੩. ‘‘ਰਿਞ੍ਚਿਤ੍ਵਾ ਪਰਮਂ ਅਤ੍ਥਂ, ਹੀਨਮਤ੍ਥਂ ਅਸੇਵਿਹਂ;

ਕਿਲੇਸਾਨਂ ਵਸਂ ਗਨ੍ਤ੍ਵਾ, ਸਾਮਞ੍ਞਤ੍ਥਂ ਨ ਬੁਜ੍ਝਿਹਂ.

੯੪. ‘‘ਤਸ੍ਸਾ ਮੇ ਅਹੁ ਸਂਵੇਗੋ, ਨਿਸਿਨ੍ਨਾਯ ਵਿਹਾਰਕੇ;

ਉਮ੍ਮਗ੍ਗਪਟਿਪਨ੍ਨਾਮ੍ਹਿ, ਤਣ੍ਹਾਯ ਵਸਮਾਗਤਾ.

੯੫. ‘‘ਅਪ੍ਪਕਂ ਜੀਵਿਤਂ ਮਯ੍ਹਂ, ਜਰਾ ਬ੍ਯਾਧਿ ਚ ਮਦ੍ਦਤਿ;

ਪੁਰਾਯਂ ਭਿਜ੍ਜਤਿ [ਜਰਾਯ ਭਿਜ੍ਜਤੇ (ਸੀ.)] ਕਾਯੋ, ਨ ਮੇ ਕਾਲੋ ਪਮਜ੍ਜਿਤੁਂ.

੯੬. ‘‘ਯਥਾਭੂਤਮਵੇਕ੍ਖਨ੍ਤੀ, ਖਨ੍ਧਾਨਂ ਉਦਯਬ੍ਬਯਂ;

ਵਿਮੁਤ੍ਤਚਿਤ੍ਤਾ ਉਟ੍ਠਾਸਿਂ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਮਿਤ੍ਤਾ ਕਾਲ਼ੀ ਥੇਰੀ….