੧੯. ਪਞ੍ਞਾਸਨਿਪਾਤੋ

੧. ਤਾਲਪੁਟਤ੍ਥੇਰਗਾਥਾ

੧੦੯੪. ‘‘ਕਦਾ ਨੁਹਂ ਪਬ੍ਬਤਕਨ੍ਦਰਾਸੁ, ਏਕਾਕਿਯੋ ਅਦ੍ਦੁਤਿਯੋ ਵਿਹਸ੍ਸਂ;

ਅਨਿਚ੍ਚਤੋ ਸਬ੍ਬਭਵਂ ਵਿਪਸ੍ਸਂ, ਤਂ ਮੇ ਇਦਂ ਤਂ ਨੁ ਕਦਾ ਭਵਿਸ੍ਸਤਿ.

੧੦੯੫. ‘‘ਕਦਾ ਨੁਹਂ ਭਿਨ੍ਨਪਟਨ੍ਧਰੋ ਮੁਨਿ, ਕਾਸਾਵਵਤ੍ਥੋ ਅਮਮੋ ਨਿਰਾਸੋ;

ਰਾਗਞ੍ਚ ਦੋਸਞ੍ਚ ਤਥੇਵ ਮੋਹਂ, ਹਨ੍ਤ੍ਵਾ ਸੁਖੀ ਪਵਨਗਤੋ ਵਿਹਸ੍ਸਂ.

੧੦੯੬. ‘‘ਕਦਾ ਅਨਿਚ੍ਚਂ ਵਧਰੋਗਨੀਲ਼ਂ, ਕਾਯਂ ਇਮਂ ਮਚ੍ਚੁਜਰਾਯੁਪਦ੍ਦੁਤਂ;

ਵਿਪਸ੍ਸਮਾਨੋ ਵੀਤਭਯੋ ਵਿਹਸ੍ਸਂ, ਏਕੋ ਵਨੇ ਤਂ ਨੁ ਕਦਾ ਭਵਿਸ੍ਸਤਿ.

੧੦੯੭. ‘‘ਕਦਾ ਨੁਹਂ ਭਯਜਨਨਿਂ ਦੁਖਾਵਹਂ, ਤਣ੍ਹਾਲਤਂ ਬਹੁਵਿਧਾਨੁਵਤ੍ਤਨਿਂ;

ਪਞ੍ਞਾਮਯਂ ਤਿਖਿਣਮਸਿਂ ਗਹੇਤ੍ਵਾ, ਛੇਤ੍ਵਾ ਵਸੇ ਤਮ੍ਪਿ ਕਦਾ ਭਵਿਸ੍ਸਤਿ.

੧੦੯੮. ‘‘ਕਦਾ ਨੁ ਪਞ੍ਞਾਮਯਮੁਗ੍ਗਤੇਜਂ, ਸਤ੍ਥਂ ਇਸੀਨਂ ਸਹਸਾਦਿਯਿਤ੍ਵਾ;

ਮਾਰਂ ਸਸੇਨਂ ਸਹਸਾ ਭਞ੍ਜਿਸ੍ਸਂ, ਸੀਹਾਸਨੇ ਤਂ ਨੁ ਕਦਾ ਭਵਿਸ੍ਸਤਿ.

੧੦੯੯. ‘‘ਕਦਾ ਨੁਹਂ ਸਬ੍ਭਿ ਸਮਾਗਮੇਸੁ, ਦਿਟ੍ਠੋ ਭਵੇ ਧਮ੍ਮਗਰੂਹਿ ਤਾਦਿਭਿ;

ਯਾਥਾਵਦਸ੍ਸੀਹਿ ਜਿਤਿਨ੍ਦ੍ਰਿਯੇਹਿ, ਪਧਾਨਿਯੋ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੦. ‘‘ਕਦਾ ਨੁ ਮਂ ਤਨ੍ਦਿ ਖੁਦਾ ਪਿਪਾਸਾ, ਵਾਤਾਤਪਾ ਕੀਟਸਰੀਸਪਾ ਵਾ;

ਨ ਬਾਧਯਿਸ੍ਸਨ੍ਤਿ ਨ ਤਂ ਗਿਰਿਬ੍ਬਜੇ, ਅਤ੍ਥਤ੍ਥਿਯਂ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੧. ‘‘ਕਦਾ ਨੁ ਖੋ ਯਂ ਵਿਦਿਤਂ ਮਹੇਸਿਨਾ, ਚਤ੍ਤਾਰਿ ਸਚ੍ਚਾਨਿ ਸੁਦੁਦ੍ਦਸਾਨਿ;

ਸਮਾਹਿਤਤ੍ਤੋ ਸਤਿਮਾ ਅਗਚ੍ਛਂ, ਪਞ੍ਞਾਯ ਤਂ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੨. ‘‘ਕਦਾ ਨੁ ਰੂਪੇ ਅਮਿਤੇ ਚ ਸਦ੍ਦੇ, ਗਨ੍ਧੇ ਰਸੇ ਫੁਸਿਤਬ੍ਬੇ ਚ ਧਮ੍ਮੇ;

ਆਦਿਤ੍ਤਤੋਹਂ ਸਮਥੇਹਿ ਯੁਤ੍ਤੋ, ਪਞ੍ਞਾਯ ਦਚ੍ਛਂ ਤਦਿਦਂ ਕਦਾ ਮੇ.

੧੧੦੩. ‘‘ਕਦਾ ਨੁਹਂ ਦੁਬ੍ਬਚਨੇਨ ਵੁਤ੍ਤੋ, ਤਤੋਨਿਮਿਤ੍ਤਂ ਵਿਮਨੋ ਨ ਹੇਸ੍ਸਂ;

ਅਥੋ ਪਸਤ੍ਥੋਪਿ ਤਤੋਨਿਮਿਤ੍ਤਂ, ਤੁਟ੍ਠੋ ਨ ਹੇਸ੍ਸਂ ਤਦਿਦਂ ਕਦਾ ਮੇ.

੧੧੦੪. ‘‘ਕਦਾ ਨੁ ਕਟ੍ਠੇ ਚ ਤਿਣੇ ਲਤਾ ਚ, ਖਨ੍ਧੇ ਇਮੇਹਂ ਅਮਿਤੇ ਚ ਧਮ੍ਮੇ;

ਅਜ੍ਝਤ੍ਤਿਕਾਨੇਵ ਚ ਬਾਹਿਰਾਨਿ ਚ, ਸਮਂ ਤੁਲੇਯ੍ਯਂ ਤਦਿਦਂ ਕਦਾ ਮੇ.

੧੧੦੫. ‘‘ਕਦਾ ਨੁ ਮਂ ਪਾਵੁਸਕਾਲਮੇਘੋ, ਨਵੇਨ ਤੋਯੇਨ ਸਚੀਵਰਂ ਵਨੇ;

ਇਸਿਪ੍ਪਯਾਤਮ੍ਹਿ ਪਥੇ ਵਜਨ੍ਤਂ, ਓਵਸ੍ਸਤੇ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੬. ‘‘ਕਦਾ ਮਯੂਰਸ੍ਸ ਸਿਖਣ੍ਡਿਨੋ ਵਨੇ, ਦਿਜਸ੍ਸ ਸੁਤ੍ਵਾ ਗਿਰਿਗਬ੍ਭਰੇ ਰੁਤਂ;

ਪਚ੍ਚੁਟ੍ਠਹਿਤ੍ਵਾ ਅਮਤਸ੍ਸ ਪਤ੍ਤਿਯਾ, ਸਂਚਿਨ੍ਤਯੇ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੭. ‘‘ਕਦਾ ਨੁ ਗਙ੍ਗਂ ਯਮੁਨਂ ਸਰਸ੍ਸਤਿਂ, ਪਾਤਾਲਖਿਤ੍ਤਂ ਵਲ਼ਵਾਮੁਖਞ੍ਚ [ਬਲਵਾਮੁਖਞ੍ਚ (ਕ.)];

ਅਸਜ੍ਜਮਾਨੋ ਪਤਰੇਯ੍ਯਮਿਦ੍ਧਿਯਾ, ਵਿਭਿਂਸਨਂ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੮. ‘‘ਕਦਾ ਨੁ ਨਾਗੋਵ ਅਸਙ੍ਗਚਾਰੀ, ਪਦਾਲਯੇ ਕਾਮਗੁਣੇਸੁ ਛਨ੍ਦਂ;

ਨਿਬ੍ਬਜ੍ਜਯਂ ਸਬ੍ਬਸੁਭਂ ਨਿਮਿਤ੍ਤਂ, ਝਾਨੇ ਯੁਤੋ ਤਂ ਨੁ ਕਦਾ ਭਵਿਸ੍ਸਤਿ.

੧੧੦੯. ‘‘ਕਦਾ ਇਣਟ੍ਟੋਵ ਦਲਿਦ੍ਦਕੋ [ਦਲ਼ਿਦ੍ਦਕੋ (ਸੀ.)] ਨਿਧਿਂ, ਆਰਾਧਯਿਤ੍ਵਾ ਧਨਿਕੇਹਿ ਪੀਲ਼ਿਤੋ;

ਤੁਟ੍ਠੋ ਭਵਿਸ੍ਸਂ ਅਧਿਗਮ੍ਮ ਸਾਸਨਂ, ਮਹੇਸਿਨੋ ਤਂ ਨੁ ਕਦਾ ਭਵਿਸ੍ਸਤਿ.

੧੧੧੦. ‘‘ਬਹੂਨਿ ਵਸ੍ਸਾਨਿ ਤਯਾਮ੍ਹਿ ਯਾਚਿਤੋ, ‘ਅਗਾਰਵਾਸੇਨ ਅਲਂ ਨੁ ਤੇ ਇਦਂ’;

ਤਂ ਦਾਨਿ ਮਂ ਪਬ੍ਬਜਿਤਂ ਸਮਾਨਂ, ਕਿਂਕਾਰਣਾ ਚਿਤ੍ਤ ਤੁਵਂ ਨ ਯੁਞ੍ਜਸਿ.

੧੧੧੧. ‘‘ਨਨੁ ਅਹਂ ਚਿਤ੍ਤ ਤਯਾਮ੍ਹਿ ਯਾਚਿਤੋ, ‘ਗਿਰਿਬ੍ਬਜੇ ਚਿਤ੍ਰਛਦਾ ਵਿਹਙ੍ਗਮਾ’;

ਮਹਿਨ੍ਦਘੋਸਤ੍ਥਨਿਤਾਭਿਗਜ੍ਜਿਨੋ, ਤੇ ਤਂ ਰਮੇਸ੍ਸਨ੍ਤਿ ਵਨਮ੍ਹਿ ਝਾਯਿਨਂ.

੧੧੧੨. ‘‘ਕੁਲਮ੍ਹਿ ਮਿਤ੍ਤੇ ਚ ਪਿਯੇ ਚ ਞਾਤਕੇ, ਖਿਡ੍ਡਾਰਤਿਂ ਕਾਮਗੁਣਞ੍ਚ ਲੋਕੇ;

ਸਬ੍ਬਂ ਪਹਾਯ ਇਮਮਜ੍ਝੁਪਾਗਤੋ, ਅਥੋਪਿ ਤ੍ਵਂ ਚਿਤ੍ਤ ਨ ਮਯ੍ਹ ਤੁਸ੍ਸਸਿ.

੧੧੧੩. ‘‘ਮਮੇਵ ਏਤਂ ਨ ਹਿ ਤ੍ਵਂ ਪਰੇਸਂ, ਸਨ੍ਨਾਹਕਾਲੇ ਪਰਿਦੇਵਿਤੇਨ ਕਿਂ;

ਸਬ੍ਬਂ ਇਦਂ ਚਲਮਿਤਿ ਪੇਕ੍ਖਮਾਨੋ, ਅਭਿਨਿਕ੍ਖਮਿਂ ਅਮਤਪਦਂ ਜਿਗੀਸਂ.

੧੧੧੪. ‘‘ਸੁਯੁਤ੍ਤਵਾਦੀ ਦ੍ਵਿਪਦਾਨਮੁਤ੍ਤਮੋ, ਮਹਾਭਿਸਕ੍ਕੋ ਨਰਦਮ੍ਮਸਾਰਥਿ [ਸਾਰਥੀ (ਸੀ.)];

‘ਚਿਤ੍ਤਂ ਚਲਂ ਮਕ੍ਕਟਸਨ੍ਨਿਭਂ ਇਤਿ, ਅਵੀਤਰਾਗੇਨ ਸੁਦੁਨ੍ਨਿਵਾਰਯਂ’.

੧੧੧੫. ‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਅਵਿਦ੍ਦਸੂ ਯਤ੍ਥ ਸਿਤਾ ਪੁਥੁਜ੍ਜਨਾ;

ਤੇ ਦੁਕ੍ਖਮਿਚ੍ਛਨ੍ਤਿ ਪੁਨਬ੍ਭਵੇਸਿਨੋ, ਚਿਤ੍ਤੇਨ ਨੀਤਾ ਨਿਰਯੇ ਨਿਰਾਕਤਾ.

੧੧੧੬. ‘‘‘ਮਯੂਰਕੋਞ੍ਚਾਭਿਰੁਤਮ੍ਹਿ ਕਾਨਨੇ, ਦੀਪੀਹਿ ਬ੍ਯਗ੍ਘੇਹਿ ਪੁਰਕ੍ਖਤੋ ਵਸਂ;

ਕਾਯੇ ਅਪੇਕ੍ਖਂ ਜਹ ਮਾ ਵਿਰਾਧਯ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੧੭. ‘‘‘ਭਾਵੇਹਿ ਝਾਨਾਨਿ ਚ ਇਨ੍ਦ੍ਰਿਯਾਨਿ ਚ, ਬਲਾਨਿ ਬੋਜ੍ਝਙ੍ਗਸਮਾਧਿਭਾਵਨਾ;

ਤਿਸ੍ਸੋ ਚ ਵਿਜ੍ਜਾ ਫੁਸ ਬੁਦ੍ਧਸਾਸਨੇ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੧੮. ‘‘‘ਭਾਵੇਹਿ ਮਗ੍ਗਂ ਅਮਤਸ੍ਸ ਪਤ੍ਤਿਯਾ, ਨਿਯ੍ਯਾਨਿਕਂ ਸਬ੍ਬਦੁਖਕ੍ਖਯੋਗਧਂ;

ਅਟ੍ਠਙ੍ਗਿਕਂ ਸਬ੍ਬਕਿਲੇਸਸੋਧਨਂ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੧੯. ‘‘‘ਦੁਕ੍ਖਨ੍ਤਿ ਖਨ੍ਧੇ ਪਟਿਪਸ੍ਸ ਯੋਨਿਸੋ, ਯਤੋ ਚ ਦੁਕ੍ਖਂ ਸਮੁਦੇਤਿ ਤਂ ਜਹ;

ਇਧੇਵ ਦੁਕ੍ਖਸ੍ਸ ਕਰੋਹਿ ਅਨ੍ਤਂ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੦. ‘‘‘ਅਨਿਚ੍ਚਂ ਦੁਕ੍ਖਨ੍ਤਿ ਵਿਪਸ੍ਸ ਯੋਨਿਸੋ, ਸੁਞ੍ਞਂ ਅਨਤ੍ਤਾਤਿ ਅਘਂ ਵਧਨ੍ਤਿ ਚ;

ਮਨੋਵਿਚਾਰੇ ਉਪਰੁਨ੍ਧ ਚੇਤਸੋ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੧. ‘‘‘ਮੁਣ੍ਡੋ ਵਿਰੂਪੋ ਅਭਿਸਾਪਮਾਗਤੋ, ਕਪਾਲਹਤ੍ਥੋਵ ਕੁਲੇਸੁ ਭਿਕ੍ਖਸੁ;

ਯੁਞ੍ਜਸ੍ਸੁ ਸਤ੍ਥੁਵਚਨੇ ਮਹੇਸਿਨੋ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੨. ‘‘‘ਸੁਸਂਵੁਤਤ੍ਤੋ ਵਿਸਿਖਨ੍ਤਰੇ ਚਰਂ, ਕੁਲੇਸੁ ਕਾਮੇਸੁ ਅਸਙ੍ਗਮਾਨਸੋ;

ਚਨ੍ਦੋ ਯਥਾ ਦੋਸਿਨਪੁਣ੍ਣਮਾਸਿਯਾ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੩. ‘‘‘ਆਰਞ੍ਞਿਕੋ ਹੋਹਿ ਚ ਪਿਣ੍ਡਪਾਤਿਕੋ, ਸੋਸਾਨਿਕੋ ਹੋਹਿ ਚ ਪਂਸੁਕੂਲਿਕੋ;

ਨੇਸਜ੍ਜਿਕੋ ਹੋਹਿ ਸਦਾ ਧੁਤੇ ਰਤੋ’, ਇਤਿਸ੍ਸੁ ਮਂ ਚਿਤ੍ਤ ਪੁਰੇ ਨਿਯੁਞ੍ਜਸਿ.

੧੧੨੪. ‘‘ਰੋਪੇਤ੍ਵ ਰੁਕ੍ਖਾਨਿ ਯਥਾ ਫਲੇਸੀ, ਮੂਲੇ ਤਰੁਂ ਛੇਤ੍ਤੁ ਤਮੇਵ ਇਚ੍ਛਸਿ;

ਤਥੂਪਮਂ ਚਿਤ੍ਤਮਿਦਂ ਕਰੋਸਿ, ਯਂ ਮਂ ਅਨਿਚ੍ਚਮ੍ਹਿ ਚਲੇ ਨਿਯੁਞ੍ਜਸਿ.

੧੧੨੫. ‘‘ਅਰੂਪ ਦੂਰਙ੍ਗਮ ਏਕਚਾਰਿ, ਨ ਤੇ ਕਰਿਸ੍ਸਂ ਵਚਨਂ ਇਦਾਨਿਹਂ;

ਦੁਕ੍ਖਾ ਹਿ ਕਾਮਾ ਕਟੁਕਾ ਮਹਬ੍ਭਯਾ, ਨਿਬ੍ਬਾਨਮੇਵਾਭਿਮਨੋ ਚਰਿਸ੍ਸਂ.

੧੧੨੬. ‘‘ਨਾਹਂ ਅਲਕ੍ਖ੍ਯਾ ਅਹਿਰਿਕ੍ਕਤਾਯ ਵਾ, ਨ ਚਿਤ੍ਤਹੇਤੂ ਨ ਚ ਦੂਰਕਨ੍ਤਨਾ;

ਆਜੀਵਹੇਤੂ ਚ ਅਹਂ ਨ ਨਿਕ੍ਖਮਿਂ, ਕਤੋ ਚ ਤੇ ਚਿਤ੍ਤ ਪਟਿਸ੍ਸਵੋ ਮਯਾ.

੧੧੨੭. ‘‘‘ਅਪ੍ਪਿਚ੍ਛਤਾ ਸਪ੍ਪੁਰਿਸੇਹਿ ਵਣ੍ਣਿਤਾ, ਮਕ੍ਖਪ੍ਪਹਾਨਂ ਵੂਪਸਮੋ ਦੁਖਸ੍ਸ’;

ਇਤਿਸ੍ਸੁ ਮਂ ਚਿਤ੍ਤ ਤਦਾ ਨਿਯੁਞ੍ਜਸਿ, ਇਦਾਨਿ ਤ੍ਵਂ ਗਚ੍ਛਸਿ ਪੁਬ੍ਬਚਿਣ੍ਣਂ.

੧੧੨੮. ‘‘ਤਣ੍ਹਾ ਅਵਿਜ੍ਜਾ ਚ ਪਿਯਾਪਿਯਞ੍ਚ, ਸੁਭਾਨਿ ਰੂਪਾਨਿ ਸੁਖਾ ਚ ਵੇਦਨਾ;

ਮਨਾਪਿਯਾ ਕਾਮਗੁਣਾ ਚ ਵਨ੍ਤਾ, ਵਨ੍ਤੇ ਅਹਂ ਆਵਮਿਤੁਂ ਨ ਉਸ੍ਸਹੇ.

੧੧੨੯. ‘‘ਸਬ੍ਬਤ੍ਥ ਤੇ ਚਿਤ੍ਤ ਵਚੋ ਕਤਂ ਮਯਾ, ਬਹੂਸੁ ਜਾਤੀਸੁ ਨ ਮੇਸਿ ਕੋਪਿਤੋ;

ਅਜ੍ਝਤ੍ਤਸਮ੍ਭਵੋ ਕਤਞ੍ਞੁਤਾਯ ਤੇ, ਦੁਕ੍ਖੇ ਚਿਰਂ ਸਂਸਰਿਤਂ ਤਯਾ ਕਤੇ.

੧੧੩੦. ‘‘ਤ੍ਵਞ੍ਞੇਵ ਨੋ ਚਿਤ੍ਤ ਕਰੋਸਿ ਬ੍ਰਾਹ੍ਮਣੋ [ਬ੍ਰਾਹ੍ਮਣੇ (ਸੀ.), ਬ੍ਰਾਹ੍ਮਣਂ (?) ਭਾਵਲੋਪ-ਤਪ੍ਪਧਾਨਤਾ ਗਹੇਤਬ੍ਬਾ], ਤ੍ਵਂ ਖਤ੍ਤਿਯੋ ਰਾਜਦਸੀ [ਰਾਜਦਿਸੀ (ਸ੍ਯਾ. ਕ.)] ਕਰੋਸਿ;

ਵੇਸ੍ਸਾ ਚ ਸੁਦ੍ਦਾ ਚ ਭਵਾਮ ਏਕਦਾ, ਦੇਵਤ੍ਤਨਂ ਵਾਪਿ ਤਵੇਵ ਵਾਹਸਾ.

੧੧੩੧. ‘‘ਤਵੇਵ ਹੇਤੂ ਅਸੁਰਾ ਭਵਾਮਸੇ, ਤ੍ਵਂਮੂਲਕਂ ਨੇਰਯਿਕਾ ਭਵਾਮਸੇ;

ਅਥੋ ਤਿਰਚ੍ਛਾਨਗਤਾਪਿ ਏਕਦਾ, ਪੇਤਤ੍ਤਨਂ ਵਾਪਿ ਤਵੇਵ ਵਾਹਸਾ.

੧੧੩੨. ‘‘ਨਨੁ ਦੁਬ੍ਭਿਸ੍ਸਸਿ ਮਂ ਪੁਨਪ੍ਪੁਨਂ, ਮੁਹੁਂ ਮੁਹੁਂ ਚਾਰਣਿਕਂਵ ਦਸ੍ਸਯਂ;

ਉਮ੍ਮਤ੍ਤਕੇਨੇਵ ਮਯਾ ਪਲੋਭਸਿ, ਕਿਞ੍ਚਾਪਿ ਤੇ ਚਿਤ੍ਤ ਵਿਰਾਧਿਤਂ ਮਯਾ.

੧੧੩੩. ‘‘ਇਦਂ ਪੁਰੇ ਚਿਤ੍ਤਮਚਾਰਿ ਚਾਰਿਕਂ, ਯੇਨਿਚ੍ਛਕਂ ਯਤ੍ਥਕਾਮਂ ਯਥਾਸੁਖਂ;

ਤਦਜ੍ਜਹਂ ਨਿਗ੍ਗਹੇਸ੍ਸਾਮਿ ਯੋਨਿਸੋ, ਹਤ੍ਥਿਪ੍ਪਭਿਨ੍ਨਂ ਵਿਯ ਅਙ੍ਕੁਸਗ੍ਗਹੋ.

੧੧੩੪. ‘‘ਸਤ੍ਥਾ ਚ ਮੇ ਲੋਕਮਿਮਂ ਅਧਿਟ੍ਠਹਿ, ਅਨਿਚ੍ਚਤੋ ਅਦ੍ਧੁਵਤੋ ਅਸਾਰਤੋ;

ਪਕ੍ਖਨ੍ਦ ਮਂ ਚਿਤ੍ਤ ਜਿਨਸ੍ਸ ਸਾਸਨੇ, ਤਾਰੇਹਿ ਓਘਾ ਮਹਤਾ ਸੁਦੁਤ੍ਤਰਾ.

੧੧੩੫. ‘‘ਨ ਤੇ ਇਦਂ ਚਿਤ੍ਤ ਯਥਾ ਪੁਰਾਣਕਂ, ਨਾਹਂ ਅਲਂ ਤੁਯ੍ਹ ਵਸੇ ਨਿਵਤ੍ਤਿਤੁਂ [ਵਸੇਨ ਵਤ੍ਤਿਤੁਂ (?)];

ਮਹੇਸਿਨੋ ਪਬ੍ਬਜਿਤੋਮ੍ਹਿ ਸਾਸਨੇ, ਨ ਮਾਦਿਸਾ ਹੋਨ੍ਤਿ ਵਿਨਾਸਧਾਰਿਨੋ.

੧੧੩੬. ‘‘ਨਗਾ ਸਮੁਦ੍ਦਾ ਸਰਿਤਾ ਵਸੁਨ੍ਧਰਾ, ਦਿਸਾ ਚਤਸ੍ਸੋ ਵਿਦਿਸਾ ਅਧੋ ਦਿਵਾ;

ਸਬ੍ਬੇ ਅਨਿਚ੍ਚਾ ਤਿਭਵਾ ਉਪਦ੍ਦੁਤਾ, ਕੁਹਿਂ ਗਤੋ ਚਿਤ੍ਤ ਸੁਖਂ ਰਮਿਸ੍ਸਸਿ.

੧੧੩੭. ‘‘ਧਿਤਿਪ੍ਪਰਂ ਕਿਂ ਮਮ ਚਿਤ੍ਤ ਕਾਹਿਸਿ, ਨ ਤੇ ਅਲਂ ਚਿਤ੍ਤ ਵਸਾਨੁਵਤ੍ਤਕੋ;

ਨ ਜਾਤੁ ਭਸ੍ਤਂ ਉਭਤੋਮੁਖਂ ਛੁਪੇ, ਧਿਰਤ੍ਥੁ ਪੂਰਂ ਨਵ ਸੋਤਸਨ੍ਦਨਿਂ.

੧੧੩੮. ‘‘ਵਰਾਹਏਣੇਯ੍ਯਵਿਗਾਲ਼੍ਹਸੇਵਿਤੇ, ਪਬ੍ਭਾਰਕੁਟ੍ਟੇ ਪਕਤੇਵ ਸੁਨ੍ਦਰੇ;

ਨਵਮ੍ਬੁਨਾ ਪਾਵੁਸਸਿਤ੍ਥਕਾਨਨੇ, ਤਹਿਂ ਗੁਹਾਗੇਹਗਤੋ ਰਮਿਸ੍ਸਸਿ.

੧੧੩੯. ‘‘ਸੁਨੀਲਗੀਵਾ ਸੁਸਿਖਾ ਸੁਪੇਖੁਨਾ, ਸੁਚਿਤ੍ਤਪਤ੍ਤਚ੍ਛਦਨਾ ਵਿਹਙ੍ਗਮਾ;

ਸੁਮਞ੍ਜੁਘੋਸਤ੍ਥਨਿਤਾਭਿਗਜ੍ਜਿਨੋ, ਤੇ ਤਂ ਰਮੇਸ੍ਸਨ੍ਤਿ ਵਨਮ੍ਹਿ ਝਾਯਿਨਂ.

੧੧੪੦. ‘‘ਵੁਟ੍ਠਮ੍ਹਿ ਦੇਵੇ ਚਤੁਰਙ੍ਗੁਲੇ ਤਿਣੇ, ਸਂਪੁਪ੍ਫਿਤੇ ਮੇਘਨਿਭਮ੍ਹਿ ਕਾਨਨੇ;

ਨਗਨ੍ਤਰੇ ਵਿਟਪਿਸਮੋ ਸਯਿਸ੍ਸਂ, ਤਂ ਮੇ ਮੁਦੂ ਹੇਹਿਤਿ ਤੂਲਸਨ੍ਨਿਭਂ.

੧੧੪੧. ‘‘ਤਥਾ ਤੁ ਕਸ੍ਸਾਮਿ ਯਥਾਪਿ ਇਸ੍ਸਰੋ, ਯਂ ਲਬ੍ਭਤਿ ਤੇਨਪਿ ਹੋਤੁ ਮੇ ਅਲਂ;

ਨ ਤਾਹਂ ਕਸ੍ਸਾਮਿ ਯਥਾ ਅਤਨ੍ਦਿਤੋ, ਬਿਲ਼ਾਰਭਸ੍ਤਂਵ ਯਥਾ ਸੁਮਦ੍ਦਿਤਂ.

੧੧੪੨. ‘‘ਤਥਾ ਤੁ ਕਸ੍ਸਾਮਿ ਯਥਾਪਿ ਇਸ੍ਸਰੋ, ਯਂ ਲਬ੍ਭਤਿ ਤੇਨਪਿ ਹੋਤੁ ਮੇ ਅਲਂ;

ਵੀਰਿਯੇਨ ਤਂ ਮਯ੍ਹ ਵਸਾਨਯਿਸ੍ਸਂ, ਗਜਂਵ ਮਤ੍ਤਂ ਕੁਸਲਙ੍ਕੁਸਗ੍ਗਹੋ.

੧੧੪੩. ‘‘ਤਯਾ ਸੁਦਨ੍ਤੇਨ ਅਵਟ੍ਠਿਤੇਨ ਹਿ, ਹਯੇਨ ਯੋਗ੍ਗਾਚਰਿਯੋਵ ਉਜ੍ਜੁਨਾ;

ਪਹੋਮਿ ਮਗ੍ਗਂ ਪਟਿਪਜ੍ਜਿਤੁਂ ਸਿਵਂ, ਚਿਤ੍ਤਾਨੁਰਕ੍ਖੀਹਿ ਸਦਾ ਨਿਸੇਵਿਤਂ.

੧੧੪੪. ‘‘ਆਰਮ੍ਮਣੇ ਤਂ ਬਲਸਾ ਨਿਬਨ੍ਧਿਸਂ, ਨਾਗਂਵ ਥਮ੍ਭਮ੍ਹਿ ਦਲ਼੍ਹਾਯ ਰਜ੍ਜੁਯਾ;

ਤਂ ਮੇ ਸੁਗੁਤ੍ਤਂ ਸਤਿਯਾ ਸੁਭਾਵਿਤਂ, ਅਨਿਸ੍ਸਿਤਂ ਸਬ੍ਬਭਵੇਸੁ ਹੇਹਿਸਿ.

੧੧੪੫. ‘‘ਪਞ੍ਞਾਯ ਛੇਤ੍ਵਾ ਵਿਪਥਾਨੁਸਾਰਿਨਂ, ਯੋਗੇਨ ਨਿਗ੍ਗਯ੍ਹ ਪਥੇ ਨਿਵੇਸਿਯ;

ਦਿਸ੍ਵਾ ਸਮੁਦਯਂ ਵਿਭਵਞ੍ਚ ਸਮ੍ਭਵਂ, ਦਾਯਾਦਕੋ ਹੇਹਿਸਿ ਅਗ੍ਗਵਾਦਿਨੋ.

੧੧੪੬. ‘‘ਚਤੁਬ੍ਬਿਪਲ੍ਲਾਸਵਸਂ ਅਧਿਟ੍ਠਿਤਂ, ਗਾਮਣ੍ਡਲਂਵ ਪਰਿਨੇਸਿ ਚਿਤ੍ਤ ਮਂ;

ਨਨੁ [ਨੂਨ (ਸੀ.)] ਸਂਯੋਜਨਬਨ੍ਧਨਚ੍ਛਿਦਂ, ਸਂਸੇਵਸੇ ਕਾਰੁਣਿਕਂ ਮਹਾਮੁਨਿਂ.

੧੧੪੭. ‘‘ਮਿਗੋ ਯਥਾ ਸੇਰਿ ਸੁਚਿਤ੍ਤਕਾਨਨੇ, ਰਮ੍ਮਂ ਗਿਰਿਂ ਪਾਵੁਸਅਬ੍ਭਮਾਲਿਨਿਂ [ਮਾਲਿਂ (?)];

ਅਨਾਕੁਲੇ ਤਤ੍ਥ ਨਗੇ ਰਮਿਸ੍ਸਂ [ਰਮਿਸ੍ਸਸਿ (ਸ੍ਯਾ. ਕ.)], ਅਸਂਸਯਂ ਚਿਤ੍ਤ ਪਰਾ ਭਵਿਸ੍ਸਸਿ.

੧੧੪੮. ‘‘ਯੇ ਤੁਯ੍ਹ ਛਨ੍ਦੇਨ ਵਸੇਨ ਵਤ੍ਤਿਨੋ, ਨਰਾ ਚ ਨਾਰੀ ਚ ਅਨੁਭੋਨ੍ਤਿ ਯਂ ਸੁਖਂ;

ਅਵਿਦ੍ਦਸੂ ਮਾਰਵਸਾਨੁਵਤ੍ਤਿਨੋ, ਭਵਾਭਿਨਨ੍ਦੀ ਤਵ ਚਿਤ੍ਤ ਸਾਵਕਾ’’ਤਿ.

… ਤਾਲਪੁਟੋ ਥੇਰੋ….

ਪਞ੍ਞਾਸਨਿਪਾਤੋ ਨਿਟ੍ਠਿਤੋ.