੧. ਸੁਮੇਧਾਥੇਰੀਅਪਦਾਨਂ

ਅਥ ਥੇਰਿਕਾਪਦਾਨਾਨਿ ਸੁਣਾਥ –

੧. ‘‘ਭਗਵਤਿ ਕੋਣਾਗਮਨੇ, ਸਙ੍ਘਾਰਾਮਮ੍ਹਿ ਨਵਨਿਵੇਸਨਮ੍ਹਿ [ਨਿਵੇਸਮ੍ਹਿ (ਸ੍ਯਾ.)];

ਸਖਿਯੋ ਤਿਸ੍ਸੋ ਜਨਿਯੋ, ਵਿਹਾਰਦਾਨਂ ਅਦਾਸਿਮ੍ਹ.

੨. ‘‘ਦਸਕ੍ਖਤ੍ਤੁਂ ਸਤਕ੍ਖਤ੍ਤੁਂ, ਦਸਸਤਕ੍ਖਤ੍ਤੁਂ ਸਤਾਨਞ੍ਚ ਸਤਕ੍ਖਤ੍ਤੁਂ [ਸਤਾਨਿ ਚ ਸਤ੍ਤਕ੍ਖਤ੍ਤੁਂ (ਸੀ. ਕ.)];

ਦੇਵੇਸੁ ਉਪਪਜ੍ਜਿਮ੍ਹ, ਕੋ ਵਾਦੋ ਮਾਨੁਸੇ ਭਵੇ.

੩. ‘‘ਦੇਵੇ ਮਹਿਦ੍ਧਿਕਾ ਅਹੁਮ੍ਹ, ਮਾਨੁਸਕਮ੍ਹਿ ਕੋ ਵਾਦੋ;

ਸਤ੍ਤਰਤਨਮਹੇਸੀ [ਸਤ੍ਤਰਤਨਸ੍ਸ ਮਹੇਸੀ (ਸੀ. ਪੀ.)], ਇਤ੍ਥਿਰਤਨਂ ਅਹਂ ਭਵਿਂ.

੪. ‘‘ਇਧ ਸਞ੍ਚਿਤਕੁਸਲਾ [ਤਤ੍ਥ ਸਞ੍ਚਿਤਂ ਕੁਸਲਂ (ਸ੍ਯਾ.)], ਸੁਸਮਿਦ੍ਧਕੁਲਪ੍ਪਜਾ;

ਧਨਞ੍ਜਾਨੀ ਚ ਖੇਮਾ ਚ, ਅਹਮ੍ਪਿ ਚ ਤਯੋ ਜਨਾ.

੫. ‘‘ਆਰਾਮਂ ਸੁਕਤਂ ਕਤ੍ਵਾ, ਸਬ੍ਬਾਵਯਵਮਣ੍ਡਿਤਂ;

ਬੁਦ੍ਧਪ੍ਪਮੁਖਸਙ੍ਘਸ੍ਸ, ਨਿਯ੍ਯਾਦੇਤ੍ਵਾ ਸਮੋਦਿਤਾ.

੬. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਤਸ੍ਸ ਕਮ੍ਮਸ੍ਸ ਵਾਹਸਾ;

ਦੇਵੇਸੁ ਅਗ੍ਗਤਂ ਪਤ੍ਤਾ, ਮਨੁਸ੍ਸੇਸੁ ਤਥੇਵ ਚ.

੭. ‘‘ਇਮਸ੍ਮਿਂਯੇਵ ਕਪ੍ਪਮ੍ਹਿ, ਬ੍ਰਹ੍ਮਬਨ੍ਧੁ ਮਹਾਯਸੋ;

ਕਸ੍ਸਪੋ ਨਾਮ ਗੋਤ੍ਤੇਨ, ਉਪ੍ਪਜ੍ਜਿ ਵਦਤਂ ਵਰੋ.

੮. ‘‘ਉਪਟ੍ਠਾਕੋ ਮਹੇਸਿਸ੍ਸ, ਤਦਾ ਆਸਿ ਨਰਿਸ੍ਸਰੋ;

ਕਾਸਿਰਾਜਾ ਕਿਕੀ ਨਾਮ, ਬਾਰਾਣਸਿਪੁਰੁਤ੍ਤਮੇ.

੯. ‘‘ਤਸ੍ਸਾਸੁਂ ਸਤ੍ਤ ਧੀਤਰੋ, ਰਾਜਕਞ੍ਞਾ ਸੁਖੇਧਿਤਾ [ਸੁਖੇਥਿਤਾ (ਸ੍ਯਾ.)];

ਬੁਦ੍ਧੋਪਟ੍ਠਾਨਨਿਰਤਾ, ਬ੍ਰਹ੍ਮਚਰਿਯਂ ਚਰਿਂਸੁ ਤਾ.

੧੦. ‘‘ਤਾਸਂ ਸਹਾਯਿਕਾ ਹੁਤ੍ਵਾ, ਸੀਲੇਸੁ ਸੁਸਮਾਹਿਤਾ;

ਦਤ੍ਵਾ ਦਾਨਾਨਿ ਸਕ੍ਕਚ੍ਚਂ, ਅਗਾਰੇਵ ਵਤਂ [ਅਗਾਰੇਵ ਵਤ੍ਤਂ (ਸ੍ਯਾ.)] ਚਰਿਂ.

੧੧. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸੂਪਗਾ ਅਹਂ.

੧੨. ‘‘ਤਤੋ ਚੁਤਾ ਯਾਮਮਗਂ [ਯਾਮਸਗ੍ਗਂ (ਸ੍ਯਾ.)], ਤਤੋਹਂ ਤੁਸਿਤਂ ਗਤਾ;

ਤਤੋ ਚ ਨਿਮ੍ਮਾਨਰਤਿਂ, ਵਸਵਤ੍ਤਿਪੁਰਂ ਤਤੋ.

੧੩. ‘‘ਯਤ੍ਥ ਯਤ੍ਥੂਪਪਜ੍ਜਾਮਿ, ਪੁਞ੍ਞਕਮ੍ਮਸਮੋਹਿਤਾ;

ਤਤ੍ਥ ਤਤ੍ਥੇਵ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

੧੪. ‘‘ਤਤੋ ਚੁਤਾ ਮਨੁਸ੍ਸਤ੍ਤੇ, ਰਾਜੂਨਂ ਚਕ੍ਕਵਤ੍ਤਿਨਂ;

ਮਣ੍ਡਲੀਨਞ੍ਚ ਰਾਜੂਨਂ, ਮਹੇਸਿਤ੍ਤਮਕਾਰਯਿਂ.

੧੫. ‘‘ਸਮ੍ਪਤ੍ਤਿਮਨੁਭੋਤ੍ਵਾਨ, ਦੇਵੇਸੁ ਮਾਨੁਸੇਸੁ ਚ;

ਸਬ੍ਬਤ੍ਥ ਸੁਖਿਤਾ ਹੁਤ੍ਵਾ, ਨੇਕਜਾਤੀਸੁ ਸਂਸਰਿਂ.

੧੬. ‘‘ਸੋ ਹੇਤੁ ਚ ਸੋ ਪਭਵੋ, ਤਮ੍ਮੂਲਂ ਸਾਸਨੇ ਖਮਂ [ਤਮ੍ਮੂਲਂ ਸਾ ਚ ਸਾਸਨੇ ਖਨ੍ਤਿ (ਸੀ. ਪੀ. ਕ.)];

ਪਠਮਂ ਤਂ ਸਮੋਧਾਨਂ, ਤਂ ਧਮ੍ਮਰਤਾਯ ਨਿਬ੍ਬਾਨਂ [ਨਿਬ੍ਬੁਤਂ (ਸ੍ਯਾ.)].

੧੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਨਾਗੀਵ ਬਨ੍ਧਨਂ ਛੇਤ੍ਵਾ, ਵਿਹਰਾਮਿ ਅਨਾਸਵਾ.

੧੮. ‘‘ਸ੍ਵਾਗਤਂ ਵਤ ਮੇ ਆਸਿ, ਮਮ ਬੁਦ੍ਧਸ੍ਸ [ਬੁਦ੍ਧਸੇਟ੍ਠਸ੍ਸ (ਸੀ. ਸ੍ਯਾ. ਕ.)] ਸਨ੍ਤਿਕੇ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਸੁਮੇਧਾ ਭਿਕ੍ਖੁਨੀ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਮੇਧਾਥੇਰਿਯਾਪਦਾਨਂ ਪਠਮਂ.