੮. ਸਲ੍ਲਸੁਤ੍ਤਂ

੫੭੯. ਅਨਿਮਿਤ੍ਤਮਨਞ੍ਞਾਤਂ, ਮਚ੍ਚਾਨਂ ਇਧ ਜੀਵਿਤਂ;

ਕਸਿਰਞ੍ਚ ਪਰਿਤ੍ਤਞ੍ਚ, ਤਞ੍ਚ ਦੁਕ੍ਖੇਨ ਸਂਯੁਤਂ.

੫੮੦. ਨ ਹਿ ਸੋ ਉਪਕ੍ਕਮੋ ਅਤ੍ਥਿ, ਯੇਨ ਜਾਤਾ ਨ ਮਿਯ੍ਯਰੇ;

ਜਰਮ੍ਪਿ ਪਤ੍ਵਾ ਮਰਣਂ, ਏਵਂਧਮ੍ਮਾ ਹਿ ਪਾਣਿਨੋ.

੫੮੧. ਫਲਾਨਮਿਵ ਪਕ੍ਕਾਨਂ, ਪਾਤੋ ਪਤਨਤੋ [ਪਪਤਤੋ (ਸੀ. ਪੀ. ਅਟ੍ਠ.)] ਭਯਂ;

ਏਵਂ ਜਾਤਾਨ ਮਚ੍ਚਾਨਂ, ਨਿਚ੍ਚਂ ਮਰਣਤੋ ਭਯਂ.

੫੮੨. ਯਥਾਪਿ ਕੁਮ੍ਭਕਾਰਸ੍ਸ, ਕਤਾ ਮਤ੍ਤਿਕਭਾਜਨਾ;

ਸਬ੍ਬੇ ਭੇਦਨਪਰਿਯਨ੍ਤਾ [ਭੇਦਪਰਿਯਨ੍ਤਾ (ਸ੍ਯਾ.)], ਏਵਂ ਮਚ੍ਚਾਨ ਜੀਵਿਤਂ.

੫੮੩. ਦਹਰਾ ਚ ਮਹਨ੍ਤਾ ਚ, ਯੇ ਬਾਲਾ ਯੇ ਚ ਪਣ੍ਡਿਤਾ;

ਸਬ੍ਬੇ ਮਚ੍ਚੁਵਸਂ ਯਨ੍ਤਿ, ਸਬ੍ਬੇ ਮਚ੍ਚੁਪਰਾਯਣਾ.

੫੮੪. ਤੇਸਂ ਮਚ੍ਚੁਪਰੇਤਾਨਂ, ਗਚ੍ਛਤਂ ਪਰਲੋਕਤੋ;

ਨ ਪਿਤਾ ਤਾਯਤੇ ਪੁਤ੍ਤਂ, ਞਾਤੀ ਵਾ ਪਨ ਞਾਤਕੇ.

੫੮੫. ਪੇਕ੍ਖਤਂ ਯੇਵ ਞਾਤੀਨਂ, ਪਸ੍ਸ ਲਾਲਪਤਂ ਪੁਥੁ;

ਏਕਮੇਕੋਵ ਮਚ੍ਚਾਨਂ, ਗੋਵਜ੍ਝੋ ਵਿਯ ਨੀਯਤਿ [ਨਿਯ੍ਯਤਿ (ਬਹੂਸੁ)].

੫੮੬. ਏਵਮਬ੍ਭਾਹਤੋ ਲੋਕੋ, ਮਚ੍ਚੁਨਾ ਚ ਜਰਾਯ ਚ;

ਤਸ੍ਮਾ ਧੀਰਾ ਨ ਸੋਚਨ੍ਤਿ, ਵਿਦਿਤ੍ਵਾ ਲੋਕਪਰਿਯਾਯਂ.

੫੮੭. ਯਸ੍ਸ ਮਗ੍ਗਂ ਨ ਜਾਨਾਸਿ, ਆਗਤਸ੍ਸ ਗਤਸ੍ਸ ਵਾ;

ਉਭੋ ਅਨ੍ਤੇ ਅਸਮ੍ਪਸ੍ਸਂ, ਨਿਰਤ੍ਥਂ ਪਰਿਦੇਵਸਿ.

੫੮੮. ਪਰਿਦੇਵਯਮਾਨੋ ਚੇ, ਕਿਞ੍ਚਿਦਤ੍ਥਂ ਉਦਬ੍ਬਹੇ;

ਸਮ੍ਮੂਲ਼੍ਹੋ ਹਿਂਸਮਤ੍ਤਾਨਂ, ਕਯਿਰਾ ਚੇ ਨਂ ਵਿਚਕ੍ਖਣੋ.

੫੮੯. ਨ ਹਿ ਰੁਣ੍ਣੇਨ ਸੋਕੇਨ, ਸਨ੍ਤਿਂ ਪਪ੍ਪੋਤਿ ਚੇਤਸੋ;

ਭਿਯ੍ਯਸ੍ਸੁਪ੍ਪਜ੍ਜਤੇ ਦੁਕ੍ਖਂ, ਸਰੀਰਂ ਚੁਪਹਞ੍ਞਤਿ.

੫੯੦. ਕਿਸੋ ਵਿਵਣ੍ਣੋ ਭਵਤਿ, ਹਿਂਸਮਤ੍ਤਾਨਮਤ੍ਤਨਾ;

ਨ ਤੇਨ ਪੇਤਾ ਪਾਲੇਨ੍ਤਿ, ਨਿਰਤ੍ਥਾ ਪਰਿਦੇਵਨਾ.

੫੯੧. ਸੋਕਮਪ੍ਪਜਹਂ ਜਨ੍ਤੁ, ਭਿਯ੍ਯੋ ਦੁਕ੍ਖਂ ਨਿਗਚ੍ਛਤਿ;

ਅਨੁਤ੍ਥੁਨਨ੍ਤੋ ਕਾਲਙ੍ਕਤਂ [ਕਾਲਕਤਂ (ਸੀ. ਸ੍ਯਾ.)], ਸੋਕਸ੍ਸ ਵਸਮਨ੍ਵਗੂ.

੫੯੨. ਅਞ੍ਞੇਪਿ ਪਸ੍ਸ ਗਮਿਨੇ, ਯਥਾਕਮ੍ਮੂਪਗੇ ਨਰੇ;

ਮਚ੍ਚੁਨੋ ਵਸਮਾਗਮ੍ਮ, ਫਨ੍ਦਨ੍ਤੇਵਿਧ ਪਾਣਿਨੋ.

੫੯੩. ਯੇਨ ਯੇਨ ਹਿ ਮਞ੍ਞਨ੍ਤਿ, ਤਤੋ ਤਂ ਹੋਤਿ ਅਞ੍ਞਥਾ;

ਏਤਾਦਿਸੋ ਵਿਨਾਭਾਵੋ, ਪਸ੍ਸ ਲੋਕਸ੍ਸ ਪਰਿਯਾਯਂ.

੫੯੪. ਅਪਿ ਵਸ੍ਸਸਤਂ ਜੀਵੇ, ਭਿਯ੍ਯੋ ਵਾ ਪਨ ਮਾਣਵੋ;

ਞਾਤਿਸਙ੍ਘਾ ਵਿਨਾ ਹੋਤਿ, ਜਹਾਤਿ ਇਧ ਜੀਵਿਤਂ.

੫੯੫. ਤਸ੍ਮਾ ਅਰਹਤੋ ਸੁਤ੍ਵਾ, ਵਿਨੇਯ੍ਯ ਪਰਿਦੇਵਿਤਂ;

ਪੇਤਂ ਕਾਲਙ੍ਕਤਂ ਦਿਸ੍ਵਾ, ਨੇਸੋ ਲਬ੍ਭਾ ਮਯਾ ਇਤਿ.

੫੯੬. ਯਥਾ ਸਰਣਮਾਦਿਤ੍ਤਂ, ਵਾਰਿਨਾ ਪਰਿਨਿਬ੍ਬਯੇ [ਪਰਿਨਿਬ੍ਬੁਤੋ (ਸੀ. ਕ.)];

ਏਵਮ੍ਪਿ ਧੀਰੋ ਸਪਞ੍ਞੋ, ਪਣ੍ਡਿਤੋ ਕੁਸਲੋ ਨਰੋ;

ਖਿਪ੍ਪਮੁਪ੍ਪਤਿਤਂ ਸੋਕਂ, ਵਾਤੋ ਤੂਲਂਵ ਧਂਸਯੇ.

੫੯੭. ਪਰਿਦੇਵਂ ਪਜਪ੍ਪਞ੍ਚ, ਦੋਮਨਸ੍ਸਞ੍ਚ ਅਤ੍ਤਨੋ;

ਅਤ੍ਤਨੋ ਸੁਖਮੇਸਾਨੋ, ਅਬ੍ਬਹੇ ਸਲ੍ਲਮਤ੍ਤਨੋ.

੫੯੮. ਅਬ੍ਬੁਲ਼੍ਹਸਲ੍ਲੋ ਅਸਿਤੋ, ਸਨ੍ਤਿਂ ਪਪ੍ਪੁਯ੍ਯ ਚੇਤਸੋ;

ਸਬ੍ਬਸੋਕਂ ਅਤਿਕ੍ਕਨ੍ਤੋ, ਅਸੋਕੋ ਹੋਤਿ ਨਿਬ੍ਬੁਤੋਤਿ.

ਸਲ੍ਲਸੁਤ੍ਤਂ ਅਟ੍ਠਮਂ ਨਿਟ੍ਠਿਤਂ.