੬. ਛਟ੍ਠਵਗ੍ਗੋ

੫੧. ‘‘ਵਸ੍ਸਤਿ ਦੇਵੋ ਯਥਾ ਸੁਗੀਤਂ, ਛਨ੍ਨਾ ਮੇ ਕੁਟਿਕਾ ਸੁਖਾ ਨਿਵਾਤਾ;

ਚਿਤ੍ਤਂ ਸੁਸਮਾਹਿਤਞ੍ਚ ਮਯ੍ਹਂ, ਅਥ ਚੇ ਪਤ੍ਥਯਸਿ ਪਵਸ੍ਸ ਦੇਵਾ’’ਤਿ.

… ਗੋਧਿਕੋ ਥੇਰੋ….

੫੨. ‘‘ਵਸ੍ਸਤਿ ਦੇਵੋ ਯਥਾ ਸੁਗੀਤਂ, ਛਨ੍ਨਾ ਮੇ ਕੁਟਿਕਾ ਸੁਖਾ ਨਿਵਾਤਾ;

ਚਿਤ੍ਤਂ ਸੁਸਮਾਹਿਤਞ੍ਚ ਕਾਯੇ, ਅਥ ਚੇ ਪਤ੍ਥਯਸਿ ਪਵਸ੍ਸ ਦੇਵਾ’’ਤਿ.

… ਸੁਬਾਹੁਤ੍ਥੇਰੋ….

੫੩. ‘‘ਵਸ੍ਸਤਿ ਦੇਵੋ ਯਥਾ ਸੁਗੀਤਂ, ਛਨ੍ਨਾ ਮੇ ਕੁਟਿਕਾ ਸੁਖਾ ਨਿਵਾਤਾ;

ਤਸ੍ਸਂ ਵਿਹਰਾਮਿ ਅਪ੍ਪਮਤ੍ਤੋ, ਅਥ ਚੇ ਪਤ੍ਥਯਸਿ ਪਵਸ੍ਸ ਦੇਵਾ’’ਤਿ.

… ਵਲ੍ਲਿਯੋ ਥੇਰੋ….

੫੪. ‘‘ਵਸ੍ਸਤਿ ਦੇਵੋ ਯਥਾ ਸੁਗੀਤਂ, ਛਨ੍ਨਾ ਮੇ ਕੁਟਿਕਾ ਸੁਖਾ ਨਿਵਾਤਾ;

ਤਸ੍ਸਂ ਵਿਹਰਾਮਿ ਅਦੁਤਿਯੋ, ਅਥ ਚੇ ਪਤ੍ਥਯਸਿ ਪਵਸ੍ਸ ਦੇਵਾ’’ਤਿ.

… ਉਤ੍ਤਿਯੋ ਥੇਰੋ….

੫੫. ‘‘ਆਸਨ੍ਦਿਂ ਕੁਟਿਕਂ ਕਤ੍ਵਾ, ਓਗਯ੍ਹ ਅਞ੍ਜਨਂ ਵਨਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਅਞ੍ਜਨਵਨਿਯੋ ਥੇਰੋ….

੫੬. ‘‘ਕੋ ਕੁਟਿਕਾਯਂ ਭਿਕ੍ਖੁ ਕੁਟਿਕਾਯਂ, ਵੀਤਰਾਗੋ ਸੁਸਮਾਹਿਤਚਿਤ੍ਤੋ;

ਏਵਂ ਜਾਨਾਹਿ ਆਵੁਸੋ, ਅਮੋਘਾ ਤੇ ਕੁਟਿਕਾ ਕਤਾ’’ਤਿ.

… ਕੁਟਿਵਿਹਾਰਿਤ੍ਥੇਰੋ….

੫੭. ‘‘ਅਯਮਾਹੁ ਪੁਰਾਣਿਯਾ ਕੁਟਿ, ਅਞ੍ਞਂ ਪਤ੍ਥਯਸੇ ਨਵਂ ਕੁਟਿਂ;

ਆਸਂ ਕੁਟਿਯਾ ਵਿਰਾਜਯ, ਦੁਕ੍ਖਾ ਭਿਕ੍ਖੁ ਪੁਨ ਨਵਾ ਕੁਟੀ’’ਤਿ.

… ਦੁਤਿਯਕੁਟਿਵਿਹਾਰਿਤ੍ਥੇਰੋ….

੫੮. ‘‘ਰਮਣੀਯਾ ਮੇ ਕੁਟਿਕਾ, ਸਦ੍ਧਾਦੇਯ੍ਯਾ ਮਨੋਰਮਾ;

ਨ ਮੇ ਅਤ੍ਥੋ ਕੁਮਾਰੀਹਿ, ਯੇਸਂ ਅਤ੍ਥੋ ਤਹਿਂ ਗਚ੍ਛਥ ਨਾਰਿਯੋ’’ਤਿ.

… ਰਮਣੀਯਕੁਟਿਕੋ ਥੇਰੋ….

੫੯. ‘‘ਸਦ੍ਧਾਯਾਹਂ ਪਬ੍ਬਜਿਤੋ, ਅਰਞ੍ਞੇ ਮੇ ਕੁਟਿਕਾ ਕਤਾ;

ਅਪ੍ਪਮਤ੍ਤੋ ਚ ਆਤਾਪੀ, ਸਮ੍ਪਜਾਨੋ ਪਤਿਸ੍ਸਤੋ’’ਤਿ [ਪਟਿਸ੍ਸਤੋਤਿ (ਕ.)].

… ਕੋਸਲਵਿਹਾਰਿਤ੍ਥੇਰੋ….

੬੦. ‘‘ਤੇ ਮੇ ਇਜ੍ਝਿਂਸੁ ਸਙ੍ਕਪ੍ਪਾ, ਯਦਤ੍ਥੋ ਪਾਵਿਸਿਂ ਕੁਟਿਂ;

ਵਿਜ੍ਜਾਵਿਮੁਤ੍ਤਿਂ ਪਚ੍ਚੇਸਂ, ਮਾਨਾਨੁਸਯਮੁਜ੍ਜਹ’’ਨ੍ਤਿ.

… ਸੀਵਲਿਤ੍ਥੇਰੋ….

ਵਗ੍ਗੋ ਛਟ੍ਠੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਗੋਧਿਕੋ ਚ ਸੁਬਾਹੁ ਚ, ਵਲ੍ਲਿਯੋ ਉਤ੍ਤਿਯੋ ਇਸਿ;

ਅਞ੍ਜਨਵਨਿਯੋ ਥੇਰੋ, ਦੁਵੇ ਕੁਟਿਵਿਹਾਰਿਨੋ;

ਰਮਣੀਯਕੁਟਿਕੋ ਚ, ਕੋਸਲਵ੍ਹਯਸੀਵਲੀਤਿ.