੨. ਰੋਹਿਨੀਥੇਰੀਗਾਥਾ
੨੭੧. ‘‘‘ਸਮਣਾ’ਤਿ ਭੋਤਿ ਸੁਪਿ [ਭੋਤਿ ਤ੍ਵਂ ਸਯਸਿ (ਸੀ.), ਭੋਤਿ ਮਂ ਵਿਪਸ੍ਸਿ (ਸ੍ਯਾ.)], ‘ਸਮਣਾ’ਤਿ ਪਬੁਜ੍ਝਸਿ [ਪਟਿਬੁਜ੍ਝਸਿ (ਸੀ. ਸ੍ਯਾ.)];
ਸਮਣਾਨੇਵ [ਸਮਣਾਨਮੇਵ (ਸੀ. ਸ੍ਯਾ.)] ਕਿਤ੍ਤੇਸਿ, ਸਮਣੀ ਨੂਨ [ਸਮਣੀ ਨੁ (ਕ.)] ਭਵਿਸ੍ਸਸਿ.
੨੭੨. ‘‘ਵਿਪੁਲਂ ਅਨ੍ਨਞ੍ਚ ਪਾਨਞ੍ਚ, ਸਮਣਾਨਂ ਪਵੇਚ੍ਚਸਿ [ਪਯਚ੍ਛਸਿ (ਸੀ.)];
ਰੋਹਿਨੀ ਦਾਨਿ ਪੁਚ੍ਛਾਮਿ, ਕੇਨ ਤੇ ਸਮਣਾ ਪਿਯਾ.
੨੭੩. ‘‘ਅਕਮ੍ਮਕਾਮਾ ਅਲਸਾ, ਪਰਦਤ੍ਤੂਪਜੀਵਿਨੋ;
ਆਸਂਸੁਕਾ ਸਾਦੁਕਾਮਾ, ਕੇਨ ਤੇ ਸਮਣਾ ਪਿਯਾ’’.
੨੭੪. ‘‘ਚਿਰਸ੍ਸਂ ਵਤ ਮਂ ਤਾਤ, ਸਮਣਾਨਂ ਪਰਿਪੁਚ੍ਛਸਿ;
ਤੇਸਂ ਤੇ ਕਿਤ੍ਤਯਿਸ੍ਸਾਮਿ, ਪਞ੍ਞਾਸੀਲਪਰਕ੍ਕਮਂ.
੨੭੫. ‘‘ਕਮ੍ਮਕਾਮਾ ਅਨਲਸਾ, ਕਮ੍ਮਸੇਟ੍ਠਸ੍ਸ ਕਾਰਕਾ;
ਰਾਗਂ ਦੋਸਂ ਪਜਹਨ੍ਤਿ, ਤੇਨ ਮੇ ਸਮਣਾ ਪਿਯਾ.
੨੭੬. ‘‘ਤੀਣਿ ਪਾਪਸ੍ਸ ਮੂਲਾਨਿ, ਧੁਨਨ੍ਤਿ ਸੁਚਿਕਾਰਿਨੋ;
ਸਬ੍ਬਂ ਪਾਪਂ ਪਹੀਨੇਸਂ, ਤੇਨ ਮੇ ਸਮਣਾ ਪਿਯਾ.
੨੭੭. ‘‘ਕਾਯਕਮ੍ਮਂ ਸੁਚਿ ਨੇਸਂ, ਵਚੀਕਮ੍ਮਞ੍ਚ ਤਾਦਿਸਂ;
ਮਨੋਕਮ੍ਮਂ ਸੁਚਿ ਨੇਸਂ, ਤੇਨ ਮੇ ਸਮਣਾ ਪਿਯਾ.
੨੭੮. ‘‘ਵਿਮਲਾ ਸਙ੍ਖਮੁਤ੍ਤਾਵ, ਸੁਦ੍ਧਾ ਸਨ੍ਤਰਬਾਹਿਰਾ;
ਪੁਣ੍ਣਾ ਸੁਕ੍ਕਾਨ ਧਮ੍ਮਾਨਂ [ਸੁਕ੍ਕੇਹਿ ਧਮ੍ਮੇਹਿ (ਸੀ. ਸ੍ਯਾ. ਅਟ੍ਠ.)], ਤੇਨ ਮੇ ਸਮਣਾ ਪਿਯਾ.
੨੭੯. ‘‘ਬਹੁਸ੍ਸੁਤਾ ਧਮ੍ਮਧਰਾ, ਅਰਿਯਾ ਧਮ੍ਮਜੀਵਿਨੋ;
ਅਤ੍ਥਂ ਧਮ੍ਮਞ੍ਚ ਦੇਸੇਨ੍ਤਿ, ਤੇਨ ਮੇ ਸਮਣਾ ਪਿਯਾ.
੨੮੦. ‘‘ਬਹੁਸ੍ਸੁਤਾ ਧਮ੍ਮਧਰਾ, ਅਰਿਯਾ ਧਮ੍ਮਜੀਵਿਨੋ;
ਏਕਗ੍ਗਚਿਤ੍ਤਾ ਸਤਿਮਨ੍ਤੋ, ਤੇਨ ਮੇ ਸਮਣਾ ਪਿਯਾ.
੨੮੧. ‘‘ਦੂਰਙ੍ਗਮਾ ਸਤਿਮਨ੍ਤੋ, ਮਨ੍ਤਭਾਣੀ ਅਨੁਦ੍ਧਤਾ;
ਦੁਕ੍ਖਸ੍ਸਨ੍ਤਂ ਪਜਾਨਨ੍ਤਿ, ਤੇਨ ਮੇ ਸਮਣਾ ਪਿਯਾ.
੨੮੨. ‘‘ਯਸ੍ਮਾ ਗਾਮਾ ਪਕ੍ਕਮਨ੍ਤਿ, ਨ ਵਿਲੋਕੇਨ੍ਤਿ ਕਿਞ੍ਚਨਂ;
ਅਨਪੇਕ੍ਖਾਵ ਗਚ੍ਛਨ੍ਤਿ, ਤੇਨ ਮੇ ਸਮਣਾ ਪਿਯਾ.
੨੮੩. ‘‘ਨ ਤੇਸਂ ਕੋਟ੍ਠੇ ਓਪੇਨ੍ਤਿ, ਨ ਕੁਮ੍ਭਿਂ ਨ ਖਲ਼ੋਪਿਯਂ;
ਪਰਿਨਿਟ੍ਠਿਤਮੇਸਾਨਾ, ਤੇਨ ਮੇ ਸਮਣਾ ਪਿਯਾ.
੨੮੪. ‘‘ਨ ਤੇ ਹਿਰਞ੍ਞਂ ਗਣ੍ਹਨ੍ਤਿ, ਨ ਸੁਵਣ੍ਣਂ ਨ ਰੂਪਿਯਂ;
ਪਚ੍ਚੁਪ੍ਪਨ੍ਨੇਨ ਯਾਪੇਨ੍ਤਿ, ਤੇਨ ਮੇ ਸਮਣਾ ਪਿਯਾ.
੨੮੫. ‘‘ਨਾਨਾਕੁਲਾ ਪਬ੍ਬਜਿਤਾ, ਨਾਨਾਜਨਪਦੇਹਿ ਚ;
ਅਞ੍ਞਮਞ੍ਞਂ ਪਿਯਾਯਨ੍ਤਿ [ਪਿਹਯਨ੍ਤਿ (ਕ.)], ਤੇਨ ਮੇ ਸਮਣਾ ਪਿਯਾ’’.
੨੮੬. ‘‘ਅਤ੍ਥਾਯ ਵਤ ਨੋ ਭੋਤਿ, ਕੁਲੇ ਜਾਤਾਸਿ ਰੋਹਿਨੀ;
ਸਦ੍ਧਾ ਬੁਦ੍ਧੇ ਚ ਧਮ੍ਮੇ ਚ, ਸਙ੍ਘੇ ਚ ਤਿਬ੍ਬਗਾਰਵਾ.
੨੮੭. ‘‘ਤੁਵਂ ਹੇਤਂ ਪਜਾਨਾਸਿ, ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ;
ਅਮ੍ਹਮ੍ਪਿ ਏਤੇ ਸਮਣਾ, ਪਟਿਗਣ੍ਹਨ੍ਤਿ ਦਕ੍ਖਿਣਂ’’.
੨੮੮. ‘‘ਪਤਿਟ੍ਠਿਤੋ ਹੇਤ੍ਥ ਯਞ੍ਞੋ, ਵਿਪੁਲੋ ਨੋ ਭਵਿਸ੍ਸਤਿ;
ਸਚੇ ਭਾਯਸਿ ਦੁਕ੍ਖਸ੍ਸ, ਸਚੇ ਤੇ ਦੁਕ੍ਖਮਪ੍ਪਿਯਂ.
੨੮੯. ‘‘ਉਪੇਹਿ ਸਰਣਂ ਬੁਦ੍ਧਂ, ਧਮ੍ਮਂ ਸਙ੍ਘਞ੍ਚ ਤਾਦਿਨਂ;
ਸਮਾਦਿਯਾਹਿ ਸੀਲਾਨਿ, ਤਂ ਤੇ ਅਤ੍ਥਾਯ ਹੇਹਿਤਿ’’.
੨੯੦. ‘‘ਉਪੇਮਿ ਸਰਣਂ ਬੁਦ੍ਧਂ, ਧਮ੍ਮਂ ਸਙ੍ਘਞ੍ਚ ਤਾਦਿਨਂ;
ਸਮਾਦਿਯਾਮਿ ਸੀਲਾਨਿ, ਤਂ ਮੇ ਅਤ੍ਥਾਯ ਹੇਹਿਤਿ.
੨੯੧. ‘‘ਬ੍ਰਹ੍ਮਬਨ੍ਧੁ ਪੁਰੇ ਆਸਿਂ, ਸੋ ਇਦਾਨਿਮ੍ਹਿ ਬ੍ਰਾਹ੍ਮਣੋ;
ਤੇਵਿਜ੍ਜੋ ਸੋਤ੍ਤਿਯੋ ਚਮ੍ਹਿ, ਵੇਦਗੂ ਚਮ੍ਹਿ ਨ੍ਹਾਤਕੋ’’.
… ਰੋਹਿਨੀ ਥੇਰੀ….