੪. ਚਤੁਤ੍ਥਵਗ੍ਗੋ

੧. ਮਿਗਸਿਰਤ੍ਥੇਰਗਾਥਾ

੧੮੧. ‘‘ਯਤੋ ਅਹਂ ਪਬ੍ਬਜਿਤੋ, ਸਮ੍ਮਾਸਮ੍ਬੁਦ੍ਧਸਾਸਨੇ;

ਵਿਮੁਚ੍ਚਮਾਨੋ ਉਗ੍ਗਚ੍ਛਿਂ, ਕਾਮਧਾਤੁਂ ਉਪਚ੍ਚਗਂ.

੧੮੨. ‘‘ਬ੍ਰਹ੍ਮੁਨੋ ਪੇਕ੍ਖਮਾਨਸ੍ਸ, ਤਤੋ ਚਿਤ੍ਤਂ ਵਿਮੁਚ੍ਚਿ ਮੇ;

ਅਕੁਪ੍ਪਾ ਮੇ ਵਿਮੁਤ੍ਤੀਤਿ, ਸਬ੍ਬਸਂਯੋਜਨਕ੍ਖਯਾ’’ਤਿ.

… ਮਿਗਸਿਰੋ ਥੇਰੋ….

੨. ਸਿਵਕਤ੍ਥੇਰਗਾਥਾ

੧੮੩. ‘‘ਅਨਿਚ੍ਚਾਨਿ ਗਹਕਾਨਿ, ਤਤ੍ਥ ਤਤ੍ਥ ਪੁਨਪ੍ਪੁਨਂ;

ਗਹਕਾਰਂ [ਗਹਕਾਰਕਂ (ਸੀ. ਪੀ.)] ਗਵੇਸਨ੍ਤੋ, ਦੁਕ੍ਖਾ ਜਾਤਿ ਪੁਨਪ੍ਪੁਨਂ.

੧੮੪. ‘‘ਗਹਕਾਰਕ ਦਿਟ੍ਠੋਸਿ, ਪੁਨ ਗੇਹਂ ਨ ਕਾਹਸਿ;

ਸਬ੍ਬਾ ਤੇ ਫਾਸੁਕਾ ਭਗ੍ਗਾ, ਥੂਣਿਕਾ [ਥੂਣਿਰਾ (ਪੀ. ਕ.), ਧੁਣਿਰਾ (ਸ੍ਯਾ.)] ਚ ਵਿਦਾਲਿਤਾ [ਪਦਾਲਿਤਾ (ਸੀ. ਸ੍ਯਾ.)];

ਵਿਮਰਿਯਾਦਿਕਤਂ ਚਿਤ੍ਤਂ, ਇਧੇਵ ਵਿਧਮਿਸ੍ਸਤੀ’’ਤਿ.

… ਸਿਵਕੋ [ਸੀਵਕੋ (ਸੀ.)] ਥੇਰੋ….

੩. ਉਪਵਾਣਤ੍ਥੇਰਗਾਥਾ

੧੮੫. ‘‘ਅਰਹਂ ਸੁਗਤੋ ਲੋਕੇ, ਵਾਤੇਹਾਬਾਧਿਤੋ [… ਬਾਧਿਤੋ (ਕ.)] ਮੁਨਿ;

ਸਚੇ ਉਣ੍ਹੋਦਕਂ ਅਤ੍ਥਿ, ਮੁਨਿਨੋ ਦੇਹਿ ਬ੍ਰਾਹ੍ਮਣ.

੧੮੬. ‘‘ਪੂਜਿਤੋ ਪੂਜਨੇਯ੍ਯਾਨਂ [ਪੂਜਨੀਯਾਨਂ (ਸੀ.)], ਸਕ੍ਕਰੇਯ੍ਯਾਨ ਸਕ੍ਕਤੋ;

ਅਪਚਿਤੋਪਚੇਯ੍ਯਾਨਂ [ਅਪਚਨੀਯਾਨਂ (ਸੀ.), ਅਪਚਿਨੇਯ੍ਯਾਨਂ (ਸ੍ਯਾ.)], ਤਸ੍ਸ ਇਚ੍ਛਾਮਿ ਹਾਤਵੇ’’ਤਿ.

… ਉਪਵਾਣੋ ਥੇਰੋ….

੪. ਇਸਿਦਿਨ੍ਨਤ੍ਥੇਰਗਾਥਾ

੧੮੭. ‘‘ਦਿਟ੍ਠਾ ਮਯਾ ਧਮ੍ਮਧਰਾ ਉਪਾਸਕਾ, ਕਾਮਾ ਅਨਿਚ੍ਚਾ ਇਤਿ ਭਾਸਮਾਨਾ;

ਸਾਰਤ੍ਤਰਤ੍ਤਾ ਮਣਿਕੁਣ੍ਡਲੇਸੁ, ਪੁਤ੍ਤੇਸੁ ਦਾਰੇਸੁ ਚ ਤੇ ਅਪੇਕ੍ਖਾ.

੧੮੮. ‘‘ਅਦ੍ਧਾ ਨ ਜਾਨਨ੍ਤਿ ਯਤੋਧ ਧਮ੍ਮਂ, ਕਾਮਾ ਅਨਿਚ੍ਚਾ ਇਤਿ ਚਾਪਿ ਆਹੁ;

ਰਾਗਞ੍ਚ ਤੇਸਂ ਨ ਬਲਤ੍ਥਿ ਛੇਤ੍ਤੁਂ, ਤਸ੍ਮਾ ਸਿਤਾ ਪੁਤ੍ਤਦਾਰਂ ਧਨਞ੍ਚਾ’’ਤਿ.

… ਇਸਿਦਿਨ੍ਨੋ ਥੇਰੋ….

੫. ਸਮ੍ਬੁਲਕਚ੍ਚਾਨਤ੍ਥੇਰਗਾਥਾ

੧੮੯. ‘‘ਦੇਵੋ ਚ ਵਸ੍ਸਤਿ ਦੇਵੋ ਚ ਗਲ਼ਗਲ਼ਾਯਤਿ,

ਏਕਕੋ ਚਾਹਂ ਭੇਰਵੇ ਬਿਲੇ ਵਿਹਰਾਮਿ;

ਤਸ੍ਸ ਮਯ੍ਹਂ ਏਕਕਸ੍ਸ ਭੇਰਵੇ ਬਿਲੇ ਵਿਹਰਤੋ,

ਨਤ੍ਥਿ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ.

੧੯੦. ‘‘ਧਮ੍ਮਤਾ ਮਮਸਾ ਯਸ੍ਸ ਮੇ, ਏਕਕਸ੍ਸ ਭੇਰਵੇ ਬਿਲੇ;

ਵਿਹਰਤੋ ਨਤ੍ਥਿ ਭਯਂ ਵਾ, ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ’’ਤਿ.

… ਸਮ੍ਬੁਲਕਚ੍ਚਾਨੋ [ਸਮ੍ਬਹੁਲਕਚ੍ਚਾਨੋ (ਕ.)] ਥੇਰੋ….

੬. ਨਿਤਕਤ੍ਥੇਰਗਾਥਾ

੧੯੧. [ਉਦਾ. ੩੪ ਉਦਾਨੇਪਿ] ‘‘ਕਸ੍ਸ ਸੇਲੂਪਮਂ ਚਿਤ੍ਤਂ, ਠਿਤਂ ਨਾਨੁਪਕਮ੍ਪਤਿ;

ਵਿਰਤ੍ਤਂ ਰਜਨੀਯੇਸੁ, ਕੁਪ੍ਪਨੀਯੇ ਨ ਕੁਪ੍ਪਤਿ;

ਯਸ੍ਸੇਵਂ ਭਾਵਿਤਂ ਚਿਤ੍ਤਂ, ਕੁਤੋ ਤਂ ਦੁਕ੍ਖਮੇਸ੍ਸਤਿ.

੧੯੨. ‘‘ਮਮ ਸੇਲੂਪਮਂ ਚਿਤ੍ਤਂ, ਠਿਤਂ ਨਾਨੁਪਕਮ੍ਪਤਿ;

ਵਿਰਤ੍ਤਂ ਰਜਨੀਯੇਸੁ, ਕੁਪ੍ਪਨੀਯੇ ਨ ਕੁਪ੍ਪਤਿ;

ਮਮੇਵਂ ਭਾਵਿਤਂ ਚਿਤ੍ਤਂ, ਕੁਤੋ ਮਂ ਦੁਕ੍ਖਮੇਸ੍ਸਤੀ’’ਤਿ.

… ਨਿਤਕੋ [ਖਿਤਕੋ (ਸੀ. ਸ੍ਯਾ.)] ਥੇਰੋ….

੭. ਸੋਣਪੋਟਿਰਿਯਤ੍ਥੇਰਗਾਥਾ

੧੯੩. ‘‘ਨ ਤਾਵ ਸੁਪਿਤੁਂ ਹੋਤਿ, ਰਤ੍ਤਿ ਨਕ੍ਖਤ੍ਤਮਾਲਿਨੀ;

ਪਟਿਜਗ੍ਗਿਤੁਮੇਵੇਸਾ, ਰਤ੍ਤਿ ਹੋਤਿ ਵਿਜਾਨਤਾ.

੧੯੪. ‘‘ਹਤ੍ਥਿਕ੍ਖਨ੍ਧਾਵਪਤਿਤਂ, ਕੁਞ੍ਜਰੋ ਚੇ ਅਨੁਕ੍ਕਮੇ;

ਸਙ੍ਗਾਮੇ ਮੇ ਮਤਂ ਸੇਯ੍ਯੋ, ਯਞ੍ਚੇ ਜੀਵੇ ਪਰਾਜਿਤੋ’’ਤਿ.

… ਸੋਣੋ ਪੋਟਿਰਿਯੋ [ਸੇਲਿਸ੍ਸਰਿਯੋ (ਸੀ.), ਪੋਟ੍ਟਿਰਿਯਪੁਤ੍ਤੋ (ਸ੍ਯਾ.)] ਥੇਰੋ ….

੮. ਨਿਸਭਤ੍ਥੇਰਗਾਥਾ

੧੯੫. ‘‘ਪਞ੍ਚ ਕਾਮਗੁਣੇ ਹਿਤ੍ਵਾ, ਪਿਯਰੂਪੇ ਮਨੋਰਮੇ;

ਸਦ੍ਧਾਯ ਘਰਾ ਨਿਕ੍ਖਮ੍ਮ, ਦੁਕ੍ਖਸ੍ਸਨ੍ਤਕਰੋ ਭਵੇ.

੧੯੬. ‘‘ਨਾਭਿਨਨ੍ਦਾਮਿ ਮਰਣਂ, ਨਾਭਿਨਨ੍ਦਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਸਮ੍ਪਜਾਨੋ ਪਤਿਸ੍ਸਤੋ’’ਤਿ.

… ਨਿਸਭੋ ਥੇਰੋ….

੯. ਉਸਭਤ੍ਥੇਰਗਾਥਾ

੧੯੭. ‘‘ਅਮ੍ਬਪਲ੍ਲਵਸਙ੍ਕਾਸਂ, ਅਂਸੇ ਕਤ੍ਵਾਨ ਚੀਵਰਂ;

ਨਿਸਿਨ੍ਨੋ ਹਤ੍ਥਿਗੀਵਾਯਂ, ਗਾਮਂ ਪਿਣ੍ਡਾਯ ਪਾਵਿਸਿਂ.

੧੯੮. ‘‘ਹਤ੍ਥਿਕ੍ਖਨ੍ਧਤੋ ਓਰੁਯ੍ਹ, ਸਂਵੇਗਂ ਅਲਭਿਂ ਤਦਾ;

ਸੋਹਂ ਦਿਤ੍ਤੋ ਤਦਾ ਸਨ੍ਤੋ, ਪਤ੍ਤੋ ਮੇ ਆਸਵਕ੍ਖਯੋ’’ਤਿ.

… ਉਸਭੋ ਥੇਰੋ….

੧੦. ਕਪ੍ਪਟਕੁਰਤ੍ਥੇਰਗਾਥਾ

੧੯੯. ‘‘ਅਯਮਿਤਿ ਕਪ੍ਪਟੋ ਕਪ੍ਪਟਕੁਰੋ, ਅਚ੍ਛਾਯ ਅਤਿਭਰਿਤਾਯ [ਅਤਿਭਰਿਯਾਯ (ਸੀ. ਕ.), ਅਚ੍ਚਂ ਭਰਾਯ (ਸ੍ਯਾ.)];

ਅਮਤਘਟਿਕਾਯਂ ਧਮ੍ਮਕਟਮਤ੍ਤੋ [ਧਮ੍ਮਕਟਪਤ੍ਤੋ (ਸ੍ਯਾ. ਕ. ਅਟ੍ਠ.), ਧਮ੍ਮਕਟਮਗ੍ਗੋ (ਸੀ. ਅਟ੍ਠ.)], ਕਤਪਦਂ ਝਾਨਾਨਿ ਓਚੇਤੁਂ.

੨੦੦. ‘‘ਮਾ ਖੋ ਤ੍ਵਂ ਕਪ੍ਪਟ ਪਚਾਲੇਸਿ, ਮਾ ਤ੍ਵਂ ਉਪਕਣ੍ਣਮ੍ਹਿ ਤਾਲ਼ੇਸ੍ਸਂ;

ਨ ਹਿ [ਨ ਵਾ (ਕ.)] ਤ੍ਵਂ ਕਪ੍ਪਟ ਮਤ੍ਤਮਞ੍ਞਾਸਿ, ਸਙ੍ਘਮਜ੍ਝਮ੍ਹਿ ਪਚਲਾਯਮਾਨੋਤਿ.

… ਕਪ੍ਪਟਕੁਰੋ ਥੇਰੋ….

ਵਗ੍ਗੋ ਚਤੁਤ੍ਥੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਮਿਗਸਿਰੋ ਸਿਵਕੋ ਚ, ਉਪਵਾਨੋ ਚ ਪਣ੍ਡਿਤੋ;

ਇਸਿਦਿਨ੍ਨੋ ਚ ਕਚ੍ਚਾਨੋ, ਨਿਤਕੋ ਚ ਮਹਾਵਸੀ;

ਪੋਟਿਰਿਯਪੁਤ੍ਤੋ ਨਿਸਭੋ, ਉਸਭੋ ਕਪ੍ਪਟਕੁਰੋਤਿ.