੩. ਚਾਪਾਥੇਰੀਗਾਥਾ

੨੯੨. ‘‘ਲਟ੍ਠਿਹਤ੍ਥੋ ਪੁਰੇ ਆਸਿ, ਸੋ ਦਾਨਿ ਮਿਗਲੁਦ੍ਦਕੋ;

ਆਸਾਯ ਪਲਿਪਾ ਘੋਰਾ, ਨਾਸਕ੍ਖਿ ਪਾਰਮੇਤਵੇ.

੨੯੩. ‘‘ਸੁਮਤ੍ਤਂ ਮਂ ਮਞ੍ਞਮਾਨਾ, ਚਾਪਾ ਪੁਤ੍ਤਮਤੋਸਯਿ;

ਚਾਪਾਯ ਬਨ੍ਧਨਂ ਛੇਤ੍ਵਾ, ਪਬ੍ਬਜਿਸ੍ਸਂ ਪੁਨੋਪਹਂ.

੨੯੪. ‘‘ਮਾ ਮੇ ਕੁਜ੍ਝਿ ਮਹਾਵੀਰ, ਮਾ ਮੇ ਕੁਜ੍ਝਿ ਮਹਾਮੁਨਿ;

ਨ ਹਿ ਕੋਧਪਰੇਤਸ੍ਸ, ਸੁਦ੍ਧਿ ਅਤ੍ਥਿ ਕੁਤੋ ਤਪੋ.

੨੯੫. ‘‘ਪਕ੍ਕਮਿਸ੍ਸਞ੍ਚ ਨਾਲ਼ਾਤੋ, ਕੋਧ ਨਾਲ਼ਾਯ ਵਚ੍ਛਤਿ;

ਬਨ੍ਧਨ੍ਤੀ ਇਤ੍ਥਿਰੂਪੇਨ, ਸਮਣੇ ਧਮ੍ਮਜੀਵਿਨੋ’’ [ਧਮ੍ਮਜੀਵਿਨੇ (ਕ.)].

੨੯੬. ‘‘ਏਹਿ ਕਾਲ਼ ਨਿਵਤ੍ਤਸ੍ਸੁ, ਭੁਞ੍ਜ ਕਾਮੇ ਯਥਾ ਪੁਰੇ;

ਅਹਞ੍ਚ ਤੇ ਵਸੀਕਤਾ, ਯੇ ਚ ਮੇ ਸਨ੍ਤਿ ਞਾਤਕਾ’’.

੨੯੭. ‘‘ਏਤ੍ਤੋ ਚਾਪੇ ਚਤੁਬ੍ਭਾਗਂ, ਯਥਾ ਭਾਸਸਿ ਤ੍ਵਞ੍ਚ ਮੇ;

ਤਯਿ ਰਤ੍ਤਸ੍ਸ ਪੋਸਸ੍ਸ, ਉਲ਼ਾਰਂ ਵਤ ਤਂ ਸਿਯਾ’’.

੨੯੮. ‘‘ਕਾਲ਼ਙ੍ਗਿਨਿਂਵ ਤਕ੍ਕਾਰਿਂ, ਪੁਪ੍ਫਿਤਂ ਗਿਰਿਮੁਦ੍ਧਨਿ;

ਫੁਲ੍ਲਂ ਦਾਲਿਮਲਟ੍ਠਿਂਵ, ਅਨ੍ਤੋਦੀਪੇਵ ਪਾਟਲਿਂ.

੨੯੯. ‘‘ਹਰਿਚਨ੍ਦਨਲਿਤ੍ਤਙ੍ਗਿਂ, ਕਾਸਿਕੁਤ੍ਤਮਧਾਰਿਨਿਂ;

ਤਂ ਮਂ ਰੂਪਵਤਿਂ ਸਨ੍ਤਿਂ, ਕਸ੍ਸ ਓਹਾਯ ਗਚ੍ਛਸਿ’’.

੩੦੦. ‘‘ਸਾਕੁਨ੍ਤਿਕੋਵ ਸਕੁਣਿਂ [ਸਕੁਣਂ (ਸ੍ਯਾ.)], ਯਥਾ ਬਨ੍ਧਿਤੁਮਿਚ੍ਛਤਿ;

ਆਹਰਿਮੇਨ ਰੂਪੇਨ, ਨ ਮਂ ਤ੍ਵਂ ਬਾਧਯਿਸ੍ਸਸਿ’’.

੩੦੧. ‘‘ਇਮਞ੍ਚ ਮੇ ਪੁਤ੍ਤਫਲਂ, ਕਾਲ਼ ਉਪ੍ਪਾਦਿਤਂ ਤਯਾ;

ਤਂ ਮਂ ਪੁਤ੍ਤਵਤਿਂ ਸਨ੍ਤਿਂ, ਕਸ੍ਸ ਓਹਾਯ ਗਚ੍ਛਸਿ’’.

੩੦੨. ‘‘ਜਹਨ੍ਤਿ ਪੁਤ੍ਤੇ ਸਪ੍ਪਞ੍ਞਾ, ਤਤੋ ਞਾਤੀ ਤਤੋ ਧਨਂ;

ਪਬ੍ਬਜਨ੍ਤਿ ਮਹਾਵੀਰਾ, ਨਾਗੋ ਛੇਤ੍ਵਾਵ ਬਨ੍ਧਨਂ’’.

੩੦੩. ‘‘ਇਦਾਨਿ ਤੇ ਇਮਂ ਪੁਤ੍ਤਂ, ਦਣ੍ਡੇਨ ਛੁਰਿਕਾਯ ਵਾ;

ਭੂਮਿਯਂ ਵਾ ਨਿਸੁਮ੍ਭਿਸ੍ਸਂ [ਨਿਸੁਮ੍ਭੇਯ੍ਯਂ (ਸੀ.)], ਪੁਤ੍ਤਸੋਕਾ ਨ ਗਚ੍ਛਸਿ’’.

੩੦੪. ‘‘ਸਚੇ ਪੁਤ੍ਤਂ ਸਿਙ੍ਗਾਲਾਨਂ, ਕੁਕ੍ਕੁਰਾਨਂ ਪਦਾਹਿਸਿ;

ਨ ਮਂ ਪੁਤ੍ਤਕਤ੍ਤੇ ਜਮ੍ਮਿ, ਪੁਨਰਾਵਤ੍ਤਯਿਸ੍ਸਸਿ’’.

੩੦੫. ‘‘ਹਨ੍ਦ ਖੋ ਦਾਨਿ ਭਦ੍ਦਨ੍ਤੇ, ਕੁਹਿਂ ਕਾਲ਼ ਗਮਿਸ੍ਸਸਿ;

ਕਤਮਂ ਗਾਮਨਿਗਮਂ, ਨਗਰਂ ਰਾਜਧਾਨਿਯੋ’’.

੩੦੬. ‘‘ਅਹੁਮ੍ਹ ਪੁਬ੍ਬੇ ਗਣਿਨੋ, ਅਸ੍ਸਮਣਾ ਸਮਣਮਾਨਿਨੋ;

ਗਾਮੇਨ ਗਾਮਂ ਵਿਚਰਿਮ੍ਹ, ਨਗਰੇ ਰਾਜਧਾਨਿਯੋ.

੩੦੭. ‘‘ਏਸੋ ਹਿ ਭਗਵਾ ਬੁਦ੍ਧੋ, ਨਦਿਂ ਨੇਰਞ੍ਜਰਂ ਪਤਿ;

ਸਬ੍ਬਦੁਕ੍ਖਪ੍ਪਹਾਨਾਯ, ਧਮ੍ਮਂ ਦੇਸੇਤਿ ਪਾਣਿਨਂ;

ਤਸ੍ਸਾਹਂ ਸਨ੍ਤਿਕਂ ਗਚ੍ਛਂ, ਸੋ ਮੇ ਸਤ੍ਥਾ ਭਵਿਸ੍ਸਤਿ’’.

੩੦੮. ‘‘ਵਨ੍ਦਨਂ ਦਾਨਿ ਵਜ੍ਜਾਸਿ, ਲੋਕਨਾਥਂ ਅਨੁਤ੍ਤਰਂ;

ਪਦਕ੍ਖਿਣਞ੍ਚ ਕਤ੍ਵਾਨ, ਆਦਿਸੇਯ੍ਯਾਸਿ ਦਕ੍ਖਿਣਂ’’.

੩੦੯. ‘‘ਏਤਂ ਖੋ ਲਬ੍ਭਮਮ੍ਹੇਹਿ, ਯਥਾ ਭਾਸਸਿ ਤ੍ਵਞ੍ਚ ਮੇ;

ਵਨ੍ਦਨਂ ਦਾਨਿ ਤੇ ਵਜ੍ਜਂ, ਲੋਕਨਾਥਂ ਅਨੁਤ੍ਤਰਂ;

ਪਦਕ੍ਖਿਣਞ੍ਚ ਕਤ੍ਵਾਨ, ਆਦਿਸਿਸ੍ਸਾਮਿ ਦਕ੍ਖਿਣਂ’’.

੩੧੦. ਤਤੋ ਚ ਕਾਲ਼ੋ ਪਕ੍ਕਾਮਿ, ਨਦਿਂ ਨੇਰਞ੍ਜਰਂ ਪਤਿ;

ਸੋ ਅਦ੍ਦਸਾਸਿ ਸਮ੍ਬੁਦ੍ਧਂ, ਦੇਸੇਨ੍ਤਂ ਅਮਤਂ ਪਦਂ.

੩੧੧. ਦੁਕ੍ਖਂ ਦੁਕ੍ਖਸਮੁਪ੍ਪਾਦਂ, ਦੁਕ੍ਖਸ੍ਸ ਚ ਅਤਿਕ੍ਕਮਂ;

ਅਰਿਯਂ ਚਟ੍ਠਙ੍ਗਿਕਂ ਮਗ੍ਗਂ, ਦੁਕ੍ਖੂਪਸਮਗਾਮਿਨਂ.

੩੧੨. ਤਸ੍ਸ ਪਾਦਾਨਿ ਵਨ੍ਦਿਤ੍ਵਾ, ਕਤ੍ਵਾਨ ਨਂ [ਕਤ੍ਵਾਨਹਂ (ਸੀ.)] ਪਦਕ੍ਖਿਣਂ;

ਚਾਪਾਯ ਆਦਿਸਿਤ੍ਵਾਨ, ਪਬ੍ਬਜਿਂ ਅਨਗਾਰਿਯਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

… ਚਾਪਾ ਥੇਰੀ….