੯. ਨਵਮਵਗ੍ਗੋ

੧. ਸਮਿਤਿਗੁਤ੍ਤਤ੍ਥੇਰਗਾਥਾ

੮੧. ‘‘ਯਂ ਮਯਾ ਪਕਤਂ ਪਾਪਂ, ਪੁਬ੍ਬੇ ਅਞ੍ਞਾਸੁ ਜਾਤਿਸੁ;

ਇਧੇਵ ਤਂ ਵੇਦਨੀਯਂ, ਵਤ੍ਥੁ ਅਞ੍ਞਂ ਨ ਵਿਜ੍ਜਤੀ’’ਤਿ.

… ਸਮਿਤਿਗੁਤ੍ਤੋ ਥੇਰੋ….

੨. ਕਸ੍ਸਪਤ੍ਥੇਰਗਾਥਾ

੮੨. ‘‘ਯੇਨ ਯੇਨ ਸੁਭਿਕ੍ਖਾਨਿ, ਸਿਵਾਨਿ ਅਭਯਾਨਿ ਚ;

ਤੇਨ ਪੁਤ੍ਤਕ ਗਚ੍ਛਸ੍ਸੁ, ਮਾ ਸੋਕਾਪਹਤੋ ਭਵਾ’’ਤਿ.

… ਕਸ੍ਸਪੋ ਥੇਰੋ….

੩. ਸੀਹਤ੍ਥੇਰਗਾਥਾ

੮੩. ‘‘ਸੀਹਪ੍ਪਮਤ੍ਤੋ ਵਿਹਰ, ਰਤ੍ਤਿਨ੍ਦਿਵਮਤਨ੍ਦਿਤੋ;

ਭਾਵੇਹਿ ਕੁਸਲਂ ਧਮ੍ਮਂ, ਜਹ ਸੀਘਂ ਸਮੁਸ੍ਸਯ’’ਨ੍ਤਿ.

… ਸੀਹੋ ਥੇਰੋ….

੪. ਨੀਤਤ੍ਥੇਰਗਾਥਾ

੮੪. ‘‘ਸਬ੍ਬਰਤ੍ਤਿਂ ਸੁਪਿਤ੍ਵਾਨ, ਦਿਵਾ ਸਙ੍ਗਣਿਕੇ ਰਤੋ;

ਕੁਦਾਸ੍ਸੁ ਨਾਮ ਦੁਮ੍ਮੇਧੋ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀ’’ਤਿ.

… ਨੀਤੋ ਥੇਰੋ….

੫. ਸੁਨਾਗਤ੍ਥੇਰਗਾਥਾ

੮੫. ‘‘ਚਿਤ੍ਤਨਿਮਿਤ੍ਤਸ੍ਸ ਕੋਵਿਦੋ, ਪਵਿਵੇਕਰਸਂ ਵਿਜਾਨਿਯ;

ਝਾਯਂ ਨਿਪਕੋ ਪਤਿਸ੍ਸਤੋ, ਅਧਿਗਚ੍ਛੇਯ੍ਯ ਸੁਖਂ ਨਿਰਾਮਿਸ’’ਨ੍ਤਿ.

… ਸੁਨਾਗੋ ਥੇਰੋ….

੬. ਨਾਗਿਤਤ੍ਥੇਰਗਾਥਾ

੮੬. ‘‘ਇਤੋ ਬਹਿਦ੍ਧਾ ਪੁਥੁ ਅਞ੍ਞਵਾਦਿਨਂ, ਮਗ੍ਗੋ ਨ ਨਿਬ੍ਬਾਨਗਮੋ ਯਥਾ ਅਯਂ;

ਇਤਿਸ੍ਸੁ ਸਙ੍ਘਂ ਭਗਵਾਨੁਸਾਸਤਿ, ਸਤ੍ਥਾ ਸਯਂ ਪਾਣਿਤਲੇਵ ਦਸ੍ਸਯ’’ਨ੍ਤਿ.

… ਨਾਗਿਤੋ ਥੇਰੋ….

੭. ਪਵਿਟ੍ਠਤ੍ਥੇਰਗਾਥਾ

੮੭. ‘‘ਖਨ੍ਧਾ ਦਿਟ੍ਠਾ ਯਥਾਭੂਤਂ, ਭਵਾ ਸਬ੍ਬੇ ਪਦਾਲਿਤਾ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

… ਪਵਿਟ੍ਠੋ ਥੇਰੋ….

੮. ਅਜ੍ਜੁਨਤ੍ਥੇਰਗਾਥਾ

੮੮. ‘‘ਅਸਕ੍ਖਿਂ ਵਤ ਅਤ੍ਤਾਨਂ, ਉਦ੍ਧਾਤੁਂ ਉਦਕਾ ਥਲਂ;

ਵੁਯ੍ਹਮਾਨੋ ਮਹੋਘੇਵ, ਸਚ੍ਚਾਨਿ ਪਟਿਵਿਜ੍ਝਹ’’ਨ੍ਤਿ.

… ਅਜ੍ਜੁਨੋ ਥੇਰੋ….

੯. (ਪਠਮ)-ਦੇਵਸਭਤ੍ਥੇਰਗਾਥਾ

੮੯. ‘‘ਉਤ੍ਤਿਣ੍ਣਾ ਪਙ੍ਕਪਲਿਪਾ, ਪਾਤਾਲਾ ਪਰਿਵਜ੍ਜਿਤਾ;

ਮੁਤ੍ਤੋ ਓਘਾ ਚ ਗਨ੍ਥਾ ਚ, ਸਬ੍ਬੇ ਮਾਨਾ ਵਿਸਂਹਤਾ’’ਤਿ.

… ਦੇਵਸਭੋ ਥੇਰੋ….

੧੦. ਸਾਮਿਦਤ੍ਤਤ੍ਥੇਰਗਾਥਾ

੯੦. ‘‘ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ, ਤਿਟ੍ਠਨ੍ਤਿ ਛਿਨ੍ਨਮੂਲਕਾ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

… ਸਾਮਿਦਤ੍ਤੋ ਥੇਰੋ….

ਵਗ੍ਗੋ ਨਵਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਥੇਰੋ ਸਮਿਤਿਗੁਤ੍ਤੋ ਚ, ਕਸ੍ਸਪੋ ਸੀਹਸਵ੍ਹਯੋ;

ਨੀਤੋ ਸੁਨਾਗੋ ਨਾਗਿਤੋ, ਪਵਿਟ੍ਠੋ ਅਜ੍ਜੁਨੋ ਇਸਿ;

ਦੇਵਸਭੋ ਚ ਯੋ ਥੇਰੋ, ਸਾਮਿਦਤ੍ਤੋ ਮਹਬ੍ਬਲੋਤਿ.