੧੧. ਏਕਾਦਸਮਵਗ੍ਗੋ

੧੦੧. ‘‘ਹਿਤ੍ਵਾ ਗਿਹਿਤ੍ਤਂ ਅਨਵੋਸਿਤਤ੍ਤੋ, ਮੁਖਨਙ੍ਗਲੀ ਓਦਰਿਕੋ ਕੁਸੀਤੋ;

ਮਹਾਵਰਾਹੋਵ ਨਿਵਾਪਪੁਟ੍ਠੋ, ਪੁਨਪ੍ਪੁਨਂ ਗਬ੍ਭਮੁਪੇਤਿ ਮਨ੍ਦੋ’’ਤਿ.

… ਬੇਲਟ੍ਠਾਨਿਕੋ ਥੇਰੋ….

੧੦੨. ‘‘ਮਾਨੇਨ ਵਞ੍ਚਿਤਾਸੇ, ਸਙ੍ਖਾਰੇਸੁ ਸਂਕਿਲਿਸ੍ਸਮਾਨਾਸੇ;

ਲਾਭਾਲਾਭੇਨ ਮਥਿਤਾ, ਸਮਾਧਿਂ ਨਾਧਿਗਚ੍ਛਨ੍ਤੀ’’ਤਿ.

… ਸੇਤੁਚ੍ਛੋ ਥੇਰੋ….

੧੦੩. ‘‘ਨਾਹਂ ਏਤੇਨ ਅਤ੍ਥਿਕੋ, ਸੁਖਿਤੋ ਧਮ੍ਮਰਸੇਨ ਤਪ੍ਪਿਤੋ;

ਪਿਤ੍ਵਾ [ਪੀਤ੍ਵਾਨ (ਸੀ. ਸ੍ਯਾ.)] ਰਸਗ੍ਗਮੁਤ੍ਤਮਂ, ਨ ਚ ਕਾਹਾਮਿ ਵਿਸੇਨ ਸਨ੍ਥਵ’’ਨ੍ਤਿ.

… ਬਨ੍ਧੁਰੋ [ਬਨ੍ਧਨੋ (ਕ.)] ਥੇਰੋ….

੧੦੪. ‘‘ਲਹੁਕੋ ਵਤ ਮੇ ਕਾਯੋ, ਫੁਟ੍ਠੋ ਚ ਪੀਤਿਸੁਖੇਨ ਵਿਪੁਲੇਨ;

ਤੂਲਮਿਵ ਏਰਿਤਂ ਮਾਲੁਤੇਨ, ਪਿਲਵਤੀਵ ਮੇ ਕਾਯੋ’’ਤਿ.

… ਖਿਤਕੋ ਥੇਰੋ….

੧੦੫. ‘‘ਉਕ੍ਕਣ੍ਠਿਤੋਪਿ ਨ ਵਸੇ, ਰਮਮਾਨੋਪਿ ਪਕ੍ਕਮੇ;

ਨ ਤ੍ਵੇਵਾਨਤ੍ਥਸਂਹਿਤਂ, ਵਸੇ ਵਾਸਂ ਵਿਚਕ੍ਖਣੋ’’ਤਿ.

… ਮਲਿਤਵਮ੍ਭੋ ਥੇਰੋ….

੧੦੬. ‘‘ਸਤਲਿਙ੍ਗਸ੍ਸ ਅਤ੍ਥਸ੍ਸ, ਸਤਲਕ੍ਖਣਧਾਰਿਨੋ;

ਏਕਙ੍ਗਦਸ੍ਸੀ ਦੁਮ੍ਮੇਧੋ, ਸਤਦਸ੍ਸੀ ਚ ਪਣ੍ਡਿਤੋ’’ਤਿ.

… ਸੁਹੇਮਨ੍ਤੋ ਥੇਰੋ….

੧੦੭. ‘‘ਪਬ੍ਬਜਿਂ ਤੁਲਯਿਤ੍ਵਾਨ, ਅਗਾਰਸ੍ਮਾਨਗਾਰਿਯਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਧਮ੍ਮਸਵੋ ਥੇਰੋ….

੧੦੮. ‘‘ਸ ਵੀਸਵਸ੍ਸਸਤਿਕੋ, ਪਬ੍ਬਜਿਂ ਅਨਗਾਰਿਯਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਧਮ੍ਮਸਵਪਿਤੁ ਥੇਰੋ….

੧੦੯. ‘‘ਨ ਨੂਨਾਯਂ ਪਰਮਹਿਤਾਨੁਕਮ੍ਪਿਨੋ, ਰਹੋਗਤੋ ਅਨੁਵਿਗਣੇਤਿ ਸਾਸਨਂ;

ਤਥਾਹਯਂ ਵਿਹਰਤਿ ਪਾਕਤਿਨ੍ਦ੍ਰਿਯੋ, ਮਿਗੀ ਯਥਾ ਤਰੁਣਜਾਤਿਕਾ ਵਨੇ’’ਤਿ.

… ਸਙ੍ਘਰਕ੍ਖਿਤੋ ਥੇਰੋ….

੧੧੦. ‘‘ਨਗਾ ਨਗਗ੍ਗੇਸੁ ਸੁਸਂਵਿਰੂਲ਼੍ਹਾ, ਉਦਗ੍ਗਮੇਘੇਨ ਨਵੇਨ ਸਿਤ੍ਤਾ;

ਵਿਵੇਕਕਾਮਸ੍ਸ ਅਰਞ੍ਞਸਞ੍ਞਿਨੋ, ਜਨੇਤਿ ਭਿਯ੍ਯੋ ਉਸਭਸ੍ਸ ਕਲ੍ਯਤ’’ਨ੍ਤਿ.

… ਉਸਭੋ ਥੇਰੋ….

ਵਗ੍ਗੋ ਏਕਾਦਸਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਬੇਲਟ੍ਠਾਨਿਕੋ ਸੇਤੁਚ੍ਛੋ, ਬਨ੍ਧੁਰੋ ਖਿਤਕੋ ਇਸਿ;

ਮਲਿਤਵਮ੍ਭੋ ਸੁਹੇਮਨ੍ਤੋ, ਧਮ੍ਮਸਵੋ ਧਮ੍ਮਸਵਪਿਤਾ;

ਸਙ੍ਘਰਕ੍ਖਿਤਤ੍ਥੇਰੋ ਚ, ਉਸਭੋ ਚ ਮਹਾਮੁਨੀਤਿ.