੧੨. ਦ੍ਵਾਦਸਮਵਗ੍ਗੋ

੧. ਜੇਨ੍ਤਤ੍ਥੇਰਗਾਥਾ

੧੧੧. ‘‘ਦੁਪ੍ਪਬ੍ਬਜ੍ਜਂ ਵੇ ਦੁਰਧਿਵਾਸਾ ਗੇਹਾ, ਧਮ੍ਮੋ ਗਮ੍ਭੀਰੋ ਦੁਰਧਿਗਮਾ ਭੋਗਾ;

ਕਿਚ੍ਛਾ ਵੁਤ੍ਤਿ ਨੋ ਇਤਰੀਤਰੇਨੇਵ, ਯੁਤ੍ਤਂ ਚਿਨ੍ਤੇਤੁਂ ਸਤਤਮਨਿਚ੍ਚਤ’’ਨ੍ਤਿ.

… ਜੇਨ੍ਤੋ ਥੇਰੋ….

੨. ਵਚ੍ਛਗੋਤ੍ਤਤ੍ਥੇਰਗਾਥਾ

੧੧੨. ‘‘ਤੇਵਿਜ੍ਜੋਹਂ ਮਹਾਝਾਯੀ, ਚੇਤੋਸਮਥਕੋਵਿਦੋ;

ਸਦਤ੍ਥੋ ਮੇ ਅਨੁਪ੍ਪਤ੍ਤੋ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਵਚ੍ਛਗੋਤ੍ਤੋ ਥੇਰੋ….

੩. ਵਨਵਚ੍ਛਤ੍ਥੇਰਗਾਥਾ

੧੧੩. ‘‘ਅਚ੍ਛੋਦਿਕਾ ਪੁਥੁਸਿਲਾ,ਗੋਨਙ੍ਗੁਲਮਿਗਾਯੁਤਾ;

ਅਮ੍ਬੁਸੇਵਾਲਸਞ੍ਛਨ੍ਨਾ, ਤੇ ਸੇਲਾ ਰਮਯਨ੍ਤਿ ਮ’’ਨ੍ਤਿ.

… ਵਨਵਚ੍ਛੋ ਥੇਰੋ….

੪. ਅਧਿਮੁਤ੍ਤਤ੍ਥੇਰਗਾਥਾ

੧੧੪. ‘‘ਕਾਯਦੁਟ੍ਠੁਲ੍ਲਗਰੁਨੋ, ਹਿਯ੍ਯਮਾਨਮ੍ਹਿ [ਹੀਯਮਾਨਮ੍ਹਿ (ਸੀ.)] ਜੀਵਿਤੇ;

ਸਰੀਰਸੁਖਗਿਦ੍ਧਸ੍ਸ, ਕੁਤੋ ਸਮਣਸਾਧੁਤਾ’’ਤਿ.

… ਅਧਿਮੁਤ੍ਤੋ ਥੇਰੋ….

੫. ਮਹਾਨਾਮਤ੍ਥੇਰਗਾਥਾ

੧੧੫. ‘‘ਏਸਾਵਹਿਯ੍ਯਸੇ ਪਬ੍ਬਤੇਨ, ਬਹੁਕੁਟਜਸਲ੍ਲਕਿਕੇਨ [ਸਲ੍ਲਕਿਤੇਨ (ਸੀ.), ਸਲ੍ਲਰਿਕੇਨ (ਸ੍ਯਾ.)];

ਨੇਸਾਦਕੇਨ ਗਿਰਿਨਾ, ਯਸਸ੍ਸਿਨਾ ਪਰਿਚ੍ਛਦੇਨਾ’’ਤਿ.

… ਮਹਾਨਾਮੋ ਥੇਰੋ….

੬. ਪਾਰਾਪਰਿਯਤ੍ਥੇਰਗਾਥਾ

੧੧੬. ‘‘ਛਫਸ੍ਸਾਯਤਨੇ ਹਿਤ੍ਵਾ, ਗੁਤ੍ਤਦ੍ਵਾਰੋ ਸੁਸਂਵੁਤੋ;

ਅਘਮੂਲਂ ਵਮਿਤ੍ਵਾਨ, ਪਤ੍ਤੋ ਮੇ ਆਸਵਕ੍ਖਯੋ’’ਤਿ.

… ਪਾਰਾਪਰਿਯੋ [ਪਾਰਾਸਰਿਯੋ (ਸੀ.), ਪਾਰਂਪਰਿਯੋ (ਕ.)] ਥੇਰੋ ….

੭. ਯਸਤ੍ਥੇਰਗਾਥਾ

੧੧੭. ‘‘ਸੁਵਿਲਿਤ੍ਤੋ ਸੁਵਸਨੋ,ਸਬ੍ਬਾਭਰਣਭੂਸਿਤੋ;

ਤਿਸ੍ਸੋ ਵਿਜ੍ਜਾ ਅਜ੍ਝਗਮਿਂ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਯਸੋ ਥੇਰੋ….

੮. ਕਿਮਿਲਤ੍ਥੇਰਗਾਥਾ

੧੧੮. ‘‘ਅਭਿਸਤ੍ਤੋਵ ਨਿਪਤਤਿ, ਵਯੋ ਰੂਪਂ ਅਞ੍ਞਮਿਵ ਤਥੇਵ ਸਨ੍ਤਂ;

ਤਸ੍ਸੇਵ ਸਤੋ ਅਵਿਪ੍ਪਵਸਤੋ, ਅਞ੍ਞਸ੍ਸੇਵ ਸਰਾਮਿ ਅਤ੍ਤਾਨ’’ਨ੍ਤਿ.

… ਕਿਮਿਲੋ [ਕਿਮ੍ਬਿਲੋ (ਸੀ. ਸ੍ਯਾ.)] ਥੇਰੋ….

੯. ਵਜ੍ਜਿਪੁਤ੍ਤਤ੍ਥੇਰਗਾਥਾ

੧੧੯. ‘‘ਰੁਕ੍ਖਮੂਲਗਹਨਂ ਪਸਕ੍ਕਿਯ, ਨਿਬ੍ਬਾਨਂ ਹਦਯਸ੍ਮਿਂ ਓਪਿਯ;

ਝਾਯ ਗੋਤਮ ਮਾ ਚ ਪਮਾਦੋ, ਕਿਂ ਤੇ ਬਿਲ਼ਿਬਿਲ਼ਿਕਾ ਕਰਿਸ੍ਸਤੀ’’ਤਿ.

… ਵਜ੍ਜਿਪੁਤ੍ਤੋ ਥੇਰੋ….

੧੦. ਇਸਿਦਤ੍ਤਤ੍ਥੇਰਗਾਥਾ

੧੨੦. ‘‘ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ, ਤਿਟ੍ਠਨ੍ਤਿ ਛਿਨ੍ਨਮੂਲਕਾ;

ਦੁਕ੍ਖਕ੍ਖਯੋ ਅਨੁਪ੍ਪਤ੍ਤੋ,ਪਤ੍ਤੋ ਮੇ ਆਸਵਕ੍ਖਯੋ’’ਤਿ.

… ਇਸਿਦਤ੍ਤੋ ਥੇਰੋ….

ਵਗ੍ਗੋ ਦ੍ਵਾਦਸਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਜੇਨ੍ਤੋ ਚ ਵਚ੍ਛਗੋਤ੍ਤੋ ਚ, ਵਚ੍ਛੋ ਚ ਵਨਸਵ੍ਹਯੋ;

ਅਧਿਮੁਤ੍ਤੋ ਮਹਾਨਾਮੋ, ਪਾਰਾਪਰਿਯੋ ਯਸੋਪਿ ਚ;

ਕਿਮਿਲੋ ਵਜ੍ਜਿਪੁਤ੍ਤੋ ਚ, ਇਸਿਦਤ੍ਤੋ ਮਹਾਯਸੋਤਿ.

ਏਕਕਨਿਪਾਤੋ ਨਿਟ੍ਠਿਤੋ.