੧੦. ਦਸਮਵਗ੍ਗੋ

੧. ਪਰਿਪੁਣ੍ਣਕਤ੍ਥੇਰਗਾਥਾ

੯੧. ‘‘ਨ ਤਥਾ ਮਤਂ ਸਤਰਸਂ, ਸੁਧਨ੍ਨਂ ਯਂ ਮਯਜ੍ਜ ਪਰਿਭੁਤ੍ਤਂ;

ਅਪਰਿਮਿਤਦਸ੍ਸਿਨਾ ਗੋਤਮੇਨ, ਬੁਦ੍ਧੇਨ ਦੇਸਿਤੋ ਧਮ੍ਮੋ’’ਤਿ.

… ਪਰਿਪੁਣ੍ਣਕੋ ਥੇਰੋ….

੨. ਵਿਜਯਤ੍ਥੇਰਗਾਥਾ

੯੨. ‘‘ਯਸ੍ਸਾਸਵਾ ਪਰਿਕ੍ਖੀਣਾ, ਆਹਾਰੇ ਚ ਅਨਿਸ੍ਸਿਤੋ;

ਸੁਞ੍ਞਤਾ ਅਨਿਮਿਤ੍ਤੋ ਚ, ਵਿਮੋਕ੍ਖੋ ਯਸ੍ਸ ਗੋਚਰੋ;

ਆਕਾਸੇਵ ਸਕੁਨ੍ਤਾਨਂ, ਪਦਂ ਤਸ੍ਸ ਦੁਰਨ੍ਨਯ’’ਨ੍ਤਿ.

… ਵਿਜਯੋ ਥੇਰੋ….

੩. ਏਰਕਤ੍ਥੇਰਗਾਥਾ

੯੩. ‘‘ਦੁਕ੍ਖਾ ਕਾਮਾ ਏਰਕ, ਨ ਸੁਖਾ ਕਾਮਾ ਏਰਕ;

ਯੋ ਕਾਮੇ ਕਾਮਯਤਿ, ਦੁਕ੍ਖਂ ਸੋ ਕਾਮਯਤਿ ਏਰਕ;

ਯੋ ਕਾਮੇ ਨ ਕਾਮਯਤਿ, ਦੁਕ੍ਖਂ ਸੋ ਨ ਕਾਮਯਤਿ ਏਰਕਾ’’ਤਿ.

… ਏਰਕੋ ਥੇਰੋ….

੪. ਮੇਤ੍ਤਜਿਤ੍ਥੇਰਗਾਥਾ

੯੪. ‘‘ਨਮੋ ਹਿ ਤਸ੍ਸ ਭਗਵਤੋ, ਸਕ੍ਯਪੁਤ੍ਤਸ੍ਸ ਸਿਰੀਮਤੋ;

ਤੇਨਾਯਂ ਅਗ੍ਗਪ੍ਪਤ੍ਤੇਨ, ਅਗ੍ਗਧਮ੍ਮੋ [ਅਗ੍ਗੋ ਧਮ੍ਮੋ (ਸੀ.)] ਸੁਦੇਸਿਤੋ’’ਤਿ.

… ਮੇਤ੍ਤਜਿ ਥੇਰੋ….

੫. ਚਕ੍ਖੁਪਾਲਤ੍ਥੇਰਗਾਥਾ

੯੫. ‘‘ਅਨ੍ਧੋਹਂ ਹਤਨੇਤ੍ਤੋਸ੍ਮਿ, ਕਨ੍ਤਾਰਦ੍ਧਾਨਪਕ੍ਖਨ੍ਦੋ [ਪਕ੍ਖਨ੍ਨੋ (ਸੀ.), ਪਕ੍ਕਨ੍ਤੋ (ਸ੍ਯਾ. ਸੀ. ਅਟ੍ਠ.)];

ਸਯਮਾਨੋਪਿ ਗਚ੍ਛਿਸ੍ਸਂ, ਨ ਸਹਾਯੇਨ ਪਾਪੇਨਾ’’ਤਿ.

… ਚਕ੍ਖੁਪਾਲੋ ਥੇਰੋ….

੬. ਖਣ੍ਡਸੁਮਨਤ੍ਥੇਰਗਾਥਾ

੯੬. ‘‘ਏਕਪੁਪ੍ਫਂ ਚਜਿਤ੍ਵਾਨ, ਅਸੀਤਿ [ਅਸੀਤਿਂ (ਸੀ.)] ਵਸ੍ਸਕੋਟਿਯੋ;

ਸਗ੍ਗੇਸੁ ਪਰਿਚਾਰੇਤ੍ਵਾ, ਸੇਸਕੇਨਮ੍ਹਿ ਨਿਬ੍ਬੁਤੋ’’ਤਿ.

… ਖਣ੍ਡਸੁਮਨੋ ਥੇਰੋ….

੭. ਤਿਸ੍ਸਤ੍ਥੇਰਗਾਥਾ

੯੭. ‘‘ਹਿਤ੍ਵਾ ਸਤਪਲਂ ਕਂਸਂ, ਸੋਵਣ੍ਣਂ ਸਤਰਾਜਿਕਂ;

ਅਗ੍ਗਹਿਂ ਮਤ੍ਤਿਕਾਪਤ੍ਤਂ, ਇਦਂ ਦੁਤਿਯਾਭਿਸੇਚਨ’’ਨ੍ਤਿ.

… ਤਿਸ੍ਸੋ ਥੇਰੋ….

੮. ਅਭਯਤ੍ਥੇਰਗਾਥਾ

੯੮. ‘‘ਰੂਪਂ ਦਿਸ੍ਵਾ ਸਤਿ ਮੁਟ੍ਠਾ, ਪਿਯਂ ਨਿਮਿਤ੍ਤਂ ਮਨਸਿਕਰੋਤੋ;

ਸਾਰਤ੍ਤਚਿਤ੍ਤੋ ਵੇਦੇਤਿ, ਤਞ੍ਚ ਅਜ੍ਝੋਸ ਤਿਟ੍ਠਤਿ;

ਤਸ੍ਸ ਵਡ੍ਢਨ੍ਤਿ ਆਸਵਾ, ਭਵਮੂਲੋਪਗਾਮਿਨੋ’’ਤਿ [ਭਵਮੂਲਾ ਭਵਗਾਮਿਨੋਤਿ (ਸੀ. ਕ.)].

… ਅਭਯੋ ਥੇਰੋ….

੯. ਉਤ੍ਤਿਯਤ੍ਥੇਰਗਾਥਾ

੯੯. ‘‘ਸਦ੍ਦਂ ਸੁਤ੍ਵਾ ਸਤਿ ਮੁਟ੍ਠਾ, ਪਿਯਂ ਨਿਮਿਤ੍ਤਂ ਮਨਸਿਕਰੋਤੋ;

ਸਾਰਤ੍ਤਚਿਤ੍ਤੋ ਵੇਦੇਤਿ, ਤਞ੍ਚ ਅਜ੍ਝੋਸ ਤਿਟ੍ਠਤਿ;

ਤਸ੍ਸ ਵਡ੍ਢਨ੍ਤਿ ਆਸਵਾ, ਸਂਸਾਰਂ ਉਪਗਾਮਿਨੋ’’ਤਿ.

… ਉਤ੍ਤਿਯੋ ਥੇਰੋ….

੧੦. (ਦੁਤਿਯ)-ਦੇਵਸਭਤ੍ਥੇਰਗਾਥਾ

੧੦੦. ‘‘ਸਮ੍ਮਪ੍ਪਧਾਨਸਮ੍ਪਨ੍ਨੋ, ਸਤਿਪਟ੍ਠਾਨਗੋਚਰੋ;

ਵਿਮੁਤ੍ਤਿਕੁਸੁਮਸਞ੍ਛਨ੍ਨੋ, ਪਰਿਨਿਬ੍ਬਿਸ੍ਸਤ੍ਯਨਾਸਵੋ’’ਤਿ.

… ਦੇਵਸਭੋ ਥੇਰੋ….

ਵਗ੍ਗੋ ਦਸਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਪਰਿਪੁਣ੍ਣਕੋ ਚ ਵਿਜਯੋ, ਏਰਕੋ ਮੇਤ੍ਤਜੀ ਮੁਨਿ;

ਚਕ੍ਖੁਪਾਲੋ ਖਣ੍ਡਸੁਮਨੋ, ਤਿਸ੍ਸੋ ਚ ਅਭਯੋ ਤਥਾ;

ਉਤ੍ਤਿਯੋ ਚ ਮਹਾਪਞ੍ਞੋ, ਥੇਰੋ ਦੇਵਸਭੋਪਿ ਚਾਤਿ.