੧. ਏਕਕਨਿਪਾਤੋ

੧. ਅਞ੍ਞਤਰਾਥੇਰੀਗਾਥਾ

੧. ‘‘ਸੁਖਂ ਸੁਪਾਹਿ ਥੇਰਿਕੇ, ਕਤ੍ਵਾ ਚੋਲ਼ੇਨ ਪਾਰੁਤਾ;

ਉਪਸਨ੍ਤੋ ਹਿ ਤੇ ਰਾਗੋ, ਸੁਕ੍ਖਡਾਕਂ ਵ ਕੁਮ੍ਭਿਯ’’ਨ੍ਤਿ.

ਇਤ੍ਥਂ ਸੁਦਂ ਅਞ੍ਞਤਰਾ ਥੇਰੀ ਅਪਞ੍ਞਾਤਾ ਭਿਕ੍ਖੁਨੀ ਗਾਥਂ ਅਭਾਸਿਤ੍ਥਾਤਿ.

੨. ਮੁਤ੍ਤਾਥੇਰੀਗਾਥਾ

੨. ‘‘ਮੁਤ੍ਤੇ ਮੁਚ੍ਚਸ੍ਸੁ ਯੋਗੇਹਿ, ਚਨ੍ਦੋ ਰਾਹੁਗ੍ਗਹਾ ਇਵ;

ਵਿਪ੍ਪਮੁਤ੍ਤੇਨ ਚਿਤ੍ਤੇਨ, ਅਨਣਾ ਭੁਞ੍ਜ ਪਿਣ੍ਡਕ’’ਨ੍ਤਿ.

ਇਤ੍ਥਂ ਸੁਦਂ ਭਗਵਾ ਮੁਤ੍ਤਂ ਸਿਕ੍ਖਮਾਨਂ ਇਮਾਯ ਗਾਥਾਯ ਅਭਿਣ੍ਹਂ ਓਵਦਤੀਤਿ.

੩. ਪੁਣ੍ਣਾਥੇਰੀਗਾਥਾ

੩. ‘‘ਪੁਣ੍ਣੇ ਪੂਰਸ੍ਸੁ ਧਮ੍ਮੇਹਿ, ਚਨ੍ਦੋ ਪਨ੍ਨਰਸੇਰਿਵ;

ਪਰਿਪੁਣ੍ਣਾਯ ਪਞ੍ਞਾਯ, ਤਮੋਖਨ੍ਧਂ [ਤਮੋਕ੍ਖਨ੍ਧਂ (ਸੀ. ਸ੍ਯਾ.)] ਪਦਾਲਯਾ’’ਤਿ.

ਇਤ੍ਥਂ ਸੁਦਂ ਪੁਣ੍ਣਾ ਥੇਰੀ ਗਾਥਂ ਅਭਾਸਿਤ੍ਥਾਤਿ.

੪. ਤਿਸ੍ਸਾਥੇਰੀਗਾਥਾ

੪. ‘‘ਤਿਸ੍ਸੇ ਸਿਕ੍ਖਸ੍ਸੁ ਸਿਕ੍ਖਾਯ, ਮਾ ਤਂ ਯੋਗਾ ਉਪਚ੍ਚਗੁਂ;

ਸਬ੍ਬਯੋਗਵਿਸਂਯੁਤ੍ਤਾ, ਚਰ ਲੋਕੇ ਅਨਾਸਵਾ’’ਤਿ.

… ਤਿਸ੍ਸਾ ਥੇਰੀ….

੫. ਅਞ੍ਞਤਰਾਤਿਸ੍ਸਾਥੇਰੀਗਾਥਾ

੫. ‘‘ਤਿਸ੍ਸੇ ਯੁਞ੍ਜਸ੍ਸੁ ਧਮ੍ਮੇਹਿ, ਖਣੋ ਤਂ ਮਾ ਉਪਚ੍ਚਗਾ;

ਖਣਾਤੀਤਾ ਹਿ ਸੋਚਨ੍ਤਿ, ਨਿਰਯਮ੍ਹਿ ਸਮਪ੍ਪਿਤਾ’’ਤਿ.

… ਅਞ੍ਞਤਰਾ ਤਿਸ੍ਸਾ ਥੇਰੀ….

੬. ਧੀਰਾਥੇਰੀਗਾਥਾ

੬. ‘‘ਧੀਰੇ ਨਿਰੋਧਂ ਫੁਸੇਹਿ [ਫੁਸ੍ਸੇਹਿ (ਸੀ.)], ਸਞ੍ਞਾਵੂਪਸਮਂ ਸੁਖਂ;

ਆਰਾਧਯਾਹਿ ਨਿਬ੍ਬਾਨਂ, ਯੋਗਕ੍ਖੇਮਮਨੁਤ੍ਤਰ’’ਨ੍ਤਿ [ਯੋਗਕ੍ਖੇਮਂ ਅਨੁਤ੍ਤਰਨ੍ਤਿ (ਸੀ. ਸ੍ਯਾ.)].

… ਧੀਰਾ ਥੇਰੀ….

੭. ਵੀਰਾਥੇਰੀਗਾਥਾ

੭. ‘‘ਵੀਰਾ ਵੀਰੇਹਿ [ਧੀਰਾ ਧੀਰੇਹਿ (ਕ.)] ਧਮ੍ਮੇਹਿ, ਭਿਕ੍ਖੁਨੀ ਭਾਵਿਤਿਨ੍ਦ੍ਰਿਯਾ;

ਧਾਰੇਹਿ ਅਨ੍ਤਿਮਂ ਦੇਹਂ, ਜੇਤ੍ਵਾ ਮਾਰਂ ਸਵਾਹਿਨਿ’’ਨ੍ਤਿ [ਸਵਾਹਨਨ੍ਤਿ (ਕ.)].

… ਵੀਰਾ ਥੇਰੀ….

੮. ਮਿਤ੍ਤਾਥੇਰੀਗਾਥਾ

੮. ‘‘ਸਦ੍ਧਾਯ ਪਬ੍ਬਜਿਤ੍ਵਾਨ, ਮਿਤ੍ਤੇ ਮਿਤ੍ਤਰਤਾ ਭਵ;

ਭਾਵੇਹਿ ਕੁਸਲੇ ਧਮ੍ਮੇ, ਯੋਗਕ੍ਖੇਮਸ੍ਸ ਪਤ੍ਤਿਯਾ’’ਤਿ.

… ਮਿਤ੍ਤਾ ਥੇਰੀ….

੯. ਭਦ੍ਰਾਥੇਰੀਗਾਥਾ

੯. ‘‘ਸਦ੍ਧਾਯ ਪਬ੍ਬਜਿਤ੍ਵਾਨ, ਭਦ੍ਰੇ ਭਦ੍ਰਰਤਾ ਭਵ;

ਭਾਵੇਹਿ ਕੁਸਲੇ ਧਮ੍ਮੇ, ਯੋਗਕ੍ਖੇਮਮਨੁਤ੍ਤਰ’’ਨ੍ਤਿ.

… ਭਦ੍ਰਾ ਥੇਰੀ….

੧੦. ਉਪਸਮਾਥੇਰੀਗਾਥਾ

੧੦. ‘‘ਉਪਸਮੇ ਤਰੇ ਓਘਂ, ਮਚ੍ਚੁਧੇਯ੍ਯਂ ਸੁਦੁਤ੍ਤਰਂ;

ਧਾਰੇਹਿ ਅਨ੍ਤਿਮਂ ਦੇਹਂ, ਜੇਤ੍ਵਾ ਮਾਰਂ ਸਵਾਹਨ’’ਨ੍ਤਿ.

… ਉਪਸਮਾ ਥੇਰੀ….

੧੧. ਮੁਤ੍ਤਾਥੇਰੀਗਾਥਾ

੧੧. ‘‘ਸੁਮੁਤ੍ਤਾ ਸਾਧੁਮੁਤ੍ਤਾਮ੍ਹਿ, ਤੀਹਿ ਖੁਜ੍ਜੇਹਿ ਮੁਤ੍ਤਿਯਾ;

ਉਦੁਕ੍ਖਲੇਨ ਮੁਸਲੇਨ, ਪਤਿਨਾ ਖੁਜ੍ਜਕੇਨ ਚ;

ਮੁਤ੍ਤਾਮ੍ਹਿ ਜਾਤਿਮਰਣਾ, ਭਵਨੇਤ੍ਤਿ ਸਮੂਹਤਾ’’ਤਿ.

… ਮੁਤ੍ਤਾ ਥੇਰੀ….

੧੨. ਧਮ੍ਮਦਿਨ੍ਨਾਥੇਰੀਗਾਥਾ

੧੨. ‘‘ਛਨ੍ਦਜਾਤਾ ਅਵਸਾਯੀ, ਮਨਸਾ ਚ ਫੁਟਾ [ਫੁਟ੍ਠਾ (ਸ੍ਯਾ.), ਫੁਠਾ (ਸੀ. ਅਟ੍ਠ.)] ਸਿਯਾ;

ਕਾਮੇਸੁ ਅਪ੍ਪਟਿਬਦ੍ਧਚਿਤ੍ਤਾ [ਅਪ੍ਪਟਿਬਨ੍ਧਚਿਤ੍ਤਾ (ਕ.)], ਉਦ੍ਧਂਸੋਤਾਤਿ ਵੁਚ੍ਚਤੀ’’ਤਿ [ਉਦ੍ਧਂਸੋਤਾ ਵਿਮੁਚ੍ਚਤੀਤਿ (ਸੀ. ਪੀ.)].

… ਧਮ੍ਮਦਿਨ੍ਨਾ ਥੇਰੀ….

੧੩.ਵਿਸਾਖਾਥੇਰੀਗਾਥਾ

੧੩. ‘‘ਕਰੋਥ ਬੁਦ੍ਧਸਾਸਨਂ, ਯਂ ਕਤ੍ਵਾ ਨਾਨੁਤਪ੍ਪਤਿ;

ਖਿਪ੍ਪਂ ਪਾਦਾਨਿ ਧੋਵਿਤ੍ਵਾ, ਏਕਮਨ੍ਤੇ ਨਿਸੀਦਥਾ’’ਤਿ.

… ਵਿਸਾਖਾ ਥੇਰੀ….

੧੪.ਸੁਮਨਾਥੇਰੀਗਾਥਾ

੧੪. ‘‘ਧਾਤੁਯੋ ਦੁਕ੍ਖਤੋ ਦਿਸ੍ਵਾ, ਮਾ ਜਾਤਿਂ ਪੁਨਰਾਗਮਿ;

ਭਵੇ ਛਨ੍ਦਂ ਵਿਰਾਜੇਤ੍ਵਾ, ਉਪਸਨ੍ਤਾ ਚਰਿਸ੍ਸਸੀ’’ਤਿ.

… ਸੁਮਨਾ ਥੇਰੀ….

੧੫. ਉਤ੍ਤਰਾਥੇਰੀਗਾਥਾ

੧੫. ‘‘ਕਾਯੇਨ ਸਂਵੁਤਾ ਆਸਿਂ, ਵਾਚਾਯ ਉਦ ਚੇਤਸਾ;

ਸਮੂਲਂ ਤਣ੍ਹਮਬ੍ਬੁਯ੍ਹ, ਸੀਤਿਭੂਤਾਮ੍ਹਿ ਨਿਬ੍ਬੁਤਾ’’ਤਿ.

… ਉਤ੍ਤਰਾ ਥੇਰੀ….

੧੬. ਵੁਡ੍ਢਪਬ੍ਬਜਿਤਸੁਮਨਾਥੇਰੀਗਾਥਾ

੧੬. ‘‘ਸੁਖਂ ਤ੍ਵਂ ਵੁਡ੍ਢਿਕੇ ਸੇਹਿ, ਕਤ੍ਵਾ ਚੋਲ਼ੇਨ ਪਾਰੂਤਾ;

ਉਪਸਨ੍ਤੋ ਹਿ ਤੇ ਰਾਗੋ, ਸੀਤਿਭੂਤਾਸਿ ਨਿਬ੍ਬੁਤਾ’’ਤਿ.

… ਸੁਮਨਾ ਵੁਡ੍ਢਪਬ੍ਬਜਿਤਾ ਥੇਰੀ….

੧੭. ਧਮ੍ਮਾਥੇਰੀਗਾਥਾ

੧੭. ‘‘ਪਿਣ੍ਡਪਾਤਂ ਚਰਿਤ੍ਵਾਨ, ਦਣ੍ਡਮੋਲੁਬ੍ਭ ਦੁਬ੍ਬਲਾ;

ਵੇਧਮਾਨੇਹਿ ਗਤ੍ਤੇਹਿ, ਤਤ੍ਥੇਵ ਨਿਪਤਿਂ ਛਮਾ;

ਦਿਸ੍ਵਾ ਆਦੀਨਵਂ ਕਾਯੇ, ਅਥ ਚਿਤ੍ਤਂ ਵਿਮੁਚ੍ਚਿ ਮੇ’’ਤਿ.

… ਧਮ੍ਮਾ ਥੇਰੀ….

੧੮. ਸਙ੍ਘਾਥੇਰੀਗਾਥਾ

੧੮. ‘‘ਹਿਤ੍ਵਾ ਘਰੇ ਪਬ੍ਬਜਿਤ੍ਵਾ [ਪਬ੍ਬਜਿਤਾ (ਸੀ. ਅਟ੍ਠ.)], ਹਿਤ੍ਵਾ ਪੁਤ੍ਤਂ ਪਸੁਂ ਪਿਯਂ;

ਹਿਤ੍ਵਾ ਰਾਗਞ੍ਚ ਦੋਸਞ੍ਚ, ਅਵਿਜ੍ਜਞ੍ਚ ਵਿਰਾਜਿਯ;

ਸਮੂਲਂ ਤਣ੍ਹਮਬ੍ਬੁਯ੍ਹ, ਉਪਸਨ੍ਤਾਮ੍ਹਿ ਨਿਬ੍ਬੁਤਾ’’ਤਿ.

… ਸਙ੍ਘਾ ਥੇਰੀ….

ਏਕਕਨਿਪਾਤੋ ਨਿਟ੍ਠਿਤੋ.