੨. ਦੁਕਨਿਪਾਤੋ

੧. ਅਭਿਰੂਪਨਨ੍ਦਾਥੇਰੀਗਾਥਾ

੧੯. [ਅਪ. ਥੇਰੀ ੨.੪.੧੫੭ ਅਪਦਾਨੇਪਿ] ‘‘ਆਤੁਰਂ ਅਸੁਚਿਂ ਪੂਤਿਂ, ਪਸ੍ਸ ਨਨ੍ਦੇ ਸਮੁਸ੍ਸਯਂ;

ਅਸੁਭਾਯ ਚਿਤ੍ਤਂ ਭਾਵੇਹਿ, ਏਕਗ੍ਗਂ ਸੁਸਮਾਹਿਤਂ.

੨੦. ‘‘ਅਨਿਮਿਤ੍ਤਞ੍ਚ ਭਾਵੇਹਿ, ਮਾਨਾਨੁਸਯਮੁਜ੍ਜਹ;

ਤਤੋ ਮਾਨਾਭਿਸਮਯਾ, ਉਪਸਨ੍ਤਾ ਚਰਿਸ੍ਸਸੀ’’ਤਿ.

ਇਤ੍ਥਂ ਸੁਦਂ ਭਗਵਾ ਅਭਿਰੂਪਨਨ੍ਦਂ ਸਿਕ੍ਖਮਾਨਂ ਇਮਾਹਿ ਗਾਥਾਹਿ ਅਭਿਣ੍ਹਂ ਓਵਦਤੀਤਿ [ਇਤ੍ਥਂ ਸੁਦਂ ਭਗਵਾ ਅਭਿਰੂਪਨਨ੍ਦਂ ਸਿਕ੍ਖਮਾਨਂ ਇਮਾਹਿ ਗਾਥਾਹਿ ਅਭਿਣ੍ਹਂ ਓਵਦਤੀਤਿ (ਕ.)].

੨. ਜੇਨ੍ਤਾਥੇਰੀਗਾਥਾ

੨੧. ‘‘ਯੇ ਇਮੇ ਸਤ੍ਤ ਬੋਜ੍ਝਙ੍ਗਾ, ਮਗ੍ਗਾ ਨਿਬ੍ਬਾਨਪਤ੍ਤਿਯਾ;

ਭਾਵਿਤਾ ਤੇ ਮਯਾ ਸਬ੍ਬੇ, ਯਥਾ ਬੁਦ੍ਧੇਨ ਦੇਸਿਤਾ.

੨੨. ‘‘ਦਿਟ੍ਠੋ ਹਿ ਮੇ ਸੋ ਭਗਵਾ, ਅਨ੍ਤਿਮੋਯਂ ਸਮੁਸ੍ਸਯੋ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

ਇਤ੍ਥਂ ਸੁਦਂ ਜੇਨ੍ਤਾ ਥੇਰੀ ਗਾਥਾਯੋ ਅਭਾਸਿਤ੍ਥਾਤਿ.

੩. ਸੁਮਙ੍ਗਲਮਾਤਾਥੇਰੀਗਾਥਾ

੨੩. ‘‘ਸੁਮੁਤ੍ਤਿਕਾ ਸੁਮੁਤ੍ਤਿਕਾ [ਸੁਮੁਤ੍ਤਿਕੇ ਸੁਮੁਤ੍ਤਿਕੇ (ਸੀ.), ਸੁਮੁਤ੍ਤਿਕੇ ਸੁਮੁਤ੍ਤਿਕਾ (ਸ੍ਯਾ. ਕ.)], ਸਾਧੁਮੁਤ੍ਤਿਕਾਮ੍ਹਿ ਮੁਸਲਸ੍ਸ;

ਅਹਿਰਿਕੋ ਮੇ ਛਤ੍ਤਕਂ ਵਾਪਿ, ਉਕ੍ਖਲਿਕਾ ਮੇ ਦੇਡ੍ਡੁਭਂ ਵਾਤਿ.

੨੪. ‘‘ਰਾਗਞ੍ਚ ਅਹਂ ਦੋਸਞ੍ਚ, ਚਿਚ੍ਚਿਟਿ ਚਿਚ੍ਚਿਟੀਤਿ ਵਿਹਨਾਮਿ;

ਸਾ ਰੁਕ੍ਖਮੂਲਮੁਪਗਮ੍ਮ, ਅਹੋ ਸੁਖਨ੍ਤਿ ਸੁਖਤੋ ਝਾਯਾਮੀ’’ਤਿ.

… ਸੁਮਙ੍ਗਲਮਾਤਾ ਥੇਰੀ [ਅਞ੍ਞਤਰਾ ਥੇਰੀ ਭਿਕ੍ਖੁਨੀ ਅਪਞ੍ਞਾਤਾ (ਸ੍ਯਾ. ਕ.)].

੪. ਅਡ੍ਢਕਾਸਿਥੇਰੀਗਾਥਾ

੨੫. ‘‘ਯਾਵ ਕਾਸਿਜਨਪਦੋ, ਸੁਙ੍ਕੋ ਮੇ ਤਤ੍ਥਕੋ ਅਹੁ;

ਤਂ ਕਤ੍ਵਾ ਨੇਗਮੋ ਅਗ੍ਘਂ, ਅਡ੍ਢੇਨਗ੍ਘਂ ਠਪੇਸਿ ਮਂ.

੨੬. ‘‘ਅਥ ਨਿਬ੍ਬਿਨ੍ਦਹਂ ਰੂਪੇ, ਨਿਬ੍ਬਿਨ੍ਦਞ੍ਚ ਵਿਰਜ੍ਜਹਂ;

ਮਾ ਪੁਨ ਜਾਤਿਸਂਸਾਰਂ, ਸਨ੍ਧਾਵੇਯ੍ਯਂ ਪੁਨਪ੍ਪੁਨਂ;

ਤਿਸ੍ਸੋ ਵਿਜ੍ਜਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਅਡ੍ਢਕਾਸਿ ਥੇਰੀ….

੫. ਚਿਤ੍ਤਾਥੇਰੀਗਾਥਾ

੨੭. ‘‘ਕਿਞ੍ਚਾਪਿ ਖੋਮ੍ਹਿ ਕਿਸਿਕਾ, ਗਿਲਾਨਾ ਬਾਲ਼੍ਹਦੁਬ੍ਬਲਾ;

ਦਣ੍ਡਮੋਲੁਬ੍ਭ ਗਚ੍ਛਾਮਿ, ਪਬ੍ਬਤਂ ਅਭਿਰੂਹਿਯ.

੨੮. ‘‘ਸਙ੍ਘਾਟਿਂ ਨਿਕ੍ਖਿਪਿਤ੍ਵਾਨ, ਪਤ੍ਤਕਞ੍ਚ ਨਿਕੁਜ੍ਜਿਯ;

ਸੇਲੇ ਖਮ੍ਭੇਸਿਮਤ੍ਤਾਨਂ, ਤਮੋਖਨ੍ਧਂ ਪਦਾਲਿਯਾ’’ਤਿ.

… ਚਿਤ੍ਤਾ ਥੇਰੀ….

੬. ਮੇਤ੍ਤਿਕਾਥੇਰੀਗਾਥਾ

੨੯. ‘‘ਕਿਞ੍ਚਾਪਿ ਖੋਮ੍ਹਿ ਦੁਕ੍ਖਿਤਾ, ਦੁਬ੍ਬਲਾ ਗਤਯੋਬ੍ਬਨਾ;

ਦਣ੍ਡਮੋਲੁਬ੍ਭ ਗਚ੍ਛਾਮਿ, ਪਬ੍ਬਤਂ ਅਭਿਰੂਹਿਯ.

੩੦. ‘‘ਨਿਕ੍ਖਿਪਿਤ੍ਵਾਨ ਸਙ੍ਘਾਟਿਂ, ਪਤ੍ਤਕਞ੍ਚ ਨਿਕੁਜ੍ਜਿਯ;

ਨਿਸਿਨ੍ਨਾ ਚਮ੍ਹਿ ਸੇਲਮ੍ਹਿ, ਅਥ ਚਿਤ੍ਤਂ ਵਿਮੁਚ੍ਚਿ ਮੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਮੇਤ੍ਤਿਕਾ ਥੇਰੀ….

੭. ਮਿਤ੍ਤਾਥੇਰੀਗਾਥਾ

੩੧. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੩੨. ‘‘ਉਪੋਸਥਂ ਉਪਾਗਚ੍ਛਿਂ, ਦੇਵਕਾਯਾਭਿਨਨ੍ਦਿਨੀ;

ਸਾਜ੍ਜ ਏਕੇਨ ਭਤ੍ਤੇਨ, ਮੁਣ੍ਡਾ ਸਙ੍ਘਾਟਿਪਾਰੁਤਾ;

ਦੇਵਕਾਯਂ ਨ ਪਤ੍ਥੇਹਂ, ਵਿਨੇਯ੍ਯ ਹਦਯੇ ਦਰ’’ਨ੍ਤਿ.

… ਮਿਤ੍ਤਾ ਥੇਰੀ….

੮. ਅਭਯਮਾਤੁਥੇਰੀਗਾਥਾ

੩੩. ‘‘ਉਦ੍ਧਂ ਪਾਦਤਲਾ ਅਮ੍ਮ, ਅਧੋ ਵੇ ਕੇਸਮਤ੍ਥਕਾ;

ਪਚ੍ਚਵੇਕ੍ਖਸ੍ਸੁਮਂ ਕਾਯਂ, ਅਸੁਚਿਂ ਪੂਤਿਗਨ੍ਧਿਕਂ.

੩੪. ‘‘ਏਵਂ ਵਿਹਰਮਾਨਾਯ, ਸਬ੍ਬੋ ਰਾਗੋ ਸਮੂਹਤੋ;

ਪਰਿਲ਼ਾਹੋ ਸਮੁਚ੍ਛਿਨ੍ਨੋ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ.

… ਅਭਯਮਾਤੁ ਥੇਰੀ….

੯. ਅਭਯਾਥੇਰੀਗਾਥਾ

੩੫. ‘‘ਅਭਯੇ ਭਿਦੁਰੋ ਕਾਯੋ, ਯਤ੍ਥ ਸਤਾ ਪੁਥੁਜ੍ਜਨਾ;

ਨਿਕ੍ਖਿਪਿਸ੍ਸਾਮਿਮਂ ਦੇਹਂ, ਸਮ੍ਪਜਾਨਾ ਸਤੀਮਤੀ.

੩੬. ‘‘ਬਹੂਹਿ ਦੁਕ੍ਖਧਮ੍ਮੇਹਿ, ਅਪ੍ਪਮਾਦਰਤਾਯ ਮੇ;

ਤਣ੍ਹਕ੍ਖਯੋ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਅਭਯਾ ਥੇਰੀ….

੧੦. ਸਾਮਾਥੇਰੀਗਾਥਾ

੩੭. ‘‘ਚਤੁਕ੍ਖਤ੍ਤੁਂ ਪਞ੍ਚਕ੍ਖਤ੍ਤੁਂ, ਵਿਹਾਰਾ ਉਪਨਿਕ੍ਖਮਿਂ;

ਅਲਦ੍ਧਾ ਚੇਤਸੋ ਸਨ੍ਤਿਂ, ਚਿਤ੍ਤੇ ਅਵਸਵਤ੍ਤਿਨੀ;

ਤਸ੍ਸਾ ਮੇ ਅਟ੍ਠਮੀ ਰਤ੍ਤਿ, ਯਤੋ ਤਣ੍ਹਾ ਸਮੂਹਤਾ.

੩੮. ‘‘ਬਹੂਹਿ ਦੁਕ੍ਖਧਮ੍ਮੇਹਿ, ਅਪ੍ਪਮਾਦਰਤਾਯ ਮੇ;

ਤਣ੍ਹਕ੍ਖਯੋ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਸਾਮਾ ਥੇਰੀ….

ਦੁਕਨਿਪਾਤੋ ਨਿਟ੍ਠਿਤੋ.