੧੫. ਅਤ੍ਤਦਣ੍ਡਸੁਤ੍ਤਂ

੯੪੧. ‘‘ਅਤ੍ਤਦਣ੍ਡਾ ਭਯਂ ਜਾਤਂ, ਜਨਂ ਪਸ੍ਸਥ ਮੇਧਗਂ;

ਸਂਵੇਗਂ ਕਿਤ੍ਤਯਿਸ੍ਸਾਮਿ, ਯਥਾ ਸਂਵਿਜਿਤਂ ਮਯਾ.

੯੪੨. ‘‘ਫਨ੍ਦਮਾਨਂ ਪਜਂ ਦਿਸ੍ਵਾ, ਮਚ੍ਛੇ ਅਪ੍ਪੋਦਕੇ ਯਥਾ;

ਅਞ੍ਞਮਞ੍ਞੇਹਿ ਬ੍ਯਾਰੁਦ੍ਧੇ, ਦਿਸ੍ਵਾ ਮਂ ਭਯਮਾਵਿਸਿ.

੯੪੩. ‘‘ਸਮਨ੍ਤਮਸਾਰੋ ਲੋਕੋ, ਦਿਸਾ ਸਬ੍ਬਾ ਸਮੇਰਿਤਾ;

ਇਚ੍ਛਂ ਭਵਨਮਤ੍ਤਨੋ, ਨਾਦ੍ਦਸਾਸਿਂ ਅਨੋਸਿਤਂ.

੯੪੪. ‘‘ਓਸਾਨੇਤ੍ਵੇਵ ਬ੍ਯਾਰੁਦ੍ਧੇ, ਦਿਸ੍ਵਾ ਮੇ ਅਰਤੀ ਅਹੁ;

ਅਥੇਤ੍ਥ ਸਲ੍ਲਮਦ੍ਦਕ੍ਖਿਂ, ਦੁਦ੍ਦਸਂ ਹਦਯਨਿਸ੍ਸਿਤਂ.

੯੪੫. ‘‘ਯੇਨ ਸਲ੍ਲੇਨ ਓਤਿਣ੍ਣੋ, ਦਿਸਾ ਸਬ੍ਬਾ ਵਿਧਾਵਤਿ;

ਤਮੇਵ ਸਲ੍ਲਮਬ੍ਬੁਯ੍ਹ, ਨ ਧਾਵਤਿ ਨ ਸੀਦਤਿ.

੯੪੬. ‘‘ਤਤ੍ਥ ਸਿਕ੍ਖਾਨੁਗੀਯਨ੍ਤਿ [ਸਿਕ੍ਖਾਨੁਕਿਰਿਯਨ੍ਤਿ (ਕ.)], ਯਾਨਿ ਲੋਕੇ ਗਧਿਤਾਨਿ;

ਨ ਤੇਸੁ ਪਸੁਤੋ ਸਿਯਾ, ਨਿਬ੍ਬਿਜ੍ਝ ਸਬ੍ਬਸੋ ਕਾਮੇ;

ਸਿਕ੍ਖੇ ਨਿਬ੍ਬਾਨਮਤ੍ਤਨੋ.

੯੪੭. ‘‘ਸਚ੍ਚੋ ਸਿਯਾ ਅਪ੍ਪਗਬ੍ਭੋ, ਅਮਾਯੋ ਰਿਤ੍ਤਪੇਸੁਣੋ;

ਅਕ੍ਕੋਧਨੋ ਲੋਭਪਾਪਂ, ਵੇਵਿਚ੍ਛਂ ਵਿਤਰੇ ਮੁਨਿ.

੯੪੮. ‘‘ਨਿਦ੍ਦਂ ਤਨ੍ਦਿਂ ਸਹੇ ਥੀਨਂ, ਪਮਾਦੇਨ ਨ ਸਂਵਸੇ;

ਅਤਿਮਾਨੇ ਨ ਤਿਟ੍ਠੇਯ੍ਯ, ਨਿਬ੍ਬਾਨਮਨਸੋ ਨਰੋ.

੯੪੯. ‘‘ਮੋਸਵਜ੍ਜੇ ਨ ਨੀਯੇਥ, ਰੂਪੇ ਸ੍ਨੇਹਂ ਨ ਕੁਬ੍ਬਯੇ;

ਮਾਨਞ੍ਚ ਪਰਿਜਾਨੇਯ੍ਯ, ਸਾਹਸਾ ਵਿਰਤੋ ਚਰੇ.

੯੫੦. ‘‘ਪੁਰਾਣਂ ਨਾਭਿਨਨ੍ਦੇਯ੍ਯ, ਨਵੇ ਖਨ੍ਤਿਂ ਨ ਕੁਬ੍ਬਯੇ;

ਹਿਯ੍ਯਮਾਨੇ ਨ ਸੋਚੇਯ੍ਯ, ਆਕਾਸਂ ਨ ਸਿਤੋ ਸਿਯਾ.

੯੫੧. ‘‘ਗੇਧਂ ਬ੍ਰੂਮਿ ਮਹੋਘੋਤਿ, ਆਜਵਂ ਬ੍ਰੂਮਿ ਜਪ੍ਪਨਂ;

ਆਰਮ੍ਮਣਂ ਪਕਪ੍ਪਨਂ, ਕਾਮਪਙ੍ਕੋ ਦੁਰਚ੍ਚਯੋ.

੯੫੨. ‘‘ਸਚ੍ਚਾ ਅਵੋਕ੍ਕਮ੍ਮ [ਅਵੋਕ੍ਕਮਂ (ਨਿਦ੍ਦੇਸ)] ਮੁਨਿ, ਥਲੇ ਤਿਟ੍ਠਤਿ ਬ੍ਰਾਹ੍ਮਣੋ;

ਸਬ੍ਬਂ ਸੋ [ਸਬ੍ਬਸੋ (ਸ੍ਯਾ. ਕ.)] ਪਟਿਨਿਸ੍ਸਜ੍ਜ, ਸ ਵੇ ਸਨ੍ਤੋਤਿ ਵੁਚ੍ਚਤਿ.

੯੫੩. ‘‘ਸ ਵੇ ਵਿਦ੍ਵਾ ਸ ਵੇਦਗੂ, ਞਤ੍ਵਾ ਧਮ੍ਮਂ ਅਨਿਸ੍ਸਿਤੋ;

ਸਮ੍ਮਾ ਸੋ ਲੋਕੇ ਇਰਿਯਾਨੋ, ਨ ਪਿਹੇਤੀਧ ਕਸ੍ਸਚਿ.

੯੫੪. ‘‘ਯੋਧ ਕਾਮੇ ਅਚ੍ਚਤਰਿ, ਸਙ੍ਗਂ ਲੋਕੇ ਦੁਰਚ੍ਚਯਂ;

ਨ ਸੋ ਸੋਚਤਿ ਨਾਜ੍ਝੇਤਿ, ਛਿਨ੍ਨਸੋਤੋ ਅਬਨ੍ਧਨੋ.

੯੫੫. ‘‘ਯਂ ਪੁਬ੍ਬੇ ਤਂ ਵਿਸੋਸੇਹਿ, ਪਚ੍ਛਾ ਤੇ ਮਾਹੁ ਕਿਞ੍ਚਨਂ;

ਮਜ੍ਝੇ ਚੇ ਨੋ ਗਹੇਸ੍ਸਸਿ, ਉਪਸਨ੍ਤੋ ਚਰਿਸ੍ਸਸਿ.

੯੫੬. ‘‘ਸਬ੍ਬਸੋ ਨਾਮਰੂਪਸ੍ਮਿਂ, ਯਸ੍ਸ ਨਤ੍ਥਿ ਮਮਾਯਿਤਂ;

ਅਸਤਾ ਚ ਨ ਸੋਚਤਿ, ਸ ਵੇ ਲੋਕੇ ਨ ਜੀਯਤਿ.

੯੫੭. ‘‘ਯਸ੍ਸ ਨਤ੍ਥਿ ਇਦਂ ਮੇਤਿ, ਪਰੇਸਂ ਵਾਪਿ ਕਿਞ੍ਚਨਂ;

ਮਮਤ੍ਤਂ ਸੋ ਅਸਂਵਿਨ੍ਦਂ, ਨਤ੍ਥਿ ਮੇਤਿ ਨ ਸੋਚਤਿ.

੯੫੮. ‘‘ਅਨਿਟ੍ਠੁਰੀ ਅਨਨੁਗਿਦ੍ਧੋ, ਅਨੇਜੋ ਸਬ੍ਬਧੀ ਸਮੋ;

ਤਮਾਨਿਸਂਸਂ ਪਬ੍ਰੂਮਿ, ਪੁਚ੍ਛਿਤੋ ਅਵਿਕਮ੍ਪਿਨਂ.

੯੫੯. ‘‘ਅਨੇਜਸ੍ਸ ਵਿਜਾਨਤੋ, ਨਤ੍ਥਿ ਕਾਚਿ ਨਿਸਙ੍ਖਤਿ [ਨਿਸਙ੍ਖਿਤਿ (ਸੀ. ਪੀ.)].

ਵਿਰਤੋ ਸੋ ਵਿਯਾਰਬ੍ਭਾ, ਖੇਮਂ ਪਸ੍ਸਤਿ ਸਬ੍ਬਧਿ.

੯੬੦. ‘‘ਨ ਸਮੇਸੁ ਨ ਓਮੇਸੁ, ਨ ਉਸ੍ਸੇਸੁ ਵਦਤੇ ਮੁਨਿ;

ਸਨ੍ਤੋ ਸੋ ਵੀਤਮਚ੍ਛਰੋ, ਨਾਦੇਤਿ ਨ ਨਿਰਸ੍ਸਤੀ’’ਤਿ.

ਅਤ੍ਤਦਣ੍ਡਸੁਤ੍ਤਂ ਪਨ੍ਨਰਸਮਂ ਨਿਟ੍ਠਿਤਂ.