੩. ਤਿਕਨਿਪਾਤੋ

੧. ਅਪਰਾਸਾਮਾਥੇਰੀਗਾਥਾ

੩੯. ‘‘ਪਣ੍ਣਵੀਸਤਿਵਸ੍ਸਾਨਿ, ਯਤੋ ਪਬ੍ਬਜਿਤਾਯ ਮੇ;

ਨਾਭਿਜਾਨਾਮਿ ਚਿਤ੍ਤਸ੍ਸ, ਸਮਂ ਲਦ੍ਧਂ ਕੁਦਾਚਨਂ.

੪੦. ‘‘ਅਲਦ੍ਧਾ ਚੇਤਸੋ ਸਨ੍ਤਿਂ, ਚਿਤ੍ਤੇ ਅਵਸਵਤ੍ਤਿਨੀ;

ਤਤੋ ਸਂਵੇਗਮਾਪਾਦਿਂ, ਸਰਿਤ੍ਵਾ ਜਿਨਸਾਸਨਂ.

੪੧. ‘‘ਬਹੂਹਿ ਦੁਕ੍ਖਧਮ੍ਮੇਹਿ, ਅਪ੍ਪਮਾਦਰਤਾਯ ਮੇ;

ਤਣ੍ਹਕ੍ਖਯੋ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨਂ;

ਅਜ੍ਜ ਮੇ ਸਤ੍ਤਮੀ ਰਤ੍ਤਿ, ਯਤੋ ਤਣ੍ਹਾ ਵਿਸੋਸਿਤਾ’’ਤਿ.

… ਅਪਰਾ ਸਾਮਾ ਥੇਰੀ….

੨. ਉਤ੍ਤਮਾਥੇਰੀਗਾਥਾ

੪੨. ‘‘ਚਤੁਕ੍ਖਤ੍ਤੁਂ ਪਞ੍ਚਕ੍ਖਤ੍ਤੁਂ, ਵਿਹਾਰਾ ਉਪਨਿਕ੍ਖਮਿਂ;

ਅਲਦ੍ਧਾ ਚੇਤਸੋ ਸਨ੍ਤਿਂ, ਚਿਤ੍ਤੇ ਅਵਸਵਤ੍ਤਿਨੀ.

੪੩. ‘‘ਸਾ ਭਿਕ੍ਖੁਨਿਂ ਉਪਗਚ੍ਛਿਂ, ਯਾ ਮੇ ਸਦ੍ਧਾਯਿਕਾ ਅਹੁ;

ਸਾ ਮੇ ਧਮ੍ਮਮਦੇਸੇਸਿ, ਖਨ੍ਧਾਯਤਨਧਾਤੁਯੋ.

੪੪. ‘‘ਤਸ੍ਸਾ ਧਮ੍ਮਂ ਸੁਣਿਤ੍ਵਾਨ, ਯਥਾ ਮਂ ਅਨੁਸਾਸਿ ਸਾ;

ਸਤ੍ਤਾਹਂ ਏਕਪਲ੍ਲਙ੍ਕੇਨ, ਨਿਸੀਦਿਂ ਪੀਤਿਸੁਖਸਮਪ੍ਪਿਤਾ [ਨਿਸੀਦਿਂ ਸੁਖਸਮਪ੍ਪਿਤਾ (ਸੀ.)];

ਅਟ੍ਠਮਿਯਾ ਪਾਦੇ ਪਸਾਰੇਸਿਂ, ਤਮੋਖਨ੍ਧਂ ਪਦਾਲਿਯਾ’’ਤਿ.

… ਉਤ੍ਤਮਾ ਥੇਰੀ….

੩. ਅਪਰਾਉਤ੍ਤਮਾਥੇਰੀਗਾਥਾ

੪੫. ‘‘ਯੇ ਇਮੇ ਸਤ੍ਤ ਬੋਜ੍ਝਙ੍ਗਾ, ਮਗ੍ਗਾ ਨਿਬ੍ਬਾਨਪਤ੍ਤਿਯਾ;

ਭਾਵਿਤਾ ਤੇ ਮਯਾ ਸਬ੍ਬੇ, ਯਥਾ ਬੁਦ੍ਧੇਨ ਦੇਸਿਤਾ.

੪੬. ‘‘ਸੁਞ੍ਞਤਸ੍ਸਾਨਿਮਿਤ੍ਤਸ੍ਸ, ਲਾਭਿਨੀਹਂ ਯਦਿਚ੍ਛਕਂ;

ਓਰਸਾ ਧੀਤਾ ਬੁਦ੍ਧਸ੍ਸ, ਨਿਬ੍ਬਾਨਾਭਿਰਤਾ ਸਦਾ.

੪੭. ‘‘ਸਬ੍ਬੇ ਕਾਮਾ ਸਮੁਚ੍ਛਿਨ੍ਨਾ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

… ਅਪਰਾ ਉਤ੍ਤਮਾ ਥੇਰੀ….

੪. ਦਨ੍ਤਿਕਾਥੇਰੀਗਾਥਾ

੪੮. ‘‘ਦਿਵਾਵਿਹਾਰਾ ਨਿਕ੍ਖਮ੍ਮ, ਗਿਜ੍ਝਕੂਟਮ੍ਹਿ ਪਬ੍ਬਤੇ;

ਨਾਗਂ ਓਗਾਹਮੁਤ੍ਤਿਣ੍ਣਂ, ਨਦੀਤੀਰਮ੍ਹਿ ਅਦ੍ਦਸਂ.

੪੯. ‘‘ਪੁਰਿਸੋ ਅਙ੍ਕੁਸਮਾਦਾਯ, ‘ਦੇਹਿ ਪਾਦ’ਨ੍ਤਿ ਯਾਚਤਿ;

ਨਾਗੋ ਪਸਾਰਯੀ ਪਾਦਂ, ਪੁਰਿਸੋ ਨਾਗਮਾਰੁਹਿ.

੫੦. ‘‘ਦਿਸ੍ਵਾ ਅਦਨ੍ਤਂ ਦਮਿਤਂ, ਮਨੁਸ੍ਸਾਨਂ ਵਸਂ ਗਤਂ;

ਤਤੋ ਚਿਤ੍ਤਂ ਸਮਾਧੇਸਿਂ, ਖਲੁ ਤਾਯ ਵਨਂ ਗਤਾ’’ਤਿ.

… ਦਨ੍ਤਿਕਾ ਥੇਰੀ….

੫. ਉਬ੍ਬਿਰਿਥੇਰੀਗਾਥਾ

੫੧. ‘‘ਅਮ੍ਮ ਜੀਵਾਤਿ ਵਨਮ੍ਹਿ ਕਨ੍ਦਸਿ, ਅਤ੍ਤਾਨਂ ਅਧਿਗਚ੍ਛ ਉਬ੍ਬਿਰਿ;

ਚੁਲ੍ਲਾਸੀਤਿਸਹਸ੍ਸਾਨਿ [ਚੂਲ਼ਾਸੀਤਿਸਹਸ੍ਸਾਨਿ (ਸੀ.)], ਸਬ੍ਬਾ ਜੀਵਸਨਾਮਿਕਾ;

ਏਤਮ੍ਹਾਲ਼ਾਹਨੇ ਦਡ੍ਢਾ, ਤਾਸਂ ਕਮਨੁਸੋਚਸਿ.

੫੨. ‘‘ਅਬ੍ਬਹੀ [ਅਬ੍ਬੁਤੀ (ਸ੍ਯਾ.), ਅਬ੍ਬੁਲ਼੍ਹਂ (ਕ.)] ਵਤ ਮੇ ਸਲ੍ਲਂ, ਦੁਦ੍ਦਸਂ ਹਦਯਸ੍ਸਿਤਂ [ਹਦਯਨਿਸ੍ਸਿਤਂ (ਸੀ. ਸ੍ਯਾ.)];

ਯਂ ਮੇ ਸੋਕਪਰੇਤਾਯ, ਧੀਤੁਸੋਕਂ ਬ੍ਯਪਾਨੁਦਿ.

੫੩. ‘‘ਸਾਜ੍ਜ ਅਬ੍ਬੂਲ਼੍ਹਸਲ੍ਲਾਹਂ, ਨਿਚ੍ਛਾਤਾ ਪਰਿਨਿਬ੍ਬੁਤਾ;

ਬੁਦ੍ਧਂ ਧਮ੍ਮਞ੍ਚ ਸਙ੍ਘਞ੍ਚ, ਉਪੇਮਿ ਸਰਣਂ ਮੁਨਿ’’ਨ੍ਤਿ.

… ਉਬ੍ਬਿਰੀ ਥੇਰੀ….

੬. ਸੁਕ੍ਕਾਥੇਰੀਗਾਥਾ

੫੪. ‘‘ਕਿਂਮੇ ਕਤਾ ਰਾਜਗਹੇ ਮਨੁਸ੍ਸਾ, ਮਧੁਂ ਪੀਤਾਵ [ਮਧੁਪੀਤਾਵ (ਸੀ.)] ਅਚ੍ਛਰੇ;

ਯੇ ਸੁਕ੍ਕਂ ਨ ਉਪਾਸਨ੍ਤਿ, ਦੇਸੇਨ੍ਤਿਂ ਬੁਦ੍ਧਸਾਸਨਂ.

੫੫. ‘‘ਤਞ੍ਚ ਅਪ੍ਪਟਿਵਾਨੀਯਂ, ਅਸੇਚਨਕਮੋਜਵਂ;

ਪਿਵਨ੍ਤਿ ਮਞ੍ਞੇ ਸਪ੍ਪਞ੍ਞਾ, ਵਲਾਹਕਮਿਵਦ੍ਧਗੂ.

੫੬. ‘‘ਸੁਕ੍ਕਾ ਸੁਕ੍ਕੇਹਿ ਧਮ੍ਮੇਹਿ, ਵੀਤਰਾਗਾ ਸਮਾਹਿਤਾ;

ਧਾਰੇਤਿ ਅਨ੍ਤਿਮਂ ਦੇਹਂ, ਜੇਤ੍ਵਾ ਮਾਰਂ ਸਵਾਹਨ’’ਨ੍ਤਿ.

… ਸੁਕ੍ਕਾ ਥੇਰੀ….

੭. ਸੇਲਾਥੇਰੀਗਾਥਾ

੫੭. ‘‘ਨਤ੍ਥਿ ਨਿਸ੍ਸਰਣਂ ਲੋਕੇ, ਕਿਂ ਵਿਵੇਕੇਨ ਕਾਹਸਿ;

ਭੁਞ੍ਜਾਹਿ ਕਾਮਰਤਿਯੋ, ਮਾਹੁ ਪਚ੍ਛਾਨੁਤਾਪਿਨੀ’’.

੫੮. ‘‘ਸਤ੍ਤਿਸੂਲੂਪਮਾ ਕਾਮਾ, ਖਨ੍ਧਾਸਂ ਅਧਿਕੁਟ੍ਟਨਾ;

ਯਂ ਤ੍ਵਂ ‘ਕਾਮਰਤਿਂ’ ਬ੍ਰੂਸਿ, ‘ਅਰਤੀ’ ਦਾਨਿ ਸਾ ਮਮ.

੫੯. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ [ਨਨ੍ਦਿ (ਸੀ. ਸ੍ਯਾ.)], ਤਮੋਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

… ਸੇਲਾ ਥੇਰੀ….

੮. ਸੋਮਾਥੇਰੀਗਾਥਾ

੬੦. ‘‘ਯਂ ਤਂ ਇਸੀਹਿ ਪਤ੍ਤਬ੍ਬਂ, ਠਾਨਂ ਦੁਰਭਿਸਮ੍ਭਵਂ;

ਨ ਤਂ ਦ੍ਵਙ੍ਗੁਲਪਞ੍ਞਾਯ, ਸਕ੍ਕਾ ਪਪ੍ਪੋਤੁਮਿਤ੍ਥਿਯਾ’’.

੬੧. ‘‘ਇਤ੍ਥਿਭਾਵੋ ਨੋ ਕਿਂ ਕਯਿਰਾ, ਚਿਤ੍ਤਮ੍ਹਿ ਸੁਸਮਾਹਿਤੇ;

ਞਾਣਮ੍ਹਿ ਵਤ੍ਤਮਾਨਮ੍ਹਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

੬੨. ‘‘ਸਬ੍ਬਤ੍ਥ ਵਿਹਤਾ ਨਨ੍ਦੀ, ਤਮੋਖਨ੍ਧੋ ਪਦਾਲਿਤੋ;

ਏਵਂ ਜਾਨਾਹਿ ਪਾਪਿਮ, ਨਿਹਤੋ ਤ੍ਵਮਸਿ ਅਨ੍ਤਕਾ’’ਤਿ.

… ਸੋਮਾ ਥੇਰੀ….

ਤਿਕਨਿਪਾਤੋ ਨਿਟ੍ਠਿਤੋ.