੧. ਮਹਾਕਸ੍ਸਪਤ੍ਥੇਰਗਾਥਾ

੧੦੫੪. ‘‘ਨ ਗਣੇਨ ਪੁਰਕ੍ਖਤੋ ਚਰੇ, ਵਿਮਨੋ ਹੋਤਿ ਸਮਾਧਿ ਦੁਲ੍ਲਭੋ;

ਨਾਨਾਜਨਸਙ੍ਗਹੋ ਦੁਖੋ, ਇਤਿ ਦਿਸ੍ਵਾਨ ਗਣਂ ਨ ਰੋਚਯੇ.

੧੦੫੫. ‘‘ਨ ਕੁਲਾਨਿ ਉਪਬ੍ਬਜੇ ਮੁਨਿ, ਵਿਮਨੋ ਹੋਤਿ ਸਮਾਧਿ ਦੁਲ੍ਲਭੋ;

ਸੋ ਉਸ੍ਸੁਕ੍ਕੋ ਰਸਾਨੁਗਿਦ੍ਧੋ, ਅਤ੍ਥਂ ਰਿਞ੍ਚਤਿ ਯੋ ਸੁਖਾਵਹੋ.

੧੦੫੬. ‘‘ਪਙ੍ਕੋਤਿ ਹਿ ਨਂ ਅਵੇਦਯੁਂ, ਯਾਯਂ ਵਨ੍ਦਨਪੂਜਨਾ ਕੁਲੇਸੁ;

ਸੁਖੁਮਂ ਸਲ੍ਲ ਦੁਰੁਬ੍ਬਹਂ, ਸਕ੍ਕਾਰੋ ਕਾਪੁਰਿਸੇਨ ਦੁਜ੍ਜਹੋ.

੧੦੫੭. ‘‘ਸੇਨਾਸਨਮ੍ਹਾ ਓਰੁਯ੍ਹ, ਨਗਰਂ ਪਿਣ੍ਡਾਯ ਪਾਵਿਸਿਂ;

ਭੁਞ੍ਜਨ੍ਤਂ ਪੁਰਿਸਂ ਕੁਟ੍ਠਿਂ, ਸਕ੍ਕਚ੍ਚਂ ਤਂ ਉਪਟ੍ਠਹਿਂ.

੧੦੫੮. ‘‘ਸੋ ਮੇ [ਤਂ (ਸੀ. ਕ.)] ਪਕ੍ਕੇਨ ਹਤ੍ਥੇਨ, ਆਲੋਪਂ ਉਪਨਾਮਯਿ;

ਆਲੋਪਂ ਪਕ੍ਖਿਪਨ੍ਤਸ੍ਸ, ਅਙ੍ਗੁਲਿ ਚੇਤ੍ਥ [ਪੇਤ੍ਥ (ਸੀ. ਕ.)] ਛਿਜ੍ਜਥ.

੧੦੫੯. ‘‘ਕੁਟ੍ਟਮੂਲਞ੍ਚ [ਕੁਡ੍ਡਮੂਲਞ੍ਚ (ਸੀ. ਸ੍ਯਾ.)] ਨਿਸ੍ਸਾਯ, ਆਲੋਪਂ ਤਂ ਅਭੁਞ੍ਜਿਸਂ;

ਭੁਞ੍ਜਮਾਨੇ ਵਾ ਭੁਤ੍ਤੇ ਵਾ, ਜੇਗੁਚ੍ਛਂ ਮੇ ਨ ਵਿਜ੍ਜਤਿ.

੧੦੬੦. ‘‘ਉਤ੍ਤਿਟ੍ਠਪਿਣ੍ਡੋ ਆਹਾਰੋ, ਪੂਤਿਮੁਤ੍ਤਞ੍ਚ ਓਸਧਂ;

ਸੇਨਾਸਨਂ ਰੁਕ੍ਖਮੂਲਂ, ਪਂਸੁਕੂਲਞ੍ਚ ਚੀਵਰਂ;

ਯਸ੍ਸੇਤੇ ਅਭਿਸਮ੍ਭੁਤ੍ਵਾ [ਅਭਿਭੁਞ੍ਜਤਿ (?)], ਸ ਵੇ ਚਾਤੁਦ੍ਦਿਸੋ ਨਰੋ.

੧੦੬੧. ‘‘ਯਤ੍ਥ ਏਕੇ ਵਿਹਞ੍ਞਨ੍ਤਿ, ਆਰੁਹਨ੍ਤਾ ਸਿਲੁਚ੍ਚਯਂ;

ਤਸ੍ਸ ਬੁਦ੍ਧਸ੍ਸ ਦਾਯਾਦੋ, ਸਮ੍ਪਜਾਨੋ ਪਤਿਸ੍ਸਤੋ;

ਇਦ੍ਧਿਬਲੇਨੁਪਤ੍ਥਦ੍ਧੋ, ਕਸ੍ਸਪੋ ਅਭਿਰੂਹਤਿ.

੧੦੬੨. ‘‘ਪਿਣ੍ਡਪਾਤਪਟਿਕ੍ਕਨ੍ਤੋ, ਸੇਲਮਾਰੁਯ੍ਹ ਕਸ੍ਸਪੋ;

ਝਾਯਤਿ ਅਨੁਪਾਦਾਨੋ, ਪਹੀਨਭਯਭੇਰਵੋ.

੧੦੬੩. ‘‘ਪਿਣ੍ਡਪਾਤਪਟਿਕ੍ਕਨ੍ਤੋ, ਸੇਲਮਾਰੁਯ੍ਹ ਕਸ੍ਸਪੋ;

ਝਾਯਤਿ ਅਨੁਪਾਦਾਨੋ, ਡਯ੍ਹਮਾਨੇਸੁ ਨਿਬ੍ਬੁਤੋ.

੧੦੬੪. ‘‘ਪਿਣ੍ਡਪਾਤਪਟਿਕ੍ਕਨ੍ਤੋ, ਸੇਲਮਾਰੁਯ੍ਹ ਕਸ੍ਸਪੋ;

ਝਾਯਤਿ ਅਨੁਪਾਦਾਨੋ, ਕਤਕਿਚ੍ਚੋ ਅਨਾਸਵੋ.

੧੦੬੫. ‘‘ਕਰੇਰਿਮਾਲਾਵਿਤਤਾ, ਭੂਮਿਭਾਗਾ ਮਨੋਰਮਾ;

ਕੁਞ੍ਜਰਾਭਿਰੁਦਾ ਰਮ੍ਮਾ, ਤੇ ਸੇਲਾ ਰਮਯਨ੍ਤਿ ਮਂ.

੧੦੬੬. ‘‘ਨੀਲਬ੍ਭਵਣ੍ਣਾ ਰੁਚਿਰਾ, ਵਾਰਿਸੀਤਾ ਸੁਚਿਨ੍ਧਰਾ;

ਇਨ੍ਦਗੋਪਕਸਞ੍ਛਨ੍ਨਾ, ਤੇ ਸੇਲਾ ਰਮਯਨ੍ਤਿ ਮਂ.

੧੦੬੭. ‘‘ਨੀਲਬ੍ਭਕੂਟਸਦਿਸਾ, ਕੂਟਾਗਾਰਵਰੂਪਮਾ;

ਵਾਰਣਾਭਿਰੁਦਾ ਰਮ੍ਮਾ, ਤੇ ਸੇਲਾ ਰਮਯਨ੍ਤਿ ਮਂ.

੧੦੬੮. ‘‘ਅਭਿਵੁਟ੍ਠਾ ਰਮ੍ਮਤਲਾ, ਨਗਾ ਇਸਿਭਿ ਸੇਵਿਤਾ;

ਅਬ੍ਭੁਨ੍ਨਦਿਤਾ ਸਿਖੀਹਿ, ਤੇ ਸੇਲਾ ਰਮਯਨ੍ਤਿ ਮਂ.

੧੦੬੯. ‘‘ਅਲਂ ਝਾਯਿਤੁਕਾਮਸ੍ਸ, ਪਹਿਤਤ੍ਤਸ੍ਸ ਮੇ ਸਤੋ;

ਅਲਂ ਮੇ ਅਤ੍ਥਕਾਮਸ੍ਸ [ਅਤ੍ਤਕਾਮਸ੍ਸ (?)], ਪਹਿਤਤ੍ਤਸ੍ਸ ਭਿਕ੍ਖੁਨੋ.

੧੦੭੦. ‘‘ਅਲਂ ਮੇ ਫਾਸੁਕਾਮਸ੍ਸ, ਪਹਿਤਤ੍ਤਸ੍ਸ ਭਿਕ੍ਖੁਨੋ;

ਅਲਂ ਮੇ ਯੋਗਕਾਮਸ੍ਸ, ਪਹਿਤਤ੍ਤਸ੍ਸ ਤਾਦਿਨੋ.

੧੦੭੧. ‘‘ਉਮਾਪੁਪ੍ਫੇਨ ਸਮਾਨਾ, ਗਗਨਾਵਬ੍ਭਛਾਦਿਤਾ;

ਨਾਨਾਦਿਜਗਣਾਕਿਣ੍ਣਾ, ਤੇ ਸੇਲਾ ਰਮਯਨ੍ਤਿ ਮਂ.

੧੦੭੨. ‘‘ਅਨਾਕਿਣ੍ਣਾ ਗਹਟ੍ਠੇਹਿ, ਮਿਗਸਙ੍ਘਨਿਸੇਵਿਤਾ;

ਨਾਨਾਦਿਜਗਣਾਕਿਣ੍ਣਾ, ਤੇ ਸੇਲਾ ਰਮਯਨ੍ਤਿ ਮਂ.

੧੦੭੩. ‘‘ਅਚ੍ਛੋਦਿਕਾ ਪੁਥੁਸਿਲਾ, ਗੋਨਙ੍ਗੁਲਮਿਗਾਯੁਤਾ;

ਅਮ੍ਬੁਸੇਵਾਲਸਞ੍ਛਨ੍ਨਾ, ਤੇ ਸੇਲਾ ਰਮਯਨ੍ਤਿ ਮਂ.

੧੦੭੪. ‘‘ਨ ਪਞ੍ਚਙ੍ਗਿਕੇਨ ਤੁਰਿਯੇਨ, ਰਤਿ ਮੇ ਹੋਤਿ ਤਾਦਿਸੀ;

ਯਥਾ ਏਕਗ੍ਗਚਿਤ੍ਤਸ੍ਸ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

੧੦੭੫. ‘‘ਕਮ੍ਮਂ ਬਹੁਕਂ ਨ ਕਾਰਯੇ, ਪਰਿਵਜ੍ਜੇਯ੍ਯ ਜਨਂ ਨ ਉਯ੍ਯਮੇ;

ਉਸ੍ਸੁਕ੍ਕੋ ਸੋ ਰਸਾਨੁਗਿਦ੍ਧੋ, ਅਤ੍ਥਂ ਰਿਞ੍ਚਤਿ ਯੋ ਸੁਖਾਵਹੋ.

੧੦੭੬. ‘‘ਕਮ੍ਮਂ ਬਹੁਕਂ ਨ ਕਾਰਯੇ, ਪਰਿਵਜ੍ਜੇਯ੍ਯ ਅਨਤ੍ਤਨੇਯ੍ਯਮੇਤਂ;

ਕਿਚ੍ਛਤਿ ਕਾਯੋ ਕਿਲਮਤਿ, ਦੁਕ੍ਖਿਤੋ ਸੋ ਸਮਥਂ ਨ ਵਿਨ੍ਦਤਿ.

੧੦੭੭. ‘‘ਓਟ੍ਠਪ੍ਪਹਤਮਤ੍ਤੇਨ, ਅਤ੍ਤਾਨਮ੍ਪਿ ਨ ਪਸ੍ਸਤਿ;

ਪਤ੍ਥਦ੍ਧਗੀਵੋ ਚਰਤਿ, ਅਹਂ ਸੇਯ੍ਯੋਤਿ ਮਞ੍ਞਤਿ.

੧੦੭੮. ‘‘ਅਸੇਯ੍ਯੋ ਸੇਯ੍ਯਸਮਾਨਂ, ਬਾਲੋ ਮਞ੍ਞਤਿ ਅਤ੍ਤਾਨਂ;

ਨ ਤਂ ਵਿਞ੍ਞੂ ਪਸਂਸਨ੍ਤਿ, ਪਤ੍ਥਦ੍ਧਮਾਨਸਂ ਨਰਂ.

੧੦੭੯. ‘‘ਯੋ ਚ ਸੇਯ੍ਯੋਹਮਸ੍ਮੀਤਿ, ਨਾਹਂ ਸੇਯ੍ਯੋਤਿ ਵਾ ਪਨ;

ਹੀਨੋ ਤਂਸਦਿਸੋ [ਤੀਨੋਹਂ ਸਦਿਸੋ (ਸ੍ਯਾ.)] ਵਾਤਿ, ਵਿਧਾਸੁ ਨ ਵਿਕਮ੍ਪਤਿ.

੧੦੮੦. ‘‘ਪਞ੍ਞਵਨ੍ਤਂ ਤਥਾ ਤਾਦਿਂ, ਸੀਲੇਸੁ ਸੁਸਮਾਹਿਤਂ;

ਚੇਤੋਸਮਥਮਨੁਤ੍ਤਂ, ਤਞ੍ਚੇ ਵਿਞ੍ਞੂ ਪਸਂਸਰੇ.

੧੦੮੧. ‘‘ਯਸ੍ਸ ਸਬ੍ਰਹ੍ਮਚਾਰੀਸੁ, ਗਾਰਵੋ ਨੂਪਲਬ੍ਭਤਿ;

ਆਰਕਾ ਹੋਤਿ ਸਦ੍ਧਮ੍ਮਾ, ਨਭਤੋ ਪੁਥਵੀ ਯਥਾ.

੧੦੮੨. ‘‘ਯੇਸਞ੍ਚ ਹਿਰਿ ਓਤ੍ਤਪ੍ਪਂ, ਸਦਾ ਸਮ੍ਮਾ ਉਪਟ੍ਠਿਤਂ;

ਵਿਰੂਲ਼੍ਹਬ੍ਰਹ੍ਮਚਰਿਯਾ ਤੇ, ਤੇਸਂ ਖੀਣਾ ਪੁਨਬ੍ਭਵਾ.

੧੦੮੩. ‘‘ਉਦ੍ਧਤੋ ਚਪਲੋ ਭਿਕ੍ਖੁ, ਪਂਸੁਕੂਲੇਨ ਪਾਰੁਤੋ;

ਕਪੀਵ ਸੀਹਚਮ੍ਮੇਨ, ਨ ਸੋ ਤੇਨੁਪਸੋਭਤਿ.

੧੦੮੪. ‘‘ਅਨੁਦ੍ਧਤੋ ਅਚਪਲੋ, ਨਿਪਕੋ ਸਂਵੁਤਿਨ੍ਦ੍ਰਿਯੋ;

ਸੋਭਤਿ ਪਂਸੁਕੂਲੇਨ, ਸੀਹੋਵ ਗਿਰਿਗਬ੍ਭਰੇ.

੧੦੮੫. ‘‘ਏਤੇ ਸਮ੍ਬਹੁਲਾ ਦੇਵਾ, ਇਦ੍ਧਿਮਨ੍ਤੋ ਯਸਸ੍ਸਿਨੋ;

ਦਸਦੇਵਸਹਸ੍ਸਾਨਿ, ਸਬ੍ਬੇ ਤੇ ਬ੍ਰਹ੍ਮਕਾਯਿਕਾ.

੧੦੮੬. ‘‘ਧਮ੍ਮਸੇਨਾਪਤਿਂ ਵੀਰਂ, ਮਹਾਝਾਯਿਂ ਸਮਾਹਿਤਂ;

ਸਾਰਿਪੁਤ੍ਤਂ ਨਮਸ੍ਸਨ੍ਤਾ, ਤਿਟ੍ਠਨ੍ਤਿ ਪਞ੍ਜਲੀਕਤਾ.

੧੦੮੭. ‘‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਯਸ੍ਸ ਤੇ ਨਾਭਿਜਾਨਾਮ, ਯਮ੍ਪਿ ਨਿਸ੍ਸਾਯ ਝਾਯਤਿ [ਝਾਯਸਿ (ਕ. ਅਟ੍ਠ.)].

੧੦੮੮. ‘‘‘ਅਚ੍ਛੇਰਂ ਵਤ ਬੁਦ੍ਧਾਨਂ, ਗਮ੍ਭੀਰੋ ਗੋਚਰੋ ਸਕੋ;

ਯੇ ਮਯਂ ਨਾਭਿਜਾਨਾਮ, ਵਾਲਵੇਧਿਸਮਾਗਤਾ’.

੧੦੮੯. ‘‘ਤਂ ਤਥਾ ਦੇਵਕਾਯੇਹਿ, ਪੂਜਿਤਂ ਪੂਜਨਾਰਹਂ;

ਸਾਰਿਪੁਤ੍ਤਂ ਤਦਾ ਦਿਸ੍ਵਾ, ਕਪ੍ਪਿਨਸ੍ਸ ਸਿਤਂ ਅਹੁ.

੧੦੯੦. ‘‘ਯਾਵਤਾ ਬੁਦ੍ਧਖੇਤ੍ਤਮ੍ਹਿ, ਠਪਯਿਤ੍ਵਾ ਮਹਾਮੁਨਿਂ;

ਧੁਤਗੁਣੇ ਵਿਸਿਟ੍ਠੋਹਂ, ਸਦਿਸੋ ਮੇ ਨ ਵਿਜ੍ਜਤਿ.

੧੦੯੧. ‘‘ਪਰਿਚਿਣ੍ਣੋ ਮਯਾ ਸਤ੍ਥਾ, ਕਤਂ ਬੁਦ੍ਧਸ੍ਸ ਸਾਸਨਂ;

ਓਹਿਤੋ ਗਰੁਕੋ ਭਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ.

੧੦੯੨. ‘‘ਨ ਚੀਵਰੇ ਨ ਸਯਨੇ, ਭੋਜਨੇ ਨੁਪਲਿਮ੍ਪਤਿ;

ਗੋਤਮੋ ਅਨਪ੍ਪਮੇਯ੍ਯੋ, ਮੁਲ਼ਾਲਪੁਪ੍ਫਂ ਵਿਮਲਂਵ;

ਅਮ੍ਬੁਨਾ ਨੇਕ੍ਖਮ੍ਮਨਿਨ੍ਨੋ, ਤਿਭਵਾਭਿਨਿਸ੍ਸਟੋ.

੧੦੯੩. ‘‘ਸਤਿਪਟ੍ਠਾਨਗੀਵੋ ਸੋ, ਸਦ੍ਧਾਹਤ੍ਥੋ ਮਹਾਮੁਨਿ;

ਪਞ੍ਞਾਸੀਸੋ ਮਹਾਞਾਣੀ, ਸਦਾ ਚਰਤਿ ਨਿਬ੍ਬੁਤੋ’’ਤਿ.

… ਮਹਾਕਸ੍ਸਪੋ ਥੇਰੋ….

ਚਤ੍ਤਾਲੀਸਨਿਪਾਤੋ ਨਿਟ੍ਠਿਤੋ.