੭. ਸਤ੍ਤਮਵਗ੍ਗੋ

੬੧. ‘‘ਪਸ੍ਸਤਿ ਪਸ੍ਸੋ ਪਸ੍ਸਨ੍ਤਂ, ਅਪਸ੍ਸਨ੍ਤਞ੍ਚ ਪਸ੍ਸਤਿ;

ਅਪਸ੍ਸਨ੍ਤੋ ਅਪਸ੍ਸਨ੍ਤਂ, ਪਸ੍ਸਨ੍ਤਞ੍ਚ ਨ ਪਸ੍ਸਤੀ’’ਤਿ.

… ਵਪ੍ਪੋ ਥੇਰੋ….

੬੨. ‘‘ਏਕਕਾ ਮਯਂ ਅਰਞ੍ਞੇ ਵਿਹਰਾਮ, ਅਪਵਿਦ੍ਧਂਵ ਵਨਸ੍ਮਿਂ ਦਾਰੁਕਂ;

ਤਸ੍ਸ ਮੇ ਬਹੁਕਾ ਪਿਹਯਨ੍ਤਿ, ਨੇਰਯਿਕਾ ਵਿਯ ਸਗ੍ਗਗਾਮਿਨ’’ਨ੍ਤਿ.

… ਵਜ੍ਜਿਪੁਤ੍ਤੋ ਥੇਰੋ….

੬੩. ‘‘ਚੁਤਾ ਪਤਨ੍ਤਿ ਪਤਿਤਾ, ਗਿਦ੍ਧਾ ਚ ਪੁਨਰਾਗਤਾ;

ਕਤਂ ਕਿਚ੍ਚਂ ਰਤਂ ਰਮ੍ਮਂ, ਸੁਖੇਨਨ੍ਵਾਗਤਂ ਸੁਖ’’ਨ੍ਤਿ.

… ਪਕ੍ਖੋ ਥੇਰੋ….

੬੪. ‘‘ਦੁਮਵ੍ਹਯਾਯ ਉਪ੍ਪਨ੍ਨੋ, ਜਾਤੋ ਪਣ੍ਡਰਕੇਤੁਨਾ;

ਕੇਤੁਹਾ ਕੇਤੁਨਾਯੇਵ, ਮਹਾਕੇਤੁਂ ਪਧਂਸਯੀ’’ਤਿ.

… ਵਿਮਲਕੋਣ੍ਡਞ੍ਞੋ ਥੇਰੋ….

੬੫. ‘‘ਉਕ੍ਖੇਪਕਤਵਚ੍ਛਸ੍ਸ, ਸਙ੍ਕਲਿਤਂ ਬਹੂਹਿ ਵਸ੍ਸੇਹਿ;

ਤਂ ਭਾਸਤਿ ਗਹਟ੍ਠਾਨਂ, ਸੁਨਿਸਿਨ੍ਨੋ ਉਲ਼ਾਰਪਾਮੋਜ੍ਜੋ’’ਤਿ.

… ਉਕ੍ਖੇਪਕਤਵਚ੍ਛੋ ਥੇਰੋ….

੬੬. ‘‘ਅਨੁਸਾਸਿ ਮਹਾਵੀਰੋ, ਸਬ੍ਬਧਮ੍ਮਾਨ ਪਾਰਗੂ;

ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਵਿਹਾਸਿਂ ਸਨ੍ਤਿਕੇ ਸਤੋ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਮੇਘਿਯੋ ਥੇਰੋ….

੬੭. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਵਿਕ੍ਖੀਣੋ ਜਾਤਿਸਂਸਾਰੋ, ਨਤ੍ਥਿ ਦਾਨਿ ਪੁਨਬ੍ਭਵੋ’’ਤਿ.

… ਏਕਧਮ੍ਮਸਵਨੀਯੋ ਥੇਰੋ….

੬੮. [ਉਦਾ. ੩੭; ਪਾਚਿ. ੧੫੩] ‘‘ਅਧਿਚੇਤਸੋ ਅਪ੍ਪਮਜ੍ਜਤੋ, ਮੁਨਿਨੋ ਮੋਨਪਥੇਸੁ ਸਿਕ੍ਖਤੋ;

ਸੋਕਾ ਨ ਭਵਨ੍ਤਿ ਤਾਦਿਨੋ, ਉਪਸਨ੍ਤਸ੍ਸ ਸਦਾ ਸਤੀਮਤੋ’’ਤਿ.

… ਏਕੁਦਾਨਿਯੋ ਥੇਰੋ….

੬੯. ‘‘ਸੁਤ੍ਵਾਨ ਧਮ੍ਮਂ ਮਹਤੋ ਮਹਾਰਸਂ, ਸਬ੍ਬਞ੍ਞੁਤਞ੍ਞਾਣਵਰੇਨ ਦੇਸਿਤਂ;

ਮਗ੍ਗਂ ਪਪਜ੍ਜਿਂ [ਪਪਜ੍ਜਂ (ਕ.)] ਅਮਤਸ੍ਸ ਪਤ੍ਤਿਯਾ, ਸੋ ਯੋਗਕ੍ਖੇਮਸ੍ਸ ਪਥਸ੍ਸ ਕੋਵਿਦੋ’’ਤਿ.

… ਛਨ੍ਨੋ ਥੇਰੋ….

੭੦. ‘‘ਸੀਲਮੇਵ ਇਧ ਅਗ੍ਗਂ, ਪਞ੍ਞਵਾ ਪਨ ਉਤ੍ਤਮੋ;

ਮਨੁਸ੍ਸੇਸੁ ਚ ਦੇਵੇਸੁ, ਸੀਲਪਞ੍ਞਾਣਤੋ ਜਯ’’ਨ੍ਤਿ.

… ਪੁਣ੍ਣੋ ਥੇਰੋ….

ਵਗ੍ਗੋ ਸਤ੍ਤਮੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਵਪ੍ਪੋ ਚ ਵਜ੍ਜਿਪੁਤ੍ਤੋ ਚ, ਪਕ੍ਖੋ ਵਿਮਲਕੋਣ੍ਡਞ੍ਞੋ;

ਉਕ੍ਖੇਪਕਤਵਚ੍ਛੋ ਚ, ਮੇਘਿਯੋ ਏਕਧਮ੍ਮਿਕੋ;

ਏਕੁਦਾਨਿਯਛਨ੍ਨਾ ਚ, ਪੁਣ੍ਣਤ੍ਥੇਰੋ ਮਹਬ੍ਬਲੋਤਿ.