੪. ਸੁਨ੍ਦਰੀਥੇਰੀਗਾਥਾ

੩੧੩. ‘‘ਪੇਤਾਨਿ ਭੋਤਿ ਪੁਤ੍ਤਾਨਿ, ਖਾਦਮਾਨਾ ਤੁਵਂ ਪੁਰੇ;

ਤੁਵਂ ਦਿਵਾ ਚ ਰਤ੍ਤੋ ਚ, ਅਤੀਵ ਪਰਿਤਪ੍ਪਸਿ.

੩੧੪. ‘‘ਸਾਜ੍ਜ ਸਬ੍ਬਾਨਿ ਖਾਦਿਤ੍ਵਾ, ਸਤਪੁਤ੍ਤਾਨਿ [ਸਤ੍ਤ ਪੁਤ੍ਤਾਨਿ (ਸ੍ਯਾ.)] ਬ੍ਰਾਹ੍ਮਣੀ;

ਵਾਸੇਟ੍ਠਿ ਕੇਨ ਵਣ੍ਣੇਨ, ਨ ਬਾਲ਼੍ਹਂ ਪਰਿਤਪ੍ਪਸਿ’’.

੩੧੫. ‘‘ਬਹੂਨਿ ਪੁਤ੍ਤਸਤਾਨਿ, ਞਾਤਿਸਙ੍ਘਸਤਾਨਿ ਚ;

ਖਾਦਿਤਾਨਿ ਅਤੀਤਂਸੇ, ਮਮ ਤੁਯ੍ਹਞ੍ਚ ਬ੍ਰਾਹ੍ਮਣ.

੩੧੬. ‘‘ਸਾਹਂ ਨਿਸ੍ਸਰਣਂ ਞਤ੍ਵਾ, ਜਾਤਿਯਾ ਮਰਣਸ੍ਸ ਚ;

ਨ ਸੋਚਾਮਿ ਨ ਰੋਦਾਮਿ, ਨ ਚਾਪਿ ਪਰਿਤਪ੍ਪਯਿਂ’’.

੩੧੭. ‘‘ਅਬ੍ਭੁਤਂ ਵਤ ਵਾਸੇਟ੍ਠਿ, ਵਾਚਂ ਭਾਸਸਿ ਏਦਿਸਿਂ;

ਕਸ੍ਸ ਤ੍ਵਂ ਧਮ੍ਮਮਞ੍ਞਾਯ, ਗਿਰਂ [ਥਿਰਂ (ਸੀ.)] ਭਾਸਸਿ ਏਦਿਸਿਂ’’.

੩੧੮. ‘‘ਏਸ ਬ੍ਰਾਹ੍ਮਣ ਸਮ੍ਬੁਦ੍ਧੋ, ਨਗਰਂ ਮਿਥਿਲਂ ਪਤਿ;

ਸਬ੍ਬਦੁਕ੍ਖਪ੍ਪਹਾਨਾਯ, ਧਮ੍ਮਂ ਦੇਸੇਸਿ ਪਾਣਿਨਂ.

੩੧੯. ‘‘ਤਸ੍ਸ ਬ੍ਰਹ੍ਮੇ [ਬ੍ਰਾਹ੍ਮਣ (ਸੀ. ਸ੍ਯਾ.)] ਅਰਹਤੋ, ਧਮ੍ਮਂ ਸੁਤ੍ਵਾ ਨਿਰੂਪਧਿਂ;

ਤਤ੍ਥ ਵਿਞ੍ਞਾਤਸਦ੍ਧਮ੍ਮਾ, ਪੁਤ੍ਤਸੋਕਂ ਬ੍ਯਪਾਨੁਦਿਂ’’.

੩੨੦. ‘‘ਸੋ ਅਹਮ੍ਪਿ ਗਮਿਸ੍ਸਾਮਿ, ਨਗਰਂ ਮਿਥਿਲਂ ਪਤਿ;

ਅਪ੍ਪੇਵ ਮਂ ਸੋ ਭਗਵਾ, ਸਬ੍ਬਦੁਕ੍ਖਾ ਪਮੋਚਯੇ’’.

੩੨੧. ਅਦ੍ਦਸ ਬ੍ਰਾਹ੍ਮਣੋ ਬੁਦ੍ਧਂ, ਵਿਪ੍ਪਮੁਤ੍ਤਂ ਨਿਰੂਪਧਿਂ;

ਸ੍ਵਸ੍ਸ ਧਮ੍ਮਮਦੇਸੇਸਿ, ਮੁਨਿ ਦੁਕ੍ਖਸ੍ਸ ਪਾਰਗੂ.

੩੨੨. ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਂ ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

੩੨੩. ਤਤ੍ਥ ਵਿਞ੍ਞਾਤਸਦ੍ਧਮ੍ਮੋ, ਪਬ੍ਬਜ੍ਜਂ ਸਮਰੋਚਯਿ;

ਸੁਜਾਤੋ ਤੀਹਿ ਰਤ੍ਤੀਹਿ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿ.

੩੨੪. ‘‘ਏਹਿ ਸਾਰਥਿ ਗਚ੍ਛਾਹਿ, ਰਥਂ ਨਿਯ੍ਯਾਦਯਾਹਿਮਂ;

ਆਰੋਗ੍ਯਂ ਬ੍ਰਾਹ੍ਮਣਿਂ ਵਜ੍ਜ [ਵਜ੍ਜਾ (ਸੀ.)], ‘ਪਬ੍ਬਜਿ [ਪਬ੍ਬਜਿਤੋ (ਸੀ.)] ਦਾਨਿ ਬ੍ਰਾਹ੍ਮਣੋ;

ਸੁਜਾਤੋ ਤੀਹਿ ਰਤ੍ਤੀਹਿ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿ’’’.

੩੨੫. ਤਤੋ ਚ ਰਥਮਾਦਾਯ, ਸਹਸ੍ਸਞ੍ਚਾਪਿ ਸਾਰਥਿ;

ਆਰੋਗ੍ਯਂ ਬ੍ਰਾਹ੍ਮਣਿਵੋਚ, ‘‘ਪਬ੍ਬਜਿ ਦਾਨਿ ਬ੍ਰਾਹ੍ਮਣੋ;

ਸੁਜਾਤੋ ਤੀਹਿ ਰਤ੍ਤੀਹਿ, ਤਿਸ੍ਸੋ ਵਿਜ੍ਜਾ ਅਫਸ੍ਸਯਿ’’.

੩੨੬. ‘‘ਏਤਞ੍ਚਾਹਂ ਅਸ੍ਸਰਥਂ, ਸਹਸ੍ਸਞ੍ਚਾਪਿ ਸਾਰਥਿ;

ਤੇਵਿਜ੍ਜਂ ਬ੍ਰਾਹ੍ਮਣਂ ਸੁਤ੍ਵਾ [ਞਤ੍ਵਾ (ਸੀ.)], ਪੁਣ੍ਣਪਤ੍ਤਂ ਦਦਾਮਿ ਤੇ’’.

੩੨੭. ‘‘ਤੁਯ੍ਹੇਵ ਹੋਤ੍ਵਸ੍ਸਰਥੋ, ਸਹਸ੍ਸਞ੍ਚਾਪਿ ਬ੍ਰਾਹ੍ਮਣਿ;

ਅਹਮ੍ਪਿ ਪਬ੍ਬਜਿਸ੍ਸਾਮਿ, ਵਰਪਞ੍ਞਸ੍ਸ ਸਨ੍ਤਿਕੇ’’.

੩੨੮. ‘‘ਹਤ੍ਥੀ ਗਵਸ੍ਸਂ ਮਣਿਕੁਣ੍ਡਲਞ੍ਚ, ਫੀਤਞ੍ਚਿਮਂ ਗਹਵਿਭਵਂ ਪਹਾਯ;

ਪਿਤਾ ਪਬ੍ਬਜਿਤੋ ਤੁਯ੍ਹਂ, ਭੁਞ੍ਜ ਭੋਗਾਨਿ ਸੁਨ੍ਦਰਿ; ਤੁਵਂ ਦਾਯਾਦਿਕਾ ਕੁਲੇ’’.

੩੨੯. ‘‘ਹਤ੍ਥੀ ਗਵਸ੍ਸਂ ਮਣਿਕੁਣ੍ਡਲਞ੍ਚ, ਰਮ੍ਮਂ ਚਿਮਂ ਗਹਵਿਭਵਂ ਪਹਾਯ;

ਪਿਤਾ ਪਬ੍ਬਜਿਤੋ ਮਯ੍ਹਂ, ਪੁਤ੍ਤਸੋਕੇਨ ਅਟ੍ਟਿਤੋ;

ਅਹਮ੍ਪਿ ਪਬ੍ਬਜਿਸ੍ਸਾਮਿ, ਭਾਤੁਸੋਕੇਨ ਅਟ੍ਟਿਤਾ’’.

੩੩੦. ‘‘ਸੋ ਤੇ ਇਜ੍ਝਤੁ ਸਙ੍ਕਪ੍ਪੋ, ਯਂ ਤ੍ਵਂ ਪਤ੍ਥੇਸਿ ਸੁਨ੍ਦਰੀ;

ਉਤ੍ਤਿਟ੍ਠਪਿਣ੍ਡੋ ਉਞ੍ਛੋ ਚ, ਪਂਸੁਕੂਲਞ੍ਚ ਚੀਵਰਂ;

ਏਤਾਨਿ ਅਭਿਸਮ੍ਭੋਨ੍ਤੀ, ਪਰਲੋਕੇ ਅਨਾਸਵਾ’’.

੩੩੧. ‘‘ਸਿਕ੍ਖਮਾਨਾਯ ਮੇ ਅਯ੍ਯੇ, ਦਿਬ੍ਬਚਕ੍ਖੁ ਵਿਸੋਧਿਤਂ;

ਪੁਬ੍ਬੇਨਿਵਾਸਂ ਜਾਨਾਮਿ, ਯਤ੍ਥ ਮੇ ਵੁਸਿਤਂ ਪੁਰੇ.

੩੩੨. ‘‘ਤੁਵਂ ਨਿਸ੍ਸਾਯ ਕਲ੍ਯਾਣੀ, ਥੇਰੀ ਸਙ੍ਘਸ੍ਸ ਸੋਭਨੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੩੩੩. ‘‘ਅਨੁਜਾਨਾਹਿ ਮੇ ਅਯ੍ਯੇ, ਇਚ੍ਛੇ ਸਾਵਤ੍ਥਿ ਗਨ੍ਤਵੇ;

ਸੀਹਨਾਦਂ ਨਦਿਸ੍ਸਾਮਿ, ਬੁਦ੍ਧਸੇਟ੍ਠਸ੍ਸ ਸਨ੍ਤਿਕੇ’’.

੩੩੪. ‘‘ਪਸ੍ਸ ਸੁਨ੍ਦਰਿ ਸਤ੍ਥਾਰਂ, ਹੇਮਵਣ੍ਣਂ ਹਰਿਤ੍ਤਚਂ;

ਅਦਨ੍ਤਾਨਂ ਦਮੇਤਾਰਂ, ਸਮ੍ਬੁਦ੍ਧਮਕੁਤੋਭਯਂ’’.

੩੩੫. ‘‘ਪਸ੍ਸ ਸੁਨ੍ਦਰਿਮਾਯਨ੍ਤਿਂ, ਵਿਪ੍ਪਮੁਤ੍ਤਂ ਨਿਰੂਪਧਿਂ;

ਵੀਤਰਾਗਂ ਵਿਸਂਯੁਤ੍ਤਂ, ਕਤਕਿਚ੍ਚਮਨਾਸਵਂ.

੩੩੬. ‘‘ਬਾਰਾਣਸੀਤੋ ਨਿਕ੍ਖਮ੍ਮ, ਤਵ ਸਨ੍ਤਿਕਮਾਗਤਾ;

ਸਾਵਿਕਾ ਤੇ ਮਹਾਵੀਰ, ਪਾਦੇ ਵਨ੍ਦਤਿ ਸੁਨ੍ਦਰੀ’’.

੩੩੭. ‘‘ਤੁਵਂ ਬੁਦ੍ਧੋ ਤੁਵਂ ਸਤ੍ਥਾ, ਤੁਯ੍ਹਂ ਧੀਤਾਮ੍ਹਿ ਬ੍ਰਾਹ੍ਮਣ;

ਓਰਸਾ ਮੁਖਤੋ ਜਾਤਾ, ਕਤਕਿਚ੍ਚਾ ਅਨਾਸਵਾ’’.

੩੩੮. ‘‘ਤਸ੍ਸਾ ਤੇ ਸ੍ਵਾਗਤਂ ਭਦ੍ਦੇ, ਤਤੋ [ਅਥੋ (ਕ.)] ਤੇ ਅਦੁਰਾਗਤਂ;

ਏਵਞ੍ਹਿ ਦਨ੍ਤਾ ਆਯਨ੍ਤਿ, ਸਤ੍ਥੁ ਪਾਦਾਨਿ ਵਨ੍ਦਿਕਾ;

ਵੀਤਰਾਗਾ ਵਿਸਂਯੁਤ੍ਤਾ, ਕਤਕਿਚ੍ਚਾ ਅਨਾਸਵਾ’’.

… ਸੁਨ੍ਦਰੀ ਥੇਰੀ….