੪. ਚਤੁਤ੍ਥਵਗ੍ਗੋ

੩੧. ‘‘ਫੁਟ੍ਠੋ ਡਂਸੇਹਿ ਮਕਸੇਹਿ, ਅਰਞ੍ਞਸ੍ਮਿਂ ਬ੍ਰਹਾਵਨੇ;

ਨਾਗੋ ਸਂਗਾਮਸੀਸੇਵ, ਸਤੋ ਤਤ੍ਰਾਧਿਵਾਸਯੇ’’ਤਿ.

… ਗਹ੍ਵਰਤੀਰਿਯੋ ਥੇਰੋ….

੩੨. ‘‘ਅਜਰਂ ਜੀਰਮਾਨੇਨ, ਤਪ੍ਪਮਾਨੇਨ ਨਿਬ੍ਬੁਤਿਂ;

ਨਿਮਿਯਂ [ਨਿਮ੍ਮਿਸ੍ਸਂ (ਸੀ.), ਨਿਰਾਮਿਸਂ (ਸ੍ਯਾ.), ਨਿਮਿਨੇਯ੍ਯਂ (?)] ਪਰਮਂ ਸਨ੍ਤਿਂ, ਯੋਗਕ੍ਖੇਮਂ ਅਨੁਤ੍ਤਰ’’ਨ੍ਤਿ.

… ਸੁਪ੍ਪਿਯੋ ਥੇਰੋ….

੩੩. ‘‘ਯਥਾਪਿ ਏਕਪੁਤ੍ਤਸ੍ਮਿਂ, ਪਿਯਸ੍ਮਿਂ ਕੁਸਲੀ ਸਿਯਾ;

ਏਵਂ ਸਬ੍ਬੇਸੁ ਪਾਣੇਸੁ, ਸਬ੍ਬਤ੍ਥ ਕੁਸਲੋ ਸਿਯਾ’’ਤਿ.

… ਸੋਪਾਕੋ ਥੇਰੋ….

੩੪. ‘‘ਅਨਾਸਨ੍ਨਵਰਾ ਏਤਾ, ਨਿਚ੍ਚਮੇਵ ਵਿਜਾਨਤਾ;

ਗਾਮਾ ਅਰਞ੍ਞਮਾਗਮ੍ਮ, ਤਤੋ ਗੇਹਂ ਉਪਾਵਿਸਿ [ਉਪਾਵਿਸਿਂ (ਸੀ.)];

ਤਤੋ ਉਟ੍ਠਾਯ ਪਕ੍ਕਾਮਿ, ਅਨਾਮਨ੍ਤੇਤ੍ਵਾ [ਅਨਾਮਨ੍ਤਿਯ (ਸੀ.)] ਪੋਸਿਯੋ’’ਤਿ.

… ਪੋਸਿਯੋ ਥੇਰੋ….

੩੫. ‘‘ਸੁਖਂ ਸੁਖਤ੍ਥੋ ਲਭਤੇ ਤਦਾਚਰਂ, ਕਿਤ੍ਤਿਞ੍ਚ ਪਪ੍ਪੋਤਿ ਯਸਸ੍ਸ ਵਡ੍ਢਤਿ;

ਯੋ ਅਰਿਯਮਟ੍ਠਙ੍ਗਿਕਮਞ੍ਜਸਂ ਉਜੁਂ, ਭਾਵੇਤਿ ਮਗ੍ਗਂ ਅਮਤਸ੍ਸ ਪਤ੍ਤਿਯਾ’’ਤਿ.

… ਸਾਮਞ੍ਞਕਾਨਿਤ੍ਥੇਰੋ….

੩੬. ‘‘ਸਾਧੁ ਸੁਤਂ ਸਾਧੁ ਚਰਿਤਕਂ, ਸਾਧੁ ਸਦਾ ਅਨਿਕੇਤਵਿਹਾਰੋ;

ਅਤ੍ਥਪੁਚ੍ਛਨਂ ਪਦਕ੍ਖਿਣਕਮ੍ਮਂ, ਏਤਂ ਸਾਮਞ੍ਞਮਕਿਞ੍ਚਨਸ੍ਸਾ’’ਤਿ.

… ਕੁਮਾਪੁਤ੍ਤੋ ਥੇਰੋ….

੩੭. ‘‘ਨਾਨਾਜਨਪਦਂ ਯਨ੍ਤਿ, ਵਿਚਰਨ੍ਤਾ ਅਸਞ੍ਞਤਾ;

ਸਮਾਧਿਞ੍ਚ ਵਿਰਾਧੇਨ੍ਤਿ, ਕਿਂਸੁ ਰਟ੍ਠਚਰਿਯਾ ਕਰਿਸ੍ਸਤਿ;

ਤਸ੍ਮਾ ਵਿਨੇਯ੍ਯ ਸਾਰਮ੍ਭਂ, ਝਾਯੇਯ੍ਯ ਅਪੁਰਕ੍ਖਤੋ’’ਤਿ.

… ਕੁਮਾਪੁਤ੍ਤਤ੍ਥੇਰਸ੍ਸ ਸਹਾਯਕੋ ਥੇਰੋ….

੩੮. ‘‘ਯੋ ਇਦ੍ਧਿਯਾ ਸਰਭੁਂ ਅਟ੍ਠਪੇਸਿ, ਸੋ ਗਵਮ੍ਪਤਿ ਅਸਿਤੋ ਅਨੇਜੋ;

ਤਂ ਸਬ੍ਬਸਙ੍ਗਾਤਿਗਤਂ ਮਹਾਮੁਨਿਂ, ਦੇਵਾ ਨਮਸ੍ਸਨ੍ਤਿ ਭਵਸ੍ਸ ਪਾਰਗੁ’’ਨ੍ਤਿ.

… ਗਵਮ੍ਪਤਿਤ੍ਥੇਰੋ….

੩੯. [ਸਂ. ਨਿ. ੧.੨੧, ੯੭]‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ [ਡਯ੍ਹਮਾਨੇਵ (ਸਬ੍ਬਤ੍ਥ)] ਮਤ੍ਥਕੇ;

ਕਾਮਰਾਗਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

… ਤਿਸ੍ਸੋ ਥੇਰੋ….

੪੦. ‘‘ਸਤ੍ਤਿਯਾ ਵਿਯ ਓਮਟ੍ਠੋ, ਡਯ੍ਹਮਾਨੋਵ ਮਤ੍ਥਕੇ;

ਭਵਰਾਗਪ੍ਪਹਾਨਾਯ, ਸਤੋ ਭਿਕ੍ਖੁ ਪਰਿਬ੍ਬਜੇ’’ਤਿ.

… ਵਡ੍ਢਮਾਨੋ ਥੇਰੋ….

ਵਗ੍ਗੋ ਚਤੁਤ੍ਥੋ ਨਿਟ੍ਠਿਤੋ.

ਤਸ੍ਸੁਦ੍ਦਾਨਂ –

ਗਹ੍ਵਰਤੀਰਿਯੋ ਸੁਪ੍ਪਿਯੋ, ਸੋਪਾਕੋ ਚੇਵ ਪੋਸਿਯੋ;

ਸਾਮਞ੍ਞਕਾਨਿ ਕੁਮਾਪੁਤ੍ਤੋ, ਕੁਮਾਪੁਤ੍ਤਸਹਾਯਕੋ;

ਗਵਮ੍ਪਤਿ ਤਿਸ੍ਸਤ੍ਥੇਰੋ, ਵਡ੍ਢਮਾਨੋ ਮਹਾਯਸੋਤਿ.