੫. ਸੁਭਾਕਮ੍ਮਾਰਧੀਤੁਥੇਰੀਗਾਥਾ

੩੩੯. ‘‘ਦਹਰਾਹਂ ਸੁਦ੍ਧਵਸਨਾ, ਯਂ ਪੁਰੇ ਧਮ੍ਮਮਸ੍ਸੁਣਿਂ;

ਤਸ੍ਸਾ ਮੇ ਅਪ੍ਪਮਤ੍ਤਾਯ, ਸਚ੍ਚਾਭਿਸਮਯੋ ਅਹੁ.

੩੪੦. ‘‘ਤਤੋਹਂ ਸਬ੍ਬਕਾਮੇਸੁ, ਭੁਸਂ ਅਰਤਿਮਜ੍ਝਗਂ;

ਸਕ੍ਕਾਯਸ੍ਮਿਂ ਭਯਂ ਦਿਸ੍ਵਾ, ਨੇਕ੍ਖਮ੍ਮਮੇਵ [ਨੇਕ੍ਖਮ੍ਮਞ੍ਞੇਵ (ਸੀ.), ਨੇਕ੍ਖਮ੍ਮਸ੍ਸੇਵ (ਸ੍ਯਾ.)] ਪੀਹਯੇ.

੩੪੧. ‘‘ਹਿਤ੍ਵਾਨਹਂ ਞਾਤਿਗਣਂ, ਦਾਸਕਮ੍ਮਕਰਾਨਿ ਚ;

ਗਾਮਖੇਤ੍ਤਾਨਿ ਫੀਤਾਨਿ, ਰਮਣੀਯੇ ਪਮੋਦਿਤੇ.

੩੪੨. ‘‘ਪਹਾਯਹਂ ਪਬ੍ਬਜਿਤਾ, ਸਾਪਤੇਯ੍ਯਮਨਪ੍ਪਕਂ;

ਏਵਂ ਸਦ੍ਧਾਯ ਨਿਕ੍ਖਮ੍ਮ, ਸਦ੍ਧਮ੍ਮੇ ਸੁਪ੍ਪਵੇਦਿਤੇ.

੩੪੩. ‘‘ਨੇਤਂ [ਨ ਮੇਤਂ (ਸੀ. ਸ੍ਯਾ.)] ਅਸ੍ਸ ਪਤਿਰੂਪਂ, ਆਕਿਞ੍ਚਞ੍ਞਞ੍ਹਿ ਪਤ੍ਥਯੇ;

ਯੋ [ਯਾ (ਸ੍ਯਾ.)] ਜਾਤਰੂਪਂ ਰਜਤਂ, ਛਡ੍ਡੇਤ੍ਵਾ [ਥਪੇਤ੍ਵਾ (ਕ.)] ਪੁਨਰਾਗਮੇ [ਪੁਨਰਾਗਹੇ (ਕ.)].

੩੪੪. ‘‘ਰਜਤਂ ਜਾਤਰੂਪਂ ਵਾ, ਨ ਬੋਧਾਯ ਨ ਸਨ੍ਤਿਯਾ;

ਨੇਤਂ ਸਮਣਸਾਰੁਪ੍ਪਂ, ਨ ਏਤਂ ਅਰਿਯਦ੍ਧਨਂ.

੩੪੫. ‘‘ਲੋਭਨਂ ਮਦਨਞ੍ਚੇਤਂ, ਮੋਹਨਂ ਰਜਵਡ੍ਢਨਂ;

ਸਾਸਙ੍ਕਂ ਬਹੁਆਯਾਸਂ, ਨਤ੍ਥਿ ਚੇਤ੍ਥ ਧੁਵਂ ਠਿਤਿ.

੩੪੬. ‘‘ਏਤ੍ਥ ਰਤ੍ਤਾ ਪਮਤ੍ਤਾ ਚ, ਸਙ੍ਕਿਲਿਟ੍ਠਮਨਾ ਨਰਾ;

ਅਞ੍ਞਮਞ੍ਞੇਨ ਬ੍ਯਾਰੁਦ੍ਧਾ, ਪੁਥੁ ਕੁਬ੍ਬਨ੍ਤਿ ਮੇਧਗਂ.

੩੪੭. ‘‘ਵਧੋ ਬਨ੍ਧੋ ਪਰਿਕ੍ਲੇਸੋ, ਜਾਨਿ ਸੋਕਪਰਿਦ੍ਦਵੋ;

ਕਾਮੇਸੁ ਅਧਿਪਨ੍ਨਾਨਂ, ਦਿਸ੍ਸਤੇ ਬ੍ਯਸਨਂ ਬਹੁਂ.

੩੪੮. ‘‘ਤਂ ਮਂ ਞਾਤੀ ਅਮਿਤ੍ਤਾਵ, ਕਿਂ ਵੋ ਕਾਮੇਸੁ ਯੁਞ੍ਜਥ;

ਜਾਨਾਥ ਮਂ ਪਬ੍ਬਜਿਤਂ, ਕਾਮੇਸੁ ਭਯਦਸ੍ਸਿਨਿਂ.

੩੪੯. ‘‘ਨ ਹਿਰਞ੍ਞਸੁਵਣ੍ਣੇਨ, ਪਰਿਕ੍ਖੀਯਨ੍ਤਿ ਆਸਵਾ;

ਅਮਿਤ੍ਤਾ ਵਧਕਾ ਕਾਮਾ, ਸਪਤ੍ਤਾ ਸਲ੍ਲਬਨ੍ਧਨਾ.

੩੫੦. ‘‘ਤਂ ਮਂ ਞਾਤੀ ਅਮਿਤ੍ਤਾਵ, ਕਿਂ ਵੋ ਕਾਮੇਸੁ ਯੁਞ੍ਜਥ;

ਜਾਨਾਥ ਮਂ ਪਬ੍ਬਜਿਤਂ, ਮੁਣ੍ਡਂ ਸਙ੍ਘਾਟਿਪਾਰੁਤਂ.

੩੫੧. ‘‘ਉਤ੍ਤਿਟ੍ਠਪਿਣ੍ਡੋ ਉਞ੍ਛੋ ਚ, ਪਂਸੁਕੂਲਞ੍ਚ ਚੀਵਰਂ;

ਏਤਂ ਖੋ ਮਮ ਸਾਰੁਪ੍ਪਂ, ਅਨਗਾਰੂਪਨਿਸ੍ਸਯੋ.

੩੫੨. ‘‘ਵਨ੍ਤਾ ਮਹੇਸੀਹਿ ਕਾਮਾ, ਯੇ ਦਿਬ੍ਬਾ ਯੇ ਚ ਮਾਨੁਸਾ;

ਖੇਮਟ੍ਠਾਨੇ ਵਿਮੁਤ੍ਤਾ ਤੇ, ਪਤ੍ਤਾ ਤੇ ਅਚਲਂ ਸੁਖਂ.

੩੫੩. ‘‘ਮਾਹਂ ਕਾਮੇਹਿ ਸਙ੍ਗਚ੍ਛਿਂ, ਯੇਸੁ ਤਾਣਂ ਨ ਵਿਜ੍ਜਤਿ;

ਅਮਿਤ੍ਤਾ ਵਧਕਾ ਕਾਮਾ, ਅਗ੍ਗਿਕ੍ਖਨ੍ਧੂਪਮਾ ਦੁਖਾ.

੩੫੪. ‘‘ਪਰਿਪਨ੍ਥੋ ਏਸ ਭਯੋ, ਸਵਿਘਾਤੋ ਸਕਣ੍ਟਕੋ;

ਗੇਧੋ ਸੁਵਿਸਮੋ ਚੇਸੋ [ਲੇਪੋ (ਸੀ.)], ਮਹਨ੍ਤੋ ਮੋਹਨਾਮੁਖੋ.

੩੫੫. ‘‘ਉਪਸਗ੍ਗੋ ਭੀਮਰੂਪੋ, ਕਾਮਾ ਸਪ੍ਪਸਿਰੂਪਮਾ;

ਯੇ ਬਾਲਾ ਅਭਿਨਨ੍ਦਨ੍ਤਿ, ਅਨ੍ਧਭੂਤਾ ਪੁਥੁਜ੍ਜਨਾ.

੩੫੬. ‘‘ਕਾਮਪਙ੍ਕੇਨ ਸਤ੍ਤਾ ਹਿ, ਬਹੂ ਲੋਕੇ ਅਵਿਦ੍ਦਸੂ;

ਪਰਿਯਨ੍ਤਂ ਨ ਜਾਨਨ੍ਤਿ, ਜਾਤਿਯਾ ਮਰਣਸ੍ਸ ਚ.

੩੫੭. ‘‘ਦੁਗ੍ਗਤਿਗਮਨਂ ਮਗ੍ਗਂ, ਮਨੁਸ੍ਸਾ ਕਾਮਹੇਤੁਕਂ;

ਬਹੁਂ ਵੇ ਪਟਿਪਜ੍ਜਨ੍ਤਿ, ਅਤ੍ਤਨੋ ਰੋਗਮਾਵਹਂ.

੩੫੮. ‘‘ਏਵਂ ਅਮਿਤ੍ਤਜਨਨਾ, ਤਾਪਨਾ ਸਂਕਿਲੇਸਿਕਾ;

ਲੋਕਾਮਿਸਾ ਬਨ੍ਧਨੀਯਾ, ਕਾਮਾ ਮਰਣਬਨ੍ਧਨਾ [ਚਰਣਬਨ੍ਧਨਾ (ਸੀ.)].

੩੫੯. ‘‘ਉਮ੍ਮਾਦਨਾ ਉਲ੍ਲਪਨਾ, ਕਾਮਾ ਚਿਤ੍ਤਪ੍ਪਮਦ੍ਦਿਨੋ;

ਸਤ੍ਤਾਨਂ ਸਙ੍ਕਿਲੇਸਾਯ, ਖਿਪ੍ਪਂ [ਖਿਪਂ (ਸੀ.)] ਮਾਰੇਨ ਓਡ੍ਡਿਤਂ.

੩੬੦. ‘‘ਅਨਨ੍ਤਾਦੀਨਵਾ ਕਾਮਾ, ਬਹੁਦੁਕ੍ਖਾ ਮਹਾਵਿਸਾ;

ਅਪ੍ਪਸ੍ਸਾਦਾ ਰਣਕਰਾ, ਸੁਕ੍ਕਪਕ੍ਖਵਿਸੋਸਨਾ [ਵਿਸੋਸਕਾ (ਸੀ.)].

੩੬੧. ‘‘ਸਾਹਂ ਏਤਾਦਿਸਂ ਕਤ੍ਵਾ, ਬ੍ਯਸਨਂ ਕਾਮਹੇਤੁਕਂ;

ਨ ਤਂ ਪਚ੍ਚਾਗਮਿਸ੍ਸਾਮਿ, ਨਿਬ੍ਬਾਨਾਭਿਰਤਾ ਸਦਾ.

੩੬੨. ‘‘ਰਣਂ ਕਰਿਤ੍ਵਾ [ਤਰਿਤ੍ਵਾ (ਸੀ.)] ਕਾਮਾਨਂ, ਸੀਤਿਭਾਵਾਭਿਕਙ੍ਖਿਨੀ;

ਅਪ੍ਪਮਤ੍ਤਾ ਵਿਹਸ੍ਸਾਮਿ, ਸਬ੍ਬਸਂਯੋਜਨਕ੍ਖਯੇ.

੩੬੩. ‘‘ਅਸੋਕਂ ਵਿਰਜਂ ਖੇਮਂ, ਅਰਿਯਟ੍ਠਙ੍ਗਿਕਂ ਉਜੁਂ;

ਤਂ ਮਗ੍ਗਂ ਅਨੁਗਚ੍ਛਾਮਿ, ਯੇਨ ਤਿਣ੍ਣਾ ਮਹੇਸਿਨੋ’’.

੩੬੪. ਇਮਂ ਪਸ੍ਸਥ ਧਮ੍ਮਟ੍ਠਂ, ਸੁਭਂ ਕਮ੍ਮਾਰਧੀਤਰਂ;

ਅਨੇਜਂ ਉਪਸਮ੍ਪਜ੍ਜ, ਰੁਕ੍ਖਮੂਲਮ੍ਹਿ ਝਾਯਤਿ.

੩੬੫. ਅਜ੍ਜਟ੍ਠਮੀ ਪਬ੍ਬਜਿਤਾ, ਸਦ੍ਧਾ ਸਦ੍ਧਮ੍ਮਸੋਭਨਾ;

ਵਿਨੀਤੁਪ੍ਪਲਵਣ੍ਣਾਯ, ਤੇਵਿਜ੍ਜਾ ਮਚ੍ਚੁਹਾਯਿਨੀ.

੩੬੬. ਸਾਯਂ ਭੁਜਿਸ੍ਸਾ ਅਨਣਾ, ਭਿਕ੍ਖੁਨੀ ਭਾਵਿਤਿਨ੍ਦ੍ਰਿਯਾ;

ਸਬ੍ਬਯੋਗਵਿਸਂਯੁਤ੍ਤਾ, ਕਤਕਿਚ੍ਚਾ ਅਨਾਸਵਾ.

੩੬੭. ਤਂ ਸਕ੍ਕੋ ਦੇਵਸਙ੍ਘੇਨ, ਉਪਸਙ੍ਕਮ੍ਮ ਇਦ੍ਧਿਯਾ;

ਨਮਸ੍ਸਤਿ ਭੂਤਪਤਿ, ਸੁਭਂ ਕਮ੍ਮਾਰਧੀਤਰਨ੍ਤਿ.

… ਸੁਭਾ ਕਮ੍ਮਾਰਧੀਤਾ ਥੇਰੀ….

ਵੀਸਤਿਨਿਪਾਤੋ ਨਿਟ੍ਠਿਤੋ.