੩. ਤਤਿਯਵਗ੍ਗੋ

੧. ਉਤ੍ਤਰਤ੍ਥੇਰਗਾਥਾ

੧੬੧. ‘‘ਖਨ੍ਧਾ ਮਯਾ ਪਰਿਞ੍ਞਾਤਾ, ਤਣ੍ਹਾ ਮੇ ਸੁਸਮੂਹਤਾ;

ਭਾਵਿਤਾ ਮਮ ਬੋਜ੍ਝਙ੍ਗਾ, ਪਤ੍ਤੋ ਮੇ ਆਸਵਕ੍ਖਯੋ.

੧੬੨. ‘‘ਸੋਹਂ ਖਨ੍ਧੇ ਪਰਿਞ੍ਞਾਯ, ਅਬ੍ਬਹਿਤ੍ਵਾਨ [ਅਬ੍ਬੁਹਿਤ੍ਵਾਨ (ਕ.)] ਜਾਲਿਨਿਂ;

ਭਾਵਯਿਤ੍ਵਾਨ ਬੋਜ੍ਝਙ੍ਗੇ, ਨਿਬ੍ਬਾਯਿਸ੍ਸਂ ਅਨਾਸਵੋ’’ਤਿ.

… ਉਤ੍ਤਰੋ ਥੇਰੋ….

੨. ਭਦ੍ਦਜਿਤ੍ਥੇਰਗਾਥਾ

੧੬੩. ‘‘ਪਨਾਦੋ ਨਾਮ ਸੋ ਰਾਜਾ, ਯਸ੍ਸ ਯੂਪੋ ਸੁਵਣ੍ਣਯੋ;

ਤਿਰਿਯਂ ਸੋਲ਼ਸੁਬ੍ਬੇਧੋ [ਸੋਲ਼ਸਪਬ੍ਬੇਧੋ (ਸੀ. ਅਟ੍ਠ.), ਸੋਲ਼ਸਬ੍ਬਾਣੋ (?)], ਉਬ੍ਭਮਾਹੁ [ਉਦ੍ਧਮਾਹੁ (ਸੀ.), ਉਚ੍ਚਮਾਹੁ (ਸ੍ਯਾ.)] ਸਹਸ੍ਸਧਾ.

੧੬੪. ‘‘ਸਹਸ੍ਸਕਣ੍ਡੋ ਸਤਗੇਣ੍ਡੁ, ਧਜਾਲੁ ਹਰਿਤਾਮਯੋ;

ਅਨਚ੍ਚੁਂ ਤਤ੍ਥ ਗਨ੍ਧਬ੍ਬਾ, ਛਸਹਸ੍ਸਾਨਿ ਸਤ੍ਤਧਾ’’ਤਿ.

… ਭਦ੍ਦਜਿਤ੍ਥੇਰੋ….

੩. ਸੋਭਿਤਤ੍ਥੇਰਗਾਥਾ

੧੬੫. ‘‘ਸਤਿਮਾ ਪਞ੍ਞਵਾ ਭਿਕ੍ਖੁ, ਆਰਦ੍ਧਬਲਵੀਰਿਯੋ;

ਪਞ੍ਚ ਕਪ੍ਪਸਤਾਨਾਹਂ, ਏਕਰਤ੍ਤਿਂ ਅਨੁਸ੍ਸਰਿਂ.

੧੬੬. ‘‘ਚਤ੍ਤਾਰੋ ਸਤਿਪਟ੍ਠਾਨੇ, ਸਤ੍ਤ ਅਟ੍ਠ ਚ ਭਾਵਯਂ;

ਪਞ੍ਚ ਕਪ੍ਪਸਤਾਨਾਹਂ, ਏਕਰਤ੍ਤਿਂ ਅਨੁਸ੍ਸਰਿ’’ਨ੍ਤਿ.

… ਸੋਭਿਤੋ ਥੇਰੋ….

੪. ਵਲ੍ਲਿਯਤ੍ਥੇਰਗਾਥਾ

੧੬੭. ‘‘ਯਂ ਕਿਚ੍ਚਂ ਦਲ਼੍ਹਵੀਰਿਯੇਨ, ਯਂ ਕਿਚ੍ਚਂ ਬੋਦ੍ਧੁਮਿਚ੍ਛਤਾ;

ਕਰਿਸ੍ਸਂ ਨਾਵਰਜ੍ਝਿਸ੍ਸਂ [ਨਾਵਰੁਜ੍ਝਿਸ੍ਸਂ (ਕ. ਸੀ. ਕ.)], ਪਸ੍ਸ ਵੀਰਿਯਂ ਪਰਕ੍ਕਮ.

੧੬੮. ‘‘ਤ੍ਵਞ੍ਚ ਮੇ ਮਗ੍ਗਮਕ੍ਖਾਹਿ, ਅਞ੍ਜਸਂ ਅਮਤੋਗਧਂ;

ਅਹਂ ਮੋਨੇਨ ਮੋਨਿਸ੍ਸਂ, ਗਙ੍ਗਾਸੋਤੋਵ ਸਾਗਰ’’ਨ੍ਤਿ.

… ਵਲ੍ਲਿਯੋ ਥੇਰੋ….

੫. ਵੀਤਸੋਕਤ੍ਥੇਰਗਾਥਾ

੧੬੯. ‘‘ਕੇਸੇ ਮੇ ਓਲਿਖਿਸ੍ਸਨ੍ਤਿ, ਕਪ੍ਪਕੋ ਉਪਸਙ੍ਕਮਿ;

ਤਤੋ ਆਦਾਸਮਾਦਾਯ, ਸਰੀਰਂ ਪਚ੍ਚਵੇਕ੍ਖਿਸਂ.

੧੭੦. ‘‘ਤੁਚ੍ਛੋ ਕਾਯੋ ਅਦਿਸ੍ਸਿਤ੍ਥ, ਅਨ੍ਧਕਾਰੋ ਤਮੋ ਬ੍ਯਗਾ;

ਸਬ੍ਬੇ ਚੋਲ਼ਾ ਸਮੁਚ੍ਛਿਨ੍ਨਾ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

… ਵੀਤਸੋਕੋ ਥੇਰੋ….

੬. ਪੁਣ੍ਣਮਾਸਤ੍ਥੇਰਗਾਥਾ

੧੭੧. ‘‘ਪਞ੍ਚ ਨੀਵਰਣੇ ਹਿਤ੍ਵਾ, ਯੋਗਕ੍ਖੇਮਸ੍ਸ ਪਤ੍ਤਿਯਾ;

ਧਮ੍ਮਾਦਾਸਂ ਗਹੇਤ੍ਵਾਨ, ਞਾਣਦਸ੍ਸਨਮਤ੍ਤਨੋ.

੧੭੨. ‘‘ਪਚ੍ਚਵੇਕ੍ਖਿਂ ਇਮਂ ਕਾਯਂ, ਸਬ੍ਬਂ ਸਨ੍ਤਰਬਾਹਿਰਂ;

ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਤੁਚ੍ਛੋ ਕਾਯੋ ਅਦਿਸ੍ਸਥਾ’’ਤਿ.

… ਪੁਣ੍ਣਮਾਸੋ ਥੇਰੋ….

੭. ਨਨ੍ਦਕਤ੍ਥੇਰਗਾਥਾ

੧੭੩. ‘‘ਯਥਾਪਿ ਭਦ੍ਦੋ ਆਜਞ੍ਞੋ, ਖਲਿਤ੍ਵਾ ਪਤਿਤਿਟ੍ਠਤਿ;

ਭਿਯ੍ਯੋ ਲਦ੍ਦਾਨ ਸਂਵੇਗਂ, ਅਦੀਨੋ ਵਹਤੇ ਧੁਰਂ.

੧੭੪. ‘‘ਏਵਂ ਦਸ੍ਸਨਸਮ੍ਪਨ੍ਨਂ, ਸਮ੍ਮਾਸਮ੍ਬੁਦ੍ਧਸਾਵਕਂ;

ਆਜਾਨੀਯਂ ਮਂ ਧਾਰੇਥ, ਪੁਤ੍ਤਂ ਬੁਦ੍ਧਸ੍ਸ ਓਰਸ’’ਨ੍ਤਿ.

… ਨਨ੍ਦਕੋ ਥੇਰੋ….

੮. ਭਰਤਤ੍ਥੇਰਗਾਥਾ

੧੭੫. ‘‘ਏਹਿ ਨਨ੍ਦਕ ਗਚ੍ਛਾਮ, ਉਪਜ੍ਝਾਯਸ੍ਸ ਸਨ੍ਤਿਕਂ;

ਸੀਹਨਾਦਂ ਨਦਿਸ੍ਸਾਮ, ਬੁਦ੍ਧਸੇਟ੍ਠਸ੍ਸ ਸਮ੍ਮੁਖਾ.

੧੭੬. ‘‘ਯਾਯ ਨੋ ਅਨੁਕਮ੍ਪਾਯ, ਅਮ੍ਹੇ ਪਬ੍ਬਾਜਯੀ ਮੁਨਿ;

ਸੋ ਨੋ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ’’ਤਿ.

… ਭਰਤੋ ਥੇਰੋ….

੯. ਭਾਰਦ੍ਵਾਜਤ੍ਥੇਰਗਾਥਾ

੧੭੭. ‘‘ਨਦਨ੍ਤਿ ਏਵਂ ਸਪ੍ਪਞ੍ਞਾ, ਸੀਹਾਵ ਗਿਰਿਗਬ੍ਭਰੇ;

ਵੀਰਾ ਵਿਜਿਤਸਙ੍ਗਾਮਾ, ਜੇਤ੍ਵਾ ਮਾਰਂ ਸਵਾਹਨਿਂ [ਸਵਾਹਨਂ (ਬਹੂਸੁ)].

੧੭੮. ‘‘ਸਤ੍ਥਾ ਚ ਪਰਿਚਿਣ੍ਣੋ ਮੇ, ਧਮ੍ਮੋ ਸਙ੍ਘੋ ਚ ਪੂਜਿਤੋ;

ਅਹਞ੍ਚ ਵਿਤ੍ਤੋ ਸੁਮਨੋ, ਪੁਤ੍ਤਂ ਦਿਸ੍ਵਾ ਅਨਾਸਵ’’ਨ੍ਤਿ.

… ਭਾਰਦ੍ਵਾਜੋ ਥੇਰੋ….

੧੦. ਕਣ੍ਹਦਿਨ੍ਨਤ੍ਥੇਰਗਾਥਾ

੧੭੯. ‘‘ਉਪਾਸਿਤਾ ਸਪ੍ਪੁਰਿਸਾ, ਸੁਤਾ ਧਮ੍ਮਾ ਅਭਿਣ੍ਹਸੋ;

ਸੁਤ੍ਵਾਨ ਪਟਿਪਜ੍ਜਿਸ੍ਸਂ, ਅਞ੍ਜਸਂ ਅਮਤੋਗਧਂ.

੧੮੦. ‘‘ਭਵਰਾਗਹਤਸ੍ਸ ਮੇ ਸਤੋ, ਭਵਰਾਗੋ ਪੁਨ ਮੇ ਨ ਵਿਜ੍ਜਤਿ;

ਨ ਚਾਹੁ ਨ ਚ ਮੇ ਭਵਿਸ੍ਸਤਿ, ਨ ਚ ਮੇ ਏਤਰਹਿ ਵਿਜ੍ਜਤੀ’’ਤਿ.

… ਕਣ੍ਹਦਿਨ੍ਨੋ ਥੇਰੋ….

ਵਗ੍ਗੋ ਤਤਿਯੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਉਤ੍ਤਰੋ ਭਦ੍ਦਜਿਤ੍ਥੇਰੋ, ਸੋਭਿਤੋ ਵਲ੍ਲਿਯੋ ਇਸਿ;

ਵੀਤਸੋਕੋ ਚ ਯੋ ਥੇਰੋ, ਪੁਣ੍ਣਮਾਸੋ ਚ ਨਨ੍ਦਕੋ;

ਭਰਤੋ ਭਾਰਦ੍ਵਾਜੋ ਚ, ਕਣ੍ਹਦਿਨ੍ਨੋ ਮਹਾਮੁਨੀਤਿ.