੧੬. ਸਾਰਿਪੁਤ੍ਤਸੁਤ੍ਤਂ

੯੬੧. ‘‘ਨ ਮੇ ਦਿਟ੍ਠੋ ਇਤੋ ਪੁਬ੍ਬੇ, (ਇਚ੍ਚਾਯਸ੍ਮਾ ਸਾਰਿਪੁਤ੍ਤੋ)

ਨ ਸੁਤੋ ਉਦ ਕਸ੍ਸਚਿ;

ਏਵਂ ਵਗ੍ਗੁਵਦੋ ਸਤ੍ਥਾ,

ਤੁਸਿਤਾ ਗਣਿਮਾਗਤੋ.

੯੬੨. ‘‘ਸਦੇਵਕਸ੍ਸ ਲੋਕਸ੍ਸ, ਯਥਾ ਦਿਸ੍ਸਤਿ ਚਕ੍ਖੁਮਾ;

ਸਬ੍ਬਂ ਤਮਂ ਵਿਨੋਦੇਤ੍ਵਾ, ਏਕੋਵ ਰਤਿਮਜ੍ਝਗਾ.

੯੬੩. ‘‘ਤਂ ਬੁਦ੍ਧਂ ਅਸਿਤਂ ਤਾਦਿਂ, ਅਕੁਹਂ ਗਣਿਮਾਗਤਂ;

ਬਹੂਨਮਿਧ ਬਦ੍ਧਾਨਂ, ਅਤ੍ਥਿ ਪਞ੍ਹੇਨ ਆਗਮਂ.

੯੬੪. ‘‘ਭਿਕ੍ਖੁਨੋ ਵਿਜਿਗੁਚ੍ਛਤੋ, ਭਜਤੋ ਰਿਤ੍ਤਮਾਸਨਂ;

ਰੁਕ੍ਖਮੂਲਂ ਸੁਸਾਨਂ ਵਾ, ਪਬ੍ਬਤਾਨਂ ਗੁਹਾਸੁ ਵਾ.

੯੬੫. ‘‘ਉਚ੍ਚਾਵਚੇਸੁ ਸਯਨੇਸੁ, ਕੀਵਨ੍ਤੋ ਤਤ੍ਥ ਭੇਰਵਾ;

ਯੇਹਿ ਭਿਕ੍ਖੁ ਨ ਵੇਧੇਯ੍ਯ, ਨਿਗ੍ਘੋਸੇ ਸਯਨਾਸਨੇ.

੯੬੬. ‘‘ਕਤੀ ਪਰਿਸ੍ਸਯਾ ਲੋਕੇ, ਗਚ੍ਛਤੋ ਅਗਤਂ ਦਿਸਂ;

ਯੇ ਭਿਕ੍ਖੁ ਅਭਿਸਮ੍ਭਵੇ, ਪਨ੍ਤਮ੍ਹਿ ਸਯਨਾਸਨੇ.

੯੬੭. ‘‘ਕ੍ਯਾਸ੍ਸ ਬ੍ਯਪ੍ਪਥਯੋ ਅਸ੍ਸੁ, ਕ੍ਯਾਸ੍ਸਸ੍ਸੁ ਇਧ ਗੋਚਰਾ;

ਕਾਨਿ ਸੀਲਬ੍ਬਤਾਨਾਸ੍ਸੁ, ਪਹਿਤਤ੍ਤਸ੍ਸ ਭਿਕ੍ਖੁਨੋ.

੯੬੮. ‘‘ਕਂ ਸੋ ਸਿਕ੍ਖਂ ਸਮਾਦਾਯ, ਏਕੋਦਿ ਨਿਪਕੋ ਸਤੋ;

ਕਮ੍ਮਾਰੋ ਰਜਤਸ੍ਸੇਵ, ਨਿਦ੍ਧਮੇ ਮਲਮਤ੍ਤਨੋ’’.

੯੬੯. ‘‘ਵਿਜਿਗੁਚ੍ਛਮਾਨਸ੍ਸ ਯਦਿਦਂ ਫਾਸੁ, (ਸਾਰਿਪੁਤ੍ਤਾਤਿ ਭਗਵਾ)

ਰਿਤ੍ਤਾਸਨਂ ਸਯਨਂ ਸੇਵਤੋ ਚੇ;

ਸਮ੍ਬੋਧਿਕਾਮਸ੍ਸ ਯਥਾਨੁਧਮ੍ਮਂ,

ਤਂ ਤੇ ਪਵਕ੍ਖਾਮਿ ਯਥਾ ਪਜਾਨਂ.

੯੭੦. ‘‘ਪਞ੍ਚਨ੍ਨਂ ਧੀਰੋ ਭਯਾਨਂ ਨ ਭਾਯੇ, ਭਿਕ੍ਖੁ ਸਤੋ ਸਪਰਿਯਨ੍ਤਚਾਰੀ;

ਡਂਸਾਧਿਪਾਤਾਨਂ ਸਰੀਸਪਾਨਂ, ਮਨੁਸ੍ਸਫਸ੍ਸਾਨਂ ਚਤੁਪ੍ਪਦਾਨਂ.

੯੭੧. ‘‘ਪਰਧਮ੍ਮਿਕਾਨਮ੍ਪਿ ਨ ਸਨ੍ਤਸੇਯ੍ਯ, ਦਿਸ੍ਵਾਪਿ ਤੇਸਂ ਬਹੁਭੇਰਵਾਨਿ;

ਅਥਾਪਰਾਨਿ ਅਭਿਸਮ੍ਭਵੇਯ੍ਯ, ਪਰਿਸ੍ਸਯਾਨਿ ਕੁਸਲਾਨੁਏਸੀ.

੯੭੨. ‘‘ਆਤਙ੍ਕਫਸ੍ਸੇਨ ਖੁਦਾਯ ਫੁਟ੍ਠੋ, ਸੀਤਂ ਅਤੁਣ੍ਹਂ [ਅਚ੍ਚੁਣ੍ਹਂ (ਸੀ. ਸ੍ਯਾ.)] ਅਧਿਵਾਸਯੇਯ੍ਯ;

ਸੋ ਤੇਹਿ ਫੁਟ੍ਠੋ ਬਹੁਧਾ ਅਨੋਕੋ, ਵੀਰਿਯਂ ਪਰਕ੍ਕਮ੍ਮਦਲ਼੍ਹਂ ਕਰੇਯ੍ਯ.

੯੭੩. ‘‘ਥੇਯ੍ਯਂ ਨ ਕਾਰੇ [ਨ ਕਰੇਯ੍ਯ (ਸੀ. ਸ੍ਯਾ. ਕ.)] ਨ ਮੁਸਾ ਭਣੇਯ੍ਯ, ਮੇਤ੍ਤਾਯ ਫਸ੍ਸੇ ਤਸਥਾਵਰਾਨਿ;

ਯਦਾਵਿਲਤ੍ਤਂ ਮਨਸੋ ਵਿਜਞ੍ਞਾ, ਕਣ੍ਹਸ੍ਸ ਪਕ੍ਖੋਤਿ ਵਿਨੋਦਯੇਯ੍ਯ.

੯੭੪. ‘‘ਕੋਧਾਤਿਮਾਨਸ੍ਸ ਵਸਂ ਨ ਗਚ੍ਛੇ, ਮੂਲਮ੍ਪਿ ਤੇਸਂ ਪਲਿਖਞ੍ਞ ਤਿਟ੍ਠੇ;

ਅਥਪ੍ਪਿਯਂ ਵਾ ਪਨ ਅਪ੍ਪਿਯਂ ਵਾ, ਅਦ੍ਧਾ ਭਵਨ੍ਤੋ ਅਭਿਸਮ੍ਭਵੇਯ੍ਯ.

੯੭੫. ‘‘ਪਞ੍ਞਂ ਪੁਰਕ੍ਖਤ੍ਵਾ ਕਲ੍ਯਾਣਪੀਤਿ, ਵਿਕ੍ਖਮ੍ਭਯੇ ਤਾਨਿ ਪਰਿਸ੍ਸਯਾਨਿ;

ਅਰਤਿਂ ਸਹੇਥ ਸਯਨਮ੍ਹਿ ਪਨ੍ਤੇ, ਚਤੁਰੋ ਸਹੇਥ ਪਰਿਦੇਵਧਮ੍ਮੇ.

੯੭੬. ‘‘ਕਿਂਸੂ ਅਸਿਸ੍ਸਾਮਿ ਕੁਵਂ ਵਾ [ਕੁਧ ਵਾ (ਕ.), ਕੁਥ ਵਾ (ਨਿਦ੍ਦੇਸ)] ਅਸਿਸ੍ਸਂ, ਦੁਕ੍ਖਂ ਵਤ ਸੇਤ੍ਥ ਕ੍ਵਜ੍ਜ ਸੇਸ੍ਸਂ;

ਏਤੇ ਵਿਤਕ੍ਕੇ ਪਰਿਦੇਵਨੇਯ੍ਯੇ, ਵਿਨਯੇਥ ਸੇਖੋ ਅਨਿਕੇਤਚਾਰੀ.

੯੭੭. ‘‘ਅਨ੍ਨਞ੍ਚ ਲਦ੍ਧਾ ਵਸਨਞ੍ਚ ਕਾਲੇ, ਮਤ੍ਤਂ ਸੋ ਜਞ੍ਞਾ ਇਧ ਤੋਸਨਤ੍ਥਂ;

ਸੋ ਤੇਸੁ ਗੁਤ੍ਤੋ ਯਤਚਾਰਿ ਗਾਮੇ, ਰੁਸਿਤੋਪਿ ਵਾਚਂ ਫਰੁਸਂ ਨ ਵਜ੍ਜਾ.

੯੭੮. ‘‘ਓਕ੍ਖਿਤ੍ਤਚਕ੍ਖੁ ਨ ਚ ਪਾਦਲੋਲੋ, ਝਾਨਾਨੁਯੁਤ੍ਤੋ ਬਹੁਜਾਗਰਸ੍ਸ;

ਉਪੇਕ੍ਖਮਾਰਬ੍ਭ ਸਮਾਹਿਤਤ੍ਤੋ, ਤਕ੍ਕਾਸਯਂ ਕੁਕ੍ਕੁਚ੍ਚਿਯੂਪਛਿਨ੍ਦੇ.

੯੭੯. ‘‘ਚੁਦਿਤੋ ਵਚੀਭਿ ਸਤਿਮਾਭਿਨਨ੍ਦੇ, ਸਬ੍ਰਹ੍ਮਚਾਰੀਸੁ ਖਿਲਂ ਪਭਿਨ੍ਦੇ;

ਵਾਚਂ ਪਮੁਞ੍ਚੇ ਕੁਸਲਂ ਨਾਤਿਵੇਲਂ, ਜਨਵਾਦਧਮ੍ਮਾਯ ਨ ਚੇਤਯੇਯ੍ਯ.

੯੮੦. ‘‘ਅਥਾਪਰਂ ਪਞ੍ਚ ਰਜਾਨਿ ਲੋਕੇ, ਯੇਸਂ ਸਤੀਮਾ ਵਿਨਯਾਯ ਸਿਕ੍ਖੇ;

ਰੂਪੇਸੁ ਸਦ੍ਦੇਸੁ ਅਥੋ ਰਸੇਸੁ, ਗਨ੍ਧੇਸੁ ਫਸ੍ਸੇਸੁ ਸਹੇਥ ਰਾਗਂ.

੯੮੧. ‘‘ਏਤੇਸੁ ਧਮ੍ਮੇਸੁ ਵਿਨੇਯ੍ਯ ਛਨ੍ਦਂ, ਭਿਕ੍ਖੁ ਸਤਿਮਾ ਸੁਵਿਮੁਤ੍ਤਚਿਤ੍ਤੋ;

ਕਾਲੇਨ ਸੋ ਸਮ੍ਮਾ ਧਮ੍ਮਂ ਪਰਿਵੀਮਂਸਮਾਨੋ,

ਏਕੋਦਿਭੂਤੋ ਵਿਹਨੇ ਤਮਂ ਸੋ’’ਤਿ.

ਸਾਰਿਪੁਤ੍ਤਸੁਤ੍ਤਂ ਸੋਲ਼ਸਮਂ ਨਿਟ੍ਠਿਤਂ.

ਅਟ੍ਠਕਵਗ੍ਗੋ ਚਤੁਤ੍ਥੋ