੩. ਤਤਿਯਵਗ੍ਗੋ

੧. ਨਿਗ੍ਰੋਧਤ੍ਥੇਰਗਾਥਾ

੨੧. ‘‘ਨਾਹਂ ਭਯਸ੍ਸ ਭਾਯਾਮਿ, ਸਤ੍ਥਾ ਨੋ ਅਮਤਸ੍ਸ ਕੋਵਿਦੋ;

ਯਤ੍ਥ ਭਯਂ ਨਾਵਤਿਟ੍ਠਤਿ, ਤੇਨ ਮਗ੍ਗੇਨ ਵਜਨ੍ਤਿ ਭਿਕ੍ਖਵੋ’’ਤਿ.

… ਨਿਗ੍ਰੋਧੋ ਥੇਰੋ….

੨. ਚਿਤ੍ਤਕਤ੍ਥੇਰਗਾਥਾ

੨੨. ‘‘ਨੀਲਾ ਸੁਗੀਵਾ ਸਿਖਿਨੋ, ਮੋਰਾ ਕਾਰਮ੍ਭਿਯਂ [ਕਾਰਂਵਿਯਂ (ਸੀ.), ਕਾਰਵਿਯਂ (ਸ੍ਯਾ.)] ਅਭਿਨਦਨ੍ਤਿ;

ਤੇ ਸੀਤਵਾਤਕੀਲ਼ਿਤਾ [ਸੀਤਵਾਤਕਦ੍ਦਿਤਕਲਿਤਾ (ਸੀ.), ਸੀਤਵਾਤਕਲਿਤਾ (ਸ੍ਯਾ.)], ਸੁਤ੍ਤਂ ਝਾਯਂ [ਝਾਨਂ (ਸ੍ਯਾ.), ਝਾਯਿਂ (?)] ਨਿਬੋਧੇਨ੍ਤੀ’’ਤਿ.

… ਚਿਤ੍ਤਕੋ ਥੇਰੋ….

੩. ਗੋਸਾਲਤ੍ਥੇਰਗਾਥਾ

੨੩. ‘‘ਅਹਂ ਖੋ ਵੇਲ਼ੁਗੁਮ੍ਬਸ੍ਮਿਂ, ਭੁਤ੍ਵਾਨ ਮਧੁਪਾਯਸਂ;

ਪਦਕ੍ਖਿਣਂ ਸਮ੍ਮਸਨ੍ਤੋ, ਖਨ੍ਧਾਨਂ ਉਦਯਬ੍ਬਯਂ;

ਸਾਨੁਂ ਪਟਿਗਮਿਸ੍ਸਾਮਿ, ਵਿਵੇਕਮਨੁਬ੍ਰੂਹਯ’’ਨ੍ਤਿ.

… ਗੋਸਾਲੋ ਥੇਰੋ….

੪. ਸੁਗਨ੍ਧਤ੍ਥੇਰਗਾਥਾ

੨੪. ‘‘ਅਨੁਵਸ੍ਸਿਕੋ ਪਬ੍ਬਜਿਤੋ, ਪਸ੍ਸ ਧਮ੍ਮਸੁਧਮ੍ਮਤਂ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨ’’ਨ੍ਤਿ.

… ਸੁਗਨ੍ਧੋ ਥੇਰੋ….

੫. ਨਨ੍ਦਿਯਤ੍ਥੇਰਗਾਥਾ

੨੫. ‘‘ਓਭਾਸਜਾਤਂ ਫਲਗਂ, ਚਿਤ੍ਤਂ ਯਸ੍ਸ ਅਭਿਣ੍ਹਸੋ;

ਤਾਦਿਸਂ ਭਿਕ੍ਖੁਮਾਸਜ੍ਜ, ਕਣ੍ਹ ਦੁਕ੍ਖਂ ਨਿਗਚ੍ਛਸੀ’’ਤਿ.

… ਨਨ੍ਦਿਯੋ ਥੇਰੋ….

੬. ਅਭਯਤ੍ਥੇਰਗਾਥਾ

੨੬. ‘‘ਸੁਤ੍ਵਾ ਸੁਭਾਸਿਤਂ ਵਾਚਂ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਪਚ੍ਚਬ੍ਯਧਿਂ ਹਿ ਨਿਪੁਣਂ, ਵਾਲਗ੍ਗਂ ਉਸੁਨਾ ਯਥਾ’’ਤਿ.

… ਅਭਯੋ ਥੇਰੋ….

੭. ਲੋਮਸਕਙ੍ਗਿਯਤ੍ਥੇਰਗਾਥਾ

੨੭. ‘‘ਦਬ੍ਬਂ ਕੁਸਂ ਪੋਟਕਿਲਂ, ਉਸੀਰਂ ਮੁਞ੍ਜਪਬ੍ਬਜਂ;

ਉਰਸਾ ਪਨੁਦਿਸ੍ਸਾਮਿ, ਵਿਵੇਕਮਨੁਬ੍ਰੂਹਯ’’ਨ੍ਤਿ.

… ਲੋਮਸਕਙ੍ਗਿਯੋ ਥੇਰੋ….

੮. ਜਮ੍ਬੁਗਾਮਿਕਪੁਤ੍ਤਤ੍ਥੇਰਗਾਥਾ

੨੮. ‘‘ਕਚ੍ਚਿ ਨੋ ਵਤ੍ਥਪਸੁਤੋ, ਕਚ੍ਚਿ ਨੋ ਭੂਸਨਾਰਤੋ;

ਕਚ੍ਚਿ ਸੀਲਮਯਂ ਗਨ੍ਧਂ, ਕਿਂ ਤ੍ਵਂ ਵਾਯਸਿ [ਕਚ੍ਚਿ ਸੀਲਮਯਂ ਗਨ੍ਧਂ, ਤ੍ਵਂ ਵਾਸਿ (ਸ੍ਯਾ.)] ਨੇਤਰਾ ਪਜਾ’’ਤਿ.

… ਜਮ੍ਬੁਗਾਮਿਕਪੁਤ੍ਤੋ ਥੇਰੋ….

੯. ਹਾਰਿਤਤ੍ਥੇਰਗਾਥਾ

੨੯. ‘‘ਸਮੁਨ੍ਨਮਯਮਤ੍ਤਾਨਂ, ਉਸੁਕਾਰੋਵ ਤੇਜਨਂ;

ਚਿਤ੍ਤਂ ਉਜੁਂ ਕਰਿਤ੍ਵਾਨ, ਅਵਿਜ੍ਜਂ ਭਿਨ੍ਦ ਹਾਰਿਤਾ’’ਤਿ.

… ਹਾਰਿਤੋ ਥੇਰੋ….

੧੦. ਉਤ੍ਤਿਯਤ੍ਥੇਰਗਾਥਾ

੩੦. ‘‘ਆਬਾਧੇ ਮੇ ਸਮੁਪ੍ਪਨ੍ਨੇ, ਸਤਿ ਮੇ ਉਦਪਜ੍ਜਥ;

ਆਬਾਧੋ ਮੇ ਸਮੁਪ੍ਪਨ੍ਨੋ, ਕਾਲੋ ਮੇ ਨਪ੍ਪਮਜ੍ਜਿਤੁ’’ਨ੍ਤਿ.

… ਉਤ੍ਤਿਯੋ ਥੇਰੋ….

ਵਗ੍ਗੋ ਤਤਿਯੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਨਿਗ੍ਰੋਧੋ ਚਿਤ੍ਤਕੋ ਥੇਰੋ, ਗੋਸਾਲਥੇਰੋ ਸੁਗਨ੍ਧੋ;

ਨਨ੍ਦਿਯੋ ਅਭਯੋ ਥੇਰੋ, ਥੇਰੋ ਲੋਮਸਕਙ੍ਗਿਯੋ;

ਜਮ੍ਬੁਗਾਮਿਕਪੁਤ੍ਤੋ ਚ, ਹਾਰਿਤੋ ਉਤ੍ਤਿਯੋ ਇਸੀਤਿ.